गुरुपादुकास्तोत्रम् Shri Gurupaduka Stotram

प्रणम्य संविन्मार्गस्थानागमज्ञान् महागुरुन् ।प्रायश्चित्तं प्रवक्ष्यामि सर्वतन्त्राविरोधतः ॥ १॥

praṇamya saṃvinmārgasthānāgamajñān mahāgurun |prāyaścittaṃ pravakṣyāmi sarvatantrāvirodhataḥ || 1||

प्रमाददोषजमलप्रविलापनकारणम् ।प्रायश्चित्तं परं सत्यं श्रीगुरोः पादुकास्मृतिः ॥ २॥

pramādadoṣajamalapravilāpanakāraṇam |prāyaścittaṃ paraṃ satyaṃ śrīguroḥ pādukāsmṛtiḥ || 2||

यस्य श्रीपादरजसा रञ्जते मस्तके शिवः ।रमते सह पार्वत्या तस्य श्रीपादुकास्मृतिः ॥ ३॥

yasya śrīpādarajasā rañjate mastake śivaḥ |ramate saha pārvatyā tasya śrīpādukāsmṛtiḥ || 3||

यस्मै सर्वस्वमात्मानमप्येकवृत्तिभक्तितः ।समर्पयति सच्छिष्यस्तस्य श्रीपादुकास्मृतिः ॥ ४॥

yasmai sarvasvamātmānamapyekavṛttibhaktitaḥ |samarpayati sacchiṣyastasya śrīpādukāsmṛtiḥ || 4||

यस्य पादतले सिद्धाः पादाग्रे कुलपर्वताः ।गुल्फौ नक्षत्रवृन्दानि तस्य श्रीपादुकास्मृतिः ॥ ५॥

yasya pādatale siddhāḥ pādāgre kulaparvatāḥ |gulphau nakṣatravṛndāni tasya śrīpādukāsmṛtiḥ || 5||

आधारे परमाशक्तिर्नाभिचक्रे हृदाज्ञयोः ।योगिनीनां चतुःषष्ठिस्तस्य श्रीपादुकास्मृतिः ॥ ६॥

ādhāre paramāśaktirnābhicakre hṛdājñayoḥ |yoginīnāṃ catuḥṣaṣṭhistasya śrīpādukāsmṛtiḥ || 6||

शुक्लरक्तपदद्वन्द्वं मस्तके यस्य राजते ।शाम्भवं तु तयोर्मध्ये तस्य श्रीपादुकास्मृतिः ॥ ७॥

śuklaraktapadadvandvaṃ mastake yasya rājate |śāmbhavaṃ tu tayormadhye tasya śrīpādukāsmṛtiḥ || 7||

अन्यत्सर्वं सप्रपञ्चं निष्प्रपञ्चा गुरोः स्मृतिः ।तस्माच्छ्रीपादुकाध्यानं सर्वपापनिकृन्तनम् ॥ ८॥

anyatsarvaṃ saprapañcaṃ niṣprapañcā guroḥ smṛtiḥ |tasmācchrīpādukādhyānaṃ sarvapāpanikṛntanam || 8||

पालनाद्दुरितच्छेदात् कामितार्थप्रपूरणात् ।पादुकामन्त्रशब्दार्थं विमृशन् मूर्ध्नि पूजयेत् ॥ ९॥

pālanādduritacchedāt kāmitārthaprapūraṇāt |pādukāmantraśabdārthaṃ vimṛśan mūrdhni pūjayet || 9||

श्रीगुरोः पादुकास्तोत्रं प्रातरुत्थाय यः पठेत् ।नश्यन्ति सर्वपापानि वह्निना तूलराशिवत् ॥ १०॥

śrīguroḥ pādukāstotraṃ prātarutthāya yaḥ paṭhet |naśyanti sarvapāpāni vahninā tūlarāśivat || 10||

काशीक्षेत्रं निवासस्तव चरणजलं जाह्नवी श्रीगुरो नः ।साक्षाद्विश्वेश्वरो नस्तव वचनतया तारकब्रह्मबोधे ॥ ११॥

kāśīkṣetraṃ nivāsastava caraṇajalaṃ jāhnavī śrīguro naḥ |sākṣādviśveśvaro nastava vacanatayā tārakabrahmabodhe || 11||

त्वच्छ्रीपादाङ्किताभूरिह भवति गयास्त्वत् प्रसङ्गः प्रयागः ।त्वत्तोन्यत् तीर्थदेवः क्वचिदपि च वयं न प्रतीमः पृथिव्याम् ॥ १२॥

tvacchrīpādāṅkitābhūriha bhavati gayāstvat prasaṅgaḥ prayāgaḥ |tvattonyat tīrthadevaḥ kvacidapi ca vayaṃ na pratīmaḥ pṛthivyām || 12||

इति श्रीगुरुपादुकास्तोत्रं सम्पूर्णम् ।

iti śrīgurupādukāstotraṃ sampūrṇam |