सुदर्शनषट्कम् २ Sudarshanashatkam 2

सहस्रादित्यसङ्काशं सहस्रवदनं परम् ।सहस्रदोस्सहस्रारं प्रपद्येऽहं सुदर्शनम् ॥ १॥

sahasrādityasaṅkāśaṃ sahasravadanaṃ param |sahasradossahasrāraṃ prapadye'haṃ sudarśanam || 1||

रणत्कङ्किणिजालेन राक्षसघ्नं महाद्भुतम् ।व्याप्तकेशं विरूपाक्षं प्रपद्येऽहं सुदर्शनम् ॥ २॥

raṇatkaṅkiṇijālena rākṣasaghnaṃ mahādbhutam |vyāptakeśaṃ virūpākṣaṃ prapadye'haṃ sudarśanam || 2||

प्राकारसहितं मन्त्रं वदन्तं शत्रुनिग्रहम् ।भूषणैर्भूषितकरं प्रपद्येऽहं सुदर्शनम् ॥ ३॥

prākārasahitaṃ mantraṃ vadantaṃ śatrunigraham |bhūṣaṇairbhūṣitakaraṃ prapadye'haṃ sudarśanam || 3||

पुष्करस्थमनिर्देश्यं महामन्त्रेण संयुतम् ।शिवं प्रसन्नवदनं प्रपद्येऽहं सुदर्शनम् ॥ ४॥

puṣkarasthamanirdeśyaṃ mahāmantreṇa saṃyutam |śivaṃ prasannavadanaṃ prapadye'haṃ sudarśanam || 4||

हुङ्कारभैरवं भीमं प्रपन्नार्तिहरं प्रियम् ।सर्वपापप्रशमनं प्रपद्येऽहं सुदर्शनम् ॥ ५॥

huṅkārabhairavaṃ bhīmaṃ prapannārtiharaṃ priyam |sarvapāpapraśamanaṃ prapadye'haṃ sudarśanam || 5||

अनन्तहारकेयूरमुकुटादिविभूषितम् ।सर्वपापप्रशमनं प्रपद्येऽहं सुदर्शनम् ॥ ६॥

anantahārakeyūramukuṭādivibhūṣitam |sarvapāpapraśamanaṃ prapadye'haṃ sudarśanam || 6||

एतैष्षड्भिस्तुतो देवो भगवाञ्च्छ्रीसुदर्शनः ।रक्षां करोति सर्वत्र सर्वत्र विजयी भवेत् ॥ ७॥

etaiṣṣaḍbhistuto devo bhagavāñcchrīsudarśanaḥ |rakṣāṃ karoti sarvatra sarvatra vijayī bhavet || 7||

इति सुदर्शनषट्कं २ सम्पूर्णम् ।

iti sudarśanaṣaṭkaṃ 2 sampūrṇam |