विष्णुस्तोत्रम् (ब्रह्मकृतं १० भागवतपुराणान्तर्गतम् अजातजन्मस्थितिसंयमायागुणायनिर्वाणसुखार्णवाय) Brahmakritam 10 Vishnu Stotram

ब्रह्मोवाच ।अजातजन्मस्थितिसंयमायागुणायनिर्वाणसुखार्णवाय ।अणोरणिम्नेऽपरिगण्यधाम्ने महानुभावाय नमो नमस्ते ॥ ८॥

brahmovāca |ajātajanmasthitisaṃyamāyāguṇāyanirvāṇasukhārṇavāya |aṇoraṇimne'parigaṇyadhāmne mahānubhāvāya namo namaste || 8||

रूपं तवैतत्पुरुषर्षभेज्यं श्रेयोऽर्थिभिर्वैदिकतान्त्रिकेण ।योगेन धातः सह नस्त्रिलोकान् पश्याम्यमुष्मिन्नु ह विश्वमूर्तौ ॥ ९॥

rūpaṃ tavaitatpuruṣarṣabhejyaṃ śreyo'rthibhirvaidikatāntrikeṇa |yogena dhātaḥ saha nastrilokān paśyāmyamuṣminnu ha viśvamūrtau || 9||

त्वय्यग्र आसीत्त्वयि मध्य आसीत्त्वय्यन्त आसीदिदमात्मतन्त्रे ।त्वमादिरन्तो जगतोऽस्य मध्यं घटस्य मृत्स्नेव परः परस्मात् ॥ १०॥

tvayyagra āsīttvayi madhya āsīttvayyanta āsīdidamātmatantre |tvamādiranto jagato'sya madhyaṃ ghaṭasya mṛtsneva paraḥ parasmāt || 10||

त्वं माययाऽऽत्माऽऽश्रयया स्वयेदं निर्माय विश्वं तदनुप्रविष्टः ।पश्यन्ति युक्ता मनसा मनीषिणो गुणव्यवायेऽप्यगुणं विपश्चितः ॥ ११॥

tvaṃ māyayā''tmā''śrayayā svayedaṃ nirmāya viśvaṃ tadanupraviṣṭaḥ |paśyanti yuktā manasā manīṣiṇo guṇavyavāye'pyaguṇaṃ vipaścitaḥ || 11||

यथाग्निमेधस्यमृतं च गोषु भुव्यन्नमम्बूद्यमने च वृत्तिम् ।योगैर्मनुष्या अधियन्ति हि त्वां गुणेषु बुद्।ह्ध्या कवयो वदन्ति ॥ १२॥

yathāgnimedhasyamṛtaṃ ca goṣu bhuvyannamambūdyamane ca vṛttim |yogairmanuṣyā adhiyanti hi tvāṃ guṇeṣu bud|hdhyā kavayo vadanti || 12||

तं त्वां वयं नाथ समुज्जिहानं सरोजनाभातिचिरेप्सितार्थम् ।दृष्ट्वा गता निर्वृतमद्य सर्वे गजा दवार्ता इव गाङ्गमम्भः ॥ १३॥

taṃ tvāṃ vayaṃ nātha samujjihānaṃ sarojanābhāticirepsitārtham |dṛṣṭvā gatā nirvṛtamadya sarve gajā davārtā iva gāṅgamambhaḥ || 13||

स त्वं विधत्स्वाखिललोकपाला वयं यदर्थास्तव पादमूलम् ।समागतास्ते बहिरन्तरात्मन् किं वान्यविज्ञाप्यमशेषसाक्षिणः ॥ १४॥

sa tvaṃ vidhatsvākhilalokapālā vayaṃ yadarthāstava pādamūlam |samāgatāste bahirantarātman kiṃ vānyavijñāpyamaśeṣasākṣiṇaḥ || 14||

अहं गिरित्रश्च सुरादयो ये दक्षादयोऽग्नेरिव केतवस्ते ।किं वा विदामेश पृथग्विभाता विधत्स्व शं नो द्विजदेवमन्त्रम् ॥ १५॥

ahaṃ giritraśca surādayo ye dakṣādayo'gneriva ketavaste |kiṃ vā vidāmeśa pṛthagvibhātā vidhatsva śaṃ no dvijadevamantram || 15||

इति श्रीमद्भागवतमहापुराणे अष्टमस्कन्धे षष्ठाध्यायान्तर्गतंब्रह्मकृतं विष्णुस्तोत्रं समाप्तम् ।भागवतपुराण । अध्याय ८/६/८१५॥भागवतपुराण । अध्याय ८/६/८-१५॥

iti śrīmadbhāgavatamahāpurāṇe aṣṭamaskandhe ṣaṣṭhādhyāyāntargataṃbrahmakṛtaṃ viṣṇustotraṃ samāptam |bhāgavatapurāṇa | adhyāya 8/6/815||bhāgavatapurāṇa | adhyāya 8/6/8-15||