घटिकाद्रिनाथशतकम् Ghatikadrinatha Shatakam

श्रीवेङ्कटार्यचरणौ शिरसि करोमि स्मिताब्जसुहृदौ तौ ।पृथुतरमपि भवजलधिं पिबतितरां यत्परागपरमाणुः ॥व्यत्यस्तचरणकमलां विनिहितभुजयुगलमित्रजानुयुगाम् ।विलसितरथाङ्गशङ्खां व्यक्तिमुपासे विरुद्धजातिमतीम् ॥ १॥

śrīveṅkaṭāryacaraṇau śirasi karomi smitābjasuhṛdau tau |pṛthutaramapi bhavajaladhiṃ pibatitarāṃ yatparāgaparamāṇuḥ ||vyatyastacaraṇakamalāṃ vinihitabhujayugalamitrajānuyugām |vilasitarathāṅgaśaṅkhāṃ vyaktimupāse viruddhajātimatīm || 1||

श्रितघटिकाचलशृङ्गं शीतलकरुणातरङ्गितापाङ्गम् ।मनसि ममोल्लसदङ्गं वस्तु महः किमपि वाससा पिङ्गम् ॥ २॥

śritaghaṭikācalaśṛṅgaṃ śītalakaruṇātaraṅgitāpāṅgam |manasi mamollasadaṅgaṃ vastu mahaḥ kimapi vāsasā piṅgam || 2||

कलितदनुतनयभङ्गं करकमलाभरणवारिजरथाङ्गम् ।कृतघटिकाचलसङ्गं किमपि महो जयति केतनविहङ्गम् ॥ ३॥

kalitadanutanayabhaṅgaṃ karakamalābharaṇavārijarathāṅgam |kṛtaghaṭikācalasaṅgaṃ kimapi maho jayati ketanavihaṅgam || 3||

सर्वरसगन्धभरितं सङ्गतमेकमपि सकलशाखासु ।अमृतफलमखिलपुंसामास्वाद्यं चित्रमस्ति घटिकाद्रौ ॥ ४॥

sarvarasagandhabharitaṃ saṅgatamekamapi sakalaśākhāsu |amṛtaphalamakhilapuṃsāmāsvādyaṃ citramasti ghaṭikādrau || 4||

आरण्यकाप्तवाक्यैरवगम्यो ग्राम्यजनदृशामपदम् ।स्फुरति घटिकाचलाग्रे पुरुषमृगः कोऽपि पुण्यकृदुपेयः ॥ ५॥

āraṇyakāptavākyairavagamyo grāmyajanadṛśāmapadam |sphurati ghaṭikācalāgre puruṣamṛgaḥ ko'pi puṇyakṛdupeyaḥ || 5||

महति घटिकाद्रिविषये महता स्नेहेन निर्मलदशायाम् ।देदीप्यते स्थिरोऽयं दिव्यैर्मुनिभिः प्रवर्तितो दीपः ॥ ६॥

mahati ghaṭikādriviṣaye mahatā snehena nirmaladaśāyām |dedīpyate sthiro'yaṃ divyairmunibhiḥ pravartito dīpaḥ || 6||

मुष्णंस्तमो जनानां मूर्धनि घटिकाचलस्य सम्भूतः ।आलोकतोऽखिलार्थानधिगमयति नित्यमच्युतो दीपः ॥ ७॥

muṣṇaṃstamo janānāṃ mūrdhani ghaṭikācalasya sambhūtaḥ |ālokato'khilārthānadhigamayati nityamacyuto dīpaḥ || 7||

रस्यं सकृदुपसेव्यं लभ्यमपथ्यसहमसहितममोघम् ।त्वरितं हरति भवार्तिं शुद्धं घटिकाद्रिमौलिजं मूलम् ॥ ८॥

rasyaṃ sakṛdupasevyaṃ labhyamapathyasahamasahitamamogham |tvaritaṃ harati bhavārtiṃ śuddhaṃ ghaṭikādrimaulijaṃ mūlam || 8||

स्थिरशोकशल्यहरणं जगतां विच्छिन्नकुशलसन्धानम् ।सञ्जीवनमपि घटिकाशैलजमूलं करोति सारूप्यम् ॥ ९॥

sthiraśokaśalyaharaṇaṃ jagatāṃ vicchinnakuśalasandhānam |sañjīvanamapi ghaṭikāśailajamūlaṃ karoti sārūpyam || 9||

अतिबलभवाहिदष्टानमिलाषविषाग्निमूर्च्छनानष्टान् ।घटिकाशिखरिनरेन्द्रो घटयत्यसुभिः कटाक्षमात्रेण ॥ १०॥

atibalabhavāhidaṣṭānamilāṣaviṣāgnimūrcchanānaṣṭān |ghaṭikāśikharinarendro ghaṭayatyasubhiḥ kaṭākṣamātreṇa || 10||

चोरं स्वतश्च्युतं मां स्वामी घटिकाद्रिपो विचिन्वानः ।दृष्ट्वा कुतोऽप्युपायाद् दृप्तमबध्नाद् दयागुणेन दृढम् ॥ ११॥

coraṃ svataścyutaṃ māṃ svāmī ghaṭikādripo vicinvānaḥ |dṛṣṭvā kuto'pyupāyād dṛptamabadhnād dayāguṇena dṛḍham || 11||

विमलकविसेव्यमाना विलसति सन्निहितशङ्खचक्राब्जा ।कापि घटिकाद्रिशिखरे करुणारसपूरनिर्भरा सरसी ॥ १२॥

vimalakavisevyamānā vilasati sannihitaśaṅkhacakrābjā |kāpi ghaṭikādriśikhare karuṇārasapūranirbharā sarasī || 12||

निर्मुक्तभोगशुद्धान् नित्यमहीनान् वहन् निजासक्तान् ।भाति घटिकाद्रिशिखरे भद्रश्रीः कोऽपि परिमलः शाखी ॥ १३॥

nirmuktabhogaśuddhān nityamahīnān vahan nijāsaktān |bhāti ghaṭikādriśikhare bhadraśrīḥ ko'pi parimalaḥ śākhī || 13||

करुणामृतरसवर्षैर्घटिकाचलघटितकालमेघ निजैः ।संसरणतरणितप्तं सञ्जीवय विनतसस्यजालमिदम् ॥ १४॥

karuṇāmṛtarasavarṣairghaṭikācalaghaṭitakālamegha nijaiḥ |saṃsaraṇataraṇitaptaṃ sañjīvaya vinatasasyajālamidam || 14||

विमलतरभक्तिपूरे व्यपगतपङ्के विकस्वराम्बुरुहे ।मानससरसि मुनीनां रमते घटिकाद्विराजहंस भवान् ॥ १५॥

vimalatarabhaktipūre vyapagatapaṅke vikasvarāmburuhe |mānasasarasi munīnāṃ ramate ghaṭikādvirājahaṃsa bhavān || 15||

स्तम्भो हि विघ्नकारी सन्दृष्टो जगति सर्वकार्येषु ।दानवविदारणे ते तस्यैव हरे कथं नु साचिव्यम् ॥ १६॥

stambho hi vighnakārī sandṛṣṭo jagati sarvakāryeṣu |dānavavidāraṇe te tasyaiva hare kathaṃ nu sācivyam || 16||

देवत्वमागमान्ते सिद्धं तिर्यक्त्वमपि नरत्वेन ।सह दृष्टमद्य घटिङ्कास्थावरसर्वात्मकस्य किमयुक्तम् ॥ १७॥

devatvamāgamānte siddhaṃ tiryaktvamapi naratvena |saha dṛṣṭamadya ghaṭiṅkāsthāvarasarvātmakasya kimayuktam || 17||

पञ्चास्य एव हि त्वं प्रथितो भगवन् कथं सहस्रास्यः ।घटिकाद्रिपक्षपातिन् ख्यातोऽसि कथं नु विश्वसाक्षीति ॥ १८॥

pañcāsya eva hi tvaṃ prathito bhagavan kathaṃ sahasrāsyaḥ |ghaṭikādripakṣapātin khyāto'si kathaṃ nu viśvasākṣīti || 18||

बहुदेशमल्पदेशादपि सिंहत्वादधःस्थितं पुंस्त्वम् ।मूर्तौ तवात्र नृहरे मुख्यः को वावमन्यतेऽन्येन ॥ १९॥

bahudeśamalpadeśādapi siṃhatvādadhaḥsthitaṃ puṃstvam |mūrtau tavātra nṛhare mukhyaḥ ko vāvamanyate'nyena || 19||

पुंसूक्तपूर्वकैस्तैः पुरुषत्वं मुख्यमेव ते विदितम् ।कथमियममुख्यतास्मिन् घटते घटिकाद्रिमनुजमृगराज ॥ २०॥

puṃsūktapūrvakaistaiḥ puruṣatvaṃ mukhyameva te viditam |kathamiyamamukhyatāsmin ghaṭate ghaṭikādrimanujamṛgarāja || 20||

विदधति न भाग्यलक्ष्मीविरहविलासात्तविकृतयो मनुजाः ।श्रवणामृतेषु घटिकाशैलवनप्रिय वचःसु ते श्रद्धाम् ॥ २१॥

vidadhati na bhāgyalakṣmīvirahavilāsāttavikṛtayo manujāḥ |śravaṇāmṛteṣu ghaṭikāśailavanapriya vacaḥsu te śraddhām || 21||

कार्यं हिरण्यहरणं घटिकाचललुब्ध कंसमुख्यहरणं वा ।अहरस्त्वमाश्रितानां हन्त किमखिलान्यनर्थजातानि ॥ २२॥

kāryaṃ hiraṇyaharaṇaṃ ghaṭikācalalubdha kaṃsamukhyaharaṇaṃ vā |aharastvamāśritānāṃ hanta kimakhilānyanarthajātāni || 22||

दोषा ममान्तरहिताः स्वामिन् घटिकेन्द्र तावकाश्च गुणाः ।तदपि गुणैस्त्वदुपघ्नैः स्थाने हीनाश्रिता जिता दोषाः ॥ २३॥

doṣā mamāntarahitāḥ svāmin ghaṭikendra tāvakāśca guṇāḥ |tadapi guṇaistvadupaghnaiḥ sthāne hīnāśritā jitā doṣāḥ || 23||

पादाम्बुजेन लसता प्रसृमरमधुना परार्ध्यगन्धेन ।श्रयतां शमयसि घटिकाशैलप विपरीतवासनाः सकलाः ॥ २४॥

pādāmbujena lasatā prasṛmaramadhunā parārdhyagandhena |śrayatāṃ śamayasi ghaṭikāśailapa viparītavāsanāḥ sakalāḥ || 24||

प्रगुणा परं प्रसादं प्राप्ता निपुणेन पदविदा ग्रथिता ।सुतरां त्वयैव घटिकानायक शोभेत सूक्तिहारलता ॥ २५॥

praguṇā paraṃ prasādaṃ prāptā nipuṇena padavidā grathitā |sutarāṃ tvayaiva ghaṭikānāyaka śobheta sūktihāralatā || 25||

सरससुमनोऽभिरामा साधु च संस्कारसम्भृतोल्लासा ।समुपैति सूक्तिलतिका सङ्गादमृतफल तव हि साफल्यम् ॥ २६॥

sarasasumano'bhirāmā sādhu ca saṃskārasambhṛtollāsā |samupaiti sūktilatikā saṅgādamṛtaphala tava hi sāphalyam || 26||

सत्पक्षपातसुभगं सन्मानसरसिकमम्बुजासक्तम् ।भुवनाश्रयं विशुद्धं बुध्ये घटिकावनौकसं हंसम् ॥ २७॥

satpakṣapātasubhagaṃ sanmānasarasikamambujāsaktam |bhuvanāśrayaṃ viśuddhaṃ budhye ghaṭikāvanaukasaṃ haṃsam || 27||

सुमनोरसकृतसङ्गं (स्व) स्मरणविशेषेण तोषितानङ्गम् ।कमलालयान्तरङ्गं कलये घटिकाद्रिकल्पतरुभृङ्गम् ॥ २८॥

sumanorasakṛtasaṅgaṃ (sva) smaraṇaviśeṣeṇa toṣitānaṅgam |kamalālayāntaraṅgaṃ kalaye ghaṭikādrikalpatarubhṛṅgam || 28||

दुर्गतिदुःखितचित्तान् दुष्करयोगान् विमुच्य सुखसेव्याम् ।प्राज्ञाः प्रयान्ति नित्यां निभृतिं घठिकाद्रिभूपमालम्ब्य ॥ २९॥

durgatiduḥkhitacittān duṣkarayogān vimucya sukhasevyām |prājñāḥ prayānti nityāṃ nibhṛtiṃ ghaṭhikādribhūpamālambya || 29||

कलयन्ति नैव सन्तः कापुरुषद्वारि वारणाकदनम् ।घटिकाशिखरिमुकुन्दं कमपि निधिं सुलभमनवधिं लब्ध्वा ॥ ३०॥

kalayanti naiva santaḥ kāpuruṣadvāri vāraṇākadanam |ghaṭikāśikharimukundaṃ kamapi nidhiṃ sulabhamanavadhiṃ labdhvā || 30||

मकरमयकूर्मरूपं वरशङ्खं पद्ममपि महापद्मम् ।कुन्दमसितं मुकुन्दं को वा घटिकाद्रिनवनिधिं न भजेत् ॥ ३१॥

makaramayakūrmarūpaṃ varaśaṅkhaṃ padmamapi mahāpadmam |kundamasitaṃ mukundaṃ ko vā ghaṭikādrinavanidhiṃ na bhajet || 31||

काञ्चनमये स्फुरन्तं कञ्चन घटिकामहीभृतः कटके ।कृष्णमणिमर्घरहितं के वा न विदन्ति कृत्स्नतः श्लाघ्यम् ॥ ३२॥

kāñcanamaye sphurantaṃ kañcana ghaṭikāmahībhṛtaḥ kaṭake |kṛṣṇamaṇimargharahitaṃ ke vā na vidanti kṛtsnataḥ ślāghyam || 32||

संसरणसरणिपान्थास्तापत्रयतरणिकिरणसन्तप्ताः ।आश्वसिता घटिकाद्रौ हरिचन्दनमेत्य शीतलच्छायम् ॥ ३३॥

saṃsaraṇasaraṇipānthāstāpatrayataraṇikiraṇasantaptāḥ |āśvasitā ghaṭikādrau haricandanametya śītalacchāyam || 33||

मुक्तं निरञ्जनबद्धं मूलं जगतां फलं च घटिकाद्रौ ।आकलयताद्भुतं महदाकण्ठं मनुजमानने सिंहम् ॥ ३४॥

muktaṃ nirañjanabaddhaṃ mūlaṃ jagatāṃ phalaṃ ca ghaṭikādrau |ākalayatādbhutaṃ mahadākaṇṭhaṃ manujamānane siṃham || 34||

पश्यन्ति नयनहरिणाः स्पष्टं घटिकाद्रिलुब्धकं यावत् ।परिसरचरैस्तु तावत् पातकपतगैः पलायितं क्वापि ॥ ३५॥

paśyanti nayanahariṇāḥ spaṣṭaṃ ghaṭikādrilubdhakaṃ yāvat |parisaracaraistu tāvat pātakapatagaiḥ palāyitaṃ kvāpi || 35||

विमलमणिहेमकटकं विकसितवनमालमुल्लसन्मौलिम् ।घटिकाद्रिसुहृदमीडे काञ्चनपीतांशुकावृतं प्रांशुम् ॥ ३६॥

vimalamaṇihemakaṭakaṃ vikasitavanamālamullasanmaulim |ghaṭikādrisuhṛdamīḍe kāñcanapītāṃśukāvṛtaṃ prāṃśum || 36||

सद्भिः परिगतममलैः संश्रितसर्वसहं हिरण्यकृतम् ।घटिकाद्रिपं सुमेरुं कलये सर्वोत्तरं सुरैः सेव्यम् ॥ ३७॥

sadbhiḥ parigatamamalaiḥ saṃśritasarvasahaṃ hiraṇyakṛtam |ghaṭikādripaṃ sumeruṃ kalaye sarvottaraṃ suraiḥ sevyam || 37||

सरसमविप्लुतवेलं सम्भृतमणिराजसरसिजाशङ्खम् ।गम्भीरममितममलं गाहे घटिकाचलेशकलशाब्धिम् ॥ ३८॥

sarasamaviplutavelaṃ sambhṛtamaṇirājasarasijāśaṅkham |gambhīramamitamamalaṃ gāhe ghaṭikācaleśakalaśābdhim || 38||

विगतत्तमोग्रहमचलं वृद्धिक्षयरहितमनुदयास्तमयम् ।विकसितमानसकमलं वीक्षे घटिकाद्रिविधुमहो विमलम् ॥ ३९॥

vigatattamograhamacalaṃ vṛddhikṣayarahitamanudayāstamayam |vikasitamānasakamalaṃ vīkṣe ghaṭikādrividhumaho vimalam || 39||

निरवधिकनित्यमहसा निर्मलमुक्तानुबन्धसुभगेन ।घटिकाद्रिमकुटभाजा मणिना मम मनसि वारितं तिमिरम् ॥ ४०॥

niravadhikanityamahasā nirmalamuktānubandhasubhagena |ghaṭikādrimakuṭabhājā maṇinā mama manasi vāritaṃ timiram || 40||

अविरलविसृमरसृणिना हरिमणिना सततमाहितौज्ज्वल्यः ।घनकनककल्पितोऽयं कटको घटिकामहीभृतो भाति ॥ ४१॥

aviralavisṛmarasṛṇinā harimaṇinā satatamāhitaujjvalyaḥ |ghanakanakakalpito'yaṃ kaṭako ghaṭikāmahībhṛto bhāti || 41||

सुमनोभृतेन मधुना सुतरां मधुरेण शुद्धिगुणभाजा ।मम घटिकाचलजनुषा मानसनामा समुत्सुको भृङ्गः ॥ ४२॥

sumanobhṛtena madhunā sutarāṃ madhureṇa śuddhiguṇabhājā |mama ghaṭikācalajanuṣā mānasanāmā samutsuko bhṛṅgaḥ || 42||

अणुतरमपि स्वमन्यानर्पयतः सततमाप्तुकामेन ।घटिकाचलप्रणयिना विपुलं विहितं हिरण्यदानमहो ॥ ४३॥

aṇutaramapi svamanyānarpayataḥ satatamāptukāmena |ghaṭikācalapraṇayinā vipulaṃ vihitaṃ hiraṇyadānamaho || 43||

अननुगुणविषयवीक्षामनिदम्प्रथमां सरस्वतीं मुक्त्वा ।घटिकाचलप्रणयिना घटयति दृष्टिं घनानुरागमयीम् ॥ ४४॥

ananuguṇaviṣayavīkṣāmanidamprathamāṃ sarasvatīṃ muktvā |ghaṭikācalapraṇayinā ghaṭayati dṛṣṭiṃ ghanānurāgamayīm || 44||

दृश्येन दैवयोगाद् दीव्यन्महसाञ्जनाद्यतीतेन ।साधयति सिद्धिमखिलां सङ्गो घटिकाद्रियोगिपुरुषेण ॥ ४५॥

dṛśyena daivayogād dīvyanmahasāñjanādyatītena |sādhayati siddhimakhilāṃ saṅgo ghaṭikādriyogipuruṣeṇa || 45||

प्रबलैर्ममेन्द्रियाश्चैः परितुष्टो विषमविषयकान्तारे ।पदवीं मनोरथाग्र्यां प्राप्तो घटिकाद्रिपार्थसारथिना ॥ ४६॥

prabalairmamendriyāścaiḥ parituṣṭo viṣamaviṣayakāntāre |padavīṃ manorathāgryāṃ prāpto ghaṭikādripārthasārathinā || 46||

अतिवेलविलसिन्तोर्मेरवगाहवतामधोगमनहेतोः ।प्राप्तोऽस्मि भवपयोधेः पारं घटिकानियामकेनाहम् ॥ ४७॥

ativelavilasintormeravagāhavatāmadhogamanahetoḥ |prāpto'smi bhavapayodheḥ pāraṃ ghaṭikāniyāmakenāham || 47||

घटिका यदि गुणघटिता घटिकाचलचक्रिकल्पिता न स्युः ।भवकूपतो जलानां भव्यः को वा समुद्धरणहेतुः ॥ ४८॥

ghaṭikā yadi guṇaghaṭitā ghaṭikācalacakrikalpitā na syuḥ |bhavakūpato jalānāṃ bhavyaḥ ko vā samuddharaṇahetuḥ || 48||

कलयन्ति ये स्वयात्रां घटिकाचलवैद्यकल्पितेन पथा ।भवरोगतोऽचिरात् ते मुक्ताः स्नानं चरन्ति विरजायाम् ॥ ४९॥

kalayanti ye svayātrāṃ ghaṭikācalavaidyakalpitena pathā |bhavarogato'cirāt te muktāḥ snānaṃ caranti virajāyām || 49||

ददतो जगत्युदारान् स्वापेक्षितमर्थमर्थिनः प्राहुः ।आददतः पुनरर्थानुक्ता घटिकाचलार्थिनोदाराः ॥ ५०॥

dadato jagatyudārān svāpekṣitamarthamarthinaḥ prāhuḥ |ādadataḥ punararthānuktā ghaṭikācalārthinodārāḥ || 50||

दाता हि लौकिकोऽर्थान् स्वव्यतिरिक्तान् ददाति नात्मानम् ।स्वोऽपि स्वसंश्रितेभ्यो दत्तो घटिकाद्रिनृहरिणा दात्रा ॥ ५१॥

dātā hi laukiko'rthān svavyatiriktān dadāti nātmānam |svo'pi svasaṃśritebhyo datto ghaṭikādrinṛhariṇā dātrā || 51||

हिंसितदानवकरिणे हृदयगुहाविहितबहुविहाराय ।विक्रमवते सपर्यां विदधे घटिकाद्रिवीरसिंहाय ॥ ५२॥

hiṃsitadānavakariṇe hṛdayaguhāvihitabahuvihārāya |vikramavate saparyāṃ vidadhe ghaṭikādrivīrasiṃhāya || 52||

श्रुतिपारगाय विद्यासूतिगृहाय स्वधर्मनिरताय ।स्वस्वोचितं प्रदानं सुधियां घटिकाद्रिभूमिदेवाय ॥ ५३॥

śrutipāragāya vidyāsūtigṛhāya svadharmaniratāya |svasvocitaṃ pradānaṃ sudhiyāṃ ghaṭikādribhūmidevāya || 53||

महनीयवृत्तवर्णा महितान्वयवत्यलङ्कृता कृतिना ।सूक्तिसुतनुः प्रदेया शुद्धा घटिकाद्रिसुरवराय शुभा ॥ ५४॥

mahanīyavṛttavarṇā mahitānvayavatyalaṅkṛtā kṛtinā |sūktisutanuḥ pradeyā śuddhā ghaṭikādrisuravarāya śubhā || 54||

गां यो ददाति सार्थां गलदमितप्रेमधारया सहिताम् ।घटिकाचलप्रणयिने घटते किं तस्य काङ्क्षितं नालम् ॥ ५५॥

gāṃ yo dadāti sārthāṃ galadamitapremadhārayā sahitām |ghaṭikācalapraṇayine ghaṭate kiṃ tasya kāṅkṣitaṃ nālam || 55||

कलुषापि घटकवाक्यैः क्षालितवैमुख्यकल्मषा धिषणा ।पृथुगुणभृते मदीया स्पृहयति घटिकाचलप्रियाय भृशम् ॥ ५६॥

kaluṣāpi ghaṭakavākyaiḥ kṣālitavaimukhyakalmaṣā dhiṣaṇā |pṛthuguṇabhṛte madīyā spṛhayati ghaṭikācalapriyāya bhṛśam || 56||

अन्विच्छतान्यमथवा तृष्णीमाध्वं सुरर्षिपितृमुख्याः ।तत्किङ्करोऽर्पितोऽहं तज्ज्ञैर्घटिकाद्रिभृभुजे सचिवैः ॥ ५७॥

anvicchatānyamathavā tṛṣṇīmādhvaṃ surarṣipitṛmukhyāḥ |tatkiṅkaro'rpito'haṃ tajjñairghaṭikādribhṛbhuje sacivaiḥ || 57||

क्रुध्यन्त्यनर्थकं ये गोप्त्रे घटिकामहीभृतो हरये ।मन्ये मन्दधियस्तान् मातङ्गानेव मदजुषः कलुषान् ॥ ५८॥

krudhyantyanarthakaṃ ye goptre ghaṭikāmahībhṛto haraye |manye mandadhiyastān mātaṅgāneva madajuṣaḥ kaluṣān || 58||

दुष्टान् निगृह्य तरसा शिष्टानखिलांश्चिरेण पालयते ।स्वस्ति सुहृदे गुणानां भूत्यै घटिकाद्रिभूभुजे भूयात् ॥ ५९॥

duṣṭān nigṛhya tarasā śiṣṭānakhilāṃścireṇa pālayate |svasti suhṛde guṇānāṃ bhūtyai ghaṭikādribhūbhuje bhūyāt || 59||

मृदुलं भवाग्निपाकाद् व्याप्तं गुणतो विशुद्धमहमन्नम् ।भोज्यं समर्पये स्वं भोक्त्रे घटिङ्काचलस्य सुस्नेहम् ॥ ६०॥

mṛdulaṃ bhavāgnipākād vyāptaṃ guṇato viśuddhamahamannam |bhojyaṃ samarpaye svaṃ bhoktre ghaṭiṅkācalasya susneham || 60||

नित्यश्रिये गुणानां निधये निष्ठ्यूतनिखिलदोषाय ।प्रज्ञार्पिता मयैषा भर्त्रे घटिकाचलस्य भाग्यवशात् ॥ ६१॥

nityaśriye guṇānāṃ nidhaye niṣṭhyūtanikhiladoṣāya |prajñārpitā mayaiṣā bhartre ghaṭikācalasya bhāgyavaśāt || 61||

पात्रे समाश्रितानां शास्त्रे सत्पुरुप विद्विषां सततम् ।दात्रे सकलफलानां नेत्रे जगतां नमो नृसिंहाय ॥ ६२॥

pātre samāśritānāṃ śāstre satpurupa vidviṣāṃ satatam |dātre sakalaphalānāṃ netre jagatāṃ namo nṛsiṃhāya || 62||

सुमनःसमूहभव्याच्छुकमुखसेव्यात् सुशीतलच्छायात् ।घटिकाद्रितटविरूढात् कल्पतरोः कस्य काङ्क्षितं न फलम् ॥ ६३॥

sumanaḥsamūhabhavyācchukamukhasevyāt suśītalacchāyāt |ghaṭikādritaṭavirūḍhāt kalpataroḥ kasya kāṅkṣitaṃ na phalam || 63||

अविरतहितप्रवृत्तेरापदि सहितादकृत्रिमस्नेहात् ।मम घटिकाचलबन्धोर्मान्यादन्येन केन किं कार्यम् ॥ ६४॥

aviratahitapravṛtterāpadi sahitādakṛtrimasnehāt |mama ghaṭikācalabandhormānyādanyena kena kiṃ kāryam || 64||

घनकरुणामृतपूरैर्घटिकाचलकृष्णमेघतो जनितैः ।पापाटवी प्रदग्धा भजते चित्रं भवाम्बुधिः शोषम् ॥ ६५॥

ghanakaruṇāmṛtapūrairghaṭikācalakṛṣṇameghato janitaiḥ |pāpāṭavī pradagdhā bhajate citraṃ bhavāmbudhiḥ śoṣam || 65||

गोभिः प्रकाशितार्थाद् गोप्तुर्घटिकाभिधानवाद्र्युदितात् ।जागर्ति सततनिद्रं सवितुर्जगतां मनःसरोजं मे ॥ ६६॥

gobhiḥ prakāśitārthād gopturghaṭikābhidhānavādryuditāt |jāgarti satatanidraṃ saviturjagatāṃ manaḥsarojaṃ me || 66||

रुष्टेन येन रौद्रो रुग्णो धरणिं जगाम शरभोऽपि ।स न दुरितदन्तिनोऽस्माद् घटिकाद्रिहरेः कथं न बिभ्यति मे ॥ ६७॥

ruṣṭena yena raudro rugṇo dharaṇiṃ jagāma śarabho'pi |sa na duritadantino'smād ghaṭikādrihareḥ kathaṃ na bibhyati me || 67||

अव्याहतप्रचारादवमतमन्त्रौषधात् सहस्रास्यात् ।पातकमूषकनिवहात् पायात् घटिकाद्रिभोगिनः को वा ॥ ६८॥

avyāhatapracārādavamatamantrauṣadhāt sahasrāsyāt |pātakamūṣakanivahāt pāyāt ghaṭikādribhoginaḥ ko vā || 68||

कलितपुरुषार्थसार्थाद् घटिकाघटितात् सनातनाद् धर्मात् ।किं वा प्रमाद्यतां स्यात् क्षेमं ह्यत्राप्यमुत्र वा पुंसाम् ॥ ६९॥

kalitapuruṣārthasārthād ghaṭikāghaṭitāt sanātanād dharmāt |kiṃ vā pramādyatāṃ syāt kṣemaṃ hyatrāpyamutra vā puṃsām || 69||

घनसमयनिर्व्यपेक्षाद् घटिकाचलभूमिभर्तुरुद्भ्रूता ।क्षालयति कलुषमलिनं काचन करुणातरङ्गिणी भुवनम् ॥ ७०॥

ghanasamayanirvyapekṣād ghaṭikācalabhūmibharturudbhrūtā |kṣālayati kaluṣamalinaṃ kācana karuṇātaraṅgiṇī bhuvanam || 70||

सन्निहितशङ्खपद्मात् सर्वसखात् सकलपुण्यजनसेव्यात् ।घटिकाद्रिराजराजात् का वा न स्यात् समाश्रिता सम्पत् ॥ ७१॥

sannihitaśaṅkhapadmāt sarvasakhāt sakalapuṇyajanasevyāt |ghaṭikādrirājarājāt kā vā na syāt samāśritā sampat || 71||

वृजिनविषानलमूर्च्छाविमुषितचित्तान् भवोरगग्रस्तान् ।कुर्वीत लब्धसत्तान् को वा घटिकाद्रिगारुडिकतोऽन्यः ॥ ७२॥

vṛjinaviṣānalamūrcchāvimuṣitacittān bhavoragagrastān |kurvīta labdhasattān ko vā ghaṭikādrigāruḍikato'nyaḥ || 72||

नित्यान्निरस्तदोषान्नियतपदात् पुण्यकीर्तनश्रवणात् ।विनतोचित्ताभिधानाद् ब्रह्मण एवाधिगम्यते सकलम् ॥ ७३॥

nityānnirastadoṣānniyatapadāt puṇyakīrtanaśravaṇāt |vinatocittābhidhānād brahmaṇa evādhigamyate sakalam || 73||

शुद्धिमुपजनयतोऽग्र्यां स्वालोकेनैव चक्षुषो जगताम् ।घटिकाद्रिमित्रतोऽन्यं कलयेऽखिललोकबान्धवं नाहम् ॥ ७४॥

śuddhimupajanayato'gryāṃ svālokenaiva cakṣuṣo jagatām |ghaṭikādrimitrato'nyaṃ kalaye'khilalokabāndhavaṃ nāham || 74||

अमृतप्रवाहसहजैरालोकैरमलशीतलैः स्नपिताः ।विविधान् भवदवदाहान् विजहति घटिकाद्रिविलसितस्य विधोः ॥ ७५॥

amṛtapravāhasahajairālokairamalaśītalaiḥ snapitāḥ |vividhān bhavadavadāhān vijahati ghaṭikādrivilasitasya vidhoḥ || 75||

धर्मोत्तरं द्विपाद्रेः शङ्के घटिकाद्रिमत्र न विवादः ।केनाङ्ग्यकारि नास्मिन् कृष्णमृगस्यास्य नियतसंवासः ॥ ७६॥

dharmottaraṃ dvipādreḥ śaṅke ghaṭikādrimatra na vivādaḥ |kenāṅgyakāri nāsmin kṛṣṇamṛgasyāsya niyatasaṃvāsaḥ || 76||

अमृतार्पणं श्रितानामभिदुररसनत्वमार्जवं गमने ।कथमिव च गरुडसख्यं घटिकाचलकृष्णभोगिनो घटते ॥ ७७॥

amṛtārpaṇaṃ śritānāmabhidurarasanatvamārjavaṃ gamane |kathamiva ca garuḍasakhyaṃ ghaṭikācalakṛṣṇabhogino ghaṭate || 77||

आगःसु संश्रितानामनभिज्ञस्यात्मसाम्यदस्याहम् ।नियमेन सेवकः स्यां नित्यं घटिकाद्रिभूमिपालस्य ॥ ७८॥

āgaḥsu saṃśritānāmanabhijñasyātmasāmyadasyāham |niyamena sevakaḥ syāṃ nityaṃ ghaṭikādribhūmipālasya || 78||

सत्त्वोत्तरस्य दानं सद्भ्यो घटिकाद्रिभूभृतो युक्तम् ।सुतरां पापरतानां युज्येत कथं सुरद्विषां दानम् ॥ ७९॥

sattvottarasya dānaṃ sadbhyo ghaṭikādribhūbhṛto yuktam |sutarāṃ pāparatānāṃ yujyeta kathaṃ suradviṣāṃ dānam || 79||

घटिकाद्रिकामसुरभेः काङ्क्षापदसकलफलदुहो जगताम् ।मातुर्गवां मयि स्याद् वत्से बहुलं कथं न वात्सल्यम् ॥ ८०॥

ghaṭikādrikāmasurabheḥ kāṅkṣāpadasakalaphaladuho jagatām |māturgavāṃ mayi syād vatse bahulaṃ kathaṃ na vātsalyam || 80||

हन्त न जहत्यमोघामाशिषमायुः श्रियं प्रयुञ्जानाः ।घटिकाचलहरिचन्दनपार्श्वमहीनाः सुपावनाहाराः ॥ ८१॥

hanta na jahatyamoghāmāśiṣamāyuḥ śriyaṃ prayuñjānāḥ |ghaṭikācalaharicandanapārśvamahīnāḥ supāvanāhārāḥ || 81||

सदमृतफलस्य घटिकाशैलगसालस्य सविधगस्यापि ।शब्दादिनिम्बसेवां सन्त्यजतिं न हन्तु हृदयकामो ॥ ८२॥

sadamṛtaphalasya ghaṭikāśailagasālasya savidhagasyāpi |śabdādinimbasevāṃ santyajatiṃ na hantu hṛdayakāmo || 82||

अमलानुरागसलिलैरभिलाषमलान्यपोह्य सकलानि ।कुसुमैरहिंसनाद्यैः कुर्यां घटिकाद्विदैवतस्यार्चाम् ॥ ८३॥

amalānurāgasalilairabhilāṣamalānyapohya sakalāni |kusumairahiṃsanādyaiḥ kuryāṃ ghaṭikādvidaivatasyārcām || 83||

धनदाद्यैरपि न परैः साध्यं सुमहद्धिरण्यदानं तत् ।सुकरेण कृतवतः स्यात् तुल्यो घटिकाद्रिभूभृतः को वा ॥ ८४॥

dhanadādyairapi na paraiḥ sādhyaṃ sumahaddhiraṇyadānaṃ tat |sukareṇa kṛtavataḥ syāt tulyo ghaṭikādribhūbhṛtaḥ ko vā || 84||

जनयत्यवति च सकलांज्ञापयति यो हिताहिते शास्त्रात् ।साम्ये तु तस्य को वा ज्ञानी घटिकाद्रिसर्वजनकस्य ॥ ८५॥

janayatyavati ca sakalāṃjñāpayati yo hitāhite śāstrāt |sāmye tu tasya ko vā jñānī ghaṭikādrisarvajanakasya || 85||

दोषाकरे विरागं सूर्यालोके विकासमामोदम् ।पद्माख्यामपि वहतो युक्तं घटिकाद्रिपस्य केसरिता ॥ ८६॥

doṣākare virāgaṃ sūryāloke vikāsamāmodam |padmākhyāmapi vahato yuktaṃ ghaṭikādripasya kesaritā || 86||

तन्त्री मयाद्य लब्धा तपसा विपुलेन भक्तिकन्येयम् ।भजतामव्यभिचारं भावं घटिकाद्रिमर्तरि प्रौढा ॥ ८७॥

tantrī mayādya labdhā tapasā vipulena bhaktikanyeyam |bhajatāmavyabhicāraṃ bhāvaṃ ghaṭikādrimartari prauḍhā || 87||

भास्वति सुरासुरगुरौ भोगिनि व न्दारुसौम्यमन्दारे ।घटताममायघटिते घटिकाद्विविधौ कथं ग्रहैः पीडा ॥ ८८॥

bhāsvati surāsuragurau bhogini va ndārusaumyamandāre |ghaṭatāmamāyaghaṭite ghaṭikādvividhau kathaṃ grahaiḥ pīḍā || 88||

समवर्तिनि भुवनेशे पुण्यजने पावके जगत्प्राणे ।श्रीदे शिवेऽपि घटिकाशैलहरौ सति किमन्यदिक्पालैः ॥ ८९॥

samavartini bhuvaneśe puṇyajane pāvake jagatprāṇe |śrīde śive'pi ghaṭikāśailaharau sati kimanyadikpālaiḥ || 89||

यस्योदयः परार्थो यस्यालोकेन यात्यघं विलयम् ।काले च बोधयति यो घटिकामित्रेऽत्र को विरागी स्यात् ॥ ९०॥

yasyodayaḥ parārtho yasyālokena yātyaghaṃ vilayam |kāle ca bodhayati yo ghaṭikāmitre'tra ko virāgī syāt || 90||

सरसे जाग्रति घटिकाशैलगते सरसिजालये मोहात् ।विरसेषु चित्तनामा विषयक्षरकेषु विभ्रमति भृङ्गः ॥ ९१॥

sarase jāgrati ghaṭikāśailagate sarasijālaye mohāt |viraseṣu cittanāmā viṣayakṣarakeṣu vibhramati bhṛṅgaḥ || 91||

बिभ्रति सदैव लक्ष्मीं विभ्राम्यति मित्रमण्डले विदुषाम् ।घटिकाद्विसार्वभौमे घटते किं वा न संश्रिताभिमतम् ॥ ९२॥

bibhrati sadaiva lakṣmīṃ vibhrāmyati mitramaṇḍale viduṣām |ghaṭikādvisārvabhaume ghaṭate kiṃ vā na saṃśritābhimatam || 92||

श्रितघटिकाचलशिखरे स्थिरकरुणापूरनिर्भरे शिशिरे ।दीव्यन्ति विमलपक्षा दिव्ये कमलालये चिरं हंसाः ॥ ९३॥

śritaghaṭikācalaśikhare sthirakaruṇāpūranirbhare śiśire |dīvyanti vimalapakṣā divye kamalālaye ciraṃ haṃsāḥ || 93||

विहरति बहुगुणजाले वीरे घटिकाद्रिकृष्णवर्त्मनिभे ।विजहति समस्ततापान् विजयन्ते मृत्युमपि विमोहमहो ॥ ९४॥

viharati bahuguṇajāle vīre ghaṭikādrikṛṣṇavartmanibhe |vijahati samastatāpān vijayante mṛtyumapi vimohamaho || 94||

कनकमयकटकशोभां कलयति घटिकामहीभृतो रुचिरे ।दीप्तिमति कृष्णरत्ने दृष्टे त्रासलवमनुभवेत् को वा ॥ ९५॥

kanakamayakaṭakaśobhāṃ kalayati ghaṭikāmahībhṛto rucire |dīptimati kṛṣṇaratne dṛṣṭe trāsalavamanubhavet ko vā || 95||

सप्तर्षिसेव्यमाने सन्ततसुमनस्कृते सहस्राक्षे ।रमतां मनो हरौ मे राजति घटिकाद्रिरत्नसानुतटे ॥ ९६॥

saptarṣisevyamāne santatasumanaskṛte sahasrākṣe |ramatāṃ mano harau me rājati ghaṭikādriratnasānutaṭe || 96||

पादस्पर्शनविभवात् पावितभुवने प्रबोधितात्मणे ।भजति घटिकाद्रिमित्रे भगवति भावं मनःसरोजं मे ॥ ९७॥

pādasparśanavibhavāt pāvitabhuvane prabodhitātmaṇe |bhajati ghaṭikādrimitre bhagavati bhāvaṃ manaḥsarojaṃ me || 97||

तुष्टेऽल्पतः सुशीले सुगुणगृहीते सुलक्षणे सुदृढे ।आरोपितो मदीयो भद्रे घटिकाद्रिघूर्वहे भारः ॥ ९८॥

tuṣṭe'lpataḥ suśīle suguṇagṛhīte sulakṣaṇe sudṛḍhe |āropito madīyo bhadre ghaṭikādrighūrvahe bhāraḥ || 98||

अननुगुणामपि वाणीमागःसन्दोहमन्दमतिकलिताम् ।अङ्गीकरोतु भगवानाश्रितदोषावलोकनाकल्यः ॥ ९९॥

ananuguṇāmapi vāṇīmāgaḥsandohamandamatikalitām |aṅgīkarotu bhagavānāśritadoṣāvalokanākalyaḥ || 99||

स्वामिन एव कृतिर्मे सूक्तिस्तोषाय तदपि तस्यैषा ।स्वोक्तमनुवदति बाले सुतरां तातो हि तोषमुपयाति ॥ १००॥

svāmina eva kṛtirme sūktistoṣāya tadapi tasyaiṣā |svoktamanuvadati bāle sutarāṃ tāto hi toṣamupayāti || 100||

भक्तोचितोपयुक्तां भक्त्या सौम्यवरकिङ्करोपहृताम् ।अमृतफलावलिमनघां मृदुलामास्वाद्य मृत्युमतियन्ति ॥ १०१॥

bhaktocitopayuktāṃ bhaktyā saumyavarakiṅkaropahṛtām |amṛtaphalāvalimanaghāṃ mṛdulāmāsvādya mṛtyumatiyanti || 101||

इति श्रीघटिकाद्रिनाथशतकं सम्पूर्णम् ।स्तोत्रसमुच्चयः २ (५७)मेत्रे ओन् ग़ोद् ण्र्सिम्ह अत् ग़्हतिकचल ओर् षोलिन्घुर्औथोर् मुस्त् हवे बीन् अ ष्रिवैस्नव; हे पय्स् ओबेइसन्चे

iti śrīghaṭikādrināthaśatakaṃ sampūrṇam |stotrasamuccayaḥ 2 (57)metre on ग़od ṇrsimha at ग़hatikacala or ṣolinghurauthor must have bīn a ṣrivaisnava; he pays obeisance