गणेश्वरस्तोत्रम् अथवा गाणेश्वरतेजोवर्धनस्तोत्रम् Ganeshvara Stotram

श्रीगणेशाय नमः ॥भ्रूशुण्ड्युवाचनमो नमस्ते गणनाथ ढुण्ढे सदा सुशान्तिप्रद शान्तिमूर्ते ।अपारयोगेन च योगिनस्त्वां भजन्ति भावेन नमो नमस्ते ॥ १॥

śrīgaṇeśāya namaḥ ||bhrūśuṇḍyuvācanamo namaste gaṇanātha ḍhuṇḍhe sadā suśāntiprada śāntimūrte |apārayogena ca yoginastvāṃ bhajanti bhāvena namo namaste || 1||

प्रजापतीनां त्वमथो विधाता सुपालकानां गणनाथ विष्णुः ।हरोऽसि संहारकरेषु देव कलांशमात्रेण नमो नमस्ते ॥ २॥

prajāpatīnāṃ tvamatho vidhātā supālakānāṃ gaṇanātha viṣṇuḥ |haro'si saṃhārakareṣu deva kalāṃśamātreṇa namo namaste || 2||

क्रियात्मकानां जगदम्बिका त्वं प्रकाशकानां रविरेव ढुण्ढे ।यत्नप्रदानां च गुणेश नामा कलांशमात्रेण नमो नमस्ते ॥ ३॥

kriyātmakānāṃ jagadambikā tvaṃ prakāśakānāṃ ravireva ḍhuṇḍhe |yatnapradānāṃ ca guṇeśa nāmā kalāṃśamātreṇa namo namaste || 3||

शरीरभाजां त्वमथासि बिन्दुः शरीरिणां सोऽहमथो विभासि ।सुबोधरूपः स्वत उत्थकानां कलांशमात्रेण नमो नमस्ते ॥ ४॥

śarīrabhājāṃ tvamathāsi binduḥ śarīriṇāṃ so'hamatho vibhāsi |subodharūpaḥ svata utthakānāṃ kalāṃśamātreṇa namo namaste || 4||

विदेहकानामसि साङ्ख्यरूपः समाधिदानां च निजात्मकस्त्वम् ।निवृत्तियोगे त्वमयोगधारी कलांशमात्रेण नमो नमस्ते ॥ ५॥

videhakānāmasi sāṅkhyarūpaḥ samādhidānāṃ ca nijātmakastvam |nivṛttiyoge tvamayogadhārī kalāṃśamātreṇa namo namaste || 5||

गणास्त एते गणनाथनाम्ना त्वमेव वेदादिषु योगकीर्ते ।सदा सुशान्तिप्रद संस्थितोऽसि भक्तेश भक्तिप्रिय ते नमो वै ॥ ६॥

gaṇāsta ete gaṇanāthanāmnā tvameva vedādiṣu yogakīrte |sadā suśāntiprada saṃsthito'si bhakteśa bhaktipriya te namo vai || 6||

गकारसिद्धिस्त्वपि मोहदात्री णकारबुद्धिस्त्वथ मोहधात्री ।तयोर्विलासी पतिरेव नाम्ना गणेश्वरस्त्वं च नमो नमस्ते ॥ ७॥

gakārasiddhistvapi mohadātrī ṇakārabuddhistvatha mohadhātrī |tayorvilāsī patireva nāmnā gaṇeśvarastvaṃ ca namo namaste || 7||

गकाररूपेण भवान् स गौणो णकाररूपेण च निर्गुणोऽसि ।तयोरभेदे गणनाथनामा योगेश भक्तेश नमो नमस्ते ॥ ८॥

gakārarūpeṇa bhavān sa gauṇo ṇakārarūpeṇa ca nirguṇo'si |tayorabhede gaṇanāthanāmā yogeśa bhakteśa namo namaste || 8||

किं वदामि गणाधीश महिमानं महाद्भुतम् ।यत्र वेदादयो भ्रान्ता इव जाताः प्रवर्णने ॥ ९॥

kiṃ vadāmi gaṇādhīśa mahimānaṃ mahādbhutam |yatra vedādayo bhrāntā iva jātāḥ pravarṇane || 9||

पतितानामहं श्रेष्ठः पतितोत्तम एव च ।तव नामप्रभावेण जातोऽहं ब्राह्मणोत्तमः ॥ १०॥

patitānāmahaṃ śreṣṭhaḥ patitottama eva ca |tava nāmaprabhāveṇa jāto'haṃ brāhmaṇottamaḥ || 10||

किञ्चित्संस्कारयोगेन विश्रामित्रादयः प्रभो ।जाता वै ब्राह्मणत्वस्य ब्राह्मणानिर्मलाः पुरा ॥ ११॥

kiñcitsaṃskārayogena viśrāmitrādayaḥ prabho |jātā vai brāhmaṇatvasya brāhmaṇānirmalāḥ purā || 11||

अहं संस्कारहीनश्च जात्या कैवर्तकोद्भवः ।तत्राऽपि पापसक्तात्मा त्वया च ब्राह्मणः कृतः ॥ १२॥

ahaṃ saṃskārahīnaśca jātyā kaivartakodbhavaḥ |tatrā'pi pāpasaktātmā tvayā ca brāhmaṇaḥ kṛtaḥ || 12||

एवमुक्त्वा नतं विप्रं प्राञ्जलिं पुरतः स्थितम् ।भक्तिभावेन सन्तुष्टस्तमुवाच गजाननः ॥ १३॥

evamuktvā nataṃ vipraṃ prāñjaliṃ purataḥ sthitam |bhaktibhāvena santuṣṭastamuvāca gajānanaḥ || 13||

गणेश उवाचवरान्वरय दास्यामि यांस्त्वं विप्र प्रवाञ्छसि ।त्वत्समो नैव तेजस्वी भक्तो मे प्रभविष्यति ॥ १४॥

gaṇeśa uvācavarānvaraya dāsyāmi yāṃstvaṃ vipra pravāñchasi |tvatsamo naiva tejasvī bhakto me prabhaviṣyati || 14||

तस्य तद्वचनं श्रुत्वा साश्रुनेत्रो महामुनिः ।भ्रूशुण्डी गद्गदोक्त्या च तं जगाद गजाननम् ॥ १५॥

tasya tadvacanaṃ śrutvā sāśrunetro mahāmuniḥ |bhrūśuṇḍī gadgadoktyā ca taṃ jagāda gajānanam || 15||

यदि प्रसन्नभावेन वरदोऽसि गजानन ।त्वदीयां भक्तिमुग्रां मे देहि सम्पूर्णभावतः ॥ १६॥

yadi prasannabhāvena varado'si gajānana |tvadīyāṃ bhaktimugrāṃ me dehi sampūrṇabhāvataḥ || 16||

तथेति तमुवाचाथ गणेशो भक्तवत्सलः ।क्षेत्रं त्वदीयमत्रैव भविष्यति मदाज्ञया ॥ १७॥

tatheti tamuvācātha gaṇeśo bhaktavatsalaḥ |kṣetraṃ tvadīyamatraiva bhaviṣyati madājñayā || 17||

अमलाश्रमकं नाम्ना जनानां सेविनां सदा ।अज्ञानज मलं हत्वा ज्ञानं दास्यति निर्मलम् ॥ १८॥

amalāśramakaṃ nāmnā janānāṃ sevināṃ sadā |ajñānaja malaṃ hatvā jñānaṃ dāsyati nirmalam || 18||

एवमुक्त्वांऽतर्दधे च गणेशो देवनायकः ।भ्रूशुण्डी भक्तिभावेन भेजे वै तं निरन्तरम् ॥ १९॥

evamuktvāṃ'tardadhe ca gaṇeśo devanāyakaḥ |bhrūśuṇḍī bhaktibhāvena bheje vai taṃ nirantaram || 19||

नान्यत् स मनसा क्वापि क्षेत्रं देवादिकं मुनिः ।तीर्थं जज्ञौ स योगीन्द्रो गणेशानान्न संशयः ॥ २०॥

nānyat sa manasā kvāpi kṣetraṃ devādikaṃ muniḥ |tīrthaṃ jajñau sa yogīndro gaṇeśānānna saṃśayaḥ || 20||

ततस्तत्र महाक्षेत्रे ब्राह्मणाद्या ययुर्मुदा ।तत्रैव गणनाथं ते भेजिरे भक्तिभावतः ॥ २१॥

tatastatra mahākṣetre brāhmaṇādyā yayurmudā |tatraiva gaṇanāthaṃ te bhejire bhaktibhāvataḥ || 21||

शिष्यास्तस्य महाभागा जाता ब्रह्मर्षयोऽमलाः ।क्षेत्रसंन्यासभावेन तेऽसेवन्त महामुनिम् ॥ २२॥

śiṣyāstasya mahābhāgā jātā brahmarṣayo'malāḥ |kṣetrasaṃnyāsabhāvena te'sevanta mahāmunim || 22||

भ्रूशुण्डिनस्तत्र तीर्थं गणेशस्य च सुन्दरम् ।भुक्तिमुक्तिप्रदं प्रोक्तं स्नानमात्रेण जन्तवे ॥ २३॥

bhrūśuṇḍinastatra tīrthaṃ gaṇeśasya ca sundaram |bhuktimuktipradaṃ proktaṃ snānamātreṇa jantave || 23||

तस्यैवं दर्शनार्थं च मुनयः कश्यपादयः ।शुकादियोगिनः सर्वे गत्वा तेऽपूजयन् मुदा ॥ २४॥

tasyaivaṃ darśanārthaṃ ca munayaḥ kaśyapādayaḥ |śukādiyoginaḥ sarve gatvā te'pūjayan mudā || 24||

कृतार्थं मन्यमानाश्च स्वस्थलं ते ययुः पुनः ।प्रशंसन्तो मुनिं सर्वे साक्षाच्छुण्डाधरं प्रभुम् ॥ २५॥

kṛtārthaṃ manyamānāśca svasthalaṃ te yayuḥ punaḥ |praśaṃsanto muniṃ sarve sākṣācchuṇḍādharaṃ prabhum || 25||

इन्द्रादयस्तमेवं च दर्शनार्थं समागताः ।कृतकृत्याः स्वभावेन स्वालयं ते ययुः पुनः ॥ २६॥

indrādayastamevaṃ ca darśanārthaṃ samāgatāḥ |kṛtakṛtyāḥ svabhāvena svālayaṃ te yayuḥ punaḥ || 26||

ब्रह्मविष्णुमहेशाद्या ईश्वरास्ते महामुनेः ।नित्यदर्शनसंसक्ता बभूवुर्हृष्टमानसाः ॥ २७॥

brahmaviṣṇumaheśādyā īśvarāste mahāmuneḥ |nityadarśanasaṃsaktā babhūvurhṛṣṭamānasāḥ || 27||

एवं प्रभावयुक्तः स भ्रूशुण्डी कथितो मया ।चाण्डालो ब्राह्मणो जातो गणेशस्मरणेन वै ॥ २८॥

evaṃ prabhāvayuktaḥ sa bhrūśuṇḍī kathito mayā |cāṇḍālo brāhmaṇo jāto gaṇeśasmaraṇena vai || 28||

॥ इति श्रीमन्मौद्गले महापुराणे द्वितीये खण्डे एकदन्तचरितेभ्रूशुण्डिब्राह्मणत्ववर्णनं नाम षष्टितमोऽध्यायेगाणेश्वरस्तोत्रं सम्पूर्णम् ।श्रीगणपतिस्तोत्रम्॥ मुद्गलपुराणं द्वितीयः खण्डः । अध्यायः ६० । २\।६० ३५६२॥– ॥ मुद्गलपुराणं द्वितीयः खण्डः । अध्यायः ६० । २।६० ३५-६२॥

|| iti śrīmanmaudgale mahāpurāṇe dvitīye khaṇḍe ekadantacaritebhrūśuṇḍibrāhmaṇatvavarṇanaṃ nāma ṣaṣṭitamo'dhyāyegāṇeśvarastotraṃ sampūrṇam |śrīgaṇapatistotram|| mudgalapurāṇaṃ dvitīyaḥ khaṇḍaḥ | adhyāyaḥ 60 | 2\|60 3562||– || mudgalapurāṇaṃ dvitīyaḥ khaṇḍaḥ | adhyāyaḥ 60 | 2|60 35-62||