धीशुद्धिस्तोत्रम् Dhishuddhi Stotram

चिन्तामणिर्हयग्रीवो वशे यस्य निषेविणः ।सोऽपि सर्वार्थदो नॄणां किमुतासौ हयाननः ॥ १॥

cintāmaṇirhayagrīvo vaśe yasya niṣeviṇaḥ |so'pi sarvārthado nṝṇāṃ kimutāsau hayānanaḥ || 1||

यं यं चिन्मय सन्मूर्ते धर्मं कुर्मस्तवाज्ञया ।तं तं घ्नन्त्यसुराः किं तद्धन्ता त्वं तान्न कृन्तसि ॥ २॥

yaṃ yaṃ cinmaya sanmūrte dharmaṃ kurmastavājñayā |taṃ taṃ ghnantyasurāḥ kiṃ taddhantā tvaṃ tānna kṛntasi || 2||

त्वद्दत्तपुण्यवित्तं मे सद्यः पापैरपाहरन् ।कृद्दा दैत्या न दैत्यारे तद्विक्रान्तेरलं तव ॥ ३॥

tvaddattapuṇyavittaṃ me sadyaḥ pāpairapāharan |kṛddā daityā na daityāre tadvikrānteralaṃ tava || 3||

स्वक्षेम राम मे कामे रक्षांस्यक्षाण्यचिक्षिपन् ।तत्क्षाम्यं न हृषीकेशस्याक्षय्यत्रय्यधीशितुः ॥ ४॥

svakṣema rāma me kāme rakṣāṃsyakṣāṇyacikṣipan |tatkṣāmyaṃ na hṛṣīkeśasyākṣayyatrayyadhīśituḥ || 4||

स्वप्नोऽपि सूचको यस्मात्तस्मादस्माकमच्युत ।अस्वप्नप्रिय न स्वप्नेऽप्यक्षं निक्षिप दुष्कृते ॥ ५॥

svapno'pi sūcako yasmāttasmādasmākamacyuta |asvapnapriya na svapne'pyakṣaṃ nikṣipa duṣkṛte || 5||

क्वाहं नृहय तेंऽर्घ्कशरणः करुणाम्बुधे ।क्वेदं निस्सारसंसारनीहारावरणं मम ॥ ६॥

kvāhaṃ nṛhaya teṃ'rghkaśaraṇaḥ karuṇāmbudhe |kvedaṃ nissārasaṃsāranīhārāvaraṇaṃ mama || 6||

अनुत्साहमहोत्साहचरणस्मरणे सताम् ।शरणे सति जल्पन्तः किमसन्तो हसन्ति नः ॥ ७॥

anutsāhamahotsāhacaraṇasmaraṇe satām |śaraṇe sati jalpantaḥ kimasanto hasanti naḥ || 7||

कस्य कस्य प्रियं ब्रूमः स्तुमः कं कं पदे पदे ।कस्मै कस्मै दिशामोऽर्थं कस्माद्वाऽस्मत्प्रयोजनम् ॥ ८॥

kasya kasya priyaṃ brūmaḥ stumaḥ kaṃ kaṃ pade pade |kasmai kasmai diśāmo'rthaṃ kasmādvā'smatprayojanam || 8||

को वा जीवापरस्त्राता देवाच्छ्रीवासुदेवतः ।यो वा गा वाति यश्चोर्ध्वं तौ वातौ वामनाश्रितौ ॥ ९॥

ko vā jīvāparastrātā devācchrīvāsudevataḥ |yo vā gā vāti yaścordhvaṃ tau vātau vāmanāśritau || 9||

मां चेन्मुञ्चति देवोऽसौ गां च मुञ्चति वैदिकीम् ।सत्यव्रतस्य नासत्यं भक्तस्य न कदाऽपि भीः ॥ १०॥

māṃ cenmuñcati devo'sau gāṃ ca muñcati vaidikīm |satyavratasya nāsatyaṃ bhaktasya na kadā'pi bhīḥ || 10||

प्रभो प्रबोध्य बोधाब्धिं प्रबुद्धबुधसाध्य ते ।कृपाक्षपाकरकरश्चकोरीमिव पातु माम् ॥ ११॥

prabho prabodhya bodhābdhiṃ prabuddhabudhasādhya te |kṛpākṣapākarakaraścakorīmiva pātu mām || 11||

सेयं श्रीशहयग्रीवदासेनाऽऽचार्यसेविना ।यतिना वादिराजेन स्तुतिर्धीशुद्धये कृता ॥ १२॥

seyaṃ śrīśahayagrīvadāsenā''cāryasevinā |yatinā vādirājena stutirdhīśuddhaye kṛtā || 12||

इति श्रीमद्वादिराजपूज्यचरणविरचितंधीशुद्धिस्तोत्रं सम्पूर्णम् ।भारतीरमणमुख्यप्राणान्तर्गत श्रीकृष्णार्पणमस्तु ।

iti śrīmadvādirājapūjyacaraṇaviracitaṃdhīśuddhistotraṃ sampūrṇam |bhāratīramaṇamukhyaprāṇāntargata śrīkṛṣṇārpaṇamastu |