हाटकेश्वरशिवस्तुतिः १ Sheshakrita Hatakeshvara Shiva Stuti 1

(शिवरहस्यान्तर्गते भीमाख्ये)फणामणिगणव्रज प्रभवगर्भधामामृतप्रभं वर सुहाटकेश्वरमहोरुलिङ्गोत्तमम् ।सुबिल्वदलपङ्कजैः कनकचम्पकैर्मल्लिकाकदम्बकरवीरजैः सुमवरैः प्रपूज्योरगाः ॥ १३॥

(śivarahasyāntargate bhīmākhye)phaṇāmaṇigaṇavraja prabhavagarbhadhāmāmṛtaprabhaṃ vara suhāṭakeśvaramahoruliṅgottamam |subilvadalapaṅkajaiḥ kanakacampakairmallikākadambakaravīrajaiḥ sumavaraiḥ prapūjyoragāḥ || 13||

लिङ्गं हाटकगर्भमण्डितमहागर्भोरुधामस्थितंदिव्योत्तुङ्गवृषाद्यरत्नशिखरद्वाराङ्कितं सुन्दरम् ।प्राकारप्रकरैरपारगणनाहीनस्वमौलीलसत्सद्रत्नच्छविभिः प्रदीपितमुमाकान्तलयेषूद्यताः ॥ १४॥

liṅgaṃ hāṭakagarbhamaṇḍitamahāgarbhorudhāmasthitaṃdivyottuṅgavṛṣādyaratnaśikharadvārāṅkitaṃ sundaram |prākāraprakarairapāragaṇanāhīnasvamaulīlasatsadratnacchavibhiḥ pradīpitamumākāntalayeṣūdyatāḥ || 14||

पातालगङ्गाम्बुघटीसहस्रधारादिभिः क्षीरदधिप्रभाज्यैः ।प्राज्यैर्मधुप्रभवसारघटीसहस्रैःसच्छर्कराफलरसैरपि चेक्षुनीरैः ॥ १५॥

pātālagaṅgāmbughaṭīsahasradhārādibhiḥ kṣīradadhiprabhājyaiḥ |prājyairmadhuprabhavasāraghaṭīsahasraiḥsaccharkarāphalarasairapi cekṣunīraiḥ || 15||

सन्नारिकेलोदकजम्बुनीररम्भाफलाम्रप्रभवैश्च पनसैः ।गन्धोदकैश्चन्द्र उशीरपाटलातक्कोलकाङ्कोलसुवासितैर्जलैः ॥ १६॥

sannārikelodakajambunīrarambhāphalāmraprabhavaiśca panasaiḥ |gandhodakaiścandra uśīrapāṭalātakkolakāṅkolasuvāsitairjalaiḥ || 16||

आज्यैश्च गव्यैर्वर पञ्चकाद्यैरालिप्य लिङ्गं धवलैश्चवस्त्रैः ।सद्रत्नभूषाफणिगोलकाङ्कितैरत्नैश्च निष्टप्तसुवर्णयुक्तैः ॥ १७॥

ājyaiśca gavyairvara pañcakādyairālipya liṅgaṃ dhavalaiścavastraiḥ |sadratnabhūṣāphaṇigolakāṅkitairatnaiśca niṣṭaptasuvarṇayuktaiḥ || 17||

तगरागरुधूपसम्भवैरथ गन्धैर्मणिदीपकोटिभिः ।परिफुल्लसुपङ्कजार्कबिल्वैरपि मल्लीकरवीरजाजिपुष्पैः ॥ १८॥

tagarāgarudhūpasambhavairatha gandhairmaṇidīpakoṭibhiḥ |pariphullasupaṅkajārkabilvairapi mallīkaravīrajājipuṣpaiḥ || 18||

मरुवदमनकस्रजादिभारैःपरिपूज्य प्रमथाधिपोरुलिङ्गम् ।भुजगा जगतां महेशमेवंवरनैवेद्यभरैः फलैश्च भक्ष्यभोज्यैः ॥ १९॥

maruvadamanakasrajādibhāraiḥparipūjya pramathādhiporuliṅgam |bhujagā jagatāṃ maheśamevaṃvaranaivedyabharaiḥ phalaiśca bhakṣyabhojyaiḥ || 19||

स्रक्ताम्बूलदुकूलवर्यविहितालङ्कारसच्चन्दनालिप्तं लिङ्गमुमापतेः प्रियतमं नीराजयन्ति द्विजदीपानां च सहस्रकैर्वरमहाकर्पूरखण्डोत्थितज्वालाजालनिरस्तदिक्तमततिं ते पन्नगाः शङ्करम् ॥ २०॥

sraktāmbūladukūlavaryavihitālaṅkārasaccandanāliptaṃ liṅgamumāpateḥ priyatamaṃ nīrājayanti dvijadīpānāṃ ca sahasrakairvaramahākarpūrakhaṇḍotthitajvālājālanirastadiktamatatiṃ te pannagāḥ śaṅkaram || 20||

हाटककटकं महेशलिङ्गेपरिसंवेष्ट्य मुदाननोत्त्थरत्नैः ।स्वफणाछदि सुन्दरेशमूर्ध्निवरिवस्याभिरहो समर्चयन्ति ॥ २१॥

hāṭakakaṭakaṃ maheśaliṅgeparisaṃveṣṭya mudānanotttharatnaiḥ |svaphaṇāchadi sundareśamūrdhnivarivasyābhiraho samarcayanti || 21||

स्वच्छेन्दुधामपरिमण्डल सन्निभोरुनिष्टप्तरुक्मवरदण्डसुमण्डितैश्च ।सच्छत्रपङ्क्तिवरचामरकोटिकोटिभ्राजत्पताकनिकरैर्व्यजनैरपारैः ॥ २२॥

svacchendudhāmaparimaṇḍala sannibhoruniṣṭaptarukmavaradaṇḍasumaṇḍitaiśca |sacchatrapaṅktivaracāmarakoṭikoṭibhrājatpatākanikarairvyajanairapāraiḥ || 22||

आदर्शदर्शवरनाट्यमहोत्सवोद्यद्ध्वानैर्जिताम्बुधिरवैर्वरदुन्दुभीनाम् ।सत्काहलैर्वरमृदङ्गसुशङ्खनादैःसङ्घोष्य शङ्करमहालयमध्यमेवम् ॥ २३॥

ādarśadarśavaranāṭyamahotsavodyaddhvānairjitāmbudhiravairvaradundubhīnām |satkāhalairvaramṛdaṅgasuśaṅkhanādaiḥsaṅghoṣya śaṅkaramahālayamadhyamevam || 23||

तौर्यत्रिकैर्हरहरेति रवैर्भुजङ्गानृत्यन्ति लिङ्गसविधे मुदिताः कृतार्थाः ॥ २४॥

tauryatrikairharahareti ravairbhujaṅgānṛtyanti liṅgasavidhe muditāḥ kṛtārthāḥ || 24||

श्रीरुद्रवीणायुतवाणिपाणिपद्मप्रभोत्थैर्नखरैर्नखाग्रैः ।तदुक्तिरागोत्तमगानधारानाम्नां च शम्भोश्च नयन्ति कालम् ॥ २५॥

śrīrudravīṇāyutavāṇipāṇipadmaprabhotthairnakharairnakhāgraiḥ |taduktirāgottamagānadhārānāmnāṃ ca śambhośca nayanti kālam || 25||

तदङ्गणसुनीलिमाविधुतकालिनानं कुचप्रकर्षभुजगाङ्गनाः परिलसत्कपोलश्रियः ।चलद्दलनमण्डनैः प्रथितकुण्डलान्दोलनैर्नयन्ति किल वीणया शिवमहेशगानादराः ॥ २६॥

tadaṅgaṇasunīlimāvidhutakālinānaṃ kucaprakarṣabhujagāṅganāḥ parilasatkapolaśriyaḥ |caladdalanamaṇḍanaiḥ prathitakuṇḍalāndolanairnayanti kila vīṇayā śivamaheśagānādarāḥ || 26||

ता नागाभरणोरुलिङ्गसदने नृत्यन्ति नागात्मजाःनागास्याः प्रसभोरुकाण्डसुमहापादा झणन्नूपुराः ।पश्येशेति हरेति शङ्करमहादेवेति नित्यं सदावीणावेणुमृदङ्गनिःस्वनलयैः सोमोरुधामाननाः ॥ २७॥

tā nāgābharaṇoruliṅgasadane nṛtyanti nāgātmajāḥnāgāsyāḥ prasabhorukāṇḍasumahāpādā jhaṇannūpurāḥ |paśyeśeti hareti śaṅkaramahādeveti nityaṃ sadāvīṇāveṇumṛdaṅganiḥsvanalayaiḥ somorudhāmānanāḥ || 27||

शेषोऽप्यशेषवदनैर्भुजगोरुभूषपूषोज्ज्वलाक्षभसितोत्तमभूषिताङ्गम् ।योषार्धकाय नवमाषनिकाशकण्ठंसन्तोष्य शङ्करमहो स्तुवति प्रदोषे ॥(अस्तौत्प्रदोषसमये परितुष्टचेताः) ॥ २८॥

śeṣo'pyaśeṣavadanairbhujagorubhūṣapūṣojjvalākṣabhasitottamabhūṣitāṅgam |yoṣārdhakāya navamāṣanikāśakaṇṭhaṃsantoṣya śaṅkaramaho stuvati pradoṣe ||(astautpradoṣasamaye parituṣṭacetāḥ) || 28||

द्विजिह्वफणिभूषणं शशिहुताशसूर्येक्षणंसुपङ्कजदलेक्षणं प्रथितपूजया तोषणम् ।गरोल्बणविशेषणं मदनकालसंहारणंकुरङ्गशिशु धारणं सुरवराद्यसत्कारणम् ॥ २९॥

dvijihvaphaṇibhūṣaṇaṃ śaśihutāśasūryekṣaṇaṃsupaṅkajadalekṣaṇaṃ prathitapūjayā toṣaṇam |garolbaṇaviśeṣaṇaṃ madanakālasaṃhāraṇaṃkuraṅgaśiśu dhāraṇaṃ suravarādyasatkāraṇam || 29||

॥ इति शिवरहस्यान्तर्गते शेषकृता हाटकेश्वरशस्तुतिः १ सम्पूर्णा ॥॥ श्रीशिवरहस्यम् । भीमाख्यः अष्टमांशः । अध्यायः २७ शेषकृतहाटकेशार्चनम् । १३२९॥

|| iti śivarahasyāntargate śeṣakṛtā hāṭakeśvaraśastutiḥ 1 sampūrṇā |||| śrīśivarahasyam | bhīmākhyaḥ aṣṭamāṃśaḥ | adhyāyaḥ 27 śeṣakṛtahāṭakeśārcanam | 1329||

– ॥ श्रीशिवरहस्यम् ।भीमाख्यः अष्टमांशः ।अध्यायः २७ शेषकृतहाटकेशार्चनम् ।१३-२९॥

– || śrīśivarahasyam |bhīmākhyaḥ aṣṭamāṃśaḥ |adhyāyaḥ 27 śeṣakṛtahāṭakeśārcanam | 13-29||