कल्पकगणेशपञ्चरत्नस्तवः Shri Kalpakaganeshapancharatna Stava

श्रीमदुमापतिशिवप्रणीतःश्रीमत्तिल्ववने सभेशसदनप्रत्यक्ककुब्गोपुराधोभागस्थित चारुसद्मवसतिर्भक्तेष्टकल्पद्रुमः ।नृत्तानन्दमदोत्कटो गणपतिः संरक्षताद्वोऽनिशंदूर्वासः प्रमुखाखिलर्षि विनुतः सर्वेश्वरोऽग्र्योऽव्ययः ॥ १॥

śrīmadumāpatiśivapraṇītaḥśrīmattilvavane sabheśasadanapratyakkakubgopurādhobhāgasthita cārusadmavasatirbhakteṣṭakalpadrumaḥ |nṛttānandamadotkaṭo gaṇapatiḥ saṃrakṣatādvo'niśaṃdūrvāsaḥ pramukhākhilarṣi vinutaḥ sarveśvaro'gryo'vyayaḥ || 1||

श्रीमत्तिल्लवनाभिधं पुरवरं क्षुल्लावुकं प्राणिनांइत्याहुर्मुनयः किलेति नितरां ज्ञातुं च तत्सत्यताम् ।आयान्तं निशि मस्करीन्द्रमपि यो दूर्वाससं प्रीणयन्नृत्तं दर्शयति स्म नो गणपतिः कल्पद्रुकल्पोऽवतात् ॥ २॥

śrīmattillavanābhidhaṃ puravaraṃ kṣullāvukaṃ prāṇināṃityāhurmunayaḥ kileti nitarāṃ jñātuṃ ca tatsatyatām |āyāntaṃ niśi maskarīndramapi yo dūrvāsasaṃ prīṇayannṛttaṃ darśayati sma no gaṇapatiḥ kalpadrukalpo'vatāt || 2||

देवान् नृत्तदिदृक्षया पशुपतेरभ्यागतान् कामिनःशक्रादीन् स्वयमुद्धृतं निजपदं वामेतरं दर्शयन् ।दत्वा तत्तदभीष्टवर्गमनिशं स्वर्गादिलोकान्विभुःनिन्ये यः शिवकामिनाथतनयः कुर्याच्छिवं वोऽन्वहम् ॥ ३॥

devān nṛttadidṛkṣayā paśupaterabhyāgatān kāminaḥśakrādīn svayamuddhṛtaṃ nijapadaṃ vāmetaraṃ darśayan |datvā tattadabhīṣṭavargamaniśaṃ svargādilokānvibhuḥninye yaḥ śivakāmināthatanayaḥ kuryācchivaṃ vo'nvaham || 3||

अस्माकं पुरतश्चकास्तु भगवान् श्रीकल्पकाख्योऽग्रणीःगोविन्दादि सुरार्चितोऽमृतरसप्राप्त्यै गजेन्द्राननः ।वाचं यच्छतु निश्चलां श्रियमपि स्वात्मावबोधं परंदारान् पुत्रवरांश्च सर्वविभवं कात्यायनीशात्मजः ॥ ४॥

asmākaṃ purataścakāstu bhagavān śrīkalpakākhyo'graṇīḥgovindādi surārcito'mṛtarasaprāptyai gajendrānanaḥ |vācaṃ yacchatu niścalāṃ śriyamapi svātmāvabodhaṃ paraṃdārān putravarāṃśca sarvavibhavaṃ kātyāyanīśātmajaḥ || 4||

वन्दे कल्पक कुञ्जरेन्द्रवदनं वेदोक्तिभिस्तिल्वभूदेवैः पूजितपादपद्मयुगलं पाशच्छिदं प्राणिनाम् ।दन्तादीनपि षड्भुजेषु दधतं वाञ्छाप्रदत्वाप्तयेस्वाभ्यर्णाश्रयिकामधेनुमनिशं श्रीमुख्यसर्वार्थदम् ॥ ५॥

vande kalpaka kuñjarendravadanaṃ vedoktibhistilvabhūdevaiḥ pūjitapādapadmayugalaṃ pāśacchidaṃ prāṇinām |dantādīnapi ṣaḍbhujeṣu dadhataṃ vāñchāpradatvāptayesvābhyarṇāśrayikāmadhenumaniśaṃ śrīmukhyasarvārthadam || 5||

औमापत्यमिमं स्तवं प्रतिदिनं प्रातर्निशं यः पठेत्श्रीमत्कल्पककुञ्जराननकृपापाङ्गाव लोकान्नरः ।यं यं कामयते च तं तमखिलं प्राप्नोति निर्विघ्नतःकैवल्यं च तथाऽन्तिमे वयसि तत्सर्वार्थसिद्धिप्रदम् ॥ ६॥

aumāpatyamimaṃ stavaṃ pratidinaṃ prātarniśaṃ yaḥ paṭhetśrīmatkalpakakuñjarānanakṛpāpāṅgāva lokānnaraḥ |yaṃ yaṃ kāmayate ca taṃ tamakhilaṃ prāpnoti nirvighnataḥkaivalyaṃ ca tathā'ntime vayasi tatsarvārthasiddhipradam || 6||

इति श्रीमदुमापतिशिवप्रणीतः श्रीकल्पकगणेशपञ्चरत्नस्तवः सम्पूर्णः ।

iti śrīmadumāpatiśivapraṇītaḥ śrīkalpakagaṇeśapañcaratnastavaḥ sampūrṇaḥ |