गुहाष्टकम् १ Guha Ashtakam

श्रीगणेशाय नमः ।शान्तं शम्भुतनूजं सत्यमनाधारं जगदाधारंज्ञातृज्ञाननिरन्तरलोकगुणातीतं गुरुणातीतम् ।वल्लीवत्सलभृङ्गारण्यकतारुण्यं वरकारुण्यंसेनासारमुदारं प्रणमत देवेशं गुहमावेशम् ॥ १॥

śrīgaṇeśāya namaḥ |śāntaṃ śambhutanūjaṃ satyamanādhāraṃ jagadādhāraṃjñātṛjñānanirantaralokaguṇātītaṃ guruṇātītam |vallīvatsalabhṛṅgāraṇyakatāruṇyaṃ varakāruṇyaṃsenāsāramudāraṃ praṇamata deveśaṃ guhamāveśam || 1||

विष्णुब्रह्मसमर्च्यं भक्तजनादित्यं वरुणातिथ्यंभावाभावजगत्त्रयरूपमथारूपं जितसारूपम् ।नानाभुवनसमाधेयं विनुताधेयं वरराधेयंकेयुराङ्गनिषङ्गं प्रणमत देवेशं गुहमावेशम् ॥ २॥

viṣṇubrahmasamarcyaṃ bhaktajanādityaṃ varuṇātithyaṃbhāvābhāvajagattrayarūpamathārūpaṃ jitasārūpam |nānābhuvanasamādheyaṃ vinutādheyaṃ vararādheyaṃkeyurāṅganiṣaṅgaṃ praṇamata deveśaṃ guhamāveśam || 2||

स्कन्दं कुङ्कुमवर्णं स्पन्दमुदानन्दं परमानन्दंज्योतिःस्तोमनिरन्तररम्यमहस्साम्यं मनसायाम्यम् ।मायाशृङ्खलबन्धविहीनमनादीनं परमादीनंशोकापेतमुदात्तं प्रणमत देवेशं गुहमावेशम् ॥ ३॥

skandaṃ kuṅkumavarṇaṃ spandamudānandaṃ paramānandaṃjyotiḥstomanirantararamyamahassāmyaṃ manasāyāmyam |māyāśṛṅkhalabandhavihīnamanādīnaṃ paramādīnaṃśokāpetamudāttaṃ praṇamata deveśaṃ guhamāveśam || 3||

व्यालव्यावृतभूषं भस्मसमालेपं भुवनालेपंज्योतिश्चक्रसमर्पितकायमनाकायव्ययमाकायम् ।भक्तत्राणनशक्त्या युक्तमनुद्युक्तं प्रणयासक्तंसुब्रह्मण्यमरण्यं प्रणमत देवेशं गुहमावेशम् ॥ ४॥

vyālavyāvṛtabhūṣaṃ bhasmasamālepaṃ bhuvanālepaṃjyotiścakrasamarpitakāyamanākāyavyayamākāyam |bhaktatrāṇanaśaktyā yuktamanudyuktaṃ praṇayāsaktaṃsubrahmaṇyamaraṇyaṃ praṇamata deveśaṃ guhamāveśam || 4||

श्रीमत्सुन्दरकायं शिष्टजनासेव्यं सुजटासेव्यंसेवातुष्टसमर्पितसूत्रमहासत्रं निजषड्वक्त्रम् ।प्रत्यर्त्थ्यानतपादसरोरुहमावाहं भवभीदाहंनानायोनिमयोनिं प्रणमत देवेशं गुहमावेशम् ॥ ५॥

śrīmatsundarakāyaṃ śiṣṭajanāsevyaṃ sujaṭāsevyaṃsevātuṣṭasamarpitasūtramahāsatraṃ nijaṣaḍvaktram |pratyartthyānatapādasaroruhamāvāhaṃ bhavabhīdāhaṃnānāyonimayoniṃ praṇamata deveśaṃ guhamāveśam || 5||

मान्यं मुनिभिरमान्यं मञ्जुजटासर्पं जितकन्दर्पंआकल्पामृततरलतरङ्गमनासङ्गं सकलासङ्गम् ।भासा ह्यधरितभास्वन्तं भविकस्वान्तं जितभीस्वान्तंकामं कामनिकामं प्रणमत देवेशं गुहमावेशम् ॥ ६॥

mānyaṃ munibhiramānyaṃ mañjujaṭāsarpaṃ jitakandarpaṃākalpāmṛtataralataraṅgamanāsaṅgaṃ sakalāsaṅgam |bhāsā hyadharitabhāsvantaṃ bhavikasvāntaṃ jitabhīsvāntaṃkāmaṃ kāmanikāmaṃ praṇamata deveśaṃ guhamāveśam || 6||

शिष्टं शिवजनतुष्टं बुधहृदयाकृष्टं हृतपापिष्ठंनादान्तद्युतिमेकमनेकमनासङ्गं सकलासङ्गम् ।दानविनिर्जितनिर्जरदारुमहाभीरुं तिमिराभीरुंकालाकालमकालं प्रणमत देवेशं गुहमावेशम् ॥ ७॥

śiṣṭaṃ śivajanatuṣṭaṃ budhahṛdayākṛṣṭaṃ hṛtapāpiṣṭhaṃnādāntadyutimekamanekamanāsaṅgaṃ sakalāsaṅgam |dānavinirjitanirjaradārumahābhīruṃ timirābhīruṃkālākālamakālaṃ praṇamata deveśaṃ guhamāveśam || 7||

नित्यं नियमिहृदिस्थं सत्यमनागारं भुवनागारंबन्धूकारुणललितशरीरमुरोहारं महिमाहारम् ।कौमारीकरपीडितपादपयोजातं दिवि भूजातंकण्ठेकालमकालं प्रणमत देवेशं गुहमावेशम् ॥ ८॥

nityaṃ niyamihṛdisthaṃ satyamanāgāraṃ bhuvanāgāraṃbandhūkāruṇalalitaśarīramurohāraṃ mahimāhāram |kaumārīkarapīḍitapādapayojātaṃ divi bhūjātaṃkaṇṭhekālamakālaṃ praṇamata deveśaṃ guhamāveśam || 8||

इति श्रीनारायणगुरुविरचितं गुहाष्टकं सम्पूर्णम् ।

iti śrīnārāyaṇaguruviracitaṃ guhāṣṭakaṃ sampūrṇam |