दुर्गासहस्रनामस्तोत्रम् ३ Shridurgasahasranamastotram

ध्यानम् ।१\। सिंहस्था शशिशेखरा मरकतप्रख्यैश्चतुर्भिर्भुजैः ।शङ्खं चक्रधनुः शरांश्च दधती नेत्रैस्त्रिभिः शोभिता ॥आमुक्ताङ्गदहारकङ्कणरणत्काञ्ची रणन्नूपुरा ।दुर्गा दुर्गतिहारिणी भवतु नो रत्नेल्लसत्कुण्डला ॥ २\। मातर्मे मधुकैटभघ्नि महिषप्राणापहारोद्यमे ।हेलानिर्जितधूम्रलोचनवधे हे चण्डमुण्डार्दिनि ॥निश्शेषीकृतरक्तबीजदनुजे नित्ये निशुम्भापहे ।शुम्भध्वंसिनि संहराशु दुरितं दुर्गे नमस्तेऽम्बिके ॥ ३\। हेमप्रख्यामिन्दुखण्डार्धमौलिम् ।शङ्खारिष्टाभीतिहस्तां त्रिणेत्राम् ॥हेमाब्जस्थां पीतवस्त्रां प्रसन्नाम् ।देवीं दुर्गां दिव्यरूपां नमामि ॥ ४\। उद्यद्विद्युत्करालाकुलहरिगलसंस्थारिशङ्खासिखेटेष्विष्वासाख्यत्रिशूलानरिगणभयदा तर्जनीं सन्दधाना ।चर्मास्युत्तीर्णदोर्भिः प्रहरणनिपुणाभिर्वृता कन्यकाभिःदद्यात्कार्शानभीष्टान् त्रिणयनललिता चापि कात्यायनी वः ॥ ५\। अरिशङ्खकृपाणखेटबाणान् सुधनुः शूलककर्तरीं तर्जनीं दधाना ।भजतां महिषोत्तमाङ्गसंस्था नवदूर्वासदृशीश्रियेऽस्तु दुर्गा ॥ॐ श्रीदुर्गा त्रिजगन्माता श्रीमत्कैलासवासिनी ।हिमाचलगुहाकान्तमाणिक्यमणिमण्डपा ॥ १॥

dhyānam | 1\| siṃhasthā śaśiśekharā marakataprakhyaiścaturbhirbhujaiḥ |śaṅkhaṃ cakradhanuḥ śarāṃśca dadhatī netraistribhiḥ śobhitā ||āmuktāṅgadahārakaṅkaṇaraṇatkāñcī raṇannūpurā |durgā durgatihāriṇī bhavatu no ratnellasatkuṇḍalā || 2\| mātarme madhukaiṭabhaghni mahiṣaprāṇāpahārodyame |helānirjitadhūmralocanavadhe he caṇḍamuṇḍārdini ||niśśeṣīkṛtaraktabījadanuje nitye niśumbhāpahe |śumbhadhvaṃsini saṃharāśu duritaṃ durge namaste'mbike || 3\| hemaprakhyāmindukhaṇḍārdhamaulim |śaṅkhāriṣṭābhītihastāṃ triṇetrām ||hemābjasthāṃ pītavastrāṃ prasannām |devīṃ durgāṃ divyarūpāṃ namāmi || 4\| udyadvidyutkarālākulaharigalasaṃsthāriśaṅkhāsikheṭeṣviṣvāsākhyatriśūlānarigaṇabhayadā tarjanīṃ sandadhānā |carmāsyuttīrṇadorbhiḥ praharaṇanipuṇābhirvṛtā kanyakābhiḥdadyātkārśānabhīṣṭān triṇayanalalitā cāpi kātyāyanī vaḥ || 5\| ariśaṅkhakṛpāṇakheṭabāṇān sudhanuḥ śūlakakartarīṃ tarjanīṃ dadhānā |bhajatāṃ mahiṣottamāṅgasaṃsthā navadūrvāsadṛśīśriye'stu durgā ||oṃ śrīdurgā trijaganmātā śrīmatkailāsavāsinī |himācalaguhākāntamāṇikyamaṇimaṇḍapā || 1||

गिरिदुर्गा गौरहस्ता गणनाथवृताङ्गणा ।कल्पकारण्यसंवीतमालतीकुञ्जमन्दिरा ॥ २॥

giridurgā gaurahastā gaṇanāthavṛtāṅgaṇā |kalpakāraṇyasaṃvītamālatīkuñjamandirā || 2||

धर्मसिंहासनारूढा डाकिन्यादि समाश्रिता ।सिद्धविद्याधरामर्त्यवधूटीनिकरस्तुता ॥ ३॥

dharmasiṃhāsanārūḍhā ḍākinyādi samāśritā |siddhavidyādharāmartyavadhūṭīnikarastutā || 3||

चिन्तामणिशिलाक्लृप्तद्वारावलिगृहान्तरा ।कटाक्षवीक्षणापेक्षकमलाक्षिसुराङ्गना ॥ ४॥

cintāmaṇiśilāklṛptadvārāvaligṛhāntarā |kaṭākṣavīkṣaṇāpekṣakamalākṣisurāṅganā || 4||

लीलाभाषणसंलोलकमलासनवल्लभा ।यामलोपनिषन्मन्त्रविलपच्छुकपुङ्गवा ॥ ५॥

līlābhāṣaṇasaṃlolakamalāsanavallabhā |yāmalopaniṣanmantravilapacchukapuṅgavā || 5||

दूर्वादलश्यामरूपा दुर्वारमतविह्वला ।नवकोरकसम्पत्श्रीकल्पकारण्यकुन्तला ॥ ६॥

dūrvādalaśyāmarūpā durvāramatavihvalā |navakorakasampatśrīkalpakāraṇyakuntalā || 6||

वेणीकैतकबर्हांशुविजितस्मरपट्टसा ।कचसीमन्तरेखान्तलम्बमाणिक्यलम्बिका ॥ ७॥

veṇīkaitakabarhāṃśuvijitasmarapaṭṭasā |kacasīmantarekhāntalambamāṇikyalambikā || 7||

पुष्पबाणशरालीढघनधम्मिल्लभूषणा ।भालचन्द्रकलाप्रान्तसत्सुधाबिन्दुमौक्तिका ॥ ८॥

puṣpabāṇaśarālīḍhaghanadhammillabhūṣaṇā |bhālacandrakalāprāntasatsudhābindumauktikā || 8||

चूलीकादम्बिनीश्लिष्टचन्द्ररेखाललाटिका ।चन्द्रमण्डलसंयुक्तभौमकुङ्कुमरेखिका ॥ ९॥

cūlīkādambinīśliṣṭacandrarekhālalāṭikā |candramaṇḍalasaṃyuktabhaumakuṅkumarekhikā || 9||

केशाभ्रमुक्तकोदण्डसदृग्भ्रूलतिकाञ्चिता ।मारचापलसच्छुभ्रमृगनाभिविशेषका ॥ १०॥

keśābhramuktakodaṇḍasadṛgbhrūlatikāñcitā |māracāpalasacchubhramṛganābhiviśeṣakā || 10||

कर्णपूरितकह्लाराकाङ्क्षितापाङ्गवीक्षणा ।क्षीराशयोत्पलाकारविलसत्कृष्णतारका ॥ ११॥

karṇapūritakahlārākāṅkṣitāpāṅgavīkṣaṇā |kṣīrāśayotpalākāravilasatkṛṣṇatārakā || 11||

नेत्रपङ्केरुहान्तःस्थभ्रमद्भ्रमरतारका ।गरलावृतकल्लोलनिमेषाञ्जनभासुरा ॥ १२॥

netrapaṅkeruhāntaḥsthabhramadbhramaratārakā |garalāvṛtakallolanimeṣāñjanabhāsurā || 12||

तीक्ष्णाग्रधारप्रद्युम्नशस्त्रप्रत्यस्त्रवीक्षणा ।मुखचन्द्रसुधापूरलुढन्मीनाभलोचना ॥ १३॥

tīkṣṇāgradhārapradyumnaśastrapratyastravīkṣaṇā |mukhacandrasudhāpūraluḍhanmīnābhalocanā || 13||

मौक्तिकावृतताटङ्कमण्डलद्वयमण्डिता ।कन्दर्पध्वजताकीर्णमकराङ्कितकुण्डला ॥ १४॥

mauktikāvṛtatāṭaṅkamaṇḍaladvayamaṇḍitā |kandarpadhvajatākīrṇamakarāṅkitakuṇḍalā || 14||

कर्णरत्नौघचिन्तार्ककमनीयमुखाम्बुजा ।कारुण्यस्यन्दिवदना कण्ठमूलसुकुङ्कुमा ॥ १५॥

karṇaratnaughacintārkakamanīyamukhāmbujā |kāruṇyasyandivadanā kaṇṭhamūlasukuṅkumā || 15||

ओष्ठबिम्बफलामोदशुकतुण्डाभनासिका ।तिलचम्पकपुष्पश्रीनासिकाभरणोज्ज्वला ॥ १६॥

oṣṭhabimbaphalāmodaśukatuṇḍābhanāsikā |tilacampakapuṣpaśrīnāsikābharaṇojjvalā || 16||

नासाचम्पकसंस्रस्तमधुबिन्दुकमौक्तिका ।मुखपङ्कजकिञ्जल्कमुक्ताजालसुनासिका ॥ १७॥

nāsācampakasaṃsrastamadhubindukamauktikā |mukhapaṅkajakiñjalkamuktājālasunāsikā || 17||

सालुवेशमुखास्वादलोलुपाधरपल्लवा ।रदनांशनटीरङ्गप्रस्तावनपटाधरा ॥ १८॥

sāluveśamukhāsvādalolupādharapallavā |radanāṃśanaṭīraṅgaprastāvanapaṭādharā || 18||

दन्तलक्ष्मीगृहद्वारनीशारांश्वधरच्छदा ।विद्रुमाधरबालार्कमिश्रस्मेरांशुकौमुदी ॥ १९॥

dantalakṣmīgṛhadvāranīśārāṃśvadharacchadā |vidrumādharabālārkamiśrasmerāṃśukaumudī || 19||

मन्त्रबीजाङ्कुराकारद्विजावलिविराजिता ।सल्लापलक्ष्मीमाङ्गल्यमौक्तिकस्रग्रदालया ॥ २०॥

mantrabījāṅkurākāradvijāvalivirājitā |sallāpalakṣmīmāṅgalyamauktikasragradālayā || 20||

ताम्बूलसारसौगन्धिसकलाम्नायतालुका ।कर्णलक्ष्मीविलासार्थमणिदर्पणगण्डभूः ॥ २१॥

tāmbūlasārasaugandhisakalāmnāyatālukā |karṇalakṣmīvilāsārthamaṇidarpaṇagaṇḍabhūḥ || 21||

कपोलमुकुलाक्रान्तकर्णताटङ्कदीधितिः ।मुखपद्मरजस्तूलहरिद्राचूर्णमण्डिता ॥ २२॥

kapolamukulākrāntakarṇatāṭaṅkadīdhitiḥ |mukhapadmarajastūlaharidrācūrṇamaṇḍitā || 22||

कण्ठादर्शप्रभासान्द्रविजितश्रीविराजिता ।देशिकेशहृदानन्दसम्पच्चिबुकपेटिका ॥ २३॥

kaṇṭhādarśaprabhāsāndravijitaśrīvirājitā |deśikeśahṛdānandasampaccibukapeṭikā || 23||

शरभाधीशसम्बद्धमाङ्गल्यमणिकन्धरा ।कस्तूरीपङ्कसञ्जातगलनालमुखाम्बुजा ॥ २४॥

śarabhādhīśasambaddhamāṅgalyamaṇikandharā |kastūrīpaṅkasañjātagalanālamukhāmbujā || 24||

लावण्याम्भोधिमध्यस्थशङ्खसन्निभकन्धरा ।गलशङ्खप्रसूतांशुमुक्तादामविराजिता ॥ २५॥

lāvaṇyāmbhodhimadhyasthaśaṅkhasannibhakandharā |galaśaṅkhaprasūtāṃśumuktādāmavirājitā || 25||

मालतीमल्लिकातुल्यभुजद्वयमनोहरा ।कनकाङ्गदकेयूरच्छविनिर्जितभास्करा ॥ २६॥

mālatīmallikātulyabhujadvayamanoharā |kanakāṅgadakeyūracchavinirjitabhāskarā || 26||

प्रकोष्ठवलयाक्रान्तपरिवेषग्रहद्युतिः ।वलयद्वयवैडूर्यज्वालालीढकराम्बुजा ॥ २७॥

prakoṣṭhavalayākrāntapariveṣagrahadyutiḥ |valayadvayavaiḍūryajvālālīḍhakarāmbujā || 27||

बाहुद्वयलताग्रस्तपल्लवाभकराङ्गुलिः ।करपङ्केरुहभ्राम्यद्रविमण्डलकङ्कणा ॥ २८॥

bāhudvayalatāgrastapallavābhakarāṅguliḥ |karapaṅkeruhabhrāmyadravimaṇḍalakaṅkaṇā || 28||

अङ्गुलीविद्रुमलतापर्वस्वर्णाङ्गुलीयका ।भाग्यप्रदकरान्तस्थशङ्खचक्राङ्कमुद्रिका ॥ २९॥

aṅgulīvidrumalatāparvasvarṇāṅgulīyakā |bhāgyapradakarāntasthaśaṅkhacakrāṅkamudrikā || 29||

करपद्मदलप्रान्तभास्वद्रत्ननखाङ्कुरा ।रत्नग्रैवेयहारातिरमणीयकुचान्तरा ॥ ३०॥

karapadmadalaprāntabhāsvadratnanakhāṅkurā |ratnagraiveyahārātiramaṇīyakucāntarā || 30||

प्रालम्बिकौस्तुभमणिप्रभालिप्तस्तनान्तरा ।शरभाधीशनेत्रांशुकञ्चुकस्तनमण्डला ॥ ३१॥

prālambikaustubhamaṇiprabhāliptastanāntarā |śarabhādhīśanetrāṃśukañcukastanamaṇḍalā || 31||

रतीविवाहकालश्रीपूर्णकुम्भस्तनद्वया ।अनङ्गजीवनप्राणमन्त्रकुम्भस्तनद्वया ॥ ३२॥

ratīvivāhakālaśrīpūrṇakumbhastanadvayā |anaṅgajīvanaprāṇamantrakumbhastanadvayā || 32||

मध्यवल्लीप्राज्यफलद्वयवक्षोजभासुरा ।स्तनपर्वतपर्यन्तचित्रकुङ्कुमपत्रिका ॥ ३३॥

madhyavallīprājyaphaladvayavakṣojabhāsurā |stanaparvataparyantacitrakuṅkumapatrikā || 33||

भ्रमरालीढराजीवकुड्मलस्तनचूचुका ।महाशरभहृद्रागरक्तवस्त्रोत्तरीयका ॥ ३४॥

bhramarālīḍharājīvakuḍmalastanacūcukā |mahāśarabhahṛdrāgaraktavastrottarīyakā || 34||

अनौपम्यातिलावण्यपार्ष्णिभागाभिनन्दिता ।स्तनस्तबकराराजद्रोमवल्लीतलोदरा ॥ ३५॥

anaupamyātilāvaṇyapārṣṇibhāgābhinanditā |stanastabakarārājadromavallītalodarā || 35||

कृष्णरोमावलीकृष्णसप्तपत्रोदरच्छविः ।सौन्दर्यपूरसम्पूर्णप्रवाहावर्तनाभिका ॥ ३६॥

kṛṣṇaromāvalīkṛṣṇasaptapatrodaracchaviḥ |saundaryapūrasampūrṇapravāhāvartanābhikā || 36||

अनङ्गरसपूराब्धितरङ्गाभवलित्रया ।सन्ध्यारुणांशुकौसुम्भपटावृतकटीतटी ॥ ३७॥

anaṅgarasapūrābdhitaraṅgābhavalitrayā |sandhyāruṇāṃśukausumbhapaṭāvṛtakaṭītaṭī || 37||

सप्तकिङ्किणिकाशिञ्जद्रत्नकान्तिकलापिनी ।मेखलादामसङ्कीर्णमयूखावृतनीविका ॥ ३८॥

saptakiṅkiṇikāśiñjadratnakāntikalāpinī |mekhalādāmasaṅkīrṇamayūkhāvṛtanīvikā || 38||

सुवर्णसूत्राकलितसूक्ष्मरत्नाम्बराचला ।वीरेश्वरानङ्गसरित्पुलिनीजघनस्थला ॥ ३९॥

suvarṇasūtrākalitasūkṣmaratnāmbarācalā |vīreśvarānaṅgasaritpulinījaghanasthalā || 39||

असादृश्यनितम्बश्रीरम्यरम्भोरुकाण्डयुक् ।हलमल्लकनेत्राभाव्याप्तसन्धिमनोहरा ॥ ४०॥

asādṛśyanitambaśrīramyarambhorukāṇḍayuk |halamallakanetrābhāvyāptasandhimanoharā || 40||

जानुमण्डलधिक्कारिराशिकूटतटीकटी ।स्मरतूणीरसङ्काशजङ्घाद्वितयसुन्दरी ॥ ४१॥

jānumaṇḍaladhikkārirāśikūṭataṭīkaṭī |smaratūṇīrasaṅkāśajaṅghādvitayasundarī || 41||

गुल्फद्वितयसौभाग्यजिततालफलद्वयी ।द्युमणिम्रक्षणाभाङ्घ्रियुग्मनूपुरमण्डला ॥ ४२॥

gulphadvitayasaubhāgyajitatālaphaladvayī |dyumaṇimrakṣaṇābhāṅghriyugmanūpuramaṇḍalā || 42||

रणद्वलयसल्लापद्रत्नमालाभपादुका ।प्रपदात्मकशस्त्रौघविलसच्चर्मपुस्तका ॥ ४३॥

raṇadvalayasallāpadratnamālābhapādukā |prapadātmakaśastraughavilasaccarmapustakā || 43||

आधारकूर्मपृष्ठाभपादपृष्ठविराजिता ।पादाङ्गुलिप्रभाजालपराजितदिवाकरा ॥ ४४॥

ādhārakūrmapṛṣṭhābhapādapṛṣṭhavirājitā |pādāṅguliprabhājālaparājitadivākarā || 44||

चक्रचामरमत्स्याङ्कचरणस्थलपङ्कजा ।सुरेन्द्रकोटिमुकुटीरत्नसङ्क्रान्तपादुका ॥ ४५॥

cakracāmaramatsyāṅkacaraṇasthalapaṅkajā |surendrakoṭimukuṭīratnasaṅkrāntapādukā || 45||

अव्याजकरुणागुप्ततनुरव्याजसुन्दरी ।शृङ्गाररससाम्राज्यपदपट्टाभिषेचिता ॥ ४६॥

avyājakaruṇāguptatanuravyājasundarī |śṛṅgārarasasāmrājyapadapaṭṭābhiṣecitā || 46||

शिवा भवानी रुद्राणी शर्वाणी सर्वमङ्गला ।उमा कात्यायनी भद्रा पार्वती पावनाकृतिः ॥ ४७॥

śivā bhavānī rudrāṇī śarvāṇī sarvamaṅgalā |umā kātyāyanī bhadrā pārvatī pāvanākṛtiḥ || 47||

मृडानी चण्डिका माता रतिर्मङ्गलदेवता ।काली हैमवती वीरा कपालशूलधारिणी ॥ ४८॥

mṛḍānī caṇḍikā mātā ratirmaṅgaladevatā |kālī haimavatī vīrā kapālaśūladhāriṇī || 48||

शरभा शाम्भवी मायातन्त्रा तन्त्रार्थरूपिणी ।तरुणी धर्मदा धर्मतापसी तारकाकृतिः ॥ ४९॥

śarabhā śāmbhavī māyātantrā tantrārtharūpiṇī |taruṇī dharmadā dharmatāpasī tārakākṛtiḥ || 49||

हरा महेश्वरी मुग्धा हंसिनी हंसवाहना ।भाग्या बलकरी नित्या भक्तिगम्या भयापहा ॥ ५०॥

harā maheśvarī mugdhā haṃsinī haṃsavāhanā |bhāgyā balakarī nityā bhaktigamyā bhayāpahā || 50||