शिवस्तुतिः १४ अथवा शिवस्तवराजः Shiva Stuti or Shiva Stavaraja

धरापोऽग्निर्मरुद्व्योममखेशेन्द्वर्कमूर्तये ।सर्व भूतान्तरस्थाय शङ्कराय नमो नमः ॥ १॥

dharāpo'gnirmarudvyomamakheśendvarkamūrtaye |sarva bhūtāntarasthāya śaṅkarāya namo namaḥ || 1||

श्रुत्यन्तः कृतवासाय श्रुतये श्रुतिजन्मने ।अतीन्द्रियाय महसे शाश्वताय नमो नमः ॥ २॥

śrutyantaḥ kṛtavāsāya śrutaye śrutijanmane |atīndriyāya mahase śāśvatāya namo namaḥ || 2||

स्थूलसूक्ष्मविभागाभ्यामनिर्देश्याय शम्भवे ।भवाय भवसम्भूत दुःखहन्त्रे नमोऽस्तुते ॥ ३॥

sthūlasūkṣmavibhāgābhyāmanirdeśyāya śambhave |bhavāya bhavasambhūta duḥkhahantre namo'stute || 3||

तर्कमार्गातिदूराय तपसां फलदायिने ।चतुर्वर्गवदन्याय सर्वज्ञाय नमो नमः ॥ ४॥

tarkamārgātidūrāya tapasāṃ phaladāyine |caturvargavadanyāya sarvajñāya namo namaḥ || 4||

आदिमध्यान्तशून्याय निरस्ताशेषभीतये ।योगिध्येयाय महते निर्गुणाय नमो नमः ॥ ५॥

ādimadhyāntaśūnyāya nirastāśeṣabhītaye |yogidhyeyāya mahate nirguṇāya namo namaḥ || 5||

विश्वात्मने विचिन्त्याय विलसच्चन्द्रमौलिने ।कन्दर्पदर्पकालाय कालहन्त्रे नमो नमः ॥ ६॥

viśvātmane vicintyāya vilasaccandramauline |kandarpadarpakālāya kālahantre namo namaḥ || 6||

विषाशनाय विहरद् वृषस्कन्दमुपेयुषे ।सरिद्दामसमाबद्धकपर्दाय नमो नमः ॥ ७॥

viṣāśanāya viharad vṛṣaskandamupeyuṣe |sariddāmasamābaddhakapardāya namo namaḥ || 7||

शुद्धाय शुद्धभावाय शुद्धानामन्तरात्मने ।पुरान्तकाय पूर्णाय पुण्यनाम्ने नमो नमः ॥ ८॥

śuddhāya śuddhabhāvāya śuddhānāmantarātmane |purāntakāya pūrṇāya puṇyanāmne namo namaḥ || 8||

भक्ताय निजभक्तानां भुक्तिमुक्तिप्रदायिने ।विवाससे विवासाय विश्वेशाय नमो नमः ॥ ९॥

bhaktāya nijabhaktānāṃ bhuktimuktipradāyine |vivāsase vivāsāya viśveśāya namo namaḥ || 9||

त्रिमूर्तिमूलभूताय त्रिणेत्राय नमो नमः ।त्रिधाम्नां धामरूपाय जन्मघ्नाय नमो नमः ॥ १०॥

trimūrtimūlabhūtāya triṇetrāya namo namaḥ |tridhāmnāṃ dhāmarūpāya janmaghnāya namo namaḥ || 10||

देवासुरशिरोरत्न किरणारुणिताङ्घ्रये ।कान्ताय निजकान्तायै दत्तार्धायै नमो नमः ॥ ११॥

devāsuraśiroratna kiraṇāruṇitāṅghraye |kāntāya nijakāntāyai dattārdhāyai namo namaḥ || 11||

स्तोत्रेणानेन पूजायां प्रीणयेज्जगतः पतिम् ।भुक्तिमुक्तिप्रदं भक्त्या सर्वज्ञं परमेश्वरम् ॥ १२॥

stotreṇānena pūjāyāṃ prīṇayejjagataḥ patim |bhuktimuktipradaṃ bhaktyā sarvajñaṃ parameśvaram || 12||

तस्यासाध्यं त्रिभुवने न किञ्चिदपि वर्तते ।ऐहिकं किं फलं तत्र मुक्तिरेव करेस्थिता ॥ १३॥

tasyāsādhyaṃ tribhuvane na kiñcidapi vartate |aihikaṃ kiṃ phalaṃ tatra muktireva karesthitā || 13||

इति श्रीमहामहेश्वराचार्य श्रीलक्ष्मणदेशिकेन्द्रेण विरचिताशिवस्तुतिः (अथवा शिवस्तवराजः) समाप्ता ।

iti śrīmahāmaheśvarācārya śrīlakṣmaṇadeśikendreṇa viracitāśivastutiḥ (athavā śivastavarājaḥ) samāptā |