वाग्वाणीस्तोत्रम् Vagvani Stotram

सरस्वतीं नमस्यामि चेतनां हृदि संस्थिताम् ।कण्ठस्थां पद्मयोनिं च ह्रीङ्कारसुप्रियां सदा ॥ १॥

sarasvatīṃ namasyāmi cetanāṃ hṛdi saṃsthitām |kaṇṭhasthāṃ padmayoniṃ ca hrīṅkārasupriyāṃ sadā || 1||

मतिदां वरदां चैव सर्वकामप्रदायिनीम् ।केशवस्य प्रियां देवीं वीणाहस्तां वरप्रदाम् ॥ २॥

matidāṃ varadāṃ caiva sarvakāmapradāyinīm |keśavasya priyāṃ devīṃ vīṇāhastāṃ varapradām || 2||

ऐं ह्रीं मन्त्रप्रियां चैव कुमतिध्वंसकारिणीम् ।स्वप्रकाशां निरालम्बामज्ञानतिमिरापहाम् ॥ ३॥

aiṃ hrīṃ mantrapriyāṃ caiva kumatidhvaṃsakāriṇīm |svaprakāśāṃ nirālambāmajñānatimirāpahām || 3||

मोक्षप्रदां सुनित्यां सुवरदां शोधनप्रियाम् ।आदित्यमण्डले लीनां प्रणमामि जिनप्रियाम् ॥ ४॥

mokṣapradāṃ sunityāṃ suvaradāṃ śodhanapriyām |ādityamaṇḍale līnāṃ praṇamāmi jinapriyām || 4||

ज्ञानाकारां जगद्दीपां भक्तपाशविनाशिनीम् ।इति सम्यक् स्तुता देवी वागीशेन महात्मना ॥ ५॥

jñānākārāṃ jagaddīpāṃ bhaktapāśavināśinīm |iti samyak stutā devī vāgīśena mahātmanā || 5||

आत्मानं दर्शयामास शरदिन्दुसमप्रभा ।सरस्वत्युवाच वरं वृणीष्व भदन्त यत्ते मनसि वर्तते ॥ ६॥

ātmānaṃ darśayāmāsa śaradindusamaprabhā |sarasvatyuvāca varaṃ vṛṇīṣva bhadanta yatte manasi vartate || 6||

बृहस्पतिरुवाच प्रसन्ना यदि मे देवी दिव्यं ज्ञानं प्रदीयताम् ।सरस्वत्युवाच स्तोत्रेणानेन ये भक्त्या मां स्तुवन्ति सदा नराः ॥ ७॥

bṛhaspatiruvāca prasannā yadi me devī divyaṃ jñānaṃ pradīyatām |sarasvatyuvāca stotreṇānena ye bhaktyā māṃ stuvanti sadā narāḥ || 7||

लभन्ते परमं ज्ञानं मम तुल्यपराक्रमम् ।कवित्वं मत्प्रसादेन तथा च विपुलं यशः ॥ ८॥

labhante paramaṃ jñānaṃ mama tulyaparākramam |kavitvaṃ matprasādena tathā ca vipulaṃ yaśaḥ || 8||

त्रिसन्ध्यं प्रयतो भूत्वा यः स्तोत्रं पठते नरः ।तस्य कण्ठे सदा वासं करिष्यामि न संशयः ॥ ९॥

trisandhyaṃ prayato bhūtvā yaḥ stotraṃ paṭhate naraḥ |tasya kaṇṭhe sadā vāsaṃ kariṣyāmi na saṃśayaḥ || 9||

ॐ ऐं वाग्वादिनि मम जिह्वायां ॐ ह्रीं मन्त्रसरस्वति स्वाहा ।इति बृहस्पतिकृतं श्रीवाग्वाणीस्तोत्रं सम्पूर्णम् ॥

oṃ aiṃ vāgvādini mama jihvāyāṃ oṃ hrīṃ mantrasarasvati svāhā |iti bṛhaspatikṛtaṃ śrīvāgvāṇīstotraṃ sampūrṇam ||