भद्रकाल्यष्टकं २ Shri Bhadrakali Ashtakam (2)

श्रीमच्छङ्करपाणिपल्लवकिरल्लोलंबमालोल्लसन्मालालोलकलापकालकबरीभारावलीभासुरीम् ।कारुण्यामृतवारिराशिलहरीपीयूषवर्षावलींबालांबां ललितालकामनुदिनं श्रीभद्रकालीं भजे ॥ १॥

śrīmacchaṅkarapāṇipallavakirallolaṃbamālollasanmālālolakalāpakālakabarībhārāvalībhāsurīm |kāruṇyāmṛtavārirāśilaharīpīyūṣavarṣāvalīṃbālāṃbāṃ lalitālakāmanudinaṃ śrībhadrakālīṃ bhaje || 1||

हेलादारितदारिकासुरशिरःश्रीवीरपाणोन्मदश्रेणीशोणितशोणिमाधरपुटीं वीटीरसास्वादिनीम् ।पाटीरादिसुगन्धिचूचुकतटीं शाटीकुटीरस्तनींघोटीवृन्दसमानधाटियुयुधीं श्रीभद्रकालीं भजे ॥ २॥

helādāritadārikāsuraśiraḥśrīvīrapāṇonmadaśreṇīśoṇitaśoṇimādharapuṭīṃ vīṭīrasāsvādinīm |pāṭīrādisugandhicūcukataṭīṃ śāṭīkuṭīrastanīṃghoṭīvṛndasamānadhāṭiyuyudhīṃ śrībhadrakālīṃ bhaje || 2||

बालार्कायुतकोटिभासुरकिरीटामुक्तमुग्धालकश्रेणीनिन्दितवासिकामरुसरोजाकाञ्चलोरुश्रियम् ।वीणावादनकौशलाशयशयश्र्यानन्दसन्दायिनीमम्बामम्बुजलोचनामनुदिनं श्रीभद्रकालीं भजे ॥ ३॥

bālārkāyutakoṭibhāsurakirīṭāmuktamugdhālakaśreṇīninditavāsikāmarusarojākāñcaloruśriyam |vīṇāvādanakauśalāśayaśayaśryānandasandāyinīmambāmambujalocanāmanudinaṃ śrībhadrakālīṃ bhaje || 3||

मातङ्गश्रुतिभूषिणीं मधुधरीवाणीसुधामोषिणींभ्रूविक्षेपकटाक्षवीक्षणविसर्गक्षेमसंहारिणीम् ।मातङ्गीं महिषासुरप्रमथिनीं माधुर्यधुर्याकरश्रीकारोत्तरपाणिपङ्कजपुटीं श्रीभद्रकालीं भजे ॥ ४॥

mātaṅgaśrutibhūṣiṇīṃ madhudharīvāṇīsudhāmoṣiṇīṃbhrūvikṣepakaṭākṣavīkṣaṇavisargakṣemasaṃhāriṇīm |mātaṅgīṃ mahiṣāsurapramathinīṃ mādhuryadhuryākaraśrīkārottarapāṇipaṅkajapuṭīṃ śrībhadrakālīṃ bhaje || 4||

मातङ्गाननबाहुलेयजननीं मातङ्गसंगामिनींचेतोहारितनुच्छवीं शफरिकाचक्षुष्मतीमम्बिकाम् ।जृंभत्प्रौढिनिशुंभशुंभमथिनीमंभोजभूपूजितांसम्पत्सन्ततिदायिनीं हृदि सदा श्रीभद्रकालीं भजे ॥ ५॥

mātaṅgānanabāhuleyajananīṃ mātaṅgasaṃgāminīṃcetohāritanucchavīṃ śapharikācakṣuṣmatīmambikām |jṛṃbhatprauḍhiniśuṃbhaśuṃbhamathinīmaṃbhojabhūpūjitāṃsampatsantatidāyinīṃ hṛdi sadā śrībhadrakālīṃ bhaje || 5||

आनन्दैकतरङ्गिणीममलहृन्नालीकहंसीमणींपीनोत्तुङ्गघनस्तनां घनलसत्पाटीरपङ्कोज्ज्वलाम् ।क्षौमावीतनितंबबिंबरशनास्यूतक्वणत् किङ्किणींएणांङ्कांबुजभासुरास्यनयनां श्रीभद्रकालीं भजे ॥ ६॥

ānandaikataraṅgiṇīmamalahṛnnālīkahaṃsīmaṇīṃpīnottuṅgaghanastanāṃ ghanalasatpāṭīrapaṅkojjvalām |kṣaumāvītanitaṃbabiṃbaraśanāsyūtakvaṇat kiṅkiṇīṃeṇāṃṅkāṃbujabhāsurāsyanayanāṃ śrībhadrakālīṃ bhaje || 6||

कालांभोदकलायकोमलतनुच्छायाशितीभूतिमत्संख्यानान्तरितस्तनान्तरलसन्मालाकिलन्मौक्तिकाम् ।नाभीकूपसरोजनालविलसच्छातोदरीशापदींदूरीकुर्वयि देवि, घोरदुरितं श्रीभद्रकालीं भजे ॥ ७॥

kālāṃbhodakalāyakomalatanucchāyāśitībhūtimatsaṃkhyānāntaritastanāntaralasanmālākilanmauktikām |nābhīkūpasarojanālavilasacchātodarīśāpadīṃdūrīkurvayi devi, ghoraduritaṃ śrībhadrakālīṃ bhaje || 7||

आत्मीयस्तनकुंभकुङ्कुमरजःपङ्कारुणालंकृतश्रीकण्ठौरसभूरिभूतिममरीकोटीरहीरायिताम् ।वीणापाणिसनन्दनन्दितपदामेणीविशालेक्षणांवेणीह्रीणितकालमेघपटलीं श्रीभद्रकालीं भजे ॥ ८॥

ātmīyastanakuṃbhakuṅkumarajaḥpaṅkāruṇālaṃkṛtaśrīkaṇṭhaurasabhūribhūtimamarīkoṭīrahīrāyitām |vīṇāpāṇisanandananditapadāmeṇīviśālekṣaṇāṃveṇīhrīṇitakālameghapaṭalīṃ śrībhadrakālīṃ bhaje || 8||

फलश्रुतिःदेवीपादपयोजपूजनमिति श्रीभद्रकाल्यष्टकंरोगौघाघघनानिलायितमिदं प्रातः प्रगेयं पठन् ।श्रेयः श्रीशिवकीर्तिसम्पदमलं सम्प्राप्य सम्पन्मयींश्रीदेवीमनपायिनीं गतिमयन् सोऽयं सुखी वर्तते ॥इति श्रीनारायणगुरुविरचितं श्रीभद्रकाल्यष्टकं सम्पूर्णम् ।

phalaśrutiḥdevīpādapayojapūjanamiti śrībhadrakālyaṣṭakaṃrogaughāghaghanānilāyitamidaṃ prātaḥ prageyaṃ paṭhan |śreyaḥ śrīśivakīrtisampadamalaṃ samprāpya sampanmayīṃśrīdevīmanapāyinīṃ gatimayan so'yaṃ sukhī vartate ||iti śrīnārāyaṇaguruviracitaṃ śrībhadrakālyaṣṭakaṃ sampūrṇam |