विष्णुस्तोत्रम् (ब्रह्मकृतं ०५ स्कन्दपुराणान्तर्गतम् देवदेव जगन्नाथ जगत्सृष्टमिदं त्वया) Brahmakritam 05 Vishnu Stotram

ब्रह्मोवाच ।देवदेव जगन्नाथ जगत्सृष्टमिदं त्वया ।ऋते त्वया जगद्विष्णो नैवावस्थातुमर्हति ॥ १२॥

brahmovāca |devadeva jagannātha jagatsṛṣṭamidaṃ tvayā |ṛte tvayā jagadviṣṇo naivāvasthātumarhati || 12||

शास्ता त्वमस्य विश्वस्य विशुद्धस्य च नापरः ।त्वत्तोऽस्तीदं जगत्सर्वं तस्मात्त्वमनुशासय ॥ १३॥

śāstā tvamasya viśvasya viśuddhasya ca nāparaḥ |tvatto'stīdaṃ jagatsarvaṃ tasmāttvamanuśāsaya || 13||

देवदानवगन्धर्वाः सयक्षोरगराक्षसाः ।त्वामृते पुण्डरीकाक्षं व्यापिताशेषविग्रहाः ।परस्परं विनिघ्नन्ति तांश्च त्वं रक्षितुं क्षमः ॥ १४॥

devadānavagandharvāḥ sayakṣoragarākṣasāḥ |tvāmṛte puṇḍarīkākṣaṃ vyāpitāśeṣavigrahāḥ |parasparaṃ vinighnanti tāṃśca tvaṃ rakṣituṃ kṣamaḥ || 14||

त्वमस्य विश्वस्य चराचरस्य ।स्थितेः सदा प्राणभृदात्मरूपिणी ॥ १५॥

tvamasya viśvasya carācarasya |sthiteḥ sadā prāṇabhṛdātmarūpiṇī || 15||

त्वया धृतं सर्वमिदं जगद्वैयतस्ततोऽसि त्वमुपेन्द्रसंज्ञः ।प्रवेशनं व्याप्तमिदं स्वधाम यत्त्वमुच्यसे विष्णुरतो मुनीन्द्रैः ॥ १६॥

tvayā dhṛtaṃ sarvamidaṃ jagadvaiyatastato'si tvamupendrasaṃjñaḥ |praveśanaṃ vyāptamidaṃ svadhāma yattvamucyase viṣṇurato munīndraiḥ || 16||

निवासितं विश्वमिदं त्वयाद्यवासश्च धातोरिति वासुदेवः ।तवानुगं विश्वमिदं विभुस्त्वमशेषविश्वस्य विभासि राजा ॥ १७॥

nivāsitaṃ viśvamidaṃ tvayādyavāsaśca dhātoriti vāsudevaḥ |tavānugaṃ viśvamidaṃ vibhustvamaśeṣaviśvasya vibhāsi rājā || 17||

सेनानुरूपं जगदेव यस्मादतः स्मृतस्त्वं किल विश्वसेनः ।विलेखनादस्य चराचरस्यकृतेश्च धातोस्त्वमतोऽसि कृष्णः ॥ १८॥

senānurūpaṃ jagadeva yasmādataḥ smṛtastvaṃ kila viśvasenaḥ |vilekhanādasya carācarasyakṛteśca dhātostvamato'si kṛṣṇaḥ || 18||

जितं त्वया देव जगत्त्रयं यज्जितेश्च धातोस्त्वमतोऽसि जिष्णुः ।तस्मात्समस्तग्रहलोकपालंजगद्विभो पालय सर्वकालम् ॥ १९॥

jitaṃ tvayā deva jagattrayaṃ yajjiteśca dhātostvamato'si jiṣṇuḥ |tasmātsamastagrahalokapālaṃjagadvibho pālaya sarvakālam || 19||

त्वमस्य सर्वस्य भवादिराजस्तवास्तु भद्रासनमद्वितीयम् ।प्रदक्षिणावर्तनकस्तु शङ्खःकरस्थितः शोभति पूरुषस्य ॥ १\।४१\।२०॥सुदर्शनं नाम तवास्ति चक्रमतो हि गीतः कविभिस्तु चक्री ।ध्वजोऽस्ति ते देव सुपर्णसेवितस्तथा सुपर्णश्च तवास्ति वाहनम् ॥ २१॥

tvamasya sarvasya bhavādirājastavāstu bhadrāsanamadvitīyam |pradakṣiṇāvartanakastu śaṅkhaḥkarasthitaḥ śobhati pūruṣasya || 1\|41\|20||sudarśanaṃ nāma tavāsti cakramato hi gītaḥ kavibhistu cakrī |dhvajo'sti te deva suparṇasevitastathā suparṇaśca tavāsti vāhanam || 21||

तुरङ्गमाः सन्तु तवारिसंहरेतथा हृषीकेश सुदन्तदन्तिनः ।किरीटनिष्काङ्गदकर्णपूरकेयूरहारोत्तमहेमसूत्रैः ॥ २२॥

turaṅgamāḥ santu tavārisaṃharetathā hṛṣīkeśa sudantadantinaḥ |kirīṭaniṣkāṅgadakarṇapūrakeyūrahārottamahemasūtraiḥ || 22||

विचित्रवस्त्रोत्तमरक्तमाल्यैर्विभूषितस्त्वं भव भीमसेनः ।श्रिया कदाचिच्च न मुच्यते भवान्भवन्ति ते नित्यमनन्तसम्पदः ॥ २३॥

vicitravastrottamaraktamālyairvibhūṣitastvaṃ bhava bhīmasenaḥ |śriyā kadācicca na mucyate bhavānbhavanti te nityamanantasampadaḥ || 23||

तवानुगा भक्तिरिहास्तु वै सती ।मुकुन्दभक्ते त्वमतः प्रसीद मे ॥ २४॥

tavānugā bhaktirihāstu vai satī |mukundabhakte tvamataḥ prasīda me || 24||

इति श्रीस्कन्दपुराणे आवन्त्यखण्डे अवन्तीक्षेत्रमाहात्म्ये एकचत्वारिंशाध्यायान्तर्गतंब्रह्मकृतं विष्णुस्तोत्रं समाप्तम् ।स्कन्दपुराण । आवन्त्यखण्ड । आवन्त्यखण्ड । अध्याय ४१/१२२४॥स्कन्दपुराण । आवन्त्यखण्ड । आवन्त्यखण्ड । अध्याय ४१/१२-२४॥

iti śrīskandapurāṇe āvantyakhaṇḍe avantīkṣetramāhātmye ekacatvāriṃśādhyāyāntargataṃbrahmakṛtaṃ viṣṇustotraṃ samāptam |skandapurāṇa | āvantyakhaṇḍa | āvantyakhaṇḍa | adhyāya 41/1224||skandapurāṇa | āvantyakhaṇḍa | āvantyakhaṇḍa | adhyāya 41/12-24||