दक्षिणास्तोत्रम् Dakshinastotram

यज्ञपुरुष उवाचपुरा गोलोकगोपी त्वं गोपीनां प्रवरा परा ।राधासमा तत्सखी च श्रीकृष्णप्रेयसी प्रिये ॥ १॥

yajñapuruṣa uvācapurā golokagopī tvaṃ gopīnāṃ pravarā parā |rādhāsamā tatsakhī ca śrīkṛṣṇapreyasī priye || 1||

कार्तिकीपूर्णिमायां तु रासे राधामहोत्सवे ।आविर्भूता दक्षिणांशात्कृष्णस्य तेन दक्षिणा ॥ २॥

kārtikīpūrṇimāyāṃ tu rāse rādhāmahotsave |āvirbhūtā dakṣiṇāṃśātkṛṣṇasya tena dakṣiṇā || 2||

पुरा त्वं हि सुशीलाऽऽख्या शीलेन शोभनेन च ।कृष्णदक्षांशवासाच्च राधाशापाच्च दक्षिणा ॥ ३॥

purā tvaṃ hi suśīlā''khyā śīlena śobhanena ca |kṛṣṇadakṣāṃśavāsācca rādhāśāpācca dakṣiṇā || 3||

गोलोकात्त्वं परिध्वस्ता मम भाग्यादुपस्थिता ।कृपां कुरु त्वमेवाद्य स्वामिनं कुरु मां प्रिये ॥ ४॥

golokāttvaṃ paridhvastā mama bhāgyādupasthitā |kṛpāṃ kuru tvamevādya svāminaṃ kuru māṃ priye || 4||

कर्मिणां कर्मणां देवी त्वमेव फलदा सदा ।त्वया विना च सर्वेषां सर्वं कर्म च निष्फलम् ॥ ५॥

karmiṇāṃ karmaṇāṃ devī tvameva phaladā sadā |tvayā vinā ca sarveṣāṃ sarvaṃ karma ca niṣphalam || 5||

फलशाखाविहीनश्च यथा वृक्षो महीतले ।त्वया विना तथा कर्म कर्मिणां च न शोभते ॥ ६॥

phalaśākhāvihīnaśca yathā vṛkṣo mahītale |tvayā vinā tathā karma karmiṇāṃ ca na śobhate || 6||

ब्रह्मविष्णुमहेशाश्च दिक्पालादय एव च ।कर्मणश्च फलं दातुं न शक्ताश्च त्वया विना ॥ ७॥

brahmaviṣṇumaheśāśca dikpālādaya eva ca |karmaṇaśca phalaṃ dātuṃ na śaktāśca tvayā vinā || 7||

कर्मरूपी स्वयं ब्रह्मा फलरूपी महेश्वरः ।यज्ञरूपी विष्णुरहं त्वमेषां साररूपिणी ॥ ८॥

karmarūpī svayaṃ brahmā phalarūpī maheśvaraḥ |yajñarūpī viṣṇurahaṃ tvameṣāṃ sārarūpiṇī || 8||

फलदाता परं ब्रह्म निर्गुणः प्रकृतेः परः ।स्वयं कृष्णश्च भगवान्न च शक्तस्त्वया विना ॥ ९॥

phaladātā paraṃ brahma nirguṇaḥ prakṛteḥ paraḥ |svayaṃ kṛṣṇaśca bhagavānna ca śaktastvayā vinā || 9||

त्वमेव शक्तिः कान्ते मे शश्वज्जन्मनि जन्मनि ।सर्वकर्मणि शक्तोऽहं त्वया सह वरानने ॥ १०॥

tvameva śaktiḥ kānte me śaśvajjanmani janmani |sarvakarmaṇi śakto'haṃ tvayā saha varānane || 10||

इत्युक्त्वा तत्पुरस्तस्थौ यज्ञाधिष्ठातृदेवकः ।तुष्टा बभूव सा देवी भजे तं कमला कला ॥ ११॥

ityuktvā tatpurastasthau yajñādhiṣṭhātṛdevakaḥ |tuṣṭā babhūva sā devī bhaje taṃ kamalā kalā || 11||

इदं च दक्षिणास्तोत्रं यज्ञकाले च यः पठेत् ।फलं च सर्वयज्ञानां लभते नात्र संशयः ॥ १२॥

idaṃ ca dakṣiṇāstotraṃ yajñakāle ca yaḥ paṭhet |phalaṃ ca sarvayajñānāṃ labhate nātra saṃśayaḥ || 12||

इति श्रीब्रह्मवैवर्तमहापुराणे प्रकृतिखण्डेयज्ञपुरुषकृतं दक्षिणास्तोत्रं सम्पूर्णम् ॥

iti śrībrahmavaivartamahāpurāṇe prakṛtikhaṇḍeyajñapuruṣakṛtaṃ dakṣiṇāstotraṃ sampūrṇam ||