ताराशतनामस्तोत्रम् २ Tarashatanamastotra from Brihannilatantra

श्रीदेव्युवाच ।सर्वं संसूचितं देव नाम्नां शतं महेश्वर ।यत्नैः शतैर्महादेव मयि नात्र प्रकाशितम् ॥ १॥

śrīdevyuvāca |sarvaṃ saṃsūcitaṃ deva nāmnāṃ śataṃ maheśvara |yatnaiḥ śatairmahādeva mayi nātra prakāśitam || 1||

पठित्वा परमेशान हठात् सिद्ध्यति साधकः ।नाम्नां शतं महादेव कथयस्व समासतः ॥ २॥

paṭhitvā parameśāna haṭhāt siddhyati sādhakaḥ |nāmnāṃ śataṃ mahādeva kathayasva samāsataḥ || 2||

श्रीभैरव उवाच ।शृणु देवि प्रवक्ष्यामि भक्तानां हितकारकम् ।यज्ज्ञात्वा साधकाः सर्वे जीवन्मुक्तिमुपागताः ॥ ३॥

śrībhairava uvāca |śṛṇu devi pravakṣyāmi bhaktānāṃ hitakārakam |yajjñātvā sādhakāḥ sarve jīvanmuktimupāgatāḥ || 3||

कृतार्थास्ते हि विस्तीर्णा यान्ति देवीपुरे स्वयम् ।नाम्नां शतं प्रवक्ष्यामि जपात् स(अ)र्वज्ञदायकम् ॥ ४॥

kṛtārthāste hi vistīrṇā yānti devīpure svayam |nāmnāṃ śataṃ pravakṣyāmi japāt sa(a)rvajñadāyakam || 4||

नाम्नां सहस्रं संत्यज्य नाम्नां शतं पठेत् सुधीः ।कलौ नास्ति महेशानि कलौ नान्या गतिर्भवेत् ॥ ५॥

nāmnāṃ sahasraṃ saṃtyajya nāmnāṃ śataṃ paṭhet sudhīḥ |kalau nāsti maheśāni kalau nānyā gatirbhavet || 5||

शृणु साध्वि वरारोहे शतं नाम्नां पुरातनम् ।सर्वसिद्धिकरं पुंसां साधकानां सुखप्रदम् ॥ ६॥

śṛṇu sādhvi varārohe śataṃ nāmnāṃ purātanam |sarvasiddhikaraṃ puṃsāṃ sādhakānāṃ sukhapradam || 6||

ॐ तारिणी तारसंयोगा महातारस्वरूपिणी ।तारकप्राणहर्त्री च तारानन्दस्वरूपिणी ॥ ७॥

oṃ tāriṇī tārasaṃyogā mahātārasvarūpiṇī |tārakaprāṇahartrī ca tārānandasvarūpiṇī || 7||

महानीला महेशानी महानीलसरस्वती ।उग्रतारा सती साध्वी भवानी भवमोचिनी ॥ ८॥

mahānīlā maheśānī mahānīlasarasvatī |ugratārā satī sādhvī bhavānī bhavamocinī || 8||

महाशङ्खरता भीमा शाङ्करी शङ्करप्रिया ।महादानरता चण्डी चण्डासुरविनाशिनी ॥ ९॥

mahāśaṅkharatā bhīmā śāṅkarī śaṅkarapriyā |mahādānaratā caṇḍī caṇḍāsuravināśinī || 9||

चन्द्रवद्रूपवदना चारुचन्द्रमहोज्ज्वला ।एकजटा कुरङ्गाक्षी वरदाभयदायिनी ॥ १०॥

candravadrūpavadanā cārucandramahojjvalā |ekajaṭā kuraṅgākṣī varadābhayadāyinī || 10||

महाकाली महादेवी गुह्यकाली वरप्रदा ।महाकालरता साध्वी महैश्वर्यप्रदायिनी ॥ ११॥

mahākālī mahādevī guhyakālī varapradā |mahākālaratā sādhvī mahaiśvaryapradāyinī || 11||

मुक्तिदा स्वर्गदा सौम्या सौम्यरूपा सुरारिहा ।शठविज्ञा महानादा कमला बगलामुखी ॥ १२॥

muktidā svargadā saumyā saumyarūpā surārihā |śaṭhavijñā mahānādā kamalā bagalāmukhī || 12||

महामुक्तिप्रदा काली कालरात्रिस्वरूपिणी ।सरस्वती सरिच्श्रेष्ठा स्वर्गङ्गा स्वर्गवासिनी ॥ १३॥

mahāmuktipradā kālī kālarātrisvarūpiṇī |sarasvatī saricśreṣṭhā svargaṅgā svargavāsinī || 13||

हिमालयसुता कन्या कन्यारूपविलासिनी ।शवोपरिसमासीना मुण्डमालाविभूषिता ॥ १४॥

himālayasutā kanyā kanyārūpavilāsinī |śavoparisamāsīnā muṇḍamālāvibhūṣitā || 14||

दिगम्बरा पतिरता विपरीतरतातुरा ।रजस्वला रजःप्रीता स्वयम्भूकुसुमप्रिया ॥ १५॥

digambarā patiratā viparītaratāturā |rajasvalā rajaḥprītā svayambhūkusumapriyā || 15||

स्वयम्भूकुसुमप्राणा स्वयम्भूकुसुमोत्सुका ।शिवप्राणा शिवरता शिवदात्री शिवासना ॥ १६॥

svayambhūkusumaprāṇā svayambhūkusumotsukā |śivaprāṇā śivaratā śivadātrī śivāsanā || 16||

अट्टहासा घोररूपा नित्यानन्दस्वरूपिणी ।मेघवर्णा किशोरी च युवतीस्तनकुङ्कुमा ॥ १७॥

aṭṭahāsā ghorarūpā nityānandasvarūpiṇī |meghavarṇā kiśorī ca yuvatīstanakuṅkumā || 17||

खर्वा खर्वजनप्रीता मणिभूषितमण्डना ।किङ्किणीशब्दसंयुक्ता नृत्यन्ती रक्तलोचना ॥ १८॥

kharvā kharvajanaprītā maṇibhūṣitamaṇḍanā |kiṅkiṇīśabdasaṃyuktā nṛtyantī raktalocanā || 18||

कृशाङ्गी कृसरप्रीता शरासनगतोत्सुका ।कपालखर्परधरा पञ्चाशन्मुण्डमालिका ॥ १९॥

kṛśāṅgī kṛsaraprītā śarāsanagatotsukā |kapālakharparadharā pañcāśanmuṇḍamālikā || 19||

हव्यकव्यप्रदा तुष्टिः पुष्टिश्चैव वराङ्गना ।शान्तिः क्षान्तिर्मनो बुद्धिः सर्वबीजस्वरूपिणी ॥ २०॥

havyakavyapradā tuṣṭiḥ puṣṭiścaiva varāṅganā |śāntiḥ kṣāntirmano buddhiḥ sarvabījasvarūpiṇī || 20||

उग्रापतारिणी तीर्णा निस्तीर्णगुणवृन्दका ।रमेशी रमणी रम्या रामानन्दस्वरूपिणी ॥ २१॥

ugrāpatāriṇī tīrṇā nistīrṇaguṇavṛndakā |rameśī ramaṇī ramyā rāmānandasvarūpiṇī || 21||

रजनीकरसम्पूर्णा रक्तोत्पलविलोचना ।इति ते कथितं दिव्यं शतं नाम्नां महेश्वरि ॥ २२॥

rajanīkarasampūrṇā raktotpalavilocanā |iti te kathitaṃ divyaṃ śataṃ nāmnāṃ maheśvari || 22||

प्रपठेद् भक्तिभावेन तारिण्यास्तारणक्षमम् ।सर्वासुरमहानादस्तूयमानमनुत्तमम् ॥ २३॥

prapaṭhed bhaktibhāvena tāriṇyāstāraṇakṣamam |sarvāsuramahānādastūyamānamanuttamam || 23||

षण्मासाद् महदैश्वर्यं लभते परमेश्वरि ।भूमिकामेन जप्तव्यं वत्सरात्तां लभेत् प्रिये ॥ २४॥

ṣaṇmāsād mahadaiśvaryaṃ labhate parameśvari |bhūmikāmena japtavyaṃ vatsarāttāṃ labhet priye || 24||

धनार्थी प्राप्नुयादर्थं मोक्षार्थी मोक्षमाप्नुयात् ।दारार्थी प्राप्नुयाद् दारान् सर्वागम(पुरो?प्रचो)दितान् ॥ २५॥

dhanārthī prāpnuyādarthaṃ mokṣārthī mokṣamāpnuyāt |dārārthī prāpnuyād dārān sarvāgama(puro?praco)ditān || 25||

अष्टम्यां च शतावृत्त्या प्रपठेद् यदि मानवः ।सत्यं सिद्ध्यति देवेशि संशयो नास्ति कश्चन ॥ २६॥

aṣṭamyāṃ ca śatāvṛttyā prapaṭhed yadi mānavaḥ |satyaṃ siddhyati deveśi saṃśayo nāsti kaścana || 26||

इति सत्यं पुनः सत्यं सत्यं सत्यं महेश्वरि ।अस्मात् परतरं नास्ति स्तोत्रमध्ये न संशयः ॥ २७॥

iti satyaṃ punaḥ satyaṃ satyaṃ satyaṃ maheśvari |asmāt parataraṃ nāsti stotramadhye na saṃśayaḥ || 27||

नाम्नां शतं पठेद् मन्त्रं संजप्य भक्तिभावतः ।प्रत्यहं प्रपठेद् देवि यदीच्छेत् शुभमात्मनः ॥ २८॥

nāmnāṃ śataṃ paṭhed mantraṃ saṃjapya bhaktibhāvataḥ |pratyahaṃ prapaṭhed devi yadīcchet śubhamātmanaḥ || 28||

इदानीं कथयिष्यामि विद्योत्पत्तिं वरानने ।येन विज्ञानमात्रेण विजयी भुवि जायते ॥ २९॥

idānīṃ kathayiṣyāmi vidyotpattiṃ varānane |yena vijñānamātreṇa vijayī bhuvi jāyate || 29||

योनिबीजत्रिरावृत्त्या मध्यरात्रौ वरानने ।अभिमन्त्र्य जलं स्निग्धं अष्टोत्तरशतेन च ॥ ३०॥

yonibījatrirāvṛttyā madhyarātrau varānane |abhimantrya jalaṃ snigdhaṃ aṣṭottaraśatena ca || 30||

तज्जलं तु पिबेद् देवि षण्मासं जपते यदि ।सर्वविद्यामयो भूत्वा मोदते पृथिवीतले ॥ ३१॥

tajjalaṃ tu pibed devi ṣaṇmāsaṃ japate yadi |sarvavidyāmayo bhūtvā modate pṛthivītale || 31||

शक्तिरूपां महादेवीं शृणु हे नगनन्दिनि ।वैष्णवः शैवमार्गो वा शाक्तो वा गाणपोऽपि वा ॥ ३२॥

śaktirūpāṃ mahādevīṃ śṛṇu he naganandini |vaiṣṇavaḥ śaivamārgo vā śākto vā gāṇapo'pi vā || 32||

तथापि शक्तेराधिक्यं शृणु भैरवसुन्दरि ।सच्चिदानन्दरूपाच्च सकलात् परमेश्वरात् ॥ ३३॥

tathāpi śakterādhikyaṃ śṛṇu bhairavasundari |saccidānandarūpācca sakalāt parameśvarāt || 33||

शक्तिरासीत् ततो नादो नादाद् बिन्दुस्ततः परम् ।अथ बिन्द्वात्मनः कालरूपबिन्दुकलात्मनः ॥ ३४॥

śaktirāsīt tato nādo nādād bindustataḥ param |atha bindvātmanaḥ kālarūpabindukalātmanaḥ || 34||

जायते च जगत्सर्वं सस्थावरचरात्मकम् ।श्रोतव्यः स च मन्तव्यो निर्ध्यातव्यः स एव हि ॥ ३५॥

jāyate ca jagatsarvaṃ sasthāvaracarātmakam |śrotavyaḥ sa ca mantavyo nirdhyātavyaḥ sa eva hi || 35||

साक्षात्कार्यश्च देवेशि आगमैर्विविधैः शिवे ।श्रोतव्यः श्रुतिवाक्येभ्यो मन्तव्यो मननादिभिः ॥ ३६॥

sākṣātkāryaśca deveśi āgamairvividhaiḥ śive |śrotavyaḥ śrutivākyebhyo mantavyo mananādibhiḥ || 36||

उपपत्तिभिरेवायं ध्यातव्यो गुरुदेशतः ।तदा स एव सर्वात्मा प्रत्यक्षो भवति क्षणात् ॥ ३७॥

upapattibhirevāyaṃ dhyātavyo gurudeśataḥ |tadā sa eva sarvātmā pratyakṣo bhavati kṣaṇāt || 37||

तस्मिन् देवेशि प्रत्यक्षे शृणुष्व परमेश्वरि ।भावैर्बहुविधैर्देवि भावस्तत्रापि नीयते ॥ ३८॥

tasmin deveśi pratyakṣe śṛṇuṣva parameśvari |bhāvairbahuvidhairdevi bhāvastatrāpi nīyate || 38||

भक्तेभ्यो नानाघासेभ्यो गवि चैको यथा रसः ।सदुग्धाख्यसंयोगे नानात्वं लभते प्रिये ॥ ३९॥

bhaktebhyo nānāghāsebhyo gavi caiko yathā rasaḥ |sadugdhākhyasaṃyoge nānātvaṃ labhate priye || 39||

तृणेन जायते देवि रसस्तस्मात् परो रसः ।तस्मात् दधि ततो हव्यं तस्मादपि रसोदयः ॥ ४०॥

tṛṇena jāyate devi rasastasmāt paro rasaḥ |tasmāt dadhi tato havyaṃ tasmādapi rasodayaḥ || 40||

स एव कारणं तत्र तत्कार्यं स च लक्ष्यते ।दृश्यते च महादे(व?वि)न कार्यं न च कारणम् ॥ ४१॥

sa eva kāraṇaṃ tatra tatkāryaṃ sa ca lakṣyate |dṛśyate ca mahāde(va?vi)na kāryaṃ na ca kāraṇam || 41||

तथैवायं स एवात्मा नानाविग्रहयोनिषु ।जायते च ततो जातः कालभेदो हि भाव्यते ॥ ४२॥

tathaivāyaṃ sa evātmā nānāvigrahayoniṣu |jāyate ca tato jātaḥ kālabhedo hi bhāvyate || 42||

स जातः स मृतो बद्धः स मुक्तः स सुखी पुमान् ।स वृद्धः स च विद्वांश्च न स्त्री पुमान् नपुंसकः ॥ ४३॥

sa jātaḥ sa mṛto baddhaḥ sa muktaḥ sa sukhī pumān |sa vṛddhaḥ sa ca vidvāṃśca na strī pumān napuṃsakaḥ || 43||

नानाध्याससमायोगादात्मना जायते शिवे ।एक एव स एवात्मा सर्वरूपः सनातनः ॥ ४४॥

nānādhyāsasamāyogādātmanā jāyate śive |eka eva sa evātmā sarvarūpaḥ sanātanaḥ || 44||

अव्यक्तश्च स च व्यक्तः प्रकृत्या ज्ञायते ध्रुवम् ।तस्मात् प्रकृतियोगेन विना न ज्ञायते क्वचित् ॥ ४५॥

avyaktaśca sa ca vyaktaḥ prakṛtyā jñāyate dhruvam |tasmāt prakṛtiyogena vinā na jñāyate kvacit || 45||

विना घटत्वयोगेन न प्रत्यक्षो यथा घटः ।इतराद् भिद्यमानोऽपि स भेदमुपगच्छति ॥ ४६॥

vinā ghaṭatvayogena na pratyakṣo yathā ghaṭaḥ |itarād bhidyamāno'pi sa bhedamupagacchati || 46||

मां विना पुरुषे भेदो न च याति कथञ्चन ।न प्रयोगैर्न च ज्ञानैर्न श्रुत्या न गुरुक्रमैः ॥ ४७॥

māṃ vinā puruṣe bhedo na ca yāti kathañcana |na prayogairna ca jñānairna śrutyā na gurukramaiḥ || 47||

न स्नानैस्तर्पणैर्वापि नच दानैः कदाचन ।प्रकृत्या ज्ञायते ह्यात्मा प्रकृत्या लुप्यते पुमान् ॥ ४८॥

na snānaistarpaṇairvāpi naca dānaiḥ kadācana |prakṛtyā jñāyate hyātmā prakṛtyā lupyate pumān || 48||

प्रकृत्याधिष्ठितं सर्वं प्रकृत्या वञ्चितं जगत् ।प्रकृत्या भेदमाप्नोति प्रकृत्याभेदमाप्नुयात् ॥ ४९॥

prakṛtyādhiṣṭhitaṃ sarvaṃ prakṛtyā vañcitaṃ jagat |prakṛtyā bhedamāpnoti prakṛtyābhedamāpnuyāt || 49||

नरस्तु प्रकृतिर्नैव न पुमान् परमेश्वरः ।इति ते कथितं तत्त्वं सर्वसारमनोरमम् ॥ ५०॥

narastu prakṛtirnaiva na pumān parameśvaraḥ |iti te kathitaṃ tattvaṃ sarvasāramanoramam || 50||

इति श्रीबृहन्नीलतन्त्रे भैरवभैरवीसंवादे ताराशतनामतत्त्वसारनिरूपणं विंशः पटलः ॥ २०॥

iti śrībṛhannīlatantre bhairavabhairavīsaṃvāde tārāśatanāmatattvasāranirūpaṇaṃ viṃśaḥ paṭalaḥ || 20||