शिवस्तुतिः सिद्धेश्वरलिङ्गवर्णानं मङ्कणककृता Shiva Stuti by Mankanaka and Siddheshvaralinga Varnanam

ईश्वरःतत्प्रतीच्यां महादेवि प्रभासं नाम विश्रुतम् ।प्रभासे वेनिका नाम नदी पुण्यप्रदा शुभा ॥ १॥

īśvaraḥtatpratīcyāṃ mahādevi prabhāsaṃ nāma viśrutam |prabhāse venikā nāma nadī puṇyapradā śubhā || 1||

तत्र शैववरा नित्यं भसितोद्धूलने रताः ।त्रिपुण्ड्रभालाः सततमन्यपुण्ड्रविवर्जिताः ॥ २॥

tatra śaivavarā nityaṃ bhasitoddhūlane ratāḥ |tripuṇḍrabhālāḥ satatamanyapuṇḍravivarjitāḥ || 2||

रुद्राक्षकवचाः सर्वे पञ्चाक्षरपरायणाः ।रुद्राध्यायार्थकथनप्रवणाः शरणा मयि ॥ ३॥

rudrākṣakavacāḥ sarve pañcākṣaraparāyaṇāḥ |rudrādhyāyārthakathanapravaṇāḥ śaraṇā mayi || 3||

मम लिङ्गार्चकाः सर्वे बिल्वपत्रादिसाधनैः ।तैः शिवानर्पितं वारि फलं वा नोपभुज्यते ॥ ४॥

mama liṅgārcakāḥ sarve bilvapatrādisādhanaiḥ |taiḥ śivānarpitaṃ vāri phalaṃ vā nopabhujyate || 4||

षट्सहस्रं मुनीन्द्राणां प्रभासे समवस्थितम् ।तत्र मङ्कणको नाम पुरा सिद्धोऽभवन्मुनिः ॥ ५॥

ṣaṭsahasraṃ munīndrāṇāṃ prabhāse samavasthitam |tatra maṅkaṇako nāma purā siddho'bhavanmuniḥ || 5||

तेन सिद्धेश्वरं लिङ्गं त्रिकालेषु समर्चितम् ।बिल्वपत्रैश्च कल्हारैर्नीलैर्नीलोत्पलैरपि ॥ ६॥

tena siddheśvaraṃ liṅgaṃ trikāleṣu samarcitam |bilvapatraiśca kalhārairnīlairnīlotpalairapi || 6||

नैवेद्यैः फलमूलादिकल्पितैः परमेश्वरि ।सदा ममाराधनकृत् स मां तुष्टाव शङ्करि ॥ ७॥

naivedyaiḥ phalamūlādikalpitaiḥ parameśvari |sadā mamārādhanakṛt sa māṃ tuṣṭāva śaṅkari || 7||

सिद्धेशं सर्वसिद्धीनामाकरं भुवनेश्वरि ॥मङ्कणकःसिद्धेश सिद्धगणपूज्यपदाब्जयुग्ममद्यैतदेकमनिशं दयया ददस्व ।मुग्धेन्दुचूड मयि सिद्धिगणं त्वदीयैः (?) सिद्धोऽस्मि मोचय महाघसुपाशबद्धम् ॥ ८॥

siddheśaṃ sarvasiddhīnāmākaraṃ bhuvaneśvari ||maṅkaṇakaḥsiddheśa siddhagaṇapūjyapadābjayugmamadyaitadekamaniśaṃ dayayā dadasva |mugdhenducūḍa mayi siddhigaṇaṃ tvadīyaiḥ (?) siddho'smi mocaya mahāghasupāśabaddham || 8||

बुद्धिं प्रसारय महेश सुखाय शम्भो त्वत्पादपूजनविधौ दृढभक्तियुक्ताम् ।सक्तां सुदारतनयादिधनादिकेषु धान्येषु गोषु गृहवर्णगणेषु मुक्तिम् ॥ ९॥

buddhiṃ prasāraya maheśa sukhāya śambho tvatpādapūjanavidhau dṛḍhabhaktiyuktām |saktāṃ sudāratanayādidhanādikeṣu dhānyeṣu goṣu gṛhavarṇagaṇeṣu muktim || 9||

देहि प्रसीद परमेश्वर पञ्चवक्त्र लोकेशमेति निखिलं सहभूतवर्गैः ।वैमानिकाश्च सकलाः ससुराश्च लोकाः कालस्त्वमीश वडवामुखसन्निभोऽब्धौ ॥ १०॥

dehi prasīda parameśvara pañcavaktra lokeśameti nikhilaṃ sahabhūtavargaiḥ |vaimānikāśca sakalāḥ sasurāśca lokāḥ kālastvamīśa vaḍavāmukhasannibho'bdhau || 10||

क्षेत्रोत्तमं मुनिवरैः सेवितं शाम्भवोत्तमैः ।तत्र सिद्धेश्वरं नाम्ना लिङ्गं मुक्तिप्रदं मम ॥ ११॥

kṣetrottamaṃ munivaraiḥ sevitaṃ śāmbhavottamaiḥ |tatra siddheśvaraṃ nāmnā liṅgaṃ muktipradaṃ mama || 11||

मद्भासनाकर्षणेन प्रभासमिति विश्रुतम् ।हरिब्रह्मरुद्रेन्द्रसाम्राज्यजालं निकृष्टं तदुत्कृष्टकष्टैकनिष्ठम् ।ममेशानलिङ्गार्चनध्यानतुष्टस्य लक्षस्थलिक्षायिता देववर्गाः ॥ १२॥

madbhāsanākarṣaṇena prabhāsamiti viśrutam |haribrahmarudrendrasāmrājyajālaṃ nikṛṣṭaṃ tadutkṛṣṭakaṣṭaikaniṣṭham |mameśānaliṅgārcanadhyānatuṣṭasya lakṣasthalikṣāyitā devavargāḥ || 12||

ईश्वरःइति मङ्कणकेनेशि संस्तुतोऽहं मुदा तदा ।तमाहूय मुनिं सिद्धं सिद्धयस्तेऽभवंस्त्वयि ॥ १३॥

īśvaraḥiti maṅkaṇakeneśi saṃstuto'haṃ mudā tadā |tamāhūya muniṃ siddhaṃ siddhayaste'bhavaṃstvayi || 13||

इति मत्तो वरं लब्ध्वा स तु मङ्कणको द्विजः ।स्वकरात्पयसो धारां निःसृतां ददृशेऽम्बिके ॥ १४॥

iti matto varaṃ labdhvā sa tu maṅkaṇako dvijaḥ |svakarātpayaso dhārāṃ niḥsṛtāṃ dadṛśe'mbike || 14||

सिद्धिः प्राप्तेसि च मया तस्य हर्षोऽजनि दुतम् ।ननर्त सिद्धलिङ्गाग्रे करतालैः स शाम्भवः ॥ १५॥

siddhiḥ prāptesi ca mayā tasya harṣo'jani dutam |nanarta siddhaliṅgāgre karatālaiḥ sa śāmbhavaḥ || 15||

मङ्कणकःस्वामिन्नन्नपते धनाधिपपते हे शैलकन्यापते हेकामान्तक हे पुरान्तक महादेवेश मां पालय ।हे विश्वेश्वर भर्ग देव भगवन् हे चारुचामीकरस्फाराकारशशीरशोभित महासिद्धेश सिद्धिप्रद ॥ १६॥

maṅkaṇakaḥsvāminnannapate dhanādhipapate he śailakanyāpate hekāmāntaka he purāntaka mahādeveśa māṃ pālaya |he viśveśvara bharga deva bhagavan he cārucāmīkarasphārākāraśaśīraśobhita mahāsiddheśa siddhiprada || 16||

हे भीमामरनायकाखिलमहापापेरुतापं हररुद्रोग्रामितशङ्कर त्रिपुरजापारव्यथां संहर ।हे कालान्तक कालकाल भवहन् कालाद्भयं संहारहे गङ्गोत्तमसङ्गरङ्गितजटाभारार्धचन्द्रस्फुर ॥ १७॥

he bhīmāmaranāyakākhilamahāpāperutāpaṃ hararudrogrāmitaśaṅkara tripurajāpāravyathāṃ saṃhara |he kālāntaka kālakāla bhavahan kālādbhayaṃ saṃhārahe gaṅgottamasaṅgaraṅgitajaṭābhārārdhacandrasphura || 17||

कर्पूरोज्वलभूतिभूष भगवन् मां सर्वदा पालयहे भोगीश्वरकङ्कण प्रमथयानाथे प्रसीदाधुना ।हे विश्वान्तक विश्वमेतदधुना त्वत्तो विभो निःसृतंपाहि त्वं परमेश्वरेश कृपया त्वन्मायया कल्पितम् ॥ १८॥

karpūrojvalabhūtibhūṣa bhagavan māṃ sarvadā pālayahe bhogīśvarakaṅkaṇa pramathayānāthe prasīdādhunā |he viśvāntaka viśvametadadhunā tvatto vibho niḥsṛtaṃpāhi tvaṃ parameśvareśa kṛpayā tvanmāyayā kalpitam || 18||

हे लिङ्गार्चनजातनन्दितनिजानन्दैकमोदप्रद हे ।बिल्वादिदलोत्तमाङ्ग भगवन् मत्सिद्धिदातार्चने ॥ १९॥

he liṅgārcanajātananditanijānandaikamodaprada he |bilvādidalottamāṅga bhagavan matsiddhidātārcane || 19||

ईश्वरःइत्थं ननर्त स मुनिः सिद्धिविस्मापितस्तदा ।तेन वृत्तेन सकलं जगन्नृत्तपरं भवत् ॥ २०॥

īśvaraḥitthaṃ nanarta sa muniḥ siddhivismāpitastadā |tena vṛttena sakalaṃ jagannṛttaparaṃ bhavat || 20||

सोद्विग्नास्त्रिदशाः सर्वे मुनिं ते ददृशुस्तदा ।निमीलिताक्षं ध्यायन्तं सानन्दजललोचनम् ॥ २१॥

sodvignāstridaśāḥ sarve muniṃ te dadṛśustadā |nimīlitākṣaṃ dhyāyantaṃ sānandajalalocanam || 21||

ब्रह्मोपेन्द्रेन्द्रविबुधान्नैवापश्यत्तदाऽम्बिके ।सिद्धेश्वराग्रतः सर्वे स्तुवन्तं मां सुरास्तदा ॥ २२॥

brahmopendrendravibudhānnaivāpaśyattadā'mbike |siddheśvarāgrataḥ sarve stuvantaṃ māṃ surāstadā || 22||

सदा सब्रह्मकाः सर्वे सिद्धेशं मां प्रणम्य च ।बिल्वैः सम्पूज्य मां सर्वे प्रार्थयन्ति तदा सुराः ॥ २३॥

sadā sabrahmakāḥ sarve siddheśaṃ māṃ praṇamya ca |bilvaiḥ sampūjya māṃ sarve prārthayanti tadā surāḥ || 23||

देवाःभो शम्भो त्रिपुरान्तकान्तक महादेवेश विश्वाधिकविश्वाशास्य दयानिधे त्रिजगतां नाथ प्रसीदाव नः ।भो भर्गामरधीर वीर भगवन् पाहीन्दुमौळे सुरान्नृत्ये तेन मुनीश्वरेण भुवनं नृत्यन्विनम्येद्ध्रुवम् ॥ २४॥

devāḥbho śambho tripurāntakāntaka mahādeveśa viśvādhikaviśvāśāsya dayānidhe trijagatāṃ nātha prasīdāva naḥ |bho bhargāmaradhīra vīra bhagavan pāhīndumauḷe surānnṛtye tena munīśvareṇa bhuvanaṃ nṛtyanvinamyeddhruvam || 24||

अयं मङ्कणकः सिद्धः सिद्धेश तव दर्शनात् ।सिद्धिं परमिकां प्राप्तस्तेन नृत्यानि मोहितः ॥ २५॥

ayaṃ maṅkaṇakaḥ siddhaḥ siddheśa tava darśanāt |siddhiṃ paramikāṃ prāptastena nṛtyāni mohitaḥ || 25||

तं निवारय लोकेश लोकानां स्थितिहेतवे ।तद्ब्रह्मणो वचः श्रुत्वा सिद्धरूप्यहमागतः ॥ २६॥

taṃ nivāraya lokeśa lokānāṃ sthitihetave |tadbrahmaṇo vacaḥ śrutvā siddharūpyahamāgataḥ || 26||

ईश्वरःजटामण्डलशोभाढ्यस्त्रिपुण्ड्रनिटिलोल्लसन् ।रुद्राक्षहारवलयः कङ्कणाद्यैश्च शोभितः ॥ २७॥

īśvaraḥjaṭāmaṇḍalaśobhāḍhyastripuṇḍraniṭilollasan |rudrākṣahāravalayaḥ kaṅkaṇādyaiśca śobhitaḥ || 27||

भसितोद्धूलितवपुः स्वर्णवेत्रलसत्करः ।शङ्खखड्गादिकलितकुण्डलैः शोभिवक्त्रकः ॥ २८॥

bhasitoddhūlitavapuḥ svarṇavetralasatkaraḥ |śaṅkhakhaḍgādikalitakuṇḍalaiḥ śobhivaktrakaḥ || 28||

पादुकाविलसत्पादो मेखलां पादलम्बिनीम् ।दधड्डमरुकं देवि नादयन्डरबरोऽम्बरम् ॥ २९॥

pādukāvilasatpādo mekhalāṃ pādalambinīm |dadhaḍḍamarukaṃ devi nādayanḍarabaro'mbaram || 29||

पादकङ्कणभूतस्य फणिनः श्वासफूत्कृतैः ।वैनतेयमहापक्षकृतपीडो महेश्वरि ॥ ३०॥

pādakaṅkaṇabhūtasya phaṇinaḥ śvāsaphūtkṛtaiḥ |vainateyamahāpakṣakṛtapīḍo maheśvari || 30||

तस्याग्रतः स्थितो देवि सिद्धेशोऽहं मुनेस्तदा ।स मुनिर्विस्मयाविष्टो मां प्रणम्य तदा स्थितः ॥ ३१॥

tasyāgrataḥ sthito devi siddheśo'haṃ munestadā |sa munirvismayāviṣṭo māṃ praṇamya tadā sthitaḥ || 31||

पश्यतस्तस्य मेऽङ्गुष्ठो देवि सन्ताडितो मया ।तस्माच्च भस्मनो राशिरुदभूत पर्वतोपमः ॥ ३२॥

paśyatastasya me'ṅguṣṭho devi santāḍito mayā |tasmācca bhasmano rāśirudabhūta parvatopamaḥ || 32||

देवा मङ्कणकः शैवा अद्भुतं ददृशुस्तदा ।नृत्तादुपारमद्विप्रो मया प्रोक्तः स मङ्कणः ॥ ३३॥

devā maṅkaṇakaḥ śaivā adbhutaṃ dadṛśustadā |nṛttādupāramadvipro mayā proktaḥ sa maṅkaṇaḥ || 33||

गच्छ मङ्कण सिद्धिस्ते मत्प्रसादात्परा तव ।मैव ते विस्मयो भूयादेतल्लिङ्गं हि सिद्धिदम् ॥ ३४॥

gaccha maṅkaṇa siddhiste matprasādātparā tava |maiva te vismayo bhūyādetalliṅgaṃ hi siddhidam || 34||

प्रभासे पावने क्षेत्रे यो वा को वाऽपि मानवः ।नियतः संवसेदत्र तस्य सिद्धिः परा भवेत् ॥ ३५॥

prabhāse pāvane kṣetre yo vā ko vā'pi mānavaḥ |niyataḥ saṃvasedatra tasya siddhiḥ parā bhavet || 35||

सिद्धिप्रदमिदं लिङ्गं सिद्धेशाख्यं तु कामदम् ।दर्शनादस्य लिङ्गस्य सर्वाः सिद्।ह्ध्यन्ति सिद्।ह्ध्यः ॥ ३६॥

siddhipradamidaṃ liṅgaṃ siddheśākhyaṃ tu kāmadam |darśanādasya liṅgasya sarvāḥ sid|hdhyanti sid|hdhyaḥ || 36||

प्रभासे मत्प्रसादेन सिद्धलिङ्गमुदीक्ष्य च ।मत्सायुज्यमवाप्नोति देवि सत्यं वदामि ते ॥ ३७॥

prabhāse matprasādena siddhaliṅgamudīkṣya ca |matsāyujyamavāpnoti devi satyaṃ vadāmi te || 37||

॥ इति शिवरहस्यान्तर्गते प्रभासक्षेत्रमाहात्म्ये मङ्कणककृता शिवस्तुतिरेवं सिद्धेश्वरलिङ्गवर्णानम् ॥॥ श्रीशिवरहस्यम् । भर्गाख्यः पञ्चमांशः । अध्यायः ३४॥– ॥ श्रीशिवरहस्यम् । भर्गाख्यः पन्चमांशः । अध्यायः ३४॥ –

|| iti śivarahasyāntargate prabhāsakṣetramāhātmye maṅkaṇakakṛtā śivastutirevaṃ siddheśvaraliṅgavarṇānam |||| śrīśivarahasyam | bhargākhyaḥ pañcamāṃśaḥ | adhyāyaḥ 34||– || śrīśivarahasyam | bhargākhyaḥ pancamāṃśaḥ | adhyāyaḥ 34|| –