गणेशाष्टकम् ३ Ganeshashtakam 3

गजवदन गणेश त्वं विभो विश्वमूर्ते!हरसि सकलविघ्नान् विघ्नराज प्रजानाम् ।भवति जगति पूजा पूर्वमेव त्वदीयावरदवर कृपालो चन्द्रमौले प्रसीद ॥ १॥

gajavadana gaṇeśa tvaṃ vibho viśvamūrte!harasi sakalavighnān vighnarāja prajānām |bhavati jagati pūjā pūrvameva tvadīyāvaradavara kṛpālo candramaule prasīda || 1||

सपदि सकलविघ्नां यान्ति दूरे दयालोतव शुचि रुचिरं स्यान्नामसङ्कीर्तनं चेत् ।अत इह मनुजास्त्वां सर्वकार्ये स्मरन्तिवरदवर कृपालो चन्द्रमौले प्रसीद ॥ २॥

sapadi sakalavighnāṃ yānti dūre dayālotava śuci ruciraṃ syānnāmasaṅkīrtanaṃ cet |ata iha manujāstvāṃ sarvakārye smarantivaradavara kṛpālo candramaule prasīda || 2||

सकलदुरितहन्तुः त स्वर्गमोक्षादिदातुःसुररिपुवधकर्त्तुः सर्वविघ्नप्रहर्त्तुः ।तव भवति कृपातोऽशेषसम्पत्तिलाभोवरदवर कृपालो चन्द्रमौले प्रसीद ॥ ३॥

sakaladuritahantuḥ ta svargamokṣādidātuḥsuraripuvadhakarttuḥ sarvavighnapraharttuḥ |tava bhavati kṛpāto'śeṣasampattilābhovaradavara kṛpālo candramaule prasīda || 3||

तव गणप गुणानां वर्णने नैव शक्ताजगति सकलवन्द्या शारदा सर्वकाले ।तदितर मनुजानां का कथा भालदृष्टेवरदवर कृपालो चन्द्रमौले प्रसीद ॥ ४॥

tava gaṇapa guṇānāṃ varṇane naiva śaktājagati sakalavandyā śāradā sarvakāle |taditara manujānāṃ kā kathā bhāladṛṣṭevaradavara kṛpālo candramaule prasīda || 4||

बहुतरमनुजैस्ते दिव्यनाम्नां सहस्रैः ।स्तुतिहुतिकरणेन प्राप्यते सर्वसिद्धिः ।विधिरयमखिलो वै तन्त्रशास्त्रे प्रसिद्धःवरदवर कृपालो चन्द्रमौले प्रसीद ॥ ५॥

bahutaramanujaiste divyanāmnāṃ sahasraiḥ |stutihutikaraṇena prāpyate sarvasiddhiḥ |vidhirayamakhilo vai tantraśāstre prasiddhaḥvaradavara kṛpālo candramaule prasīda || 5||

त्वदितरदिह नास्ते सच्चिदानन्दमूर्त्तेइति निगदति शास्त्रं विश्वरूपं त्रिनेत्र ।त्वमसि हरिरथ त्वं शङ्करस्त्वं विधातावरदवर कृपालो चन्द्रमौलेः प्रसीद ॥ ६॥

tvaditaradiha nāste saccidānandamūrtteiti nigadati śāstraṃ viśvarūpaṃ trinetra |tvamasi hariratha tvaṃ śaṅkarastvaṃ vidhātāvaradavara kṛpālo candramauleḥ prasīda || 6||

सकलसुखद माया या त्वदीया प्रसिद्धाशशधरधरसूने त्वं तया क्रीडसीह ।नट इव बहुवेषं सर्वदा संविधायवरदवर कृपालो चन्द्रमौले प्रसीद ॥ ७॥

sakalasukhada māyā yā tvadīyā prasiddhāśaśadharadharasūne tvaṃ tayā krīḍasīha |naṭa iva bahuveṣaṃ sarvadā saṃvidhāyavaradavara kṛpālo candramaule prasīda || 7||

भव इह पुरतस्ते पात्ररूपेण भर्त्तःबहुविधनरलीलां त्वां प्रदर्श्याशु याचे ।सपदि भवसमुद्रान्मां समुद्धारयस्ववरदवर कृपालो चन्द्रमौले प्रसीद ॥ ८॥

bhava iha purataste pātrarūpeṇa bharttaḥbahuvidhanaralīlāṃ tvāṃ pradarśyāśu yāce |sapadi bhavasamudrānmāṃ samuddhārayasvavaradavara kṛpālo candramaule prasīda || 8||

अष्टकं गणनाथस्य भक्त्या यो मानवः पठेत्तस्य विघ्नाः प्रणश्यन्ति गणेशस्य प्रसादतः ॥ ९॥

aṣṭakaṃ gaṇanāthasya bhaktyā yo mānavaḥ paṭhettasya vighnāḥ praṇaśyanti gaṇeśasya prasādataḥ || 9||

इति जगद्गुरुशङ्कराचार्यस्वामिश्रीशान्तानन्दसरस्वतीशिष्यस्वामि श्रीमदनन्तानन्दसरस्वतीविरचितं गणेशाष्टकं सम्पूर्णम् ।

iti jagadguruśaṅkarācāryasvāmiśrīśāntānandasarasvatīśiṣyasvāmi śrīmadanantānandasarasvatīviracitaṃ gaṇeśāṣṭakaṃ sampūrṇam |