लक्ष्मीगायत्री Lakshmi Gayatri

श्रीलक्ष्मीः कल्याणी कमला कमलालया पत्मा ।मामकचेतस्सद्मनि हृतपद्मे वसतु विष्णुना साकम् ॥ १॥

śrīlakṣmīḥ kalyāṇī kamalā kamalālayā patmā |māmakacetassadmani hṛtapadme vasatu viṣṇunā sākam || 1||

तत्सदों श्रीमिति पदैश्चतुर्भिश्चतुरागमैः ।चतुर्मुखस्तुता मह्यमिन्दिरेष्टं प्रयच्छतु ॥ २॥

tatsadoṃ śrīmiti padaiścaturbhiścaturāgamaiḥ |caturmukhastutā mahyamindireṣṭaṃ prayacchatu || 2||

सच्चित्सुखा त्रयीमूत्तिस्सर्वपुण्यफलात्मिका ।सर्वेशमहिषी मह्यमिन्दिरेष्टं प्रयच्छतु ॥ ३॥

saccitsukhā trayīmūttissarvapuṇyaphalātmikā |sarveśamahiṣī mahyamindireṣṭaṃ prayacchatu || 3||

विद्यावेदान्तसिद्धान्तविवेचनविचारजा ।विष्णुस्वरूपिणी मह्यमिन्दिरेष्टं प्रयच्छतु ॥ ४॥

vidyāvedāntasiddhāntavivecanavicārajā |viṣṇusvarūpiṇī mahyamindireṣṭaṃ prayacchatu || 4||

तुरीयाद्वैतविज्ञानसिद्धिसत्त्वस्वरूपिणि ।सर्वतत्त्वमयी मह्यमिन्दिरेष्टं प्रयच्छतु ॥ ५॥

turīyādvaitavijñānasiddhisattvasvarūpiṇi |sarvatattvamayī mahyamindireṣṭaṃ prayacchatu || 5||

वरदाभयदाम्भोजाधरपाणिचतुष्टया ।वागीशजननी मह्यमिन्दिरेष्टं प्रयच्छतु ॥ ६॥

varadābhayadāmbhojādharapāṇicatuṣṭayā |vāgīśajananī mahyamindireṣṭaṃ prayacchatu || 6||

रेचकैः पूरकैः पूर्णकुम्भकैः पूतदेहिभिः ।मुनिभिर्भाविता मह्यमिन्दिरेष्टं प्रयच्छतु ॥ ७॥

recakaiḥ pūrakaiḥ pūrṇakumbhakaiḥ pūtadehibhiḥ |munibhirbhāvitā mahyamindireṣṭaṃ prayacchatu || 7||

णीत्यक्षरमुपासन्तो यत्प्रसादेन सन्ततिम् ।कुलस्यप्राप्नुयुर्मह्यमिन्दिरेष्टं प्रयच्छतु ॥ ८॥

ṇītyakṣaramupāsanto yatprasādena santatim |kulasyaprāpnuyurmahyamindireṣṭaṃ prayacchatu || 8||

यन्त्रमन्त्रक्रियासिद्धिरूपा सर्वसुखात्मिका ।यजनादिमयी मह्यमिन्दिरेष्टं प्रयच्छतु ॥ ९॥

yantramantrakriyāsiddhirūpā sarvasukhātmikā |yajanādimayī mahyamindireṣṭaṃ prayacchatu || 9||

भगवत्यच्युते विष्णावनन्ते नित्यवासिनी ।भगवत्यमलामह्यमिन्दिरेष्टं प्रयच्छतु ॥ १०॥

bhagavatyacyute viṣṇāvanante nityavāsinī |bhagavatyamalāmahyamindireṣṭaṃ prayacchatu || 10||

गोविप्रवेदसूर्याग्निगङ्गाबिल्वसुवर्णगा ।सालग्राममयी मह्यमिन्दिरेष्टं प्रयच्छतु ॥ ११॥

govipravedasūryāgnigaṅgābilvasuvarṇagā |sālagrāmamayī mahyamindireṣṭaṃ prayacchatu || 11||

देवता देवतानाञ्च क्षीरसागरसम्भवा ।कल्याणी भार्गवी मह्यमिन्दिरेष्टं प्रयच्छतु ॥ १२॥

devatā devatānāñca kṣīrasāgarasambhavā |kalyāṇī bhārgavī mahyamindireṣṭaṃ prayacchatu || 12||

वक्ति यो वचसा रित्यं सत्यमेव न चानृतम् ।तस्मिन् न्यायमते मह्यमिन्दिरेष्टं प्रयच्छतु ॥ १३॥

vakti yo vacasā rityaṃ satyameva na cānṛtam |tasmin nyāyamate mahyamindireṣṭaṃ prayacchatu || 13||

स्यमन्तकादि मणि यो यत्प्रसादांशकांशकाः ।अनन्तविभवा मह्यमिन्दिरेष्टं प्रयच्छतु ॥ १४॥

syamantakādi maṇi yo yatprasādāṃśakāṃśakāḥ |anantavibhavā mahyamindireṣṭaṃ prayacchatu || 14||

धीराणां व्यासवाल्मीकिपूर्वाणां वाचकं तपः ।यत्प्राप्तिफलदं मह्यमिन्दिरेष्टं प्रयच्छतु ॥ १५॥

dhīrāṇāṃ vyāsavālmīkipūrvāṇāṃ vācakaṃ tapaḥ |yatprāptiphaladaṃ mahyamindireṣṭaṃ prayacchatu || 15||

महानुभावैर्मुनिभिर्महाभागैस्तपस्विभिः ।आराध्य प्रार्थिता मह्यमिन्दिरेष्टं प्रयच्छतु ॥ १६॥

mahānubhāvairmunibhirmahābhāgaistapasvibhiḥ |ārādhya prārthitā mahyamindireṣṭaṃ prayacchatu || 16||

हिमाचलसुतावाणी सख्यसौहार्दलक्षणा ।या मूलप्रकृतिर्मह्यमिन्दिरेष्टं प्रयच्छतु ॥ १७॥

himācalasutāvāṇī sakhyasauhārdalakṣaṇā |yā mūlaprakṛtirmahyamindireṣṭaṃ prayacchatu || 17||

धिया भक्त्या भिया वाचा तपश्शौचक्रियार्जवैः ।सद्भिस्समर्चिता मह्यमिन्दिरेष्टं प्रयच्छतु ॥ १८॥

dhiyā bhaktyā bhiyā vācā tapaśśaucakriyārjavaiḥ |sadbhissamarcitā mahyamindireṣṭaṃ prayacchatu || 18||

योगेन कर्मणा भक्त्या श्रद्धया श्रीस्समाप्यते ।सत्यश्शौचपरैर्मह्यमिन्दिरेष्टं प्रयच्छतु ॥ १९॥

yogena karmaṇā bhaktyā śraddhayā śrīssamāpyate |satyaśśaucaparairmahyamindireṣṭaṃ prayacchatu || 19||

योगक्षेमौ सुखादीनां पुण्यजानां निजार्थिने ।ददाति दयया मह्यमिन्दिरेष्टं प्रयच्छतु ॥ २०॥

yogakṣemau sukhādīnāṃ puṇyajānāṃ nijārthine |dadāti dayayā mahyamindireṣṭaṃ prayacchatu || 20||

मनश्शरीराणि चेतांसि करणानि सुखानि च ।यदधीनानि सा मह्यमिन्दिरेष्टं प्रयच्छतु ॥ २१॥

manaśśarīrāṇi cetāṃsi karaṇāni sukhāni ca |yadadhīnāni sā mahyamindireṣṭaṃ prayacchatu || 21||

प्रज्ञामायुर्बलं वित्तं प्रजामारोग्यमीशताम् ।यशः पुण्यं सुखं मह्यमिन्दिरेष्टं प्रयच्छतु ॥ २२॥

prajñāmāyurbalaṃ vittaṃ prajāmārogyamīśatām |yaśaḥ puṇyaṃ sukhaṃ mahyamindireṣṭaṃ prayacchatu || 22||

चोरारिव्यालरोगार्णग्रहपीडानिवारिणी ।अनीतेरभयं मह्यमिन्दिरेष्टं प्रयच्छतु ॥ २३॥

corārivyālarogārṇagrahapīḍānivāriṇī |anīterabhayaṃ mahyamindireṣṭaṃ prayacchatu || 23||

दयामाश्रितवात्सल्यं दाक्षिण्यं सत्यशीलता ।नित्यं या वहते मह्यमिन्दिरेष्टं प्रयच्छतु ॥ २४॥

dayāmāśritavātsalyaṃ dākṣiṇyaṃ satyaśīlatā |nityaṃ yā vahate mahyamindireṣṭaṃ prayacchatu || 24||

या देव्यव्याजकरुणा या जगज्जननी रमा ।स्वतन्त्रशक्तिर्या मह्यमिन्दिरेष्टं प्रयच्छतु ॥ २५॥

yā devyavyājakaruṇā yā jagajjananī ramā |svatantraśaktiryā mahyamindireṣṭaṃ prayacchatu || 25||

ब्रह्मण्यसुब्रह्मण्योक्तां गायत्र्यक्षरसम्मिताम् ।इष्टसिद्धिर्भवेन्नित्यं पठतामिन्दिरास्तुतिम् ॥ २६॥

brahmaṇyasubrahmaṇyoktāṃ gāyatryakṣarasammitām |iṣṭasiddhirbhavennityaṃ paṭhatāmindirāstutim || 26||

इति लक्ष्मीगायत्रीस्तुतिस्सम्पूर्णा ।

iti lakṣmīgāyatrīstutissampūrṇā |