राघवस्तोत्रम् Shri Raghava Stotram

इन्द्रनीलाचलश्याममिन्दीवरदृगुज्ज्वलम् ।इन्द्रादिदैवतैः सेव्यमीडे राघवनन्दनम् ॥ १॥

indranīlācalaśyāmamindīvaradṛgujjvalam |indrādidaivataiḥ sevyamīḍe rāghavanandanam || 1||

पालिताखिलदेवौघं पद्मगर्भं सनातनम् ।पीनवक्षःस्थलं वन्दे पूर्णं राघवनन्दनम् ॥ २॥

pālitākhiladevaughaṃ padmagarbhaṃ sanātanam |pīnavakṣaḥsthalaṃ vande pūrṇaṃ rāghavanandanam || 2||

दशग्रीवरिपुं भद्रं दावतुल्यं सुरद्विषाम् ।दण्डकामुनिमुख्यानां दत्ताभयमुपास्महे ॥ ३॥

daśagrīvaripuṃ bhadraṃ dāvatulyaṃ suradviṣām |daṇḍakāmunimukhyānāṃ dattābhayamupāsmahe || 3||

कस्तूरीतिलकाभासं कर्पूरनिकराकृतिम् ।कातरीकृतदैत्यौघं कलये रघुनन्दनम् ॥ ४॥

kastūrītilakābhāsaṃ karpūranikarākṛtim |kātarīkṛtadaityaughaṃ kalaye raghunandanam || 4||

खरदूषणहन्तारं खरवीर्यभुजोज्ज्वलम् ।खरकोदण्डहस्तं च खस्वरूपमुपास्महे ॥ ५॥

kharadūṣaṇahantāraṃ kharavīryabhujojjvalam |kharakodaṇḍahastaṃ ca khasvarūpamupāsmahe || 5||

गजविक्रान्तगमनं गजार्तिहरतेजसम् ।गम्भीरसत्त्वमैक्ष्वाकं गच्छामि शरणं सदा ॥ ६॥

gajavikrāntagamanaṃ gajārtiharatejasam |gambhīrasattvamaikṣvākaṃ gacchāmi śaraṇaṃ sadā || 6||

घनराजिलसद्देहं घनपीताम्बरोज्ज्वलम् ।घूत्कारद्रुतरक्षौघं प्रपद्ये रघुनन्दनम् ॥ ७॥

ghanarājilasaddehaṃ ghanapītāmbarojjvalam |ghūtkāradrutarakṣaughaṃ prapadye raghunandanam || 7||

चलपीताम्बराभासं चलत्किङ्किणिभूषितम् ।चन्द्रबिम्बमुखं वन्दे चतुरं रघुनन्दनम् ॥ ८॥

calapītāmbarābhāsaṃ calatkiṅkiṇibhūṣitam |candrabimbamukhaṃ vande caturaṃ raghunandanam || 8||

सुस्मिताञ्चितवक्त्राब्जं सुनू पुरपदद्वयम् ।सुदीर्घबाहुयुगलं सुनाभिं राघवं भजे ॥ ९॥

susmitāñcitavaktrābjaṃ sunū purapadadvayam |sudīrghabāhuyugalaṃ sunābhiṃ rāghavaṃ bhaje || 9||

हसिताञ्चितनेत्राब्जं हताखिलसुरद्विषम् ।हरिं रविकुलोद्भूतं हाटकालङ्कृतं भजे ॥ १०॥

hasitāñcitanetrābjaṃ hatākhilasuradviṣam |hariṃ ravikulodbhūtaṃ hāṭakālaṅkṛtaṃ bhaje || 10||

रविकोटिनिभं शान्तं राघवाणामलङ्कृतिम् ।रक्षोगणयुगान्ताग्निं रामचन्द्रमुपास्महे ॥ ११॥

ravikoṭinibhaṃ śāntaṃ rāghavāṇāmalaṅkṛtim |rakṣogaṇayugāntāgniṃ rāmacandramupāsmahe || 11||

लक्ष्मीसमाश्रितोरस्कं लावण्यमधुराकृतिम् ।लसदिन्दीवरश्यामं लक्ष्मणाग्रजमाश्रये ॥ १२॥

lakṣmīsamāśritoraskaṃ lāvaṇyamadhurākṛtim |lasadindīvaraśyāmaṃ lakṣmaṇāgrajamāśraye || 12||

वालिप्रमथनाकारं वालिसूनुसहायिनम् ।वरपीताम्बराभासं वन्दे राघवभूषणम् ॥ १३॥

vālipramathanākāraṃ vālisūnusahāyinam |varapītāmbarābhāsaṃ vande rāghavabhūṣaṇam || 13||

शमिताखिलपापौघं शान्त्यादिगुणवारिधिम् ।शतपत्रदृशं वन्दे शुभं दशरथात्मजम् ॥ १४॥

śamitākhilapāpaughaṃ śāntyādiguṇavāridhim |śatapatradṛśaṃ vande śubhaṃ daśarathātmajam || 14||

कुन्दकुड्मलदन्ताभं कुङ्कुमाङ्कितवक्षसम् ।कुसुम्भवस्त्रसंवीतं पुत्रं राघवमाश्रये ॥ १५॥

kundakuḍmaladantābhaṃ kuṅkumāṅkitavakṣasam |kusumbhavastrasaṃvītaṃ putraṃ rāghavamāśraye || 15||

मल्लिकामालतीजातिमाधवीपुष्पशोभितम् ।महनीयमहं वन्दे महतां कीर्तिवर्धनम् ॥ १६॥

mallikāmālatījātimādhavīpuṣpaśobhitam |mahanīyamahaṃ vande mahatāṃ kīrtivardhanam || 16||

इदं यो राघवस्तोत्रं नरः पठति भक्तिमान् ।मुक्तः संसृतिबन्धाद्धि स याति परमं पदम् ॥ १७॥

idaṃ yo rāghavastotraṃ naraḥ paṭhati bhaktimān |muktaḥ saṃsṛtibandhāddhi sa yāti paramaṃ padam || 17||

इति श्रीराघवस्तोत्रं सम्पूर्णम् ।

iti śrīrāghavastotraṃ sampūrṇam |