गणेशवज्रपञ्जरस्तोत्रम् गणेशप्रोक्तम् Shri Ganeshavajrapanjara Shtotram Shriganeshaproktam

(श्रीशिव उवाच ।वज्रपञ्जरकं नाथ ब्रूहि मे गणपप्रियम् ।ज्ञानमयं महान्धस्य नाशकं सुखदायकम् ॥ ३६॥

(śrīśiva uvāca |vajrapañjarakaṃ nātha brūhi me gaṇapapriyam |jñānamayaṃ mahāndhasya nāśakaṃ sukhadāyakam || 36||

श्रीगणेश उवाच ।आदौ नित्यविधिं कृत्वा पूजयित्वा गजाननम् ।वज्रपञ्जरकं ग्राह्यं सर्वाज्ञानविनाशनम् ॥ ३७॥)

śrīgaṇeśa uvāca |ādau nityavidhiṃ kṛtvā pūjayitvā gajānanam |vajrapañjarakaṃ grāhyaṃ sarvājñānavināśanam || 37||)

त्रिनेत्रं गजास्यं चतुर्बाहुधारं परश्वादिशस्त्रैर्युतं भालचन्द्रम् ।नराकारदेहं सदा योगशान्तं गणेशं भजे सर्ववन्द्यं परेशम् ॥ ३८॥

trinetraṃ gajāsyaṃ caturbāhudhāraṃ paraśvādiśastrairyutaṃ bhālacandram |narākāradehaṃ sadā yogaśāntaṃ gaṇeśaṃ bhaje sarvavandyaṃ pareśam || 38||

एवं ध्यात्वा गणेशानं मानसैरुपचारकैः ।पूजयेत्तं नमस्कृत्य धारयेद्वज्रपञ्जरम् ॥ ३९॥

evaṃ dhyātvā gaṇeśānaṃ mānasairupacārakaiḥ |pūjayettaṃ namaskṛtya dhārayedvajrapañjaram || 39||

बिन्दुरूपो वक्रतुण्डो रक्षतु मे हृदि स्थितः ।देहांश्चतुर्विधांस्तत्वांस्तत्वाधारः सनातनः ॥ ४०॥

bindurūpo vakratuṇḍo rakṣatu me hṛdi sthitaḥ |dehāṃścaturvidhāṃstatvāṃstatvādhāraḥ sanātanaḥ || 40||

देहमोहयुतं ह्येकदन्तः सोऽहं स्वरूपधृक् ।देहिनं मां विशेषेण रक्षतु भ्रमनाशकः ॥ ४१॥

dehamohayutaṃ hyekadantaḥ so'haṃ svarūpadhṛk |dehinaṃ māṃ viśeṣeṇa rakṣatu bhramanāśakaḥ || 41||

महोदरस्तथा देवो नानाबोधान् प्रतापवान् ।सदा रक्षतु मे बोधानन्दसंस्थो ह्यहर्निशम् ॥ ४२॥

mahodarastathā devo nānābodhān pratāpavān |sadā rakṣatu me bodhānandasaṃstho hyaharniśam || 42||

साङ्ख्यान् रक्षतु साङ्ख्येशो गजाननः सुसिद्धिदः ।असत्येषु स्थितं मां स लम्बोदरश्च रक्षतु ॥ ४३॥

sāṅkhyān rakṣatu sāṅkhyeśo gajānanaḥ susiddhidaḥ |asatyeṣu sthitaṃ māṃ sa lambodaraśca rakṣatu || 43||

सत्सु स्थितं सुमोहेन विकटो मां परात्परः ।रक्षतु भक्तवात्सल्यात् सदैकामृतधारकः ॥ ४४॥

satsu sthitaṃ sumohena vikaṭo māṃ parātparaḥ |rakṣatu bhaktavātsalyāt sadaikāmṛtadhārakaḥ || 44||

आनन्देषु स्थितं नित्यं मां रक्षतु समात्मकः ।विघ्नराजो महाविघ्नैर्नानाखेलकरः प्रभुः ॥ ४५॥

ānandeṣu sthitaṃ nityaṃ māṃ rakṣatu samātmakaḥ |vighnarājo mahāvighnairnānākhelakaraḥ prabhuḥ || 45||

अव्यक्तेषु स्थितं नित्यं धूम्रवर्णस्वरूपधृक् ।मां रक्षतु सुखाकारः सहजः सर्वपूजितः ॥ ४६॥

avyakteṣu sthitaṃ nityaṃ dhūmravarṇasvarūpadhṛk |māṃ rakṣatu sukhākāraḥ sahajaḥ sarvapūjitaḥ || 46||

स्वसंवेद्येषु संस्थं मां गणेशः स्वस्वरूपधृक् ।रक्षतु योगभावेन संस्थितो भवनायकः ॥ ४७॥

svasaṃvedyeṣu saṃsthaṃ māṃ gaṇeśaḥ svasvarūpadhṛk |rakṣatu yogabhāvena saṃsthito bhavanāyakaḥ || 47||

अयोगेषु स्थितं नित्यं मां रक्षतु गणेश्वरः ।निवृत्तिरूपधृक् साक्षादसमाधिसुखे रतः ॥ ४८॥

ayogeṣu sthitaṃ nityaṃ māṃ rakṣatu gaṇeśvaraḥ |nivṛttirūpadhṛk sākṣādasamādhisukhe rataḥ || 48||

योगशान्तिधरो मां तु रक्षतु योगसंस्थितम् ।गणाधीशः प्रसन्नात्मा सिद्धिबुद्धिसमन्वितः ॥ ४९॥

yogaśāntidharo māṃ tu rakṣatu yogasaṃsthitam |gaṇādhīśaḥ prasannātmā siddhibuddhisamanvitaḥ || 49||

पुरो मां गजकर्णश्च रक्षतु विघ्नहारकः ।वाह्न्यां याम्यां च नैरृत्यां चिन्तामणिर्वरप्रदः ॥ ५०॥

puro māṃ gajakarṇaśca rakṣatu vighnahārakaḥ |vāhnyāṃ yāmyāṃ ca nairṛtyāṃ cintāmaṇirvarapradaḥ || 50||

रक्षतु पश्चिमे ढुण्ढिर्हेरम्बो वायुदिक् स्थितम् ।विनायकश्चोत्तरे तु प्रमोदश्चेशदिक् स्थितम् ॥ ५१॥

rakṣatu paścime ḍhuṇḍhirherambo vāyudik sthitam |vināyakaścottare tu pramodaśceśadik sthitam || 51||

ऊर्ध्वं सिद्धिपतिः पातु बुद्धीशोऽधः स्थितं सदा ।सर्वाङ्गेषु मयूरेशः पातु मां भक्तिलालसः ॥ ५२॥

ūrdhvaṃ siddhipatiḥ pātu buddhīśo'dhaḥ sthitaṃ sadā |sarvāṅgeṣu mayūreśaḥ pātu māṃ bhaktilālasaḥ || 52||

यत्र तत्र स्थितं मां तु सदा रक्षतु योगपः ।परशुपाशसंयुक्तो वरदाभयधारकः ॥ ५३॥

yatra tatra sthitaṃ māṃ tu sadā rakṣatu yogapaḥ |paraśupāśasaṃyukto varadābhayadhārakaḥ || 53||

इदं गणपतेः प्रोक्तं वज्रपञ्जरकं परम् ।धारयस्व महादेव विजयी त्वं भविष्यसि ॥ ५४॥

idaṃ gaṇapateḥ proktaṃ vajrapañjarakaṃ param |dhārayasva mahādeva vijayī tvaṃ bhaviṣyasi || 54||

य इदं पञ्जरं धृत्वा यत्र कुत्र स्थितो भवेत् ।न तस्य जायते क्वापि भयं नानास्वभावजम् ॥ ५५॥

ya idaṃ pañjaraṃ dhṛtvā yatra kutra sthito bhavet |na tasya jāyate kvāpi bhayaṃ nānāsvabhāvajam || 55||

यः पठेत् पञ्जरं नित्यं स ईप्सितमवाप्नुयात् ।वज्रसारतनुर्भूत्वा चरेत् सर्वत्र मानवः ॥ ५६॥

yaḥ paṭhet pañjaraṃ nityaṃ sa īpsitamavāpnuyāt |vajrasāratanurbhūtvā caret sarvatra mānavaḥ || 56||

त्रिकालं यः पठेन्नित्यं स गणेश इवापरः ।निर्विघ्नः सर्वकार्येषु ब्रह्मभूतो भवेन्नरः ॥ ५७॥

trikālaṃ yaḥ paṭhennityaṃ sa gaṇeśa ivāparaḥ |nirvighnaḥ sarvakāryeṣu brahmabhūto bhavennaraḥ || 57||

यः शृणोति गणेशस्य पञ्जरं वज्रसंज्ञकम् ।आरोग्यादिसमायुक्तो भवते गणपप्रियः ॥ ५८॥

yaḥ śṛṇoti gaṇeśasya pañjaraṃ vajrasaṃjñakam |ārogyādisamāyukto bhavate gaṇapapriyaḥ || 58||

धनं धान्यं पशून् विद्यामायुष्यं पुत्रपौत्रकम् ।सर्वसम्पत्समायुक्तमैश्वर्यं पठनाल्लभेत् ॥ ५९॥

dhanaṃ dhānyaṃ paśūn vidyāmāyuṣyaṃ putrapautrakam |sarvasampatsamāyuktamaiśvaryaṃ paṭhanāllabhet || 59||

न भयं तस्य वज्रात्तु चक्राच्छूलाद्भवेत् कदा ।शङ्करादेर्महादेव पठनादस्य नित्यशः ॥ ६०॥

na bhayaṃ tasya vajrāttu cakrācchūlādbhavet kadā |śaṅkarādermahādeva paṭhanādasya nityaśaḥ || 60||

यं यं चिन्तयते मर्त्यस्तं तं प्राप्नोति शाश्वतम् ।पठनादस्य विघ्नेश पञ्जरस्य निरन्तरम् ॥ ६१॥

yaṃ yaṃ cintayate martyastaṃ taṃ prāpnoti śāśvatam |paṭhanādasya vighneśa pañjarasya nirantaram || 61||

लक्षावृत्तिभिरेवं स सिद्धपञ्जरको भवेत् ।स्तम्भयेदपि सूर्यं तु ब्रह्माण्डं वशमानयेत् ॥ ६२॥

lakṣāvṛttibhirevaṃ sa siddhapañjarako bhavet |stambhayedapi sūryaṃ tu brahmāṇḍaṃ vaśamānayet || 62||

(॥ ॐ तत्सदिति श्रीमदान्त्ये पुराणोपनिषदि श्रीमन्मौद्गले महापुराणेअष्टमे खण्डे धूम्रवर्णचरिते मार्गशीर्षमासमाहात्म्ये वज्रपञ्जरकथनं नाम त्रयोविंशोऽध्यायः ॥ ८\।२३)इति श्रीगणेशप्रोक्तम् श्रीगणेशवज्रपञ्जरस्तोत्रं सम्पूर्णम् ।॥ मुद्गलपुराणं अष्टमः खण्डः । अध्यायः २३ । ८\।२३ ३८६२॥– ॥ मुद्गलपुराणं अष्टमः खण्डः । अध्यायः २३ । ८।२३ ३८-६२॥

(|| oṃ tatsaditi śrīmadāntye purāṇopaniṣadi śrīmanmaudgale mahāpurāṇeaṣṭame khaṇḍe dhūmravarṇacarite mārgaśīrṣamāsamāhātmye vajrapañjarakathanaṃ nāma trayoviṃśo'dhyāyaḥ || 8\|23)iti śrīgaṇeśaproktam śrīgaṇeśavajrapañjarastotraṃ sampūrṇam ||| mudgalapurāṇaṃ aṣṭamaḥ khaṇḍaḥ | adhyāyaḥ 23 | 8\|23 3862||– || mudgalapurāṇaṃ aṣṭamaḥ khaṇḍaḥ | adhyāyaḥ 23 | 8|23 38-62||