ब्रह्मास्त्रबगलामुखीकवचम् Shri Brahmastra Bagalamukhi Khavacham

श्री गणेशाय नमः । श्री बगलायै नमः ।अथ ब्रह्मास्त्रबगलाकवचम् ।श्रीब्रह्मोवाच ।विश्वेश दक्षिणामूर्ते निगमागमवित् प्रभो ।मह्यं पुरा त्वया दत्ता विद्या ब्रह्मास्त्रसंज्ञिता ॥ १॥

śrī gaṇeśāya namaḥ | śrī bagalāyai namaḥ |atha brahmāstrabagalākavacam |śrībrahmovāca |viśveśa dakṣiṇāmūrte nigamāgamavit prabho |mahyaṃ purā tvayā dattā vidyā brahmāstrasaṃjñitā || 1||

तस्य मे कवचं ब्रूहि येनाहं सिद्धिमाप्नुयाम् ॥भवामि वज्रकवचं ब्रह्मास्त्रन्यासमात्रतः ॥ २॥

tasya me kavacaṃ brūhi yenāhaṃ siddhimāpnuyām ||bhavāmi vajrakavacaṃ brahmāstranyāsamātrataḥ || 2||

श्रीदक्षिणामूर्तिरुवाच ।शृणु ब्रह्मन् परं गुह्य ब्रह्मास्त्रकवचं शुभम् ।यस्योच्चारणमात्रेण भवेद् वै सूर्यसन्निभः ॥ ३॥

śrīdakṣiṇāmūrtiruvāca |śṛṇu brahman paraṃ guhya brahmāstrakavacaṃ śubham |yasyoccāraṇamātreṇa bhaved vai sūryasannibhaḥ || 3||

सुदर्शनं मया दत्तं कृपया विष्णवे तथा ।तद्वत् ब्रह्मास्त्रविद्यायाः कवचं कवयाम्यहम् ॥ ४॥

sudarśanaṃ mayā dattaṃ kṛpayā viṣṇave tathā |tadvat brahmāstravidyāyāḥ kavacaṃ kavayāmyaham || 4||

अष्टाविंशत्यस्त्रहेतुमाद्यं ब्रह्मास्त्रमुत्तमम् ।सर्वतेजोमयं सर्वं सामर्थ्यं विग्रहं परम् ॥ ५॥

aṣṭāviṃśatyastrahetumādyaṃ brahmāstramuttamam |sarvatejomayaṃ sarvaṃ sāmarthyaṃ vigrahaṃ param || 5||

सर्वशत्रुक्षयकरं सर्वदारिद्र्यनाशनम् ।सर्वापच्छैलराशीनामस्त्रकं कुलिशोपमम् ॥ ६॥

sarvaśatrukṣayakaraṃ sarvadāridryanāśanam |sarvāpacchailarāśīnāmastrakaṃ kuliśopamam || 6||

न तस्य शत्रवश्चापि भयं चौर्यभयं जरा ।नरा नार्यश्च राजेन्द्र खगा व्याघ्रादयोऽपि च ॥ ७॥

na tasya śatravaścāpi bhayaṃ cauryabhayaṃ jarā |narā nāryaśca rājendra khagā vyāghrādayo'pi ca || 7||

तं दृष्ट्वा वशमायान्ति किमन्यत् साधवो जनाः ।यस्य देहे न्यसेद् धीमान् कवचं बगलामयम् ॥ ८॥

taṃ dṛṣṭvā vaśamāyānti kimanyat sādhavo janāḥ |yasya dehe nyased dhīmān kavacaṃ bagalāmayam || 8||

स एव पुरुषो लोके केवलः शङ्करोपमः ।न देयं परशिष्याय शठाय पिशुनाय च ॥ ९॥

sa eva puruṣo loke kevalaḥ śaṅkaropamaḥ |na deyaṃ paraśiṣyāya śaṭhāya piśunāya ca || 9||

दातव्यं भक्तियुक्ताय गुरुदासाय धीमते ।कवचस्य ऋषिः श्रीमान् दक्षिणामूर्तिरेव च ॥ १०॥

dātavyaṃ bhaktiyuktāya gurudāsāya dhīmate |kavacasya ṛṣiḥ śrīmān dakṣiṇāmūrtireva ca || 10||

अस्यानुष्टप् छन्दः स्यात् श्रीबगला चास्य देवता ।बीजं श्रीवह्निजाया च शक्तिः श्रीबगलामुखी ॥ ११॥

asyānuṣṭap chandaḥ syāt śrībagalā cāsya devatā |bījaṃ śrīvahnijāyā ca śaktiḥ śrībagalāmukhī || 11||

कीलकं विनियोगश्च स्वकार्ये सर्वसाधके ।अथ ध्यानम् ।शुद्धस्वर्णनिभां रामां पीतेन्दुखण्डशेखराम् ।पीतगन्धानुलिप्ताङ्गीं पीतरत्नविभूषणाम् ॥ १॥

kīlakaṃ viniyogaśca svakārye sarvasādhake |atha dhyānam |śuddhasvarṇanibhāṃ rāmāṃ pītendukhaṇḍaśekharām |pītagandhānuliptāṅgīṃ pītaratnavibhūṣaṇām || 1||

पीनोन्नतकुचां स्निग्धां पीतलाङ्गीं सुपेशलाम् ।त्रिलोचनां चतुर्हस्तां गम्भीरां मदविह्वलाम् ॥ २॥

pīnonnatakucāṃ snigdhāṃ pītalāṅgīṃ supeśalām |trilocanāṃ caturhastāṃ gambhīrāṃ madavihvalām || 2||

वज्रारिरसनापाशमुद्गरं दधतीं करैः ।महाव्याघ्रासनां देवीं सर्वदेवनमस्कृताम् ॥ ३॥

vajrārirasanāpāśamudgaraṃ dadhatīṃ karaiḥ |mahāvyāghrāsanāṃ devīṃ sarvadevanamaskṛtām || 3||

प्रसन्नां सुस्मितां क्लिन्नां सुपीतां प्रमदोत्तमाम् ।सुभक्तदुःखहरणे दयार्द्रां दीनवत्सलाम् ॥ ४॥

prasannāṃ susmitāṃ klinnāṃ supītāṃ pramadottamām |subhaktaduḥkhaharaṇe dayārdrāṃ dīnavatsalām || 4||

एवं ध्यात्वा परेशानि बगलाकवचं स्मरेत् ।अथ रक्षाकवचम् ।बगला मे शिरः पातुः ललाटं ब्रह्मसंस्तुता ।बगला मे भ्रुवौ नित्यं कर्णयोः क्लेशहारिणी ॥ १॥

evaṃ dhyātvā pareśāni bagalākavacaṃ smaret |atha rakṣākavacam |bagalā me śiraḥ pātuḥ lalāṭaṃ brahmasaṃstutā |bagalā me bhruvau nityaṃ karṇayoḥ kleśahāriṇī || 1||

त्रिनेत्रा चक्षुषी पातु स्तम्भिनी गण्डयोस्तथा ।मोहिनी नासिकां पातु श्रीदेवी बगलामुखी ॥ २॥

trinetrā cakṣuṣī pātu stambhinī gaṇḍayostathā |mohinī nāsikāṃ pātu śrīdevī bagalāmukhī || 2||

ओष्ठयोर्दुर्धरा पातु सर्वदन्तेषु चञ्चला ।सिद्धान्नपूर्णा जिह्वायां जिह्वाग्रे शारदाम्बिके ॥ ३॥

oṣṭhayordurdharā pātu sarvadanteṣu cañcalā |siddhānnapūrṇā jihvāyāṃ jihvāgre śāradāmbike || 3||

अकल्मषा मुखे पातु चिबुके बगलामुखी ।धीरा मे कण्ठदेशे तु कण्ठाग्रे कालकर्षिणी ॥ ४॥

akalmaṣā mukhe pātu cibuke bagalāmukhī |dhīrā me kaṇṭhadeśe tu kaṇṭhāgre kālakarṣiṇī || 4||

शुद्धस्वर्णनिभा पातु कण्ठमध्ये तथाऽम्बिका ।कण्ठमूले महाभोगा स्कन्धौ शत्रुविनाशिनी ॥ ५॥

śuddhasvarṇanibhā pātu kaṇṭhamadhye tathā'mbikā |kaṇṭhamūle mahābhogā skandhau śatruvināśinī || 5||

भुजौ मे पातु सततं बगला सुस्मिता परा ।बगला मे सदा पातु कूर्परे कमलोद्भवा ॥ ६॥

bhujau me pātu satataṃ bagalā susmitā parā |bagalā me sadā pātu kūrpare kamalodbhavā || 6||

बगलाऽम्बा प्रकोष्ठौ तु मणिबन्धे महाबला ।बगलाश्रीर्हस्तयोश्च कुरुकुल्ला कराङ्गुलिम् ॥ ७॥

bagalā'mbā prakoṣṭhau tu maṇibandhe mahābalā |bagalāśrīrhastayośca kurukullā karāṅgulim || 7||

नखेषु वज्रहस्ता च हृदये ब्रह्मवादिनी ।स्तनौ मे मन्दगमना कुक्षयोर्योगिनी तथा ॥ ८॥

nakheṣu vajrahastā ca hṛdaye brahmavādinī |stanau me mandagamanā kukṣayoryoginī tathā || 8||

उदरं बगला माता नाभिं ब्रह्मास्त्रदेवता ।पुष्टिं मुद्गरहस्ता च पातु नो देववन्दिता ॥ ९॥

udaraṃ bagalā mātā nābhiṃ brahmāstradevatā |puṣṭiṃ mudgarahastā ca pātu no devavanditā || 9||

पार्श्वयोर्हनुमद्वन्द्या पशुपाशविमोचिनी ।करौ रामप्रिया पातु ऊरुयुग्मं महेश्वरी ॥ १०॥

pārśvayorhanumadvandyā paśupāśavimocinī |karau rāmapriyā pātu ūruyugmaṃ maheśvarī || 10||

भगमाला तु गुह्यं मे लिङ्गं कामेश्वरी तथा ।लिङ्गमूले महाक्लिन्ना वृषणौ पातु दूतिका ॥ ११॥

bhagamālā tu guhyaṃ me liṅgaṃ kāmeśvarī tathā |liṅgamūle mahāklinnā vṛṣaṇau pātu dūtikā || 11||

बगला जानुनी पातु जानुयुग्मं च नित्यशः ।जङ्घे पातु जगद्धात्री गुल्फौ रावणपूजिता ॥ १२॥

bagalā jānunī pātu jānuyugmaṃ ca nityaśaḥ |jaṅghe pātu jagaddhātrī gulphau rāvaṇapūjitā || 12||

चरणौ दुर्जया पातु पीताम्बा चरणाङ्गुलीः ।पादपृष्ठं पद्महस्ता पादाधश्चक्रधारिणी ॥ १३॥

caraṇau durjayā pātu pītāmbā caraṇāṅgulīḥ |pādapṛṣṭhaṃ padmahastā pādādhaścakradhāriṇī || 13||

सर्वाङ्गं बगला देवी पातु श्रीबगलामुखी ।ब्राह्मी मे पूर्वतः पातु माहेशी वह्निभागतः ॥ १४॥

sarvāṅgaṃ bagalā devī pātu śrībagalāmukhī |brāhmī me pūrvataḥ pātu māheśī vahnibhāgataḥ || 14||

कौमारी दक्षिणे पातु वैष्णवी स्वर्गमार्गतः ।ऊर्ध्वं पाशधरा पातु शत्रुजिह्वाधरा ह्यधः ॥ १५॥

kaumārī dakṣiṇe pātu vaiṣṇavī svargamārgataḥ |ūrdhvaṃ pāśadharā pātu śatrujihvādharā hyadhaḥ || 15||

रणे राजकुले वादे महायोगे महाभये ।बगला भैरवी पातु नित्यं क्लीङ्काररूपिणी ॥ १६॥

raṇe rājakule vāde mahāyoge mahābhaye |bagalā bhairavī pātu nityaṃ klīṅkārarūpiṇī || 16||

फलश्रुतिः ।इत्येवं वज्रकवचं महाब्रह्मास्त्रसंज्ञकम् ।त्रिसन्ध्यं यः पठेद् धीमान् सर्वैश्वर्यमवाप्नुयात् ॥ १॥

phalaśrutiḥ |ityevaṃ vajrakavacaṃ mahābrahmāstrasaṃjñakam |trisandhyaṃ yaḥ paṭhed dhīmān sarvaiśvaryamavāpnuyāt || 1||

न तस्य शत्रवः केऽपि सखायः सर्व एव च ।बलेनाकृष्य शत्रुं स्यात् सोऽपि मित्रत्वमाप्नुयात् ॥ २॥

na tasya śatravaḥ ke'pi sakhāyaḥ sarva eva ca |balenākṛṣya śatruṃ syāt so'pi mitratvamāpnuyāt || 2||

शत्रुत्वे मरुता तुल्यो धनेन धनदोपमः ।रूपेण कामतुल्यः स्याद् आयुषा शूलधृक्समः ॥ ३॥

śatrutve marutā tulyo dhanena dhanadopamaḥ |rūpeṇa kāmatulyaḥ syād āyuṣā śūladhṛksamaḥ || 3||

सनकादिसमो धैर्ये श्रिया विष्णुसमो भवेत् ।तत्तुल्यो विद्यया ब्रह्मन् यो जपेत् कवचं नरः ॥ ४॥

sanakādisamo dhairye śriyā viṣṇusamo bhavet |tattulyo vidyayā brahman yo japet kavacaṃ naraḥ || 4||

नारी वापि प्रयत्नेन वाञ्छितार्थमवाप्नुयात् ।द्वितीया सूर्यवारेण यदा भवति पद्मभूः ॥ ५॥

nārī vāpi prayatnena vāñchitārthamavāpnuyāt |dvitīyā sūryavāreṇa yadā bhavati padmabhūḥ || 5||

तस्यां जातं शतावृत्या शीघ्रं प्रत्यक्षमाप्नुयात् ।याता तुरीयं सन्ध्यायां भूशय्यायां प्रयत्नतः ॥ ६॥

tasyāṃ jātaṃ śatāvṛtyā śīghraṃ pratyakṣamāpnuyāt |yātā turīyaṃ sandhyāyāṃ bhūśayyāyāṃ prayatnataḥ || 6||

सर्वान् शत्रून् क्षयं कृत्वा विजयं प्राप्नुयान् नरः ।दारिद्र्यान् मुच्यते चाऽऽशु स्थिरा लक्ष्मीर्भवेद् गृहे ॥ ७॥

sarvān śatrūn kṣayaṃ kṛtvā vijayaṃ prāpnuyān naraḥ |dāridryān mucyate cā''śu sthirā lakṣmīrbhaved gṛhe || 7||

सर्वान् कामानवाप्नोति सविषो निर्विषो भवेत् ।ऋणं निर्मोचनं स्याद् वै सहस्रावर्तनाद् विधे ॥ ८॥

sarvān kāmānavāpnoti saviṣo nirviṣo bhavet |ṛṇaṃ nirmocanaṃ syād vai sahasrāvartanād vidhe || 8||

भूतप्रेतपिशाचादिपीडा तस्य न जायते ।द्युमणिर्भ्राजते यद्वत् तद्वत् स्याच्छ्रीप्रभावतः ॥ ९॥

bhūtapretapiśācādipīḍā tasya na jāyate |dyumaṇirbhrājate yadvat tadvat syācchrīprabhāvataḥ || 9||

स्थिराभया भवेत् तस्य यः स्मरेद् बगलामुखीम् ।जयदं बोधनं कामममुकं देहि मे शिवे ॥ १०॥

sthirābhayā bhavet tasya yaḥ smared bagalāmukhīm |jayadaṃ bodhanaṃ kāmamamukaṃ dehi me śive || 10||

जपस्यान्ते स्मरेद् यो वै सोऽभीष्टफलमाप्नुयात् ।इदं कवचमज्ञात्वा यो जपेद् बगलामुखीम् ॥ ११॥

japasyānte smared yo vai so'bhīṣṭaphalamāpnuyāt |idaṃ kavacamajñātvā yo japed bagalāmukhīm || 11||

न स सिद्धिमवाप्नोति साक्षाद् वै लोकपूजितः ।तस्मात् सर्वप्रयत्नेन कवचं ब्रह्मतेजसम् ॥ १२॥

na sa siddhimavāpnoti sākṣād vai lokapūjitaḥ |tasmāt sarvaprayatnena kavacaṃ brahmatejasam || 12||

नित्यं पदाम्बुजध्यानान् महेशानसमो भवेत् ।इति श्रीदक्षिणामूर्तिसंहितायां ब्रह्मास्त्रबगलामुखीकवचंसमाप्तम् ।

nityaṃ padāmbujadhyānān maheśānasamo bhavet |iti śrīdakṣiṇāmūrtisaṃhitāyāṃ brahmāstrabagalāmukhīkavacaṃsamāptam |