राधागोपालकवचम् Shriradhagopalakavacham

श्रीगणेशाय नमः ॥पार्वत्युवाच ।कैलासशिखरे रम्ये गौरी पृच्छति शङ्करम् ।ब्रह्माण्डाखिलनाथस्त्वं सृष्टिसंहारकारकः ॥ १॥

śrīgaṇeśāya namaḥ ||pārvatyuvāca |kailāsaśikhare ramye gaurī pṛcchati śaṅkaram |brahmāṇḍākhilanāthastvaṃ sṛṣṭisaṃhārakārakaḥ || 1||

त्वमेव पूज्यसे लोकैर्ब्रह्मविष्णुसुरादिभिः ।नित्यं पठसि देवेश कस्य स्तोत्रं महेश्वर ॥ २॥

tvameva pūjyase lokairbrahmaviṣṇusurādibhiḥ |nityaṃ paṭhasi deveśa kasya stotraṃ maheśvara || 2||

आश्चर्यमिदमत्यन्तं जायते मम शङ्कर ।तत्प्राणेश महाप्राज्ञ संशयं छिन्धि शङ्कर ॥ ३॥

āścaryamidamatyantaṃ jāyate mama śaṅkara |tatprāṇeśa mahāprājña saṃśayaṃ chindhi śaṅkara || 3||

श्रीमहादेव उवाच ।धन्यासि कृतपुण्यासि पार्वति प्राणवल्लभे ।रहस्यातिरहस्यं च यत्पृच्छसि वरानने ॥ ४॥

śrīmahādeva uvāca |dhanyāsi kṛtapuṇyāsi pārvati prāṇavallabhe |rahasyātirahasyaṃ ca yatpṛcchasi varānane || 4||

स्त्रीस्वभावान्महादेवि पुनस्त्वं परिपृच्छसि ।गोपनीयं गोपनीयं गोपनीयं प्रयत्नतः ॥ ५॥

strīsvabhāvānmahādevi punastvaṃ paripṛcchasi |gopanīyaṃ gopanīyaṃ gopanīyaṃ prayatnataḥ || 5||

दत्ते च सिद्धिहानिः स्यात्तस्माद्यत्नेन गोपयेत् ।इदं रहस्यं परमं पुरुषार्थप्रदायकम् ॥ ६॥

datte ca siddhihāniḥ syāttasmādyatnena gopayet |idaṃ rahasyaṃ paramaṃ puruṣārthapradāyakam || 6||

धनरत्नौघमाणिक्यतुरङ्गमगजादिकम् ।ददाति स्मरणादेव महामोक्षप्रदायकम् ॥ ७॥

dhanaratnaughamāṇikyaturaṅgamagajādikam |dadāti smaraṇādeva mahāmokṣapradāyakam || 7||

तत्तेऽहं सम्प्रवक्ष्यामि शृणुष्वावहिता प्रिये ।योऽसौ निरञ्जनो देवश्चित्स्वरूपी जनार्दनः ॥ ८॥

tatte'haṃ sampravakṣyāmi śṛṇuṣvāvahitā priye |yo'sau nirañjano devaścitsvarūpī janārdanaḥ || 8||

संसारसागरोत्तारकारणाय सदा नृणाम् ।श्रीरङ्गादिकरूपेण त्रैलोक्यं व्याप्य तिष्ठति ॥ ९॥

saṃsārasāgarottārakāraṇāya sadā nṛṇām |śrīraṅgādikarūpeṇa trailokyaṃ vyāpya tiṣṭhati || 9||

ततो लोका महामूढा विष्णुभक्तिविवर्जिताः ।निश्चयं नाधिगच्छन्ति पुनर्नारायणो हरिः ॥ १०॥

tato lokā mahāmūḍhā viṣṇubhaktivivarjitāḥ |niścayaṃ nādhigacchanti punarnārāyaṇo hariḥ || 10||

निरञ्जनो निराकारो भक्तानां प्रीतिकामदः ।वृन्दावनविहाराय गोपालरूपमुद्वहन् ॥ ११॥

nirañjano nirākāro bhaktānāṃ prītikāmadaḥ |vṛndāvanavihārāya gopālarūpamudvahan || 11||

मुरलीवादनाधारी राधायै प्रीतिमावहन् ।अंशांशेभ्यः समुन्मील्य पूर्णरूपकलायुतः ॥ १२॥

muralīvādanādhārī rādhāyai prītimāvahan |aṃśāṃśebhyaḥ samunmīlya pūrṇarūpakalāyutaḥ || 12||

श्रीकृष्णचद्रो भगवान् नन्दगोपवरोद्यतः ।धरणीरूपिणी माता यशोदानन्ददायिनी ॥ १३॥

śrīkṛṣṇacadro bhagavān nandagopavarodyataḥ |dharaṇīrūpiṇī mātā yaśodānandadāyinī || 13||

द्वाभ्यां प्रयाचितो नाथो देवक्यां वसुदेवतः ।ब्रह्मणाभ्यर्थितो देवो देवैरपि सुरेश्वरि ॥ १४॥

dvābhyāṃ prayācito nātho devakyāṃ vasudevataḥ |brahmaṇābhyarthito devo devairapi sureśvari || 14||

जातोऽवन्यां मुकुन्दोऽपि मुरलीवेदरेचिका ।तया सार्धं वचः कृत्वा ततो जातो महीतले ॥ १५॥

jāto'vanyāṃ mukundo'pi muralīvedarecikā |tayā sārdhaṃ vacaḥ kṛtvā tato jāto mahītale || 15||

संसारसारसर्वस्वं श्यामलं महदुज्ज्वलम् ।एतज्ज्योतिरहं वेद्यं चिन्तयामि सनातनम् ॥ १६॥

saṃsārasārasarvasvaṃ śyāmalaṃ mahadujjvalam |etajjyotirahaṃ vedyaṃ cintayāmi sanātanam || 16||

गौरतेजो विना यस्तु श्यामतेजः समर्चयेत् ।जपेद्वा ध्यायते वापि स भवेत्पातकी शिवे ॥ १७॥

gauratejo vinā yastu śyāmatejaḥ samarcayet |japedvā dhyāyate vāpi sa bhavetpātakī śive || 17||

स ब्रह्महा सुरापी च स्वर्णस्तेयी च पञ्चमः ।एतैर्दोषैर्विलिप्येत तेजोभेदान्महेश्वरि ॥ १८॥

sa brahmahā surāpī ca svarṇasteyī ca pañcamaḥ |etairdoṣairvilipyeta tejobhedānmaheśvari || 18||

यस्माज्ज्योतिरभूद्द्वेधा राधामाधवरूपकम् ।तस्मादिदं महादेवि गोपालेनैवं शायितम् ॥ १९॥

yasmājjyotirabhūddvedhā rādhāmādhavarūpakam |tasmādidaṃ mahādevi gopālenaivaṃ śāyitam || 19||

दुर्वाससो मुनेर्मोहे कार्तिक्यां रासमण्डले ।ततः पृष्टवती राधा सन्देहं भेदमात्मनः ॥ २०॥

durvāsaso munermohe kārtikyāṃ rāsamaṇḍale |tataḥ pṛṣṭavatī rādhā sandehaṃ bhedamātmanaḥ || 20||

निरञ्जनात्समुत्पन्नं मयाधीतं जगन्मयि ।श्रीकृष्णेन ततः प्रोक्तं राधायै नारदाय च ॥ २१॥

nirañjanātsamutpannaṃ mayādhītaṃ jaganmayi |śrīkṛṣṇena tataḥ proktaṃ rādhāyai nāradāya ca || 21||

ततो नारदतः सर्वं विरला वैष्णवास्तथा ।कलौ जानन्ति देवेशि गोपनीयं प्रयत्नतः ॥ २२॥

tato nāradataḥ sarvaṃ viralā vaiṣṇavāstathā |kalau jānanti deveśi gopanīyaṃ prayatnataḥ || 22||

शठाय कृपणायाथ दाम्भिकाय सुरेश्वरि ।ब्रह्महत्यामवाप्नोति तस्माद्यत्नेन गोपयेत् ॥ २३॥

śaṭhāya kṛpaṇāyātha dāmbhikāya sureśvari |brahmahatyāmavāpnoti tasmādyatnena gopayet || 23||

इति श्रीराधागोपालकवचं सम्पूर्णम् ।

iti śrīrādhāgopālakavacaṃ sampūrṇam |