बालारक्षास्तोत्रम् Shri Bala Raksha Stotram

सर्वलोकैकजनके सर्वाभीष्टफलप्रदे ।रक्ष मां क्षुद्रजालेभ्यः पातकेभ्यश्च सर्वदा ॥ १॥

sarvalokaikajanake sarvābhīṣṭaphalaprade |rakṣa māṃ kṣudrajālebhyaḥ pātakebhyaśca sarvadā || 1||

जगद्धिते जगन्नेत्रि जगन्मातर्जगन्मये ।जगद्दुरितजालेभ्यो रक्ष मामहितं हर ॥ २॥

jagaddhite jagannetri jaganmātarjaganmaye |jagadduritajālebhyo rakṣa māmahitaṃ hara || 2||

वाङ्मनः कायकरणैर्जन्मान्तरशतार्जितम् ।पापं नाशय देवेशि पाहि मां कृपयाऽनिशम् ॥ ३॥

vāṅmanaḥ kāyakaraṇairjanmāntaraśatārjitam |pāpaṃ nāśaya deveśi pāhi māṃ kṛpayā'niśam || 3||

जन्मान्तरसहस्रेषु यत्कृतं दुष्कृतं मया ।तन्निवारय मां पाहि शरण्ये भक्तवत्सले ॥ ४॥

janmāntarasahasreṣu yatkṛtaṃ duṣkṛtaṃ mayā |tannivāraya māṃ pāhi śaraṇye bhaktavatsale || 4||

मया कृतान्यशेषाणि मदीयैश्च कृतानि च ।पापानि नाशयस्वाद्य पाहि मां परदेवते ॥ ५॥

mayā kṛtānyaśeṣāṇi madīyaiśca kṛtāni ca |pāpāni nāśayasvādya pāhi māṃ paradevate || 5||

ज्ञानाज्ञानकृतैः पापैः साम्प्राप्तं दुरितं क्षणात् ।निवारय जगन्मातरखिलैरनिवारितम् ॥ ६॥

jñānājñānakṛtaiḥ pāpaiḥ sāmprāptaṃ duritaṃ kṣaṇāt |nivāraya jaganmātarakhilairanivāritam || 6||

असत्कार्यनिवृत्तिं च सत्कायस्य प्रवर्तनम् ।देवतात्मानुसन्धानं देहि मे परमेश्वरि ॥ ७॥

asatkāryanivṛttiṃ ca satkāyasya pravartanam |devatātmānusandhānaṃ dehi me parameśvari || 7||

सर्वावरणविद्यानां सन्धानेनानुचिन्तनम् ।देशिकाङ्घ्रिस्मृतिं चैव देहि मे जगदीश्वरि ॥ ८॥

sarvāvaraṇavidyānāṃ sandhānenānucintanam |deśikāṅghrismṛtiṃ caiva dehi me jagadīśvari || 8||

अनुस्यूतरपरब्रह्मानन्दामृतनिषेवणम् ।अत्यन्तनिश्चलं चित्तं देहि मे जगदीश्वरि ॥ ९॥

anusyūtaraparabrahmānandāmṛtaniṣevaṇam |atyantaniścalaṃ cittaṃ dehi me jagadīśvari || 9||

अनुस्यूतरपरब्रह्मानन्दामृतनिषेवणम् ।अत्यन्तनिश्चलं चित्तं देहि मे परमेश्वरि ॥ १०॥

anusyūtaraparabrahmānandāmṛtaniṣevaṇam |atyantaniścalaṃ cittaṃ dehi me parameśvari || 10||

सदाशिवाद्यैर्धात्र्यन्तैः देवताभिर्मुनीश्वरैः ।उपासितं पदं यत्तद्देहि मे परमेश्वरि ॥ ११॥

sadāśivādyairdhātryantaiḥ devatābhirmunīśvaraiḥ |upāsitaṃ padaṃ yattaddehi me parameśvari || 11||

इन्द्रादिभिरशेषैश्च देवैरसुरराक्षसैः ।कृतं विघ्नं निवार्याशु कृपया रक्ष रक्ष माम् ॥ १२॥

indrādibhiraśeṣaiśca devairasurarākṣasaiḥ |kṛtaṃ vighnaṃ nivāryāśu kṛpayā rakṣa rakṣa mām || 12||

आत्मानमात्मनः स्निग्धमाश्रितं परिचारकम् ।द्रव्यदं बन्धुवर्गं च देवेशि परिरक्ष नः ॥ १३॥

ātmānamātmanaḥ snigdhamāśritaṃ paricārakam |dravyadaṃ bandhuvargaṃ ca deveśi parirakṣa naḥ || 13||

उपासकस्य यो यो मे यथाशक्त्यनुकूलकृत् ।सुहृदं रक्ष तं नित्यं द्विषन्तमनुकूलय ॥ १४॥

upāsakasya yo yo me yathāśaktyanukūlakṛt |suhṛdaṃ rakṣa taṃ nityaṃ dviṣantamanukūlaya || 14||

दैहिकादैहिकान्नानाहेतुकात्केवलद्भयात् ।पाहि मां प्रणतापत्तिभञ्जने विश्वलोचने ॥ १५॥

daihikādaihikānnānāhetukātkevaladbhayāt |pāhi māṃ praṇatāpattibhañjane viśvalocane || 15||

नित्यानन्दमयं सौख्यं निर्मलं निरूपाधिकम् ।देहि मे निश्चलां भक्तिं निखिलाभिष्टसिद्धिदे ॥ १६॥

nityānandamayaṃ saukhyaṃ nirmalaṃ nirūpādhikam |dehi me niścalāṃ bhaktiṃ nikhilābhiṣṭasiddhide || 16||

यन्मया सकलोपायैः करणीयमितः परम् ।तत्सर्वं बोधयस्वाम्ब सर्वलोकहिते रते ॥ १७॥

yanmayā sakalopāyaiḥ karaṇīyamitaḥ param |tatsarvaṃ bodhayasvāmba sarvalokahite rate || 17||

प्रदेहि बुद्धियोगं तं येन त्वामुपयाम्यहम् ।कामानां हृद्यसंरोहं देहि मे कृपयेश्वरि ॥ १८॥

pradehi buddhiyogaṃ taṃ yena tvāmupayāmyaham |kāmānāṃ hṛdyasaṃrohaṃ dehi me kṛpayeśvari || 18||

भवाब्धौ पतितं भीतमनाथं दीनमानसम् ।उद्धृत्य कृपया देवि निधेहि चरणाम्बुजे ॥ १९॥

bhavābdhau patitaṃ bhītamanāthaṃ dīnamānasam |uddhṛtya kṛpayā devi nidhehi caraṇāmbuje || 19||

इति श्रीबालारक्षास्तोत्रं सम्पूर्णम् ।

iti śrībālārakṣāstotraṃ sampūrṇam |