नृसिंहकवचम् अपमृत्युहरं Shri Nrisimha Kavacham

श्रीगणेशाय नमः ।अथापरं प्रवक्ष्यामि ह्यल्पमृत्यु हरंपरम् ।उपायं यत्कृतेनाङ्ग शीघ्रं मृत्युर्निवर्तते ॥ १॥

śrīgaṇeśāya namaḥ |athāparaṃ pravakṣyāmi hyalpamṛtyu haraṃparam |upāyaṃ yatkṛtenāṅga śīghraṃ mṛtyurnivartate || 1||

नृसिंहकवचं नाम स्तोत्रं परमदुर्लभम् ।यस्य धारणया क्षिप्रमल्पमृत्युर्विनश्यति ॥ २॥

nṛsiṃhakavacaṃ nāma stotraṃ paramadurlabham |yasya dhāraṇayā kṣipramalpamṛtyurvinaśyati || 2||

अरुण उवाचभगवन्देवदेवेश कृपया परयाऽधुना ।नृसिंहकवचं दिव्यं गुह्यं भक्ताय मे वद ॥ ३॥

aruṇa uvācabhagavandevadeveśa kṛpayā parayā'dhunā |nṛsiṃhakavacaṃ divyaṃ guhyaṃ bhaktāya me vada || 3||

सूर्य उवाचशृणु पुत्र प्रवक्ष्यामि नृसिंहकवचं शुभम् ।यस्य विज्ञानमात्रेण नश्यन्ति सकलापदः ॥ ४॥

sūrya uvācaśṛṇu putra pravakṣyāmi nṛsiṃhakavacaṃ śubham |yasya vijñānamātreṇa naśyanti sakalāpadaḥ || 4||

ग्रहबाधा प्रेतबाधा बाधा या कुलदोषजा ।कृत्यया जनिता बाधा शत्रुबाधा स्वकर्मजा ॥ ५॥

grahabādhā pretabādhā bādhā yā kuladoṣajā |kṛtyayā janitā bādhā śatrubādhā svakarmajā || 5||

शीघ्रं नश्यन्ति ताः सर्वाः कवचस्य प्रभावतः ।असाध्या ये च दुस्साध्या महारोगा भयङ्कराः ॥ ६॥

śīghraṃ naśyanti tāḥ sarvāḥ kavacasya prabhāvataḥ |asādhyā ye ca dussādhyā mahārogā bhayaṅkarāḥ || 6||

सद्यो नश्यन्ति पठनात्कवचस्यास्य सारथे ।जलभीतिश्चाग्निभीतिर्भीतिः शत्रुगणादपि ॥ ७॥

sadyo naśyanti paṭhanātkavacasyāsya sārathe |jalabhītiścāgnibhītirbhītiḥ śatrugaṇādapi || 7||

सिंहव्याघ्रादिजा भीतिः शीघ्रं सर्वा विनश्यति ।सङ्ग्रामे दुर्गमेऽरण्ये सङ्कटे प्राणसंशये ॥ ८॥

siṃhavyāghrādijā bhītiḥ śīghraṃ sarvā vinaśyati |saṅgrāme durgame'raṇye saṅkaṭe prāṇasaṃśaye || 8||

पठतो विजयो रक्षा सुखं सौभाग्यसम्पदः ।पुत्रसौख्यं राजसौख्यं धनसौख्यमृणक्षयः ॥ ९॥

paṭhato vijayo rakṣā sukhaṃ saubhāgyasampadaḥ |putrasaukhyaṃ rājasaukhyaṃ dhanasaukhyamṛṇakṣayaḥ || 9||

कुटुम्बवृद्धिः कल्याणमारोग्यं विजयः सदा ।अल्पमृत्युभयं घोरं पाठादस्य विनश्यति ॥ १०॥

kuṭumbavṛddhiḥ kalyāṇamārogyaṃ vijayaḥ sadā |alpamṛtyubhayaṃ ghoraṃ pāṭhādasya vinaśyati || 10||

अल्पमृत्युहरश्चात उपायो न परः स्मृतः ।अल्पमृत्युहरं नाम कवचं चेदमुत्तमम् ॥ ११॥

alpamṛtyuharaścāta upāyo na paraḥ smṛtaḥ |alpamṛtyuharaṃ nāma kavacaṃ cedamuttamam || 11||

सिंहप्रणादान्मत्तोऽपि गजेन्द्रस्तु पलायते ।अल्पमृत्युस्तथा चास्य पाठात्सद्यो निरस्यते ॥ १२॥

siṃhapraṇādānmatto'pi gajendrastu palāyate |alpamṛtyustathā cāsya pāṭhātsadyo nirasyate || 12||

सहस्रपञ्चकावृतिं पठेद्यः सुसमाहितः ।अल्पमृत्युभयं तस्य प्रभवेन्नैव कर्हिचित् ॥ १३॥

sahasrapañcakāvṛtiṃ paṭhedyaḥ susamāhitaḥ |alpamṛtyubhayaṃ tasya prabhavennaiva karhicit || 13||

अथ पाठःनृसिंहो मे शिरः पातु पातु भालं नृकेसरी ।भ्रुवौ नृसिंहो मे पातु नृसिंहो नयनद्वयम् ॥ १४॥

atha pāṭhaḥnṛsiṃho me śiraḥ pātu pātu bhālaṃ nṛkesarī |bhruvau nṛsiṃho me pātu nṛsiṃho nayanadvayam || 14||

नृसिंहो नासिके पातु कर्णौ पातु नृकेसरी ।नृसिंहो मे मुखं पातु कपोलौ रक्षताद्धरिः ॥ १५॥

nṛsiṃho nāsike pātu karṇau pātu nṛkesarī |nṛsiṃho me mukhaṃ pātu kapolau rakṣatāddhariḥ || 15||

नृसिंहश्चिबुकं रक्षेत्कण्ठं पातु नृकेसरी ।स्कन्धौ पातु नृसिंहो मे भुजौ पातु नृकेसरी ॥ १६॥

nṛsiṃhaścibukaṃ rakṣetkaṇṭhaṃ pātu nṛkesarī |skandhau pātu nṛsiṃho me bhujau pātu nṛkesarī || 16||

करद्वयं नृसिंहोऽव्यान्नृसिंहो रक्षतादुरः ।नृसिंहो हृदयं पातु नृसिंहोऽव्यात्तथोदरम् ॥ १७॥

karadvayaṃ nṛsiṃho'vyānnṛsiṃho rakṣatāduraḥ |nṛsiṃho hṛdayaṃ pātu nṛsiṃho'vyāttathodaram || 17||

कुक्षिं नरहरिः पातु नाभिं पातु नृकेसरी ।बस्तिं च गुह्यदेशं च नृसिंहोऽव्यात्सदा मम ॥ १८॥

kukṣiṃ narahariḥ pātu nābhiṃ pātu nṛkesarī |bastiṃ ca guhyadeśaṃ ca nṛsiṃho'vyātsadā mama || 18||

नृसिंहो जानुनी पातु जङ्घे पातु नृकेसरी ।पादौ गुल्फौ सदा पातु नृसिंहो मम रक्षकः ॥ १९॥

nṛsiṃho jānunī pātu jaṅghe pātu nṛkesarī |pādau gulphau sadā pātu nṛsiṃho mama rakṣakaḥ || 19||

अग्रतः पृष्ठतो मेऽव्यात्तथा पार्श्वद्वयं सदा ।नृसिंहः सर्वगात्राणि मम रक्षतु सर्वदा ॥ २०॥

agrataḥ pṛṣṭhato me'vyāttathā pārśvadvayaṃ sadā |nṛsiṃhaḥ sarvagātrāṇi mama rakṣatu sarvadā || 20||

नृसिंहो रक्षतात्पूर्वे वह्निकोणे नृकेसरी ।नैरृत्यां नरसिंहोऽव्यानृसिंहः पातु पश्चिमे ॥ २१॥

nṛsiṃho rakṣatātpūrve vahnikoṇe nṛkesarī |nairṛtyāṃ narasiṃho'vyānṛsiṃhaḥ pātu paścime || 21||

नृसिंहो वायुकोणेऽव्यादुत्तरेऽव्यान्नृकेसरी ।नृसिंहोऽव्यात्तथेशाने ह्यध ऊर्ध्वं समन्ततः ॥ २२॥

nṛsiṃho vāyukoṇe'vyāduttare'vyānnṛkesarī |nṛsiṃho'vyāttatheśāne hyadha ūrdhvaṃ samantataḥ || 22||

जले सदा रक्षतु मां नृसिंहः स्थलेषु मां पातु सदा नृसिंहः ।नभस्तले भूमितले समन्तानृकेसरी रक्षतु सर्वदा माम् ॥ २३॥

jale sadā rakṣatu māṃ nṛsiṃhaḥ sthaleṣu māṃ pātu sadā nṛsiṃhaḥ |nabhastale bhūmitale samantānṛkesarī rakṣatu sarvadā mām || 23||

दुर्गाध्वदुर्गभवनेषु च सङ्कटेषुप्राणप्रयाणभयविघ्नसमुच्चयेषु ।शीतोष्णवातरिपुरोगभयेषु युद्धेसङ्कष्टनाशनपरोऽवतु मां नृसिंहः ॥ २४॥

durgādhvadurgabhavaneṣu ca saṅkaṭeṣuprāṇaprayāṇabhayavighnasamuccayeṣu |śītoṣṇavātaripurogabhayeṣu yuddhesaṅkaṣṭanāśanaparo'vatu māṃ nṛsiṃhaḥ || 24||

छिनत्तु चक्रेण सदाऽरिवर्गान्सर्वान्नृसिंहो मम मृत्युरूपान् ।असाध्यदुस्साध्यसमस्तरोगान्भिन्द्यान्नृसिंहः स्वगदाभिघातैः ॥ २५॥

chinattu cakreṇa sadā'rivargānsarvānnṛsiṃho mama mṛtyurūpān |asādhyadussādhyasamastarogānbhindyānnṛsiṃhaḥ svagadābhighātaiḥ || 25||

प्रेतान्पिशाचान्सगणान्स्वनेन शङ्खस्य विद्रावयतान्नृसिंहः ।कूष्माण्डबालग्रहयक्षरक्षः स डाकिनीः शाकिनिकाः समस्ताः ॥ २६॥

pretānpiśācānsagaṇānsvanena śaṅkhasya vidrāvayatānnṛsiṃhaḥ |kūṣmāṇḍabālagrahayakṣarakṣaḥ sa ḍākinīḥ śākinikāḥ samastāḥ || 26||

खड्गेन मे मृत्युनिसर्गपाशं सञ्छिद्य मां पातु सदा नृसिंहः ।सदाऽपमृत्योश्च तथाऽल्पमृत्योर्विमोच्य मां रक्षतुनारसिंहः ॥ २७॥

khaḍgena me mṛtyunisargapāśaṃ sañchidya māṃ pātu sadā nṛsiṃhaḥ |sadā'pamṛtyośca tathā'lpamṛtyorvimocya māṃ rakṣatunārasiṃhaḥ || 27||

भक्तसंरक्षणार्थाय विदार्यस्तम्भमुद्गतः ।नृसिंहो रक्षकः सोऽस्तु मृत्युः किं में करिष्यति ॥ २८॥

bhaktasaṃrakṣaṇārthāya vidāryastambhamudgataḥ |nṛsiṃho rakṣakaḥ so'stu mṛtyuḥ kiṃ meṃ kariṣyati || 28||

अट्टाट्टहासतो यस्य सर्वे देवाश्चकम्पिरे ।नृसिंहो रक्षकः सोऽस्तु मृत्युः किं मे करिष्यति ॥ २९॥

aṭṭāṭṭahāsato yasya sarve devāścakampire |nṛsiṃho rakṣakaḥ so'stu mṛtyuḥ kiṃ me kariṣyati || 29||

हिरण्यकशिपोर्वक्षो ददारनिशितैर्नखैः ।नृसिंहो रक्षकः सोऽस्तु मृत्युः किं मे करिष्यति ॥ ३०॥

hiraṇyakaśiporvakṣo dadāraniśitairnakhaiḥ |nṛsiṃho rakṣakaḥ so'stu mṛtyuḥ kiṃ me kariṣyati || 30||

यस्य भ्रूभङ्गमात्रेण त्रस्तमासीज्जगत्त्रयम् ।नृसिंहो रक्षकः सोऽस्तु मृत्युः किं मे करिष्यति ॥ ३१॥

yasya bhrūbhaṅgamātreṇa trastamāsījjagattrayam |nṛsiṃho rakṣakaḥ so'stu mṛtyuḥ kiṃ me kariṣyati || 31||

उत्क्षिप्तसटया व्यग्रा देवा दैत्या विदुद्रुवुः ।नृसिंहो रक्षकः सोऽस्तु मृत्युः किं मे करिष्यति ॥ ३२॥

utkṣiptasaṭayā vyagrā devā daityā vidudruvuḥ |nṛsiṃho rakṣakaḥ so'stu mṛtyuḥ kiṃ me kariṣyati || 32||

यन्नामस्मरणादेव दह्यन्ते विघ्नराशयः ।नृसिंहो रक्षकः सोऽस्तु मृत्युः किं मे करिष्यति ॥ ३३॥

yannāmasmaraṇādeva dahyante vighnarāśayaḥ |nṛsiṃho rakṣakaḥ so'stu mṛtyuḥ kiṃ me kariṣyati || 33||

यदङ्घ्रिध्यानतःसद्यो विलीयन्तेऽघराशयः ।नृसिंहो रक्षकः सोऽस्तु मृत्युः किं मे करिष्यति ॥ ३४॥

yadaṅghridhyānataḥsadyo vilīyante'gharāśayaḥ |nṛsiṃho rakṣakaḥ so'stu mṛtyuḥ kiṃ me kariṣyati || 34||

माता नृसिंहश्च पिता नृसिंहो भ्राता नृसिंहश्च सखा नृसिंहः ।बलं नृसिंहो द्रविणं नृसिंहः सर्वं नृसिंहो मम देवदेवः ॥ ३५॥

mātā nṛsiṃhaśca pitā nṛsiṃho bhrātā nṛsiṃhaśca sakhā nṛsiṃhaḥ |balaṃ nṛsiṃho draviṇaṃ nṛsiṃhaḥ sarvaṃ nṛsiṃho mama devadevaḥ || 35||

इति ते कथितं पुत्र नृसिंहकवचं शुभम् ।अस्य धारणतः पाठादल्पमृत्युः प्रशाम्यति ॥ ३६॥

iti te kathitaṃ putra nṛsiṃhakavacaṃ śubham |asya dhāraṇataḥ pāṭhādalpamṛtyuḥ praśāmyati || 36||

शतं वाऽथ तदर्धं वा तदर्धं वा सदक्षिणम् ।विप्रेभ्यः पुस्तकं दद्यादल्पमृत्युप्रशान्तये ॥ ३७॥

śataṃ vā'tha tadardhaṃ vā tadardhaṃ vā sadakṣiṇam |viprebhyaḥ pustakaṃ dadyādalpamṛtyupraśāntaye || 37||

इति श्रीसूर्यारुणसंवादे अपमृत्युहरंनृसिंहकवचं समाप्तम् ॥॥ ॐ तत्सत्परमात्मनेनमः ॥

iti śrīsūryāruṇasaṃvāde apamṛtyuharaṃnṛsiṃhakavacaṃ samāptam |||| oṃ tatsatparamātmanenamaḥ ||