गङ्गाष्टकम् ९ Gangashtakam 9

श्रीगणेशाय नमः ।चलद्विलोलवीचिविस्खलद्विवृत्तमीनमुल्लसत्सहस्रपत्रविस्फुरत्परागपाटलम् ।हिमाचलस्खलज्जलप्रवाहपाविताखिलप्रपञ्चमिन्दुचूडमौलिमन्दिरं महोऽवतात् ॥ १॥

śrīgaṇeśāya namaḥ |caladvilolavīciviskhaladvivṛttamīnamullasatsahasrapatravisphuratparāgapāṭalam |himācalaskhalajjalapravāhapāvitākhilaprapañcaminducūḍamaulimandiraṃ maho'vatāt || 1||

रसालशालतालसत्तमालजालमालसद्विशालभालभस्मभृत्प्रवाहभास्वरं महः ।सरोजगन्धसम्भ्रमन्मिलिन्दपुञ्जमञ्जुलैगुञ्जमानजह्नुन्दिनीतटं भजामहे ॥ २॥

rasālaśālatālasattamālajālamālasadviśālabhālabhasmabhṛtpravāhabhāsvaraṃ mahaḥ |sarojagandhasambhramanmilindapuñjamañjulaiguñjamānajahnundinītaṭaṃ bhajāmahe || 2||

चलत्तरङ्गमालमुच्छलज्झषोर्णजालमुज्वलत्प्रभाविशालमालमञ्बुवीरुधां गृहम् ।परिज्वलद्भवानलप्रभावलोडिताखिलप्रपञ्चसिञ्चनामृतं पुनातु जह्नुजापयः ॥ ३॥

calattaraṅgamālamucchalajjhaṣorṇajālamujvalatprabhāviśālamālamañbuvīrudhāṃ gṛham |parijvaladbhavānalaprabhāvaloḍitākhilaprapañcasiñcanāmṛtaṃ punātu jahnujāpayaḥ || 3||

करालतिष्यकालकालसर्पसर्पदुल्लसत्प्रभाविषानलावसेकसत्सुधारसैः (समैः) ।कुरु त्वमीश्वरप्रियाङ्गने मदङ्गसङ्गताखिलाघसङ्गभङ्गमुल्लसत्तरङ्गरिङ्गितैः ॥ ४॥

karālatiṣyakālakālasarpasarpadullasatprabhāviṣānalāvasekasatsudhārasaiḥ (samaiḥ) |kuru tvamīśvarapriyāṅgane madaṅgasaṅgatākhilāghasaṅgabhaṅgamullasattaraṅgariṅgitaiḥ || 4||

निमज्जदागलालकालिजालशालिसम्यगुल्लसत्सुरौघसुन्दरीमुखारविन्दसुन्दरम् ।मिलत्पुरार्भकस्फुरत्कराभिघातविद्रवत्रिराकुलोरुमीनमम्बु भाति शम्भुभूषणम् ॥ ५॥

nimajjadāgalālakālijālaśālisamyagullasatsuraughasundarīmukhāravindasundaram |milatpurārbhakasphuratkarābhighātavidravatrirākulorumīnamambu bhāti śambhubhūṣaṇam || 5||

उदञ्चदुद्धताखिलच्छटामिलद्विभावसुप्रभाविडम्बितातिचञ्चदभ्रतारकोत्करम् ।विलोलवीचिविस्खलत्समीरनीतसीकरंपुरारिपत्तनस्थितं पुनातु पावनं पयः ॥ ६॥

udañcaduddhatākhilacchaṭāmiladvibhāvasuprabhāviḍambitāticañcadabhratārakotkaram |vilolavīciviskhalatsamīranītasīkaraṃpurāripattanasthitaṃ punātu pāvanaṃ payaḥ || 6||

सुराधिराजराजधर्मराजमुख्यनिर्जरातिराजिपुण्यराशिरोशुसिद्धिदा कलौ (पुनः) ।परामृतप्रदायिनी मुरारिपादचारिणीपुरारिमौलिमालिनी सुरापगा विराजते ॥ ७॥

surādhirājarājadharmarājamukhyanirjarātirājipuṇyarāśirośusiddhidā kalau (punaḥ) |parāmṛtapradāyinī murāripādacāriṇīpurārimaulimālinī surāpagā virājate || 7||

महीधरेन्द्रपन्नगेन्द्रकुन्दचन्दनद्रुमस्फुरत्करीन्द्रमण्डलामृतद्रवोपनायनम् ।मिलन्निलिम्पसुन्दरीकपोलपत्रवल्लरीगलत्परागपिञ्जरीकृतं पयः पुनातु माम् ॥ ८॥

mahīdharendrapannagendrakundacandanadrumasphuratkarīndramaṇḍalāmṛtadravopanāyanam |milannilimpasundarīkapolapatravallarīgalatparāgapiñjarīkṛtaṃ payaḥ punātu mām || 8||

अनन्तभट्टसूरिसूनुढुण्ढिराजसत्कविप्रकल्पितं विचित्रपद्यचातुरीविभूषितम् ।सुरापगाष्टकं नरः पठत्रिदं स याति तत्परं पदं प्रभूतभूमभागवैभवः (सदा)॥ ९॥

anantabhaṭṭasūrisūnuḍhuṇḍhirājasatkaviprakalpitaṃ vicitrapadyacāturīvibhūṣitam |surāpagāṣṭakaṃ naraḥ paṭhatridaṃ sa yāti tatparaṃ padaṃ prabhūtabhūmabhāgavaibhavaḥ (sadā)|| 9||

इति श्रीमन्महीपण्डितधुरश्चतुस्समुद्रराजमान्यधुलोपनामकानन्तात्मजढुण्ढिराजभट्ट विरचितं श्रीगङ्गाष्टकं सम्पूर्णम् ।

iti śrīmanmahīpaṇḍitadhuraścatussamudrarājamānyadhulopanāmakānantātmajaḍhuṇḍhirājabhaṭṭa viracitaṃ śrīgaṅgāṣṭakaṃ sampūrṇam |