वज्रयोगिन्याः स्तुतिप्रणिधानम् Vajrayoginyah Stutipranidhanam

ॐ नमः श्री वज्रयोगिन्यै, नमोबुद्धधर्मसङ्घेभ्यः,नमो गुरुबुद्धबोधिसत्त्वेभ्यः, नमो लोचनादिदशवज्रविलासिनीभ्यः,नमो यमान्तकादिदशक्रोधवीरेभ्यः सप्रज्ञेभ्यः ।ॐ ओ आ हूं इति कायवाकचित इन्द्रियविज्ञानानि, वाकचित्तानि मनोविज्ञानानि,परचित्तज्ञानाभिज्ञा, परकायप्रवेशाभिज्ञा पुण्डरीकेषु नाभिस्थेरक्तसूर्य मण्डलः ॥ १॥

oṃ namaḥ śrī vajrayoginyai, namobuddhadharmasaṅghebhyaḥ,namo gurubuddhabodhisattvebhyaḥ, namo locanādidaśavajravilāsinībhyaḥ,namo yamāntakādidaśakrodhavīrebhyaḥ saprajñebhyaḥ |oṃ o ā hūṃ iti kāyavākacita indriyavijñānāni, vākacittāni manovijñānāni,paracittajñānābhijñā, parakāyapraveśābhijñā puṇḍarīkeṣu nābhistheraktasūrya maṇḍalaḥ || 1||

धर्मोदया पद्ममध्ये सिन्दूरारुणरूपिणी ।त्रिशृङ्गा हि त्रिकोणा वा चतुःपीठसमन्विता ॥ २॥

dharmodayā padmamadhye sindūrāruṇarūpiṇī |triśṛṅgā hi trikoṇā vā catuḥpīṭhasamanvitā || 2||

ह्रीङ्कारं मध्यभागेऽस्याः पीतवर्णः प्रकीर्तितः ।तद्भवा पीतवर्णा च अवधूत्या(ती) स्वयं स्थिता ॥ ३॥

hrīṅkāraṃ madhyabhāge'syāḥ pītavarṇaḥ prakīrtitaḥ |tadbhavā pītavarṇā ca avadhūtyā(tī) svayaṃ sthitā || 3||

ललनायां तु सुश्यामा रसनायां च गौरिका ।प्रत्यालीढपदा नाम्ना मध्ये पीता मनोरमा ॥ ४॥

lalanāyāṃ tu suśyāmā rasanāyāṃ ca gaurikā |pratyālīḍhapadā nāmnā madhye pītā manoramā || 4||

त्रिमार्गे संस्थिता देवी त्रिकायवज्रयोगिनी ।सेयं नाम्ना भवेदेका सर्वसम्बुद्धडाकिनी ॥ ५॥

trimārge saṃsthitā devī trikāyavajrayoginī |seyaṃ nāmnā bhavedekā sarvasambuddhaḍākinī || 5||

त्रैलोक्ये दिव्यरूपा च सर्वाशापरिपूरिका ।स्वकर्तिना कर्तितं च वामहस्ते स्वमस्तकम् ॥ ६॥

trailokye divyarūpā ca sarvāśāparipūrikā |svakartinā kartitaṃ ca vāmahaste svamastakam || 6||

दक्षिणेऽस्या स्थिता कर्तिर्जगतो दुःखच्छेदिनी ।अस्या वामे स्थिता श्यामा नाम्ना सा वरवर्णिनी ॥ ७॥

dakṣiṇe'syā sthitā kartirjagato duḥkhacchedinī |asyā vāme sthitā śyāmā nāmnā sā varavarṇinī || 7||

कर्परः सव्यहस्ते च कर्तिर्वामे च संस्थिता ।दक्षिणे चैव पीता वै वज्रवैरोचनी स्थिता ॥ ८॥

karparaḥ savyahaste ca kartirvāme ca saṃsthitā |dakṣiṇe caiva pītā vai vajravairocanī sthitā || 8||

कर्तिका दक्षिणे हस्ते वामे कपालधारिणी ।प्रत्यालीढपदा देवी नग्निका तु विशेषतः ॥ ९॥

kartikā dakṣiṇe haste vāme kapāladhāriṇī |pratyālīḍhapadā devī nagnikā tu viśeṣataḥ || 9||

करौ च द्वौ तयोः पादौ विपरीतौ तथा स्थितौ ।बुद्धानां जननी मध्या सम्यक्सम्बुद्धरूपिणी ॥ १०॥

karau ca dvau tayoḥ pādau viparītau tathā sthitau |buddhānāṃ jananī madhyā samyaksambuddharūpiṇī || 10||

अक्षया सुभगा नित्यं हन्त्री च मृत्युजन्मनोः ।धर्मसम्भोगनिर्माणमहासुखस्वरूपिणी ॥ ११॥

akṣayā subhagā nityaṃ hantrī ca mṛtyujanmanoḥ |dharmasambhoganirmāṇamahāsukhasvarūpiṇī || 11||

सेयं त्रिभुवने देवी राजये चन्द्रवत्सदा ।कबन्धादवधूत्याश्च प्रविशेत्स्वमुखेष्वसृक् ॥ १२॥

seyaṃ tribhuvane devī rājaye candravatsadā |kabandhādavadhūtyāśca praviśetsvamukheṣvasṛk || 12||

ललनारसनाभ्यां च निःसृत्य शिरसि तथा ।करूणारक्तरूपेण पिबन्ती सर्वशान्तये ॥ १३॥

lalanārasanābhyāṃ ca niḥsṛtya śirasi tathā |karūṇāraktarūpeṇa pibantī sarvaśāntaye || 13||

दुःखं संप्रेक्ष्य लोकानां चतुर्मारनिषूदिनी ।दौर्मनस्यादि कर्त्या च कर्तन्ती सर्वमेव तत् ॥ १४॥

duḥkhaṃ saṃprekṣya lokānāṃ caturmāraniṣūdinī |daurmanasyādi kartyā ca kartantī sarvameva tat || 14||

स्तुता हि जिनमातस्त्वं सुप्रसीद भवार्णवे ।स्वार्थं कर्तुं परार्थं च भवाम्यहं यथा क्षमः ॥ १५॥

stutā hi jinamātastvaṃ suprasīda bhavārṇave |svārthaṃ kartuṃ parārthaṃ ca bhavāmyahaṃ yathā kṣamaḥ || 15||

तत्त्वया देवी कर्तव्यमनुग्रहं मयि सृज ।बालोऽहमज्ञरूपी च कायवाकचित्तदोषतः ॥ १६॥

tattvayā devī kartavyamanugrahaṃ mayi sṛja |bālo'hamajñarūpī ca kāyavākacittadoṣataḥ || 16||

गुरुभक्तिं न जानेऽहं त्वद्भक्तिं च विशेषतः ।इत्याकलय लोकेशि कृपा मयि विधीयताम् ॥ १७॥

gurubhaktiṃ na jāne'haṃ tvadbhaktiṃ ca viśeṣataḥ |ityākalaya lokeśi kṛpā mayi vidhīyatām || 17||

कायवाकचेतसां साम्यं कुरु मे त्वं प्रसादतः ।येन मुञ्चामि संसारं षड्गतिं न विशाम्यहम् ॥ १८॥

kāyavākacetasāṃ sāmyaṃ kuru me tvaṃ prasādataḥ |yena muñcāmi saṃsāraṃ ṣaḍgatiṃ na viśāmyaham || 18||

यथा च वज्रवद्देहो यावन्मुक्तो भवाम्यहम् ।मारैः सर्वैः परित्यक्तो यथा कायो भवेन्मम ॥ १९॥

yathā ca vajravaddeho yāvanmukto bhavāmyaham |māraiḥ sarvaiḥ parityakto yathā kāyo bhavenmama || 19||

लीलया सिद्धिभागाः स्युर्निर्विघ्नः सर्वसिद्धिभाक् ।सर्वसाधनसिद्धि स्यात् कायश्चैवाजरामरः ॥ २०॥

līlayā siddhibhāgāḥ syurnirvighnaḥ sarvasiddhibhāk |sarvasādhanasiddhi syāt kāyaścaivājarāmaraḥ || 20||

त्रासनं सर्वमाराणां सर्वाशापरिपूरणम् ।देहि मे त्वं वरां सिद्धिं हित्वा चैव गमागमम् ॥ २१॥

trāsanaṃ sarvamārāṇāṃ sarvāśāparipūraṇam |dehi me tvaṃ varāṃ siddhiṃ hitvā caiva gamāgamam || 21||

मनो विलीयतां देवि पञ्चेन्द्रियानुसंयुतम् ।सिद्।ह्ध्येच्च वज्रसत्त्वायुर्यौवनारोग्यसत्सुखम् ॥ २२॥

mano vilīyatāṃ devi pañcendriyānusaṃyutam |sid|hdhyecca vajrasattvāyuryauvanārogyasatsukham || 22||

त्वत्प्रसादान्महामुद्रा सर्वेषामेव सम्भवेत् ।देवासुरमनुष्याश्च यत्र यत्र च संस्थिताः ।सुखिनस्ते च सर्वे स्युर्बुद्धत्वफललाभिनः ॥ २३॥

tvatprasādānmahāmudrā sarveṣāmeva sambhavet |devāsuramanuṣyāśca yatra yatra ca saṃsthitāḥ |sukhinaste ca sarve syurbuddhatvaphalalābhinaḥ || 23||

इति श्रीगुह्यसमयतन्त्रे त्रिकायवज्रयोगिन्याः स्तुतिप्रणिधानं सम्पूर्णम् ।इति सिद्धाचार्यकृतं श्रीविरूपादानाम् सम्पूर्णम् ॥

iti śrīguhyasamayatantre trikāyavajrayoginyāḥ stutipraṇidhānaṃ sampūrṇam |iti siddhācāryakṛtaṃ śrīvirūpādānām sampūrṇam ||