गणपतिस्तोत्रम् गणाष्टकम् Vedavyasaproktam Ganapati Stotram

व्यास उवाच ।पुनरन्यत्प्रवक्ष्यामि स्तोत्रं गणाधिपस्य च ।सर्वसिद्धिकरं पूतं सर्वाभीष्टफलप्रदम् ॥ १॥

vyāsa uvāca |punaranyatpravakṣyāmi stotraṃ gaṇādhipasya ca |sarvasiddhikaraṃ pūtaṃ sarvābhīṣṭaphalapradam || 1||

एकदन्तं महाकायं तप्तकाञ्चनसन्निभम् ।लम्बोदरं विशालाक्षं वन्देऽहं गणनायकम् ॥ २॥

ekadantaṃ mahākāyaṃ taptakāñcanasannibham |lambodaraṃ viśālākṣaṃ vande'haṃ gaṇanāyakam || 2||

मुञ्जकृष्णाजिनधरं नागयज्ञोपवीतकम् ।बालेन्दुकलिकामौलिं वन्देऽहं गणनायकम् ॥ ३॥

muñjakṛṣṇājinadharaṃ nāgayajñopavītakam |bālendukalikāmauliṃ vande'haṃ gaṇanāyakam || 3||

सर्वविघ्नहरं देवं सर्वविघ्नविवर्जितंमूषकोत्तममारुह्य देवासुरमहाहवे ।योद्धुकामं महाबाहुं वन्देऽहं गणनायकम् ॥ ४॥

sarvavighnaharaṃ devaṃ sarvavighnavivarjitaṃmūṣakottamamāruhya devāsuramahāhave |yoddhukāmaṃ mahābāhuṃ vande'haṃ gaṇanāyakam || 4||

अम्बिकाहृदयानन्दं मातृकापरिवेष्टितम् ।भक्तप्रियं मदोन्मत्तं वन्देऽहं गणनायकम् ॥ ५॥

ambikāhṛdayānandaṃ mātṛkāpariveṣṭitam |bhaktapriyaṃ madonmattaṃ vande'haṃ gaṇanāyakam || 5||

चित्ररत्नविचित्राङ्गं चित्रमालाविभूषणम् ।कामरूपधरं देवं वन्देऽहं गणनायकम् ॥ ६॥

citraratnavicitrāṅgaṃ citramālāvibhūṣaṇam |kāmarūpadharaṃ devaṃ vande'haṃ gaṇanāyakam || 6||

गजवक्त्रं सुरश्रेष्ठं चारुकर्णविभूषितम् ।पाशाङ्कुशधरं देवं वन्देऽहं गणनायकम् ॥ ७॥

gajavaktraṃ suraśreṣṭhaṃ cārukarṇavibhūṣitam |pāśāṅkuśadharaṃ devaṃ vande'haṃ gaṇanāyakam || 7||

यक्षकिन्नरगन्धर्वैः सिद्धविद्याधरैस्सदा ।स्तूयमानं महादेहं वन्देऽहं गणनायकम् ॥ ८॥

yakṣakinnaragandharvaiḥ siddhavidyādharaissadā |stūyamānaṃ mahādehaṃ vande'haṃ gaṇanāyakam || 8||

गणाष्टकमिदं पुण्यं भक्तितो यः पठेन्नरः ।सर्वसिद्धिमवाप्नोति रुद्रलोके महीयते ॥ ९॥

gaṇāṣṭakamidaṃ puṇyaṃ bhaktito yaḥ paṭhennaraḥ |sarvasiddhimavāpnoti rudraloke mahīyate || 9||

न निःस्वतां तथाभ्येति सप्तजन्मसु मानवः ।य इदं पठते नित्यं महाराजो भवेन्नरः ॥ १०॥

na niḥsvatāṃ tathābhyeti saptajanmasu mānavaḥ |ya idaṃ paṭhate nityaṃ mahārājo bhavennaraḥ || 10||

वश्यं करोति त्रैलोक्यं पठनाच्छ्रवणादपि ।स्तोत्रं परं महापुण्यं गणपस्य महात्मनः ॥ ११॥

vaśyaṃ karoti trailokyaṃ paṭhanācchravaṇādapi |stotraṃ paraṃ mahāpuṇyaṃ gaṇapasya mahātmanaḥ || 11||

इति श्रीपाद्मपुराणे सृष्टिखण्डे चतुष्षष्टितमाध्यायान्तर्गतंवेदव्यासकृतं गणपतिस्तोत्रं समाप्तम् ।पद्मपुराण । सृष्टिखण्ड । अध्याय ६४/१११॥पद्मपुराण । सृष्टिखण्ड । अध्याय ६४/१-११॥

iti śrīpādmapurāṇe sṛṣṭikhaṇḍe catuṣṣaṣṭitamādhyāyāntargataṃvedavyāsakṛtaṃ gaṇapatistotraṃ samāptam |padmapurāṇa | sṛṣṭikhaṇḍa | adhyāya 64/111||padmapurāṇa | sṛṣṭikhaṇḍa | adhyāya 64/1-11||