योगाधिपतिश्रीगणेशस्तुतिः Yoga Adhipati Shri Ganesha Stuti

॥ श्रीगणेशाय नमः ॥अयोग उवाच ।शान्तिस्वरूपाय सुशान्तिदाय वाणीमनोहीनतमाय ढुण्ढे ।वाणीमनोयुक्तविचारिणे वै योगाय योगाधिपते नमस्ते ॥ ३॥

|| śrīgaṇeśāya namaḥ ||ayoga uvāca |śāntisvarūpāya suśāntidāya vāṇīmanohīnatamāya ḍhuṇḍhe |vāṇīmanoyuktavicāriṇe vai yogāya yogādhipate namaste || 3||

वाणीमनोयुक्तमयं वदामि नो विश्वरूपोऽसि कथं स्तवीमि ।नित्यं गणेशाय नमो महात्मन् योगाय योगाधिपते नमस्ते ॥ ४॥

vāṇīmanoyuktamayaṃ vadāmi no viśvarūpo'si kathaṃ stavīmi |nityaṃ gaṇeśāya namo mahātman yogāya yogādhipate namaste || 4||

वाणीमनोहीनमयं कथं त्वां ब्रुवेऽद्य संयोगमयं कदा च ।नो योगरूपं त्वथ ते नमो वै योगाय योगाधिपते नमस्ते ॥ ५॥

vāṇīmanohīnamayaṃ kathaṃ tvāṃ bruve'dya saṃyogamayaṃ kadā ca |no yogarūpaṃ tvatha te namo vai yogāya yogādhipate namaste || 5||

त्वत्तः प्रसूतानि महानुभाव ब्रह्माणि विश्वानि पराणि भूयः ।त्वय्येव लीनानि ह्यभिन्नभावाद्योगाय योगाधिपते नमस्ते ॥ ६॥

tvattaḥ prasūtāni mahānubhāva brahmāṇi viśvāni parāṇi bhūyaḥ |tvayyeva līnāni hyabhinnabhāvādyogāya yogādhipate namaste || 6||

नित्यं ह्ययोगाय निवृत्तिदाय मायाविहीनाय गणाधिपाय ।वाणीमनोहीनतया सुलभ्य योगाय योगाधिपते नमस्ते ॥ ७॥

nityaṃ hyayogāya nivṛttidāya māyāvihīnāya gaṇādhipāya |vāṇīmanohīnatayā sulabhya yogāya yogādhipate namaste || 7||

स्वानन्दरूपाय सुशान्तिदाय सिद्।ह्ध्या च बुद्।ह्ध्या सह खेलकाय ।वाणीमनोहीन निजात्मलभ्य योगाय योगाधिपते नमस्ते ॥ ८॥

svānandarūpāya suśāntidāya sid|hdhyā ca bud|hdhyā saha khelakāya |vāṇīmanohīna nijātmalabhya yogāya yogādhipate namaste || 8||

अव्यक्तरूपाय च साहजाय मोहेन हीनाय सदा शिवाय ।त्रैविध्यनाथाय च नेति कर्त्रे योगाय योगाधिपते नमस्ते ॥ ९॥

avyaktarūpāya ca sāhajāya mohena hīnāya sadā śivāya |traividhyanāthāya ca neti kartre yogāya yogādhipate namaste || 9||

सामान्यरूपाय त्रयीमयाय द्वन्द्वप्रकाशाय च विष्णवे ते ।आनन्दनाथाय सुखेलकाय योगाय योगाधिपते नमस्ते ॥ १०॥

sāmānyarūpāya trayīmayāya dvandvaprakāśāya ca viṣṇave te |ānandanāthāya sukhelakāya yogāya yogādhipate namaste || 10||

आत्मस्वरूपाय सदाऽमृतस्थयोगेन संलभ्यतमाय भानो ।भेदैर्विहीनाय च जीवनाय योगाय योगाधिपते नमस्ते ॥ ११॥

ātmasvarūpāya sadā'mṛtasthayogena saṃlabhyatamāya bhāno |bhedairvihīnāya ca jīvanāya yogāya yogādhipate namaste || 11||

नानाप्रभेदेषु च तन्मयाय सर्वस्वरूपाय च शक्तये ते ।आनन्त्यभावैश्च सुमोहदाय योगाय योगाधिपते नमस्ते ॥ १२॥

nānāprabhedeṣu ca tanmayāya sarvasvarūpāya ca śaktaye te |ānantyabhāvaiśca sumohadāya yogāya yogādhipate namaste || 12||

साक्षिस्वरूपाय च साङ्ख्ययोगलभ्यस्वरूपाय सदात्मसंस्थ ।बोधेन हीनाय परात्पराय योगाय योगाधिपते नमस्ते ॥ १३॥

sākṣisvarūpāya ca sāṅkhyayogalabhyasvarūpāya sadātmasaṃstha |bodhena hīnāya parātparāya yogāya yogādhipate namaste || 13||

बोधस्वरूपाय सङ्ख्याविहारकर्त्रे सदा पालकभावधारिन् ।त्रैविध्यनाथाय महोदराय योगाय योगाधिपते नमस्ते ॥ १४॥

bodhasvarūpāya saṅkhyāvihārakartre sadā pālakabhāvadhārin |traividhyanāthāya mahodarāya yogāya yogādhipate namaste || 14||

सोहंस्वरूपाय च चिन्मयाय मोहेन युक्ताय च हीनकाय ।देहिस्वरूपेण विहारकर्त्रे योगाय योगाधिपते नमस्ते ॥ १५॥

sohaṃsvarūpāya ca cinmayāya mohena yuktāya ca hīnakāya |dehisvarūpeṇa vihārakartre yogāya yogādhipate namaste || 15||

बिन्दुप्रचुराय चतुष्पदाय चतुर्विधेषु प्रभवाय तुभ्यम् ।आनन्त्यतत्त्वाय च देहभोक्त्रे योगाय योगाधिपते नमस्ते ॥ १६॥

bindupracurāya catuṣpadāya caturvidheṣu prabhavāya tubhyam |ānantyatattvāya ca dehabhoktre yogāya yogādhipate namaste || 16||

तुर्यात्मदेहाय लयात्मकाय कालस्वरूपाय गणेश्वराय ।नादात्मकायाऽथ त्रिदेहगाय योगाय योगाधिपते नमस्ते ॥ १७॥

turyātmadehāya layātmakāya kālasvarūpāya gaṇeśvarāya |nādātmakāyā'tha tridehagāya yogāya yogādhipate namaste || 17||

आनन्दकोशात्मकसंस्थिताय प्राज्ञाय सौषुप्तमयाय तुभ्यम् ।नित्येश्वरायैव तयोः प्रचारिन् योगाय योगाधिपते नमस्ते ॥ १८॥

ānandakośātmakasaṃsthitāya prājñāya sauṣuptamayāya tubhyam |nityeśvarāyaiva tayoḥ pracārin yogāya yogādhipate namaste || 18||

सर्वान्तरस्थाय च सूक्ष्मकाय स्वप्नप्रचुराय च तैजसाय ।हिरण्यगर्भाय तयोः प्रचारिन् योगाय योगाधिपते नमस्ते ॥ १९॥

sarvāntarasthāya ca sūkṣmakāya svapnapracurāya ca taijasāya |hiraṇyagarbhāya tayoḥ pracārin yogāya yogādhipate namaste || 19||

बाह्यस्थितायान्नमयाय विश्ववैश्वानरायैव तयोः प्रचारिन् ।स्थूलस्वरूपाय च जागृदास्थ योगाय योगाधिपते नमस्ते ॥ २०॥

bāhyasthitāyānnamayāya viśvavaiśvānarāyaiva tayoḥ pracārin |sthūlasvarūpāya ca jāgṛdāstha yogāya yogādhipate namaste || 20||

विश्वस्यद्वैविध्यमयाय तुभ्यं नानाण्डरूपाय च खेलकाय ।शक्ते च धात्रे हरये शिवाय योगाय योगाधिपते नमस्ते ॥ २१॥

viśvasyadvaividhyamayāya tubhyaṃ nānāṇḍarūpāya ca khelakāya |śakte ca dhātre haraye śivāya yogāya yogādhipate namaste || 21||

एते गणेशाधिपते कलांशा विघ्नेश्वरास्ते गणनायकाय ।न त्वं सदैतैः सहितो हि तुभ्यं योगाय योगाधिपते नमस्ते ॥ २२॥

ete gaṇeśādhipate kalāṃśā vighneśvarāste gaṇanāyakāya |na tvaṃ sadaitaiḥ sahito hi tubhyaṃ yogāya yogādhipate namaste || 22||

स्तुमः कथं नाथ गणेशरूपं संयोगहीनं च ह्ययोगहीनम् ।तादात्म्यरूपं भव तुष्टचित्तं योगाय योगाधिपते नमस्ते ॥ २३॥

stumaḥ kathaṃ nātha gaṇeśarūpaṃ saṃyogahīnaṃ ca hyayogahīnam |tādātmyarūpaṃ bhava tuṣṭacittaṃ yogāya yogādhipate namaste || 23||

मुद्गल उवाच ।एवं स्तुत्वा गणेशानं प्रणनाम कृताञ्जलिः ।अयोगस्तं गणाधीशो जगाद घननिःस्वनः ॥ २४॥

mudgala uvāca |evaṃ stutvā gaṇeśānaṃ praṇanāma kṛtāñjaliḥ |ayogastaṃ gaṇādhīśo jagāda ghananiḥsvanaḥ || 24||

(फलशृतिः ।)गणेश उवाच ।वरान् वृणु महाभाग मनसीप्सितरूपकान् ।दास्यामि भक्तितुष्टोऽहं स्तोत्रेणानेन योगप ॥ २५॥

(phalaśṛtiḥ |)gaṇeśa uvāca |varān vṛṇu mahābhāga manasīpsitarūpakān |dāsyāmi bhaktituṣṭo'haṃ stotreṇānena yogapa || 25||

त्वया कृतमिदं स्तोत्रं योगशान्तिपदप्रदम् ।पठतां शृण्वतां नित्यं नानासिद्धिप्रदं भवेत् ॥ २६॥

tvayā kṛtamidaṃ stotraṃ yogaśāntipadapradam |paṭhatāṃ śṛṇvatāṃ nityaṃ nānāsiddhipradaṃ bhavet || 26||

यं यमिच्छसि तं तं वै दास्यामि स्तोत्रपाठतः ।मयि प्रीतिकरं चास्तु भक्तिभावप्रदं तथा ॥ २७॥

yaṃ yamicchasi taṃ taṃ vai dāsyāmi stotrapāṭhataḥ |mayi prītikaraṃ cāstu bhaktibhāvapradaṃ tathā || 27||

एकविंशतिवारं चैकविंशति दिनावधि ।पठते तस्य सर्वं च दास्यामि दुर्लभं हि चेत् ॥ २८॥

ekaviṃśativāraṃ caikaviṃśati dināvadhi |paṭhate tasya sarvaṃ ca dāsyāmi durlabhaṃ hi cet || 28||

एवमुक्त्वा गणेशानः सस्वजे तं गणाधिपम् ।अयोगरूपिणं हर्षसंयुक्तं प्रचकार ह ॥ २९॥

evamuktvā gaṇeśānaḥ sasvaje taṃ gaṇādhipam |ayogarūpiṇaṃ harṣasaṃyuktaṃ pracakāra ha || 29||

ततोऽयोगो गणाध्यक्षं प्रणम्य च पुनः पुनः ।जगाद भक्तिसंयुक्तो हृष्टरोमा सुहर्षितः ॥ ३०॥

tato'yogo gaṇādhyakṣaṃ praṇamya ca punaḥ punaḥ |jagāda bhaktisaṃyukto hṛṣṭaromā suharṣitaḥ || 30||

अयोग उवाच ।यदि ढुण्ढे वरान् मे त्वं दास्यसि भक्तिमोहितः ।तदा ते पादयुग्मे मे भक्तिं देहि दृढां पराम् ॥ ३१॥

ayoga uvāca |yadi ḍhuṇḍhe varān me tvaṃ dāsyasi bhaktimohitaḥ |tadā te pādayugme me bhaktiṃ dehi dṛḍhāṃ parām || 31||

पूर्णयोगस्वरूपस्थं मां कुरुष्व गजानन ।सुखं मुक्तस्वरूपस्थं नाथ नेच्छामि ते नमः ॥ ३२॥

pūrṇayogasvarūpasthaṃ māṃ kuruṣva gajānana |sukhaṃ muktasvarūpasthaṃ nātha necchāmi te namaḥ || 32||

मुद्गल उवाच ।अयोगगणराजस्य श्रुत्वा वचनमुत्तमम् ।जगाद तं गणेशानस्तथेत्यन्तर्हितोऽभवत् ॥ ३३॥

mudgala uvāca |ayogagaṇarājasya śrutvā vacanamuttamam |jagāda taṃ gaṇeśānastathetyantarhito'bhavat || 33||

अयोगस्तं हृदि स्थाप्य भजतेऽनन्यमानसः ।अन्ते योगमयः सोऽपि बभूवे मोक्षनायकः ॥ ३४॥

ayogastaṃ hṛdi sthāpya bhajate'nanyamānasaḥ |ante yogamayaḥ so'pi babhūve mokṣanāyakaḥ || 34||

इति ते सर्वमाख्यातं चरितं श्रीगणपस्य यत् ।पूर्णयोगधरस्यापि समासेन प्रजापते ॥ ३५॥

iti te sarvamākhyātaṃ caritaṃ śrīgaṇapasya yat |pūrṇayogadharasyāpi samāsena prajāpate || 35||

अतस्त्वं गणराजं तं भजस्व भक्तिसंयुतः ।तेन यज्ञमिमं पूर्णं करिष्यसि न संशयः ॥ ३६॥

atastvaṃ gaṇarājaṃ taṃ bhajasva bhaktisaṃyutaḥ |tena yajñamimaṃ pūrṇaṃ kariṣyasi na saṃśayaḥ || 36||

अन्ते योगयुतश्चैव ब्रह्मभूतो भविष्यसि ।आज्ञां देहि गमिष्यामि त्वदातिथ्यसुतोषितः ॥ ३७॥

ante yogayutaścaiva brahmabhūto bhaviṣyasi |ājñāṃ dehi gamiṣyāmi tvadātithyasutoṣitaḥ || 37||

रहस्यं गणनाथस्य कथितं सकलं मया ।नान्यत् किञ्चिदतो दक्ष परं वेदादिसम्मतम् ॥ ३८॥

rahasyaṃ gaṇanāthasya kathitaṃ sakalaṃ mayā |nānyat kiñcidato dakṣa paraṃ vedādisammatam || 38||

शृणुयाद्यः पठेद्वाऽपि स सर्वं प्राप्नुयाच्छुभम् ।अन्ते योगमयो भूत्वा सन्तिष्ठेत् गणपात्मकः ॥ ३९॥

śṛṇuyādyaḥ paṭhedvā'pi sa sarvaṃ prāpnuyācchubham |ante yogamayo bhūtvā santiṣṭhet gaṇapātmakaḥ || 39||

इति योगाधिपतिश्रीगणेशस्तुतिः सम्पूर्णा ॥एकविंशतिस्तोत्रं॥ मुद्गलपुराणं नवमः खण्डः । अध्यायः ४ । ९\।४ ३३९॥– ॥ मुद्गलपुराणं नवमः खण्डः । अध्यायः ४ । ९।४ ३-३९॥

iti yogādhipatiśrīgaṇeśastutiḥ sampūrṇā ||ekaviṃśatistotraṃ|| mudgalapurāṇaṃ navamaḥ khaṇḍaḥ | adhyāyaḥ 4 | 9\|4 339||– || mudgalapurāṇaṃ navamaḥ khaṇḍaḥ | adhyāyaḥ 4 | 9|4 3-39||