महामारीस्तोत्रम् Mahamaristotram

श्रीगणेशाय नमः ॥देव्युवाच ।पुरा ब्रह्मा तु मां सृष्ट्वा समाहूयाब्रवीद्वचः ।शृणु मे वचनं पुत्रि कुरुष्वाद्याथ सादरम् ॥ १॥

śrīgaṇeśāya namaḥ ||devyuvāca |purā brahmā tu māṃ sṛṣṭvā samāhūyābravīdvacaḥ |śṛṇu me vacanaṃ putri kuruṣvādyātha sādaram || 1||

कलौ जना दुराचारा राजानश्च तथाविधाः ।अतो गत्वा भुवं देवि मृत्युरूपा भवाशु च ॥ २॥

kalau janā durācārā rājānaśca tathāvidhāḥ |ato gatvā bhuvaṃ devi mṛtyurūpā bhavāśu ca || 2||

परद्रव्यापहर्तारः परस्त्रीनिरताः सदा ।देवस्वहरणे सक्ता ब्रह्मस्वहरणे नृप ॥ ३॥

paradravyāpahartāraḥ parastrīniratāḥ sadā |devasvaharaṇe saktā brahmasvaharaṇe nṛpa || 3||

तेषां दोषवशात्त्वं तु जनान् संहर नित्यशः ।ब्रह्मणैवं समादिष्टा इन्द्राद्यैः सुरसत्तमैः ॥ ४॥

teṣāṃ doṣavaśāttvaṃ tu janān saṃhara nityaśaḥ |brahmaṇaivaṃ samādiṣṭā indrādyaiḥ surasattamaiḥ || 4||

भुवं समागता तत्र जनाञ्ज्ञात्वाथ पापिनः ।राज्ञो दोषान्पुरस्कृत्य ग्रामे ग्रामे वसाम्यहम् ।तत्रापि पापिनो हत्वा पुनर्ग्रामान्तरं भजे ॥ ५॥

bhuvaṃ samāgatā tatra janāñjñātvātha pāpinaḥ |rājño doṣānpuraskṛtya grāme grāme vasāmyaham |tatrāpi pāpino hatvā punargrāmāntaraṃ bhaje || 5||

एवं देशानटित्वाऽहं सर्वान्संहृत्य वै जनान् ।पुनर्गच्छामि सदनं ब्रह्मणः परमेष्ठिनः ॥ ६॥

evaṃ deśānaṭitvā'haṃ sarvānsaṃhṛtya vai janān |punargacchāmi sadanaṃ brahmaṇaḥ parameṣṭhinaḥ || 6||

एवं मदागमं ज्ञात्वा बुद्धिमान्पुण्यकृन्नरः ।विचार्य शास्त्रतो नित्यं जागरूको भवेदलम् ॥ ७॥

evaṃ madāgamaṃ jñātvā buddhimānpuṇyakṛnnaraḥ |vicārya śāstrato nityaṃ jāgarūko bhavedalam || 7||

पतन्ति मूषिका यत्र नृत्यन्ति विरमन्ति च ।तद्गृहं तत्क्षणं त्यक्त्वा सकुटुम्बो वने विशेत् ॥ ८॥

patanti mūṣikā yatra nṛtyanti viramanti ca |tadgṛhaṃ tatkṣaṇaṃ tyaktvā sakuṭumbo vane viśet || 8||

तत्र शान्तिं प्रकुर्वीत महादेव्याः समीरिताम् ।जपित्वा च महामन्त्रं पठित्वा स्तोत्रमुत्तमम् ॥ ९॥

tatra śāntiṃ prakurvīta mahādevyāḥ samīritām |japitvā ca mahāmantraṃ paṭhitvā stotramuttamam || 9||

ॐ नमो भगवति महामारिके मृत्युरूपिणि सकुटुम्बं मामव स्वाहा ।वने जलाशयं गत्वा ऊर्ध्वबाहुरधोमुखः ।वीरासने चोपविश्य जपेन्मन्त्रं सहस्रशः ॥ १०॥

oṃ namo bhagavati mahāmārike mṛtyurūpiṇi sakuṭumbaṃ māmava svāhā |vane jalāśayaṃ gatvā ūrdhvabāhuradhomukhaḥ |vīrāsane copaviśya japenmantraṃ sahasraśaḥ || 10||

संस्थाप्य प्रतिमां तत्र धूपदीपोपहारकैः ।सम्पूज्य विधिवत्पश्चाज्जुहुयात्प्रत्यहं नरः ॥ ११॥

saṃsthāpya pratimāṃ tatra dhūpadīpopahārakaiḥ |sampūjya vidhivatpaścājjuhuyātpratyahaṃ naraḥ || 11||

हरिद्राचूर्णमिश्रेण चित्रान्नेनैव संयुतः ।समिद्भिः खदिरैर्भक्त्या ब्राह्मणैश्च समन्वितः ॥ १२॥

haridrācūrṇamiśreṇa citrānnenaiva saṃyutaḥ |samidbhiḥ khadirairbhaktyā brāhmaṇaiśca samanvitaḥ || 12||

पत्नीपुत्रात्मभृत्यैश्च जुहुयादनुवासरम् ।होमान्ते च पठेन्नित्यं स्तोत्रमेतज्जितेन्द्रियः ॥ १३॥

patnīputrātmabhṛtyaiśca juhuyādanuvāsaram |homānte ca paṭhennityaṃ stotrametajjitendriyaḥ || 13||

नमो देवि महादेवि सर्वशोकवशङ्करी ।सर्वदा सर्वतो मह्यं कृपां कुरु कृपामयि ॥ १४॥

namo devi mahādevi sarvaśokavaśaṅkarī |sarvadā sarvato mahyaṃ kṛpāṃ kuru kṛpāmayi || 14||

मेरौ कैलासशिखरे हेमाद्रौ गन्धमादने ।नित्यप्रियकृतावासे मद्यमांसबलिप्रिये ॥ १५॥

merau kailāsaśikhare hemādrau gandhamādane |nityapriyakṛtāvāse madyamāṃsabalipriye || 15||

महासैन्यसमायुक्ते सर्वप्राणविहिंसके ।सर्वाभिचारिके देवि सर्वं त्वं रक्ष सर्वदा ॥ १६॥

mahāsainyasamāyukte sarvaprāṇavihiṃsake |sarvābhicārike devi sarvaṃ tvaṃ rakṣa sarvadā || 16||

यत्र कुत्र स्थले वापि यस्मिन् कस्मिन् यदा तदा ।रक्ष मां रक्ष मां देवि सपुत्रपशुभृत्यकम् ॥ १७॥

yatra kutra sthale vāpi yasmin kasmin yadā tadā |rakṣa māṃ rakṣa māṃ devi saputrapaśubhṛtyakam || 17||

माङ्गल्यं मङ्गलं देहि महामङ्गलदायिनि ।लोकानामभये सर्वमङ्गले मङ्गलप्रिये ॥ १८॥

māṅgalyaṃ maṅgalaṃ dehi mahāmaṅgaladāyini |lokānāmabhaye sarvamaṅgale maṅgalapriye || 18||

इति स्तुत्वा महादेवीं भक्तिभावेन संयुतः ।भुञ्जीत स्वजनैर्युक्तो देवीं तां मनसा स्मरन् ॥ १९॥

iti stutvā mahādevīṃ bhaktibhāvena saṃyutaḥ |bhuñjīta svajanairyukto devīṃ tāṃ manasā smaran || 19||

यदा स्वगृहचैत्येषु ध्वाङ्क्षरावो भविष्यति ।काकशान्तिं ततः कृत्वा गृहं गन्तुमुपक्रमेत् ॥ २०॥

yadā svagṛhacaityeṣu dhvāṅkṣarāvo bhaviṣyati |kākaśāntiṃ tataḥ kṛtvā gṛhaṃ gantumupakramet || 20||

सुमुहूर्ते सुनक्षत्रे स्वलङ्कृत्य ततो गृहम् ।ब्राह्मणैर्बन्धुभिः सार्धं संविशेद्गृहमात्मनः ॥ २१॥

sumuhūrte sunakṣatre svalaṅkṛtya tato gṛham |brāhmaṇairbandhubhiḥ sārdhaṃ saṃviśedgṛhamātmanaḥ || 21||

स्वस्तिवाचनविप्रेभ्यः शान्तिसूक्तोक्तिपूर्वकम् ।दक्षिणां च हिरण्यादिं दद्याच्छाट्यविवर्जितः ॥ २२॥

svastivācanaviprebhyaḥ śāntisūktoktipūrvakam |dakṣiṇāṃ ca hiraṇyādiṃ dadyācchāṭyavivarjitaḥ || 22||

ब्राह्मणान्भोजयित्वा च देवीं तां प्रार्थयेद्गृहे ।गच्छ गच्छ महादेवि स्वस्थानं मङ्गलं कुरु ॥ २३॥

brāhmaṇānbhojayitvā ca devīṃ tāṃ prārthayedgṛhe |gaccha gaccha mahādevi svasthānaṃ maṅgalaṃ kuru || 23||

एवं कृत्यविधानेन मारिकाशान्तिरुत्तमा ।जायते नात्र सन्देहः सत्यं सत्यं समीरितम् ॥ २४॥

evaṃ kṛtyavidhānena mārikāśāntiruttamā |jāyate nātra sandehaḥ satyaṃ satyaṃ samīritam || 24||

इत्येतत्कथितं देव्या देवेभ्यः स्वात्मसम्भवम् ।माहात्म्यं पठितं येन सोऽपि माङ्गल्यमाप्नुयात् ॥ २५॥

ityetatkathitaṃ devyā devebhyaḥ svātmasambhavam |māhātmyaṃ paṭhitaṃ yena so'pi māṅgalyamāpnuyāt || 25||

लिखितं पुस्तकं यस्य गृहे तिष्ठति सर्वदा ।तस्य मारीभयं नास्ति सत्यं सत्यं मयोदितम् ॥ २६॥

likhitaṃ pustakaṃ yasya gṛhe tiṣṭhati sarvadā |tasya mārībhayaṃ nāsti satyaṃ satyaṃ mayoditam || 26||

पुस्तकं पूजयेद्यस्तु श्रद्धया परया सदा ।सोऽपि माङ्गल्यमाप्नोति इहामुत्र परां गतिम् ॥ २७॥

pustakaṃ pūjayedyastu śraddhayā parayā sadā |so'pi māṅgalyamāpnoti ihāmutra parāṃ gatim || 27||

सर्वं त्यक्त्वा साधयेत देवीं यत्नैर्धनैरपि ।स्तोष्यन्ति परया भक्त्या सर्वकामार्थसिद्धये ॥ २८॥

sarvaṃ tyaktvā sādhayeta devīṃ yatnairdhanairapi |stoṣyanti parayā bhaktyā sarvakāmārthasiddhaye || 28||

बिडाला यत्र नश्यन्ति यत्र नश्यन्ति मूषिकाः ।स्थानं तच्च परित्यज्य स्थानं शून्यं च कारयेत् ॥ २९॥

biḍālā yatra naśyanti yatra naśyanti mūṣikāḥ |sthānaṃ tacca parityajya sthānaṃ śūnyaṃ ca kārayet || 29||

इति श्रीदेवीपुराणे श्रीमहामारिकास्तोत्रं सम्पूर्णम् ॥

iti śrīdevīpurāṇe śrīmahāmārikāstotraṃ sampūrṇam ||