विष्णुनीराजनम् Shri Vishnu Nirajanam

जय माधव मधुसूदन जय करुणासिन्धो ।जय भवभीतिविनाशन शरणागतबन्धो ॥जय देव जय देव ॥ १॥

jaya mādhava madhusūdana jaya karuṇāsindho |jaya bhavabhītivināśana śaraṇāgatabandho ||jaya deva jaya deva || 1||

वन्दे कमलेशानं विनतासुतयानम् ।जगदेकान्तनिदानं वाञ्छितवरदानम् ॥जय देव जय देव ॥ २॥

vande kamaleśānaṃ vinatāsutayānam |jagadekāntanidānaṃ vāñchitavaradānam ||jaya deva jaya deva || 2||

मुकुटविभूषितभालं शोभितवनमालम् ।श्यामलकुञ्चितबालं त्रिभुवनजनपालम् ॥जय देव जय देव ॥ ३॥

mukuṭavibhūṣitabhālaṃ śobhitavanamālam |śyāmalakuñcitabālaṃ tribhuvanajanapālam ||jaya deva jaya deva || 3||

कटितटपीतदुकूलं विश्वविटपमूलम् ।भवसागरजलकूलं भजतामनुकूलम् ॥जय देव जय देव ॥ ४॥

kaṭitaṭapītadukūlaṃ viśvaviṭapamūlam |bhavasāgarajalakūlaṃ bhajatāmanukūlam ||jaya deva jaya deva || 4||

सागरजापरिवारं कौस्तुभमणिहारम् ।क्षीराम्भोधिविहारं निगमागमसारम् ॥जय देव जय देव ॥ ५॥

sāgarajāparivāraṃ kaustubhamaṇihāram |kṣīrāmbhodhivihāraṃ nigamāgamasāram ||jaya deva jaya deva || 5||

शेषशरीरनिवासं विमलाम्बरभासम् ।श्रीवैकुण्ठविलासं दानवकुलनाशम् ॥जय देव जय देव ॥ ६॥

śeṣaśarīranivāsaṃ vimalāmbarabhāsam |śrīvaikuṇṭhavilāsaṃ dānavakulanāśam ||jaya deva jaya deva || 6||

शङ्खगदाम्बुजधारं चतुर्भुजाकारम् ।वृन्दारकहितकारं भववारिधिपारम् ॥जय देव जय देव ॥ ७॥

śaṅkhagadāmbujadhāraṃ caturbhujākāram |vṛndārakahitakāraṃ bhavavāridhipāram ||jaya deva jaya deva || 7||

कमलाश्रितवामाङ्गं भूषितसकलाङ्गम् ।सुन्दरकरुणापाङ्गं मणिमञ्जुवराङ्गम् ॥जय देव जय देव ॥ ८॥

kamalāśritavāmāṅgaṃ bhūṣitasakalāṅgam |sundarakaruṇāpāṅgaṃ maṇimañjuvarāṅgam ||jaya deva jaya deva || 8||

पार्षदपूगसमेतं सुरगणसमवेतम् ।ब्रह्मानन्दनिकेतं मुनिजनसमुपेतम् ॥जय देव जय देव ॥ ९॥

pārṣadapūgasametaṃ suragaṇasamavetam |brahmānandaniketaṃ munijanasamupetam ||jaya deva jaya deva || 9||

हरिनीराजनमेतत्पठति नरो नित्यम् ।विष्णोर्लोकमशोकं व्रजति स वै सत्यम् ॥जय देव जय देव ॥ १०॥

harinīrājanametatpaṭhati naro nityam |viṣṇorlokamaśokaṃ vrajati sa vai satyam ||jaya deva jaya deva || 10||

इति श्रीब्रह्मानन्दस्वामिविरचितं विष्णुनीराजनं समाप्तम् ॥

iti śrībrahmānandasvāmiviracitaṃ viṣṇunīrājanaṃ samāptam ||