शिवधर्मानुवर्णनम् शतानन्दगुरुसंवादे Shatanandagurusamvade Shivadharmanuvarnanam

शतानन्दःधर्माणां परमो धर्मः को वा धर्मस्त्वया मतः ।धर्मोत्तमोत्तमत्वेन ज्ञातं धर्म वदाऽधुना ॥देवोत्तमोतमेन को वा देवस्त्वया मतः ।श्रुतिभिः कस्य वा धर्मः कीर्तितः कः परः प्रभुः ॥गुरुःधर्मोत्तमोत्तमत्वेन शिवधर्मः प्रकीर्तितः ।शिवधर्मात् परो धर्मो नास्ति न श्रूयते ध्रुवम् ॥ १॥

śatānandaḥdharmāṇāṃ paramo dharmaḥ ko vā dharmastvayā mataḥ |dharmottamottamatvena jñātaṃ dharma vadā'dhunā ||devottamotamena ko vā devastvayā mataḥ |śrutibhiḥ kasya vā dharmaḥ kīrtitaḥ kaḥ paraḥ prabhuḥ ||guruḥdharmottamottamatvena śivadharmaḥ prakīrtitaḥ |śivadharmāt paro dharmo nāsti na śrūyate dhruvam || 1||

तेनैव शिवधर्मेण सर्वान् कामानवाप्नुयात् ।यं यं कामयते कामं तं तं कामारिधर्मतः ॥ २॥

tenaiva śivadharmeṇa sarvān kāmānavāpnuyāt |yaṃ yaṃ kāmayate kāmaṃ taṃ taṃ kāmāridharmataḥ || 2||

शिवपूजा परो धर्मः तथैव शिवपूजया ।शिवपादाब्जभृङ्गत्वं प्राप्तोत्येव न संशयः ॥ ३॥

śivapūjā paro dharmaḥ tathaiva śivapūjayā |śivapādābjabhṛṅgatvaṃ prāptotyeva na saṃśayaḥ || 3||

तत्फलं नोग्रतपसा न यागार्बुदकोटिभिः ।परं तु श्रीमहादेवकृपया परया खलु ॥ ४॥

tatphalaṃ nogratapasā na yāgārbudakoṭibhiḥ |paraṃ tu śrīmahādevakṛpayā parayā khalu || 4||

सम्प्राप्य भूरिपुण्येन भक्तिमव्यभिचारिणीम् ।क्षणेन शङ्करं स्मृत्वा मुक्तो भवति पातकैः ॥ ५॥

samprāpya bhūripuṇyena bhaktimavyabhicāriṇīm |kṣaṇena śaṅkaraṃ smṛtvā mukto bhavati pātakaiḥ || 5||

यत्पूजया महादेवपादाम्बुजरजो भवेत् ।सा पूजा लिङ्गपूजेति विज्ञेया श्रुतिशेखरैः ॥ ६॥

yatpūjayā mahādevapādāmbujarajo bhavet |sā pūjā liṅgapūjeti vijñeyā śrutiśekharaiḥ || 6||

महापातकतूलाद्रिः शिवनामाग्निलेशतः ।दग्धः क्षणेन भवतीत्यवधारय सादरम् ॥ ७॥

mahāpātakatūlādriḥ śivanāmāgnileśataḥ |dagdhaḥ kṣaṇena bhavatītyavadhāraya sādaram || 7||

यस्य शङ्करपूजायां विश्वासोऽतिदृढः सदा ।तेन तीर्णः स संसारो नानापातकसागरः ॥ ८॥

yasya śaṅkarapūjāyāṃ viśvāso'tidṛḍhaḥ sadā |tena tīrṇaḥ sa saṃsāro nānāpātakasāgaraḥ || 8||

शिवपूजाप्रभावस्तु श्रुतिषु प्रथितः स तु ।एकया जिह्वया वक्तुं शक्य एव न वस्तुतः ॥ ९॥

śivapūjāprabhāvastu śrutiṣu prathitaḥ sa tu |ekayā jihvayā vaktuṃ śakya eva na vastutaḥ || 9||

सहस्रजिह्वः शेषोऽयमनेनापि न सर्वथा ।शिवधर्मप्रभावो यः स तु वक्तुं न शक्यते ॥ १०॥

sahasrajihvaḥ śeṣo'yamanenāpi na sarvathā |śivadharmaprabhāvo yaḥ sa tu vaktuṃ na śakyate || 10||

॥ इति शिवरहस्यान्तर्गते शतानन्दगुरुसंवादे शिवधर्मानुवर्णनं सम्पूर्णम् ॥॥ श्रीशिवरहस्यम् । हराख्यः तृतीयांशः । पूर्वार्धम् । अध्यायः ४६। ८९१०० ॥

|| iti śivarahasyāntargate śatānandagurusaṃvāde śivadharmānuvarṇanaṃ sampūrṇam |||| śrīśivarahasyam | harākhyaḥ tṛtīyāṃśaḥ | pūrvārdham | adhyāyaḥ 46| 89100 ||

– ॥ श्रीशिवरहस्यम् ।हराख्यः तृतीयांशः ।पूर्वार्धम् ।अध्यायः ४६। ८९-१०० ॥

– || śrīśivarahasyam |harākhyaḥ tṛtīyāṃśaḥ |pūrvārdham |adhyāyaḥ 46| 89-100 ||