वामनस्तुतिः १ Vamanastutih

अव्याद्वो वामनो यस्य कौस्तुभप्रतिबिम्बिता ।कौतुकालोकिनी जाता जाठरीव जगत्त्रयी ॥ १॥

avyādvo vāmano yasya kaustubhapratibimbitā |kautukālokinī jātā jāṭharīva jagattrayī || 1||

अङ्घ्रिदण्डो हरेरूर्ध्वमुत्क्षप्तो बलिनिग्रहे ।विधिविष्टरपद्मस्य नालदण्डो मुदेऽस्तु नः ॥ २॥

aṅghridaṇḍo harerūrdhvamutkṣapto balinigrahe |vidhiviṣṭarapadmasya nāladaṇḍo mude'stu naḥ || 2||

खर्वग्रन्थिविमुक्तसन्धिविलसद्वक्षःस्फुरत्कौस्तुभंनिर्यन्नाभिसरोजकुड्मलपुटीगम्भीरसामध्वनि ।पात्रावाप्तिसमुत्सुकेन बलिना सानन्दमालोकितंपायाद्वः क्रमवर्धमानमहिमाश्चर्यं मुरारेर्वपुः ॥ ३॥

kharvagranthivimuktasandhivilasadvakṣaḥsphuratkaustubhaṃniryannābhisarojakuḍmalapuṭīgambhīrasāmadhvani |pātrāvāptisamutsukena balinā sānandamālokitaṃpāyādvaḥ kramavardhamānamahimāścaryaṃ murārervapuḥ || 3||

हस्ते शस्त्रकिणाङ्कितोऽरुणविभाकिर्मीरितोरःस्थलोनाभिप्रेङ्खदलिर्विलोचनयुगप्रोद्भूतशीतातपः ।बाहूर्मिश्रितवह्निरेष तदिति व्याक्षिप्यवाक्यं कवेःतारैरध्ययनैर्हरन्बलिमनः पायाज्जगद्वामनः ॥ ४॥

haste śastrakiṇāṅkito'ruṇavibhākirmīritoraḥsthalonābhipreṅkhadalirvilocanayugaprodbhūtaśītātapaḥ |bāhūrmiśritavahnireṣa taditi vyākṣipyavākyaṃ kaveḥtārairadhyayanairharanbalimanaḥ pāyājjagadvāmanaḥ || 4||

स्वस्ति स्वागतमर्थ्यहं वद विभो किं दीयतां मेदिनीका मात्रा मम विक्रमत्रयपदं दत्तं जलं दीयताम् ।मा देहीत्युशनाब्रवीद्धरिरयं पात्रं किमस्मात्परंचेत्येवं बलिनार्चितो मखमुखे पायात्स वो वामनः ॥ ५॥

svasti svāgatamarthyahaṃ vada vibho kiṃ dīyatāṃ medinīkā mātrā mama vikramatrayapadaṃ dattaṃ jalaṃ dīyatām |mā dehītyuśanābravīddharirayaṃ pātraṃ kimasmātparaṃcetyevaṃ balinārcito makhamukhe pāyātsa vo vāmanaḥ || 5||

स्वामी सन्भुवनत्रयस्य विकृतिं नीतोऽसि किं याच्ञयायद्वा विश्वसृजा त्वयैव न कृतं तद्दीयतां ते कुतः ।दानं श्रेष्ठतमाय तुभ्यमतुलं बन्धाय नो मुक्तयेविज्ञप्तो बलिना निरुत्तरतया ह्रीतो हरिः पातु वः ॥ ६॥

svāmī sanbhuvanatrayasya vikṛtiṃ nīto'si kiṃ yācñayāyadvā viśvasṛjā tvayaiva na kṛtaṃ taddīyatāṃ te kutaḥ |dānaṃ śreṣṭhatamāya tubhyamatulaṃ bandhāya no muktayevijñapto balinā niruttaratayā hrīto hariḥ pātu vaḥ || 6||

ब्रह्माण्डच्छत्रदण्डः शतधृतिभवनाम्भोरुहो नालदण्डःक्षोणीनौकूपदण्डः क्षरदमरसरित्पट्टिकाकेतुदण्डः ।ज्योतिश्चक्राक्षदण्डस्त्रिभुवनविजयस्तम्भदण्डोऽङ्घ्रिदण्डःश्रेयस्त्रैविक्रमस्ते वितरतु विबुधद्वेषिणां कालदण्डः ॥ ७॥

brahmāṇḍacchatradaṇḍaḥ śatadhṛtibhavanāmbhoruho nāladaṇḍaḥkṣoṇīnaukūpadaṇḍaḥ kṣaradamarasaritpaṭṭikāketudaṇḍaḥ |jyotiścakrākṣadaṇḍastribhuvanavijayastambhadaṇḍo'ṅghridaṇḍaḥśreyastraivikramaste vitaratu vibudhadveṣiṇāṃ kāladaṇḍaḥ || 7||

यस्मादाक्रामतो द्यां गरुडमणिशिलाकेतुदण्डायमानात्आश्च्योतन्त्याबभासे सुरसरिदमला वैजयन्तीव कान्ता ।भूमिष्ठो यस्तथान्यो भुवनगृहमहास्तम्भशोभां दधानःपातामेतौ पयोजोदरललिततलौ पङ्कजाक्षस्य पादौ ॥ ८॥

yasmādākrāmato dyāṃ garuḍamaṇiśilāketudaṇḍāyamānātāścyotantyābabhāse surasaridamalā vaijayantīva kāntā |bhūmiṣṭho yastathānyo bhuvanagṛhamahāstambhaśobhāṃ dadhānaḥpātāmetau payojodaralalitatalau paṅkajākṣasya pādau || 8||

कस्त्वं ब्रह्मन्नपूर्वः क्व च तव वसतिर्याखिला ब्रह्मसृष्टिःकस्ते नाथो ह्यनाथः क्व स तव जनको नैव तातं स्मरामि ।किं तेऽभीष्टं ददामि त्रिपदपरिमिता भूमिरल्पं किमेतत्त्रैलोक्यं भावगर्भं बलिमिदमवदद्वामनो वः स पायात् ॥ ९॥

kastvaṃ brahmannapūrvaḥ kva ca tava vasatiryākhilā brahmasṛṣṭiḥkaste nātho hyanāthaḥ kva sa tava janako naiva tātaṃ smarāmi |kiṃ te'bhīṣṭaṃ dadāmi tripadaparimitā bhūmiralpaṃ kimetattrailokyaṃ bhāvagarbhaṃ balimidamavadadvāmano vaḥ sa pāyāt || 9||

इति वामनस्तुतिः समाप्ता ।

iti vāmanastutiḥ samāptā |