विष्णुस्तोत्रम् (ब्रह्मकृतं १२ महाभारतान्तर्गतम् विश्वेश्वरो वासुदेवोऽसि तस्माद्योगात्मानं दैवतं त्वामुपैमि) Brahmakritam 12 Vishnu Stotram

विश्वावसुर्विश्वमूर्तिर्विश्वेशो विष्वक्सेनो विश्वकर्मा वशी च ।विश्वेश्वरो वासुदेवोऽसि तस्माद्योगात्मानं दैवतं त्वामुपैमि ॥ ४२॥

viśvāvasurviśvamūrtirviśveśo viṣvakseno viśvakarmā vaśī ca |viśveśvaro vāsudevo'si tasmādyogātmānaṃ daivataṃ tvāmupaimi || 42||

जय विश्व महादेव जय लोकहिते रत ।जय योगीश्वर विभो जय योगपरावर ॥ ४३॥

jaya viśva mahādeva jaya lokahite rata |jaya yogīśvara vibho jaya yogaparāvara || 43||

पद्मगर्भ विशालाक्ष जय लोकेश्वरेश्वर ।भूतभव्यभवन्नाथ जय सौम्यात्मजात्मज ॥ ४४॥

padmagarbha viśālākṣa jaya lokeśvareśvara |bhūtabhavyabhavannātha jaya saumyātmajātmaja || 44||

असङ्ख्येयगुणाजेय जय सर्वपरायण ।नारायण सुदुष्पार जय शार्ङ्गधनुर्धर ॥ ४५॥

asaṅkhyeyaguṇājeya jaya sarvaparāyaṇa |nārāyaṇa suduṣpāra jaya śārṅgadhanurdhara || 45||

सर्वगुह्यगुणोपेत विश्वमूर्ते निरामय ।विश्वेश्वर महाबाहो जय लोकार्थतत्पर ॥ ४६॥

sarvaguhyaguṇopeta viśvamūrte nirāmaya |viśveśvara mahābāho jaya lokārthatatpara || 46||

महोरग वराहाद्य हरिकेश विभो जय ।हरिवास विशामीश विश्वावासामिताव्यय ॥ ४७॥

mahoraga varāhādya harikeśa vibho jaya |harivāsa viśāmīśa viśvāvāsāmitāvyaya || 47||

व्यक्ताव्यक्तामितस्थान नियतेन्द्रिय सेन्द्रिय ।असङ्ख्येयात्मभावज्ञ जय गम्भीर कामद ॥ ४८॥

vyaktāvyaktāmitasthāna niyatendriya sendriya |asaṅkhyeyātmabhāvajña jaya gambhīra kāmada || 48||

अनन्त विदितप्रज्ञ नित्यं भूतविभावन ।कृतकार्य कृतप्रज्ञ धर्मज्ञ विजयाजय ॥ ४९॥

ananta viditaprajña nityaṃ bhūtavibhāvana |kṛtakārya kṛtaprajña dharmajña vijayājaya || 49||

गुह्यात्मन्सर्वभूतात्मन्स्फुटसम्भूतसम्भव ।भूतार्थतत्त्व लोकेश जय भूतविभावन ॥ ५०॥

guhyātmansarvabhūtātmansphuṭasambhūtasambhava |bhūtārthatattva lokeśa jaya bhūtavibhāvana || 50||

आत्मयोने महाभाग कल्पसङ्क्षेपतत्पर ।उद्भावन मनोद्भाव जय ब्रह्मजनप्रिय ॥ ५१॥

ātmayone mahābhāga kalpasaṅkṣepatatpara |udbhāvana manodbhāva jaya brahmajanapriya || 51||

निसर्गसर्गाभिरत कामेश परमेश्वर ।अमृतोद्भव सद्भाव युगाग्ने विजयप्रद ॥ ५२॥

nisargasargābhirata kāmeśa parameśvara |amṛtodbhava sadbhāva yugāgne vijayaprada || 52||

प्रजापतिपते देव पद्मनाभ महाबल ।आत्मभूत महाभूत कर्मात्मञ्जय कर्मद ॥ ५३॥

prajāpatipate deva padmanābha mahābala |ātmabhūta mahābhūta karmātmañjaya karmada || 53||

पादौ तव धरा देवी दिशो बाहुर्दिवं शिरः ।मूर्तिस्तेऽहं सुराः कायश्चन्द्रादित्यौ च चक्षुषी ॥ ५४॥

pādau tava dharā devī diśo bāhurdivaṃ śiraḥ |mūrtiste'haṃ surāḥ kāyaścandrādityau ca cakṣuṣī || 54||

बलं तपश्च सत्यं च धर्मः कामात्मजः प्रभो ।तेजोऽग्निः पवनः श्वास आपस्ते स्वेदसम्भवाः ॥ ५५॥

balaṃ tapaśca satyaṃ ca dharmaḥ kāmātmajaḥ prabho |tejo'gniḥ pavanaḥ śvāsa āpaste svedasambhavāḥ || 55||

अश्विनौ श्रवणौ नित्यं देवी जिह्वा सरस्वती ।वेदाः संस्कारनिष्ठा हि त्वयीदं जगदाश्रितम् ॥ ५६॥

aśvinau śravaṇau nityaṃ devī jihvā sarasvatī |vedāḥ saṃskāraniṣṭhā hi tvayīdaṃ jagadāśritam || 56||

न सङ्ख्यां न परीमाणं न तेजो न पराक्रमम् ।न बलं योगयोगीश जानीमस्ते न सम्भवम् ॥ ५७॥

na saṅkhyāṃ na parīmāṇaṃ na tejo na parākramam |na balaṃ yogayogīśa jānīmaste na sambhavam || 57||

त्वद्भक्तिनिरता देव नियमैस्त्वां समाहिताः ।अर्चयामः सदा विष्णो परमेशं महेश्वरम् ॥ ५८॥

tvadbhaktiniratā deva niyamaistvāṃ samāhitāḥ |arcayāmaḥ sadā viṣṇo parameśaṃ maheśvaram || 58||

ऋषयो देवगन्धर्वा यक्षराक्षसपन्नगाः ।पिशाचा मानुषाश्चैव मृगपक्षिसरीसृपाः ॥ ५९॥

ṛṣayo devagandharvā yakṣarākṣasapannagāḥ |piśācā mānuṣāścaiva mṛgapakṣisarīsṛpāḥ || 59||

एवमादि मया सृष्टं पृथिव्यां त्वत्प्रसादजम् ।पद्मनाभ विशालाक्ष कृष्ण दुःस्वप्ननाशन ॥ ६०॥

evamādi mayā sṛṣṭaṃ pṛthivyāṃ tvatprasādajam |padmanābha viśālākṣa kṛṣṇa duḥsvapnanāśana || 60||

त्वं गतिः सर्वभूतानां त्वं नेता त्वं जगन्मुखम् ।त्वत्प्रसादेन देवेश सुखिनो विबुधाः सदा ॥ ६१॥

tvaṃ gatiḥ sarvabhūtānāṃ tvaṃ netā tvaṃ jaganmukham |tvatprasādena deveśa sukhino vibudhāḥ sadā || 61||

पृथिवी निर्भया देव त्वत्प्रसादात्सदाभवत् ।तस्माद्भव विशालाक्ष यदुवंशविवर्धनः ॥ ६२॥

pṛthivī nirbhayā deva tvatprasādātsadābhavat |tasmādbhava viśālākṣa yaduvaṃśavivardhanaḥ || 62||

धर्मसंस्थापनार्थाय दैतेयानां वधाय च ।जगतो धारणार्थाय विज्ञाप्यं कुरु मे प्रभो ॥ ६३॥

dharmasaṃsthāpanārthāya daiteyānāṃ vadhāya ca |jagato dhāraṇārthāya vijñāpyaṃ kuru me prabho || 63||

यदेतत्परमं गुह्यं त्वत्प्रसादमयं विभो ।वासुदेव तदेतत्ते मयोद्गीतं यथातथम् ॥ ६४॥

yadetatparamaṃ guhyaṃ tvatprasādamayaṃ vibho |vāsudeva tadetatte mayodgītaṃ yathātatham || 64||

सृष्ट्वा सङ्कर्षणं देवं स्वयमात्मानमात्मना ।कृष्ण त्वमात्मनास्राक्षीः प्रद्युम्नं चात्मसम्भवम् ॥ ६५॥

sṛṣṭvā saṅkarṣaṇaṃ devaṃ svayamātmānamātmanā |kṛṣṇa tvamātmanāsrākṣīḥ pradyumnaṃ cātmasambhavam || 65||

प्रद्युम्नाच्चानिरुद्धं त्वं यं विदुर्विष्णुमव्ययम् ।अनिरुद्धोऽसृजन्मां वै ब्रह्माणं लोकधारिणम् ॥ ६६॥

pradyumnāccāniruddhaṃ tvaṃ yaṃ vidurviṣṇumavyayam |aniruddho'sṛjanmāṃ vai brahmāṇaṃ lokadhāriṇam || 66||

वासुदेवमयः सोऽहं त्वयैवास्मि विनिर्मितः ।विभज्य भागशोऽऽत्मानं व्रज मानुषतां विभो ॥ ६७॥

vāsudevamayaḥ so'haṃ tvayaivāsmi vinirmitaḥ |vibhajya bhāgaśo''tmānaṃ vraja mānuṣatāṃ vibho || 67||

तत्रासुरवधं कृत्वा सर्वलोकसुखाय वै ।धर्मं स्थाप्य यशः प्राप्य योगं प्राप्स्यसि तत्त्वतः ॥ ६८॥

tatrāsuravadhaṃ kṛtvā sarvalokasukhāya vai |dharmaṃ sthāpya yaśaḥ prāpya yogaṃ prāpsyasi tattvataḥ || 68||

त्वां हि ब्रह्मर्षयो लोके देवाश्चामितविक्रम ।तैस्तैश्च नामभिर्भक्ता गायन्ति परमात्मकम् ॥ ६९॥

tvāṃ hi brahmarṣayo loke devāścāmitavikrama |taistaiśca nāmabhirbhaktā gāyanti paramātmakam || 69||

स्थिताश्च सर्वे त्वयि भूतसङ्घाः कृत्वाऽऽश्रयं त्वां वरदं सुबाहो ।अनादिमध्यान्तमपारयोगं लोकस्य सेतुं प्रवदन्ति विप्राः ॥ ७०॥

sthitāśca sarve tvayi bhūtasaṅghāḥ kṛtvā''śrayaṃ tvāṃ varadaṃ subāho |anādimadhyāntamapārayogaṃ lokasya setuṃ pravadanti viprāḥ || 70||

इति महाभारते भीष्मपर्वणि ३३ अध्यायान्तर्गतंब्रह्मकृतं विष्णुस्तोत्रं सम्पूर्णम् ।महाभारत । भीष्मपर्व । अध्याय ६१/४२७०॥महाभारत । भीष्मपर्व । अध्याय ६१/४२-७०॥

iti mahābhārate bhīṣmaparvaṇi 33 adhyāyāntargataṃbrahmakṛtaṃ viṣṇustotraṃ sampūrṇam |mahābhārata | bhīṣmaparva | adhyāya 61/4270||mahābhārata | bhīṣmaparva | adhyāya 61/42-70||