गणेशस्तुतिः गुणेशकृता Ganesha Stuti by Gunesha

श्रीगणेशाय नमः ।गुणेश उवाच ।नमामि देवं गणनाथमीशं सदा सुशान्तं हृदि योगिनां वै ।अपारयोगं दृढयोगनाथं सुशान्तयोगेश्वरमानतोऽस्मि ॥ ४२॥

śrīgaṇeśāya namaḥ |guṇeśa uvāca |namāmi devaṃ gaṇanāthamīśaṃ sadā suśāntaṃ hṛdi yogināṃ vai |apārayogaṃ dṛḍhayoganāthaṃ suśāntayogeśvaramānato'smi || 42||

अयोगरूपं कथितुं त्वशक्यं निवृत्तिमात्रं ह्यसमाधिसंस्थम् ।अभेदभेदात्मकमूलहीनं सुशान्तयोगेश्वरमानतोऽस्मि ॥ ४३॥

ayogarūpaṃ kathituṃ tvaśakyaṃ nivṛttimātraṃ hyasamādhisaṃstham |abhedabhedātmakamūlahīnaṃ suśāntayogeśvaramānato'smi || 43||

सदा समाधिस्थमनन्तपारं प्रभुं स्वसंवेद्यमयं विभान्तम् ।निजात्मयोगेन च लभ्यमेवं सुशान्तयोगेश्वरमानतोऽस्मि ॥ ४४॥

sadā samādhisthamanantapāraṃ prabhuṃ svasaṃvedyamayaṃ vibhāntam |nijātmayogena ca labhyamevaṃ suśāntayogeśvaramānato'smi || 44||

विदेहयोगेन च साङ्ख्यरूपं जनेन लभ्यं गणराजमीड्यम् ।सदा ह्युपाधौ न हितं गणेशं सुशान्तयोगेश्वरमानतोऽस्मि ॥ ४५॥

videhayogena ca sāṅkhyarūpaṃ janena labhyaṃ gaṇarājamīḍyam |sadā hyupādhau na hitaṃ gaṇeśaṃ suśāntayogeśvaramānato'smi || 45||

सुसंस्थितं सर्वविलासयुक्तं हृद्विज्ञबोधात्मकमादिदेवम् ।अभेदमात्रं परमार्थरूपं सुशान्तयोगेश्वरमानतोऽस्मि ॥ ४६॥

susaṃsthitaṃ sarvavilāsayuktaṃ hṛdvijñabodhātmakamādidevam |abhedamātraṃ paramārtharūpaṃ suśāntayogeśvaramānato'smi || 46||

अनादिमध्यान्तमनन्तपारं सुसंवृतं सन्ततमात्मरूपम् ।गणेशमाद्यं पुरुषं पुराणं सुशान्तयोगेश्वरमानतोऽस्मि ॥ ४७॥

anādimadhyāntamanantapāraṃ susaṃvṛtaṃ santatamātmarūpam |gaṇeśamādyaṃ puruṣaṃ purāṇaṃ suśāntayogeśvaramānato'smi || 47||

अनादिरूपं प्रकृतिप्रभेदं सदा सुबिन्द्वात्मकमप्रमेयम् ।अमायिकं मोहकरं प्रसिद्धं सुशान्तयोगेश्वरमानतोऽस्मि ॥ ४८॥

anādirūpaṃ prakṛtiprabhedaṃ sadā subindvātmakamaprameyam |amāyikaṃ mohakaraṃ prasiddhaṃ suśāntayogeśvaramānato'smi || 48||

गुणेषु रूपेण विराजमानमपारमव्यक्तमयं गणेशम् ।गुणैर्विहीनं गुणचालकं च सुशान्तयोगेश्वरमानतोऽस्मि ॥ ४९॥

guṇeṣu rūpeṇa virājamānamapāramavyaktamayaṃ gaṇeśam |guṇairvihīnaṃ guṇacālakaṃ ca suśāntayogeśvaramānato'smi || 49||

समस्वरूपं जगदीशमेकं सुषुप्तिरूपं सकलावभासम् ।अनादिमायामयमोहधारं सुशान्तयोगेश्वरमानतोऽस्मि ॥ ५०॥

samasvarūpaṃ jagadīśamekaṃ suṣuptirūpaṃ sakalāvabhāsam |anādimāyāmayamohadhāraṃ suśāntayogeśvaramānato'smi || 50||

जगन्मयं सूक्ष्मविभूतिधारं हिरण्मयं स्वप्नगतं गणेशम् ।जनस्य विज्ञानकर पुराणं सुशान्तयोगेश्वरमानतोऽस्मि ॥ ५१॥

jaganmayaṃ sūkṣmavibhūtidhāraṃ hiraṇmayaṃ svapnagataṃ gaṇeśam |janasya vijñānakara purāṇaṃ suśāntayogeśvaramānato'smi || 51||

स्तुतं सदा देवमुनीन्द्रसिद्धैः स्थितं जगन्मोहमयं प्रसिद्धम् ।सदा परं स्थूलविहारयुक्तं सुशान्तयोगेश्वरमानतोऽस्मि ॥ ५२॥

stutaṃ sadā devamunīndrasiddhaiḥ sthitaṃ jaganmohamayaṃ prasiddham |sadā paraṃ sthūlavihārayuktaṃ suśāntayogeśvaramānato'smi || 52||

असत्स्वरूपं विविधेष्वभेदं गणेशमायामयशक्तिरूपम् ।मनोवचोहीनमहानुभावं सुशान्तयोगेश्वरमानतोऽस्मि ॥ ५३॥

asatsvarūpaṃ vividheṣvabhedaṃ gaṇeśamāyāmayaśaktirūpam |manovacohīnamahānubhāvaṃ suśāntayogeśvaramānato'smi || 53||

रविस्वरूपं ह्यमृतं पुराणमभेदमेकात्मकमात्मरूपम् ।अखण्डमानन्दघनं गणेशं सुशान्तयोगेश्वरमानतोऽस्मि ॥ ५४॥

ravisvarūpaṃ hyamṛtaṃ purāṇamabhedamekātmakamātmarūpam |akhaṇḍamānandaghanaṃ gaṇeśaṃ suśāntayogeśvaramānato'smi || 54||

समं सदा विष्णुमचिन्त्यभावमभेदभेदादिविवर्जितं च ।सदा सुखानन्दमयं गणेशं सुशान्तयोगेश्वरमानतोऽस्मि ॥ ५५॥

samaṃ sadā viṣṇumacintyabhāvamabhedabhedādivivarjitaṃ ca |sadā sukhānandamayaṃ gaṇeśaṃ suśāntayogeśvaramānato'smi || 55||

अचिन्त्यरूपं सकलैर्विहीनं सदाशिवं मोहविहीनमाद्यम् ।अपारवेशं स्वसुखावभासं सुशान्तयोगेश्वरमानतोऽस्मि ॥ ५६॥

acintyarūpaṃ sakalairvihīnaṃ sadāśivaṃ mohavihīnamādyam |apāraveśaṃ svasukhāvabhāsaṃ suśāntayogeśvaramānato'smi || 56||

पदार्थरूपं विविधप्रभेदं विकारयुक्तं परमप्रमेयम् ।बोधात्मकं त्वंपदरूपमेव सुशान्तयोगेश्वरमानतोऽस्मि ॥ ५७॥

padārtharūpaṃ vividhaprabhedaṃ vikārayuktaṃ paramaprameyam |bodhātmakaṃ tvaṃpadarūpameva suśāntayogeśvaramānato'smi || 57||

अखण्डमेकात्मकविश्वरूपं विकारहीनं महदप्रमेयम् ।गणेशमेकं हृदि तत्पदस्थं सुशान्तयोगेश्वरमानतोऽस्मि ॥ ५८॥

akhaṇḍamekātmakaviśvarūpaṃ vikārahīnaṃ mahadaprameyam |gaṇeśamekaṃ hṛdi tatpadasthaṃ suśāntayogeśvaramānato'smi || 58||

गणेश चैते विविधस्वरूपाः कलावतारा भवतो हि भव्याः ।सुशान्तमेकं भवदीयरूपं कथं विभाव्यं मनसा न लभ्यम् ॥ ५९॥

gaṇeśa caite vividhasvarūpāḥ kalāvatārā bhavato hi bhavyāḥ |suśāntamekaṃ bhavadīyarūpaṃ kathaṃ vibhāvyaṃ manasā na labhyam || 59||

यदा च सर्वात्ममयं वदामि तदा तु सोऽहं प्रकृतिस्वरूपम् ।गकाररूपं जगदीशभेदं गकारमेकं शरणं प्रपद्ये ॥ ६०॥

yadā ca sarvātmamayaṃ vadāmi tadā tu so'haṃ prakṛtisvarūpam |gakārarūpaṃ jagadīśabhedaṃ gakāramekaṃ śaraṇaṃ prapadye || 60||

मनोवचोहीनमथो वदामि ह्ययोगसंयोगमयं णकारम् ।निवृत्तिरूपं शरणं सदा वै नमामि ते सर्ववरिष्ठमाद्यम् ॥ ६१॥

manovacohīnamatho vadāmi hyayogasaṃyogamayaṃ ṇakāram |nivṛttirūpaṃ śaraṇaṃ sadā vai namāmi te sarvavariṣṭhamādyam || 61||

न शक्यसे वक्तुमवक्तुमेवमतो भवन्तं प्रणमामि ढुण्ढे ।गणेश विघ्नेश महानुभाव प्रसीद भो ब्रह्मपते महात्मन् ॥ ६२॥

na śakyase vaktumavaktumevamato bhavantaṃ praṇamāmi ḍhuṇḍhe |gaṇeśa vighneśa mahānubhāva prasīda bho brahmapate mahātman || 62||

जन्म धन्यं धन्यमक्षि विद्या ज्ञानं तपः फलम् ।येन दृष्टो गणाधीशः कृतकृत्योऽम्मि साम्प्रतम् ॥ ६३॥

janma dhanyaṃ dhanyamakṣi vidyā jñānaṃ tapaḥ phalam |yena dṛṣṭo gaṇādhīśaḥ kṛtakṛtyo'mmi sāmpratam || 63||

मह्यं यदि वरो दयस्तदा भक्तिं दृढां त्वयि ।देहि मे परमेशान यया मोहो विनश्यति ॥ ६४॥

mahyaṃ yadi varo dayastadā bhaktiṃ dṛḍhāṃ tvayi |dehi me parameśāna yayā moho vinaśyati || 64||

सृष्टिसजनसामर्थ्यं भजतां कामपूरणम ।निर्विघ्नं सर्वकार्येषु देहि विघ्नविनाशन ॥ ६५॥

sṛṣṭisajanasāmarthyaṃ bhajatāṃ kāmapūraṇama |nirvighnaṃ sarvakāryeṣu dehi vighnavināśana || 65||

गुणेशवचनं श्रुत्वा सुप्रसन्नो गजाननः ।मेघगाम्भीर्यसादृश्यं वचनं त्विदमब्रवीत् ॥ ६६॥

guṇeśavacanaṃ śrutvā suprasanno gajānanaḥ |meghagāmbhīryasādṛśyaṃ vacanaṃ tvidamabravīt || 66||

श्रीगणेश उवाच ।भविता में महाभक्तिः मृष्टीनां रचनास्तथा ।नानाविधा भविष्यन्ति निर्विघ्नं सर्वदा भवत् ॥ ६७॥

śrīgaṇeśa uvāca |bhavitā meṃ mahābhaktiḥ mṛṣṭīnāṃ racanāstathā |nānāvidhā bhaviṣyanti nirvighnaṃ sarvadā bhavat || 67||

भवद्भ्यः सर्वदातृत्वं भविष्यति तथाऽनघ ।महाकार्ये समुत्पन्ने दाम्येऽहं दर्शनं च ते ॥ ६८॥

bhavadbhyaḥ sarvadātṛtvaṃ bhaviṣyati tathā'nagha |mahākārye samutpanne dāmye'haṃ darśanaṃ ca te || 68||

स्तोत्रं त्वया कृतं यच्च सर्वमान्यं भविष्यति ।पठतां शृण्वतां चैव ब्रह्मभूतकरं महत् ॥ ६९॥

stotraṃ tvayā kṛtaṃ yacca sarvamānyaṃ bhaviṣyati |paṭhatāṃ śṛṇvatāṃ caiva brahmabhūtakaraṃ mahat || 69||

स्तोत्रं ब्रह्मपतेः साक्षान्नाम्ना वै स्तुतिसारकम् ।भविष्यति महाभाग सर्वसिद्धिकरं परम् ॥ ७०॥

stotraṃ brahmapateḥ sākṣānnāmnā vai stutisārakam |bhaviṣyati mahābhāga sarvasiddhikaraṃ param || 70||

सकामेभ्यो जनेभ्योऽपि कामदं चिन्तितप्रदम् ।निष्कामेभ्यः स्वभक्तेभ्यो मुक्तिदं प्रभविष्यति ॥ ७१॥

sakāmebhyo janebhyo'pi kāmadaṃ cintitapradam |niṣkāmebhyaḥ svabhaktebhyo muktidaṃ prabhaviṣyati || 71||

मम प्रीतिकरं पूर्णं सारं सर्वत्र भाषितम् ।त्रिकालपठनादस्य साध्योऽहं नात्र संशयः ॥ ७२॥

mama prītikaraṃ pūrṇaṃ sāraṃ sarvatra bhāṣitam |trikālapaṭhanādasya sādhyo'haṃ nātra saṃśayaḥ || 72||

श्रीशिव उवाच ।इत्युक्त्वान्तर्हितः साक्षाद्गणेशो भक्तवत्सलः ।देवस्यापि वियोगेन गुणेशो विमना ह्यभूत् ॥ ७३॥

śrīśiva uvāca |ityuktvāntarhitaḥ sākṣādgaṇeśo bhaktavatsalaḥ |devasyāpi viyogena guṇeśo vimanā hyabhūt || 73||

इति गुणेशकृता समाप्ता गणेशस्तुतिः । १\।८

iti guṇeśakṛtā samāptā gaṇeśastutiḥ | 1\|8