सुब्रह्मण्यकवचविधिः Shri Subrahmanya Kavacha Vidhih

सुब्रह्मण्यस्य कवचं वक्ष्येऽहं शृणु कौशिक ।सर्वपापप्रशमनं सर्वोपद्रवनाशनम् ॥ १॥

subrahmaṇyasya kavacaṃ vakṣye'haṃ śṛṇu kauśika |sarvapāpapraśamanaṃ sarvopadravanāśanam || 1||

ब्रह्मानुष्टुप्छन्दः सुब्रह्मण्यस्य देवता ।षान्तदीर्घेण कल्पेन षडङ्गन्यासकल्पना ॥ २॥

brahmānuṣṭupchandaḥ subrahmaṇyasya devatā |ṣāntadīrgheṇa kalpena ṣaḍaṅganyāsakalpanā || 2||

ध्यानम्सिन्दूरारुणमिन्दुकान्ति वदनं केयूरहारादिभिःदिव्यैराभरणैर्विभूषिततनुः स्वर्गस्य सौख्यप्रदम् ।अम्भोजाभयशक्तिकुक्कुटधरं रक्ताङ्गरागोज्वलंसुब्रह्मण्यमुपास्महे प्रणमतां भीतिप्रणाशोद्यतम् ॥ ३॥

dhyānamsindūrāruṇamindukānti vadanaṃ keyūrahārādibhiḥdivyairābharaṇairvibhūṣitatanuḥ svargasya saukhyapradam |ambhojābhayaśaktikukkuṭadharaṃ raktāṅgarāgojvalaṃsubrahmaṇyamupāsmahe praṇamatāṃ bhītipraṇāśodyatam || 3||

सुब्रह्मण्योऽग्रतः पातु सेनानीः पातु पृष्ठतः ।गुहो मां दक्षिणे पातु भूपतिः पातु वामतः ॥ ४॥

subrahmaṇyo'grataḥ pātu senānīḥ pātu pṛṣṭhataḥ |guho māṃ dakṣiṇe pātu bhūpatiḥ pātu vāmataḥ || 4||

शिरः पातु महासेनः स्कन्दो रक्षेल्ललाटकम् ।नेत्रयोर्द्वादशाक्षश्च श्रोत्रं रक्षतु विश्वभूः ॥ ५॥

śiraḥ pātu mahāsenaḥ skando rakṣellalāṭakam |netrayordvādaśākṣaśca śrotraṃ rakṣatu viśvabhūḥ || 5||

मुखं मे षण्मुखः पातु नासिकां मकरात्मजः ।ओष्ठं वल्लीपतिः पातु जिह्वां पातु षडक्षरः ॥ ६॥

mukhaṃ me ṣaṇmukhaḥ pātu nāsikāṃ makarātmajaḥ |oṣṭhaṃ vallīpatiḥ pātu jihvāṃ pātu ṣaḍakṣaraḥ || 6||

देवसेनापतिर्दन्तान् चिबुकं बहुलासुतः ।कण्ठं तारकजित्पातु बाहुं द्वादशबाहुमान् ॥ ७॥

devasenāpatirdantān cibukaṃ bahulāsutaḥ |kaṇṭhaṃ tārakajitpātu bāhuṃ dvādaśabāhumān || 7||

हस्तौ शक्तिधरः पातु वक्षः पातु शरोद्भवः ।हृदयं ब्रह्मभूः पातु कुक्षिं पात्वम्बिकासुतः ॥ ८॥

hastau śaktidharaḥ pātu vakṣaḥ pātu śarodbhavaḥ |hṛdayaṃ brahmabhūḥ pātu kukṣiṃ pātvambikāsutaḥ || 8||

नाभिं शम्भुसुतः पातु कटिं पातु हरात्मजः ।ऊरुं पातु गजारूढो जानू द्वे जाह्नवीसुतः ॥ ९॥

nābhiṃ śambhusutaḥ pātu kaṭiṃ pātu harātmajaḥ |ūruṃ pātu gajārūḍho jānū dve jāhnavīsutaḥ || 9||

जङ्घे विशाखो मे पातु पादयोः शिखिवाहनः ।सर्वाण्यङ्गानि भूतेशः सप्तधातूंश्च षण्मुखः ॥ १०॥

jaṅghe viśākho me pātu pādayoḥ śikhivāhanaḥ |sarvāṇyaṅgāni bhūteśaḥ saptadhātūṃśca ṣaṇmukhaḥ || 10||

सन्ध्याकाले निशीथिन्यां मध्याह्ने दुस्तरे जले ।दुर्गमे च महारण्ये राजद्वारे सहायके ॥ ११॥

sandhyākāle niśīthinyāṃ madhyāhne dustare jale |durgame ca mahāraṇye rājadvāre sahāyake || 11||

तुमुले रणमध्ये च सर्पदुष्टमृगादिषु ।चोरादिसाध्वसेऽभेद्ये ज्वरादिव्याधिपीडिते ॥ १२॥

tumule raṇamadhye ca sarpaduṣṭamṛgādiṣu |corādisādhvase'bhedye jvarādivyādhipīḍite || 12||

दुष्टग्रहादिभीतौ च दुर्निमित्तादिभीषणे ।अस्त्रशस्त्रनिघातेषु त्रातु मां क्रौञ्चरन्ध्रकृत् ॥ १३॥

duṣṭagrahādibhītau ca durnimittādibhīṣaṇe |astraśastranighāteṣu trātu māṃ krauñcarandhrakṛt || 13||

सुब्रह्मण्यस्यकवचमिष्टसिद्धिफलं भवेत् ।तस्य तापत्रयं नास्ति सत्यं सत्यं वदाम्यहम् ॥ १४॥

subrahmaṇyasyakavacamiṣṭasiddhiphalaṃ bhavet |tasya tāpatrayaṃ nāsti satyaṃ satyaṃ vadāmyaham || 14||

धर्मार्थी लभते धर्मानर्थार्थी चार्थमाप्नुयात् ।कामार्थी लभते कामान् मोक्षार्थी मोक्षमाप्नुयात् ॥ १५॥

dharmārthī labhate dharmānarthārthī cārthamāpnuyāt |kāmārthī labhate kāmān mokṣārthī mokṣamāpnuyāt || 15||

यत्र यत्र जपेत् तत्र तत्र सन्निहितो गुहः ।पूजाप्रतिष्ठाकाले च जपकाले पठेदिदम् ॥ १६॥

yatra yatra japet tatra tatra sannihito guhaḥ |pūjāpratiṣṭhākāle ca japakāle paṭhedidam || 16||

तेषामेव फलावाप्त्यै महापातकनाशनम् ।यः पठेच्छृणुयाद्भक्त्या नित्यं देवस्य सन्न्निधौ ।सर्वान् कामानिह प्राप्य सोऽन्ते स्कन्दपुरं व्रजेत् ॥ १७॥

teṣāmeva phalāvāptyai mahāpātakanāśanam |yaḥ paṭhecchṛṇuyādbhaktyā nityaṃ devasya sannnidhau |sarvān kāmāniha prāpya so'nte skandapuraṃ vrajet || 17||

इति श्रीकुमारतन्त्रे सुब्रह्मण्यकवचविधिर्नाम अष्टचत्वारिंशत्पटलः ।४८

iti śrīkumāratantre subrahmaṇyakavacavidhirnāma aṣṭacatvāriṃśatpaṭalaḥ | 48