बालाशान्तिस्तोत्रम् Shri Bala Shanti Stotram

श्रीभैरव उवाचजय देवि जगद्धात्रि जय पापौघहारिणि ।जय दुःखप्रशमनि शान्तिर्भव ममार्चने ॥ १॥

śrībhairava uvācajaya devi jagaddhātri jaya pāpaughahāriṇi |jaya duḥkhapraśamani śāntirbhava mamārcane || 1||

श्रीबाले परमेशानि जय कल्पान्तकारिणि ।जय सर्वविपत्तिघ्ने शान्तिर्भव ममार्चने ॥ २॥

śrībāle parameśāni jaya kalpāntakāriṇi |jaya sarvavipattighne śāntirbhava mamārcane || 2||

जय बिन्दुनादरूपे जय कल्याणकारिणि ।जय घोरे च शत्रुघ्ने शान्तिर्भव ममार्चने ॥ ३॥

jaya bindunādarūpe jaya kalyāṇakāriṇi |jaya ghore ca śatrughne śāntirbhava mamārcane || 3||

मुण्डमाले विशालाक्षि स्वर्णवर्णे चतुर्भुजे ।महापद्मवनान्तस्थे शान्तिर्भव ममार्चने ॥ ४॥

muṇḍamāle viśālākṣi svarṇavarṇe caturbhuje |mahāpadmavanāntasthe śāntirbhava mamārcane || 4||

जगद्योनि महायोनि निर्णयातीतरूपिणि ।पराप्रासादगृहिणि शान्तिर्भव ममार्चने ॥ ५॥

jagadyoni mahāyoni nirṇayātītarūpiṇi |parāprāsādagṛhiṇi śāntirbhava mamārcane || 5||

इन्दुचूडयुते चाक्षहस्ते श्रीपरमेश्वरि ।रुद्रसंस्थे महामाये शान्तिर्भव ममार्चने ॥ ६॥

inducūḍayute cākṣahaste śrīparameśvari |rudrasaṃsthe mahāmāye śāntirbhava mamārcane || 6||

सूक्ष्मे स्थूले विश्वरूपे जय सङ्कटतारिणि ।यज्ञरूपे जाप्यरूपे शान्तिर्भव ममार्चने ॥ ७॥

sūkṣme sthūle viśvarūpe jaya saṅkaṭatāriṇi |yajñarūpe jāpyarūpe śāntirbhava mamārcane || 7||

दूतीप्रिये द्रव्यप्रिये शिवे पञ्चाङ्कुशप्रिये ।भक्तिभावप्रिये भद्रे शान्तिर्भव ममार्चने ॥ ८॥

dūtīpriye dravyapriye śive pañcāṅkuśapriye |bhaktibhāvapriye bhadre śāntirbhava mamārcane || 8||

भावप्रिये लासप्रिये कारणानन्दविग्रहे ।श्मशानस्य देवमूले शान्तिर्भव ममार्चने ॥ ९॥

bhāvapriye lāsapriye kāraṇānandavigrahe |śmaśānasya devamūle śāntirbhava mamārcane || 9||

ज्ञानाज्ञानात्मिके चाद्ये भीतिनिर्मूलनक्षमे ।वीरवन्द्ये सिद्धिदात्रि शान्तिर्भव ममार्चने ॥ १०॥

jñānājñānātmike cādye bhītinirmūlanakṣame |vīravandye siddhidātri śāntirbhava mamārcane || 10||

स्मरचन्दनसुप्रीते शोणितार्णवसंस्थिते ।सर्वसौख्यप्रदे शुद्धे शान्तिर्भव ममार्चने ॥ ११॥

smaracandanasuprīte śoṇitārṇavasaṃsthite |sarvasaukhyaprade śuddhe śāntirbhava mamārcane || 11||

कापालिकि कलाधारे कोमलाङ्गिः कुलेश्वरि ।कुलमार्गरते सिद्धे शान्तिर्भव ममार्चने ॥ १२॥

kāpāliki kalādhāre komalāṅgiḥ kuleśvari |kulamārgarate siddhe śāntirbhava mamārcane || 12||

शान्तिस्तोत्रं सुखकरं बल्यन्ते पठते शिवे ।देव्याः शान्तिर्भवेत्तस्य न्यूनाधिक्यादिकर्मणि ॥ १३॥

śāntistotraṃ sukhakaraṃ balyante paṭhate śive |devyāḥ śāntirbhavettasya nyūnādhikyādikarmaṇi || 13||

मन्त्रसिद्धिकामनया दशावृत्त्या पठेद्यदि ।मन्त्रसिद्धिर्भवेत्तस्य नात्र कार्या विचारणा ॥ १४॥

mantrasiddhikāmanayā daśāvṛttyā paṭhedyadi |mantrasiddhirbhavettasya nātra kāryā vicāraṇā || 14||

चन्द्रसूर्योपरागे च यः पठेत्स्तोत्रमुत्तमम् ।बाला सद्मनि सौख्येन बहुकालं वसेत्ततः ॥ १५॥

candrasūryoparāge ca yaḥ paṭhetstotramuttamam |bālā sadmani saukhyena bahukālaṃ vasettataḥ || 15||

सर्वभद्रमवाप्नोति सर्वत्र विजयी भवेत् ।तीर्थकोटिगुणं चैव दानकोटिफलं तथा ।लभते नात्र सन्देहः सत्यं सत्यं मयोदितम् ॥ १६॥

sarvabhadramavāpnoti sarvatra vijayī bhavet |tīrthakoṭiguṇaṃ caiva dānakoṭiphalaṃ tathā |labhate nātra sandehaḥ satyaṃ satyaṃ mayoditam || 16||

(चिन्तामणितन्त्रे)इति श्रीबालाशान्तिस्तोत्रं समाप्तम् ।

(cintāmaṇitantre)iti śrībālāśāntistotraṃ samāptam |