सङ्कल्पपद्धतिः Sankalpa Paddhatih

विष्ण्वादेशे वर्तमानवेधसश्चरमार्धके ।आयुषः कल्पके चैव सिताङ्गस्य किटेस्तथा ॥ १॥

viṣṇvādeśe vartamānavedhasaścaramārdhake |āyuṣaḥ kalpake caiva sitāṅgasya kiṭestathā || 1||

मनोश्च सूर्यपुत्रस्य सन्धौ पादे कलेस्तथा ।आद्ये वर्षे महापुण्ये भरतस्य महीपतेः ॥ २॥

manośca sūryaputrasya sandhau pāde kalestathā |ādye varṣe mahāpuṇye bharatasya mahīpateḥ || 2||

जम्बुद्वीपे वत्सरे च वर्तमाने तथाऽयने ।कृतै मासे च पक्षे च तिथौ वारे च भे तथा ॥ ३॥

jambudvīpe vatsare ca vartamāne tathā'yane |kṛtai māse ca pakṣe ca tithau vāre ca bhe tathā || 3||

करणादियुते पुण्ये कालेऽस्मिन्प्रीतये हरेः ।देवर्षिपितृतृप्त्यर्थं पापानां च निवृत्तये ॥ ४॥

karaṇādiyute puṇye kāle'sminprītaye hareḥ |devarṣipitṛtṛptyarthaṃ pāpānāṃ ca nivṛttaye || 4||

अस्मिन्जलाशये विष्णोः पादपद्मं विचिन्तयन् ।गङ्गां स्मरन्नहं स्नानं करिष्ये स्मृतिचोदितम् ॥ ५॥

asminjalāśaye viṣṇoḥ pādapadmaṃ vicintayan |gaṅgāṃ smarannahaṃ snānaṃ kariṣye smṛticoditam || 5||

अघौघविध्वंसकरस्य विष्णोस्तोषाय तेन प्रहितोऽहमस्मिन् ।जले स्मरन्देवनदीं करोमि स्नानं स गोविन्दपदाभिधानम् ॥ ६॥

aghaughavidhvaṃsakarasya viṣṇostoṣāya tena prahito'hamasmin |jale smarandevanadīṃ karomi snānaṃ sa govindapadābhidhānam || 6||

इति श्रीमद्वादिराजपूज्यचरणविरचिता सङ्कल्पपद्धतिः सम्पूर्णा ।भारतीरमणमुख्यप्राणान्तर्गत श्रीकृष्णार्पणमस्तु ।

iti śrīmadvādirājapūjyacaraṇaviracitā saṅkalpapaddhatiḥ sampūrṇā |bhāratīramaṇamukhyaprāṇāntargata śrīkṛṣṇārpaṇamastu |