धूम्रवर्णस्तोत्रम् श्रीशिवकृतं Dhumravarna Stotram Shri Shivakritam

॥ श्रीगणेशाय नमः ॥नमस्ते धूम्रवर्णाय नानाखेलकराय च ।अमेयशक्तये तुभ्यं मायिने धर्मरक्षिणे ॥ ५॥

|| śrīgaṇeśāya namaḥ ||namaste dhūmravarṇāya nānākhelakarāya ca |ameyaśaktaye tubhyaṃ māyine dharmarakṣiṇe || 5||

अनाथानां प्रणाथाय नाथनाथाय ते नमः ।सगुणाय नमस्तुभ्यं निर्गुणाय नमो नमः ॥ ६॥

anāthānāṃ praṇāthāya nāthanāthāya te namaḥ |saguṇāya namastubhyaṃ nirguṇāya namo namaḥ || 6||

सगुणनिर्गुणाभ्यां च हीनाय योगरूपिणे ।योगाकारेण सर्वत्र संस्थिताय नमो नमः ॥ ७॥

saguṇanirguṇābhyāṃ ca hīnāya yogarūpiṇe |yogākāreṇa sarvatra saṃsthitāya namo namaḥ || 7||

नरकुञ्जररूपाय धूम्रवर्णधराय च ।द्विभुजायाश्ववाहाय हेरम्बाय नमो नमः ॥ ८॥

narakuñjararūpāya dhūmravarṇadharāya ca |dvibhujāyāśvavāhāya herambāya namo namaḥ || 8||

खड्गचर्मधरायैव नाना चन्दनचर्चित ।नाना पुष्पधरायैव सर्वाध्यक्षाय ते नमः ॥ ९॥

khaḍgacarmadharāyaiva nānā candanacarcita |nānā puṣpadharāyaiva sarvādhyakṣāya te namaḥ || 9||

पूर्णाय पूर्णरूपाय गणेशाय परात्मने ।धर्मरक्ष महाभाग गजानन नमोऽस्तु ते ॥ १०॥

pūrṇāya pūrṇarūpāya gaṇeśāya parātmane |dharmarakṣa mahābhāga gajānana namo'stu te || 10||

धर्मान्ना अमराः सर्वे सुरेश्वर कृतास्त्वया ।नष्टे धर्मेऽधुना नाथ मरिष्यामस्त्वदग्रतः ॥ ११॥

dharmānnā amarāḥ sarve sureśvara kṛtāstvayā |naṣṭe dharme'dhunā nātha mariṣyāmastvadagrataḥ || 11||

बुद्धमायासहायेन कलिना निर्जिता वयम् ।विष्णुशम्भुमुखा देवास्तान् पालय महोदर ॥ १२॥

buddhamāyāsahāyena kalinā nirjitā vayam |viṣṇuśambhumukhā devāstān pālaya mahodara || 12||

सार्धेन द्विसहस्रेण प्रभो वर्षैर्विनिर्जिताः ।क्षुद्रदेवाः स्वग्रामस्थाः कलिना पपलुश्च ते ॥ १३॥

sārdhena dvisahasreṇa prabho varṣairvinirjitāḥ |kṣudradevāḥ svagrāmasthāḥ kalinā papaluśca te || 13||

ततः पञ्चसहस्रेण वर्षैस्तास्तीर्थदेवताः ।तीर्थानि कलिना नाथ जितानि पपलुस्तथा ॥ १४॥

tataḥ pañcasahasreṇa varṣaistāstīrthadevatāḥ |tīrthāni kalinā nātha jitāni papalustathā || 14||

ततो दशसहस्रेण जिता विष्णुशिवादयः ।कलिना पृथिवीं त्यक्त्वा पपलुर्देवसत्तमाः ॥ १५॥

tato daśasahasreṇa jitā viṣṇuśivādayaḥ |kalinā pṛthivīṃ tyaktvā papalurdevasattamāḥ || 15||

कर्माकर्मविकर्माख्या शक्तिस्तत्र स्थिता भवेत् ।विकर्मगुणसंयुक्ता बुद्धमायात्मिका प्रभो ॥ १६॥

karmākarmavikarmākhyā śaktistatra sthitā bhavet |vikarmaguṇasaṃyuktā buddhamāyātmikā prabho || 16||

त्वमपि त्वादृशो भूत्वा फलदाता स्थितः स्वयम् ।देवरूपधरः स्वामिन् सदा कलिप्रवर्तकः ॥ १७॥

tvamapi tvādṛśo bhūtvā phaladātā sthitaḥ svayam |devarūpadharaḥ svāmin sadā kalipravartakaḥ || 17||

न ते देवस्वरूपं तु कलिः क्रोधसमन्वितः ।छेत्तुं समुद्यतः क्वापि त्वां चिन्तयति सर्वदा ॥ १८॥

na te devasvarūpaṃ tu kaliḥ krodhasamanvitaḥ |chettuṃ samudyataḥ kvāpi tvāṃ cintayati sarvadā || 18||

तव चिन्तनभावेन वयं सर्वे पराजिताः ।कलिना देवदेवेश उपोषणयुताः कृताः ॥ १९॥

tava cintanabhāvena vayaṃ sarve parājitāḥ |kalinā devadeveśa upoṣaṇayutāḥ kṛtāḥ || 19||

अधुना लेशमात्रेण धर्मस्तिष्ठति विघ्नप ।तं हनिष्यति वेगेन कलिः परमदारुणः ॥ २०॥

adhunā leśamātreṇa dharmastiṣṭhati vighnapa |taṃ haniṣyati vegena kaliḥ paramadāruṇaḥ || 20||

नष्टे धर्मे गणाधीश अधर्मः केवलो महान् ।भविष्यति पुनर्धर्मं किं स्रक्ष्यसि च देवप ॥ २१॥

naṣṭe dharme gaṇādhīśa adharmaḥ kevalo mahān |bhaviṣyati punardharmaṃ kiṃ srakṣyasi ca devapa || 21||

अतो लेशमयं धर्मं रक्षस्व गणनायक ।नोचेद्धर्मशरीरास्तु वयं नष्टा भवामहे ॥ २२॥

ato leśamayaṃ dharmaṃ rakṣasva gaṇanāyaka |noceddharmaśarīrāstu vayaṃ naṣṭā bhavāmahe || 22||

रक्ष रक्ष दयासिन्धो धूम्रवर्ण गजानन ।मृत्युप्रायाननाथांश्च देवान् धर्मप्ररक्षकान् ॥ २३॥

rakṣa rakṣa dayāsindho dhūmravarṇa gajānana |mṛtyuprāyānanāthāṃśca devān dharmaprarakṣakān || 23||

एवमुक्त्वा गणाधीशं प्रणेमुरमराः पुनः ।रुरुदुर्दुःखसंयुक्तांस्तान् जगाद गजाननः ॥ २४॥

evamuktvā gaṇādhīśaṃ praṇemuramarāḥ punaḥ |rurudurduḥkhasaṃyuktāṃstān jagāda gajānanaḥ || 24||

(फलश्रुतिः)धूम्रवर्ण उवाच ।मा भयं कुरुत प्राज्ञा धर्मं संरक्षयाम्यहम् ।सर्वैरजेयमुग्रं तं कलिं हत्वा विशेषतः ॥ २५॥

(phalaśrutiḥ)dhūmravarṇa uvāca |mā bhayaṃ kuruta prājñā dharmaṃ saṃrakṣayāmyaham |sarvairajeyamugraṃ taṃ kaliṃ hatvā viśeṣataḥ || 25||

भवत्कृतमिदं स्तोत्रं कलिदोषहरं भवेत् ।पठते शृण्वते देवाः सर्वसिद्धिप्रदायकम् ॥ २६॥

bhavatkṛtamidaṃ stotraṃ kalidoṣaharaṃ bhavet |paṭhate śṛṇvate devāḥ sarvasiddhipradāyakam || 26||

धनधान्यप्रदं चैवारोग्यसम्पत्प्रवर्धनम् ।पुत्रपौत्रकलत्रादिदायकं प्रभविष्यति ॥ २७॥

dhanadhānyapradaṃ caivārogyasampatpravardhanam |putrapautrakalatrādidāyakaṃ prabhaviṣyati || 27||

एवमुक्त्वा स्वदेहात् स धूम्रवर्णः प्रतापवान् ।निर्ममे विविधां सेनां नानाशस्त्रसमन्विताम् ॥ २८॥

evamuktvā svadehāt sa dhūmravarṇaḥ pratāpavān |nirmame vividhāṃ senāṃ nānāśastrasamanvitām || 28||

नानावाहनगां पूर्णतेजोयुक्तां महर्षयः ।तया युक्तो जनान् सर्वान् जघान मलिनान् प्रभुः ॥ २९॥

nānāvāhanagāṃ pūrṇatejoyuktāṃ maharṣayaḥ |tayā yukto janān sarvān jaghāna malinān prabhuḥ || 29||

म्लेच्छप्रायांश्च विविधान् म्लेच्छान् कलिमलैर्युतान् ।स्वयं सन्त्रासयामास कलिं धर्मवधे रतम् ॥ ३०॥

mlecchaprāyāṃśca vividhān mlecchān kalimalairyutān |svayaṃ santrāsayāmāsa kaliṃ dharmavadhe ratam || 30||

तस्याङ्गवायुना स्पृष्टा जना धर्मपरायणाः ।भययुक्ता गणेशं ते शरणं जग्मुरादरात् ॥ ३१॥

tasyāṅgavāyunā spṛṣṭā janā dharmaparāyaṇāḥ |bhayayuktā gaṇeśaṃ te śaraṇaṃ jagmurādarāt || 31||

कलिर्गुप्तस्वरूपेण युयुधे जनसंश्रितः ।गणेशैः संहतः सोऽपि बभूव ह हतोद्यमः ॥ ३२॥

kalirguptasvarūpeṇa yuyudhe janasaṃśritaḥ |gaṇeśaiḥ saṃhataḥ so'pi babhūva ha hatodyamaḥ || 32||

ततो भयसमायुक्तं त्यक्त्वा हृज्जन्मिनां कलिः ।देहधारी समागत्य धूम्रवर्णं ननाम सः ॥ ३३॥

tato bhayasamāyuktaṃ tyaktvā hṛjjanmināṃ kaliḥ |dehadhārī samāgatya dhūmravarṇaṃ nanāma saḥ || 33||

तुष्टाव पूज्य तं नत्वा धूम्रवर्णं महाबलम् ।ज्ञात्वा विघ्नेश्वरं भक्त्या हृष्टरोमा महायशाः ॥ ३४॥

tuṣṭāva pūjya taṃ natvā dhūmravarṇaṃ mahābalam |jñātvā vighneśvaraṃ bhaktyā hṛṣṭaromā mahāyaśāḥ || 34||

इति श्रीशिवकृतं धूम्रवर्णस्तोत्रं सम्पूर्णम् ॥॥ मुद्गलपुराणं अष्टमः खण्डः । अध्यायः १६ । ८\।१६ ५३४॥– ॥ मुद्गलपुराणं अष्टमः खण्डः । अध्यायः १६ । ८।१६ ५-३४॥

iti śrīśivakṛtaṃ dhūmravarṇastotraṃ sampūrṇam |||| mudgalapurāṇaṃ aṣṭamaḥ khaṇḍaḥ | adhyāyaḥ 16 | 8\|16 534||– || mudgalapurāṇaṃ aṣṭamaḥ khaṇḍaḥ | adhyāyaḥ 16 | 8|16 5-34||