महेश्वरस्तुतिः (विष्णुकृता लिङ्गपुराणान्तर्गता नमस्तुभ्यं भगवते सुव्रतानन्ततेजसे) Maheshvara Stutih

(सूत उवाचब्रह्माणमग्रतः कृत्वा ततः स गरुडध्वजः ।अतीतैश्च भविष्यैश्च वर्तमानैस्तथैव च ॥ १॥

(sūta uvācabrahmāṇamagrataḥ kṛtvā tataḥ sa garuḍadhvajaḥ |atītaiśca bhaviṣyaiśca vartamānaistathaiva ca || 1||

नामभिश्छान्दसैश्चैव इदं स्तोत्रमुदीरयेत् ।)श्रीविष्णुरुवाच ।नमस्तुभ्यं भगवते सुव्रतानन्ततेजसे ॥ २॥

nāmabhiśchāndasaiścaiva idaṃ stotramudīrayet |)śrīviṣṇuruvāca |namastubhyaṃ bhagavate suvratānantatejase || 2||

नमः क्षेत्राधिपतये बीजिने शूलिने नमः ।सुमेण्ढ्रायार्च्यमेण्ढ्राय दण्डिने रूक्षरेतसे ॥ ३॥

namaḥ kṣetrādhipataye bījine śūline namaḥ |sumeṇḍhrāyārcyameṇḍhrāya daṇḍine rūkṣaretase || 3||

नमो ज्येष्ठाय श्रेष्ठाय पूर्वाय प्रथमाय च ।नमो मान्याय पूज्याय सद्योजाताय वै नमः ॥ ४॥

namo jyeṣṭhāya śreṣṭhāya pūrvāya prathamāya ca |namo mānyāya pūjyāya sadyojātāya vai namaḥ || 4||

गह्वराय घटेशाय व्योमचीराम्बराय च ।नमस्ते ह्यस्मदादीनां भूतानां प्रभवे नमः ॥ ५॥

gahvarāya ghaṭeśāya vyomacīrāmbarāya ca |namaste hyasmadādīnāṃ bhūtānāṃ prabhave namaḥ || 5||

वेदानां प्रभवे चैव स्मृतीनां प्रभवे नमः ।प्रभवे कर्मदानानां द्रव्याणां प्रभवे नमः ॥ ६॥

vedānāṃ prabhave caiva smṛtīnāṃ prabhave namaḥ |prabhave karmadānānāṃ dravyāṇāṃ prabhave namaḥ || 6||

नमो योगस्य प्रभवे साङ्ख्यस्य प्रभवे नमः ।नमो ध्रुवनिबद्धानामृषीणां प्रभवे नमः ॥ ७॥

namo yogasya prabhave sāṅkhyasya prabhave namaḥ |namo dhruvanibaddhānāmṛṣīṇāṃ prabhave namaḥ || 7||

ऋक्षाणां प्रभवे तुभ्यं ग्रहाणां प्रभवे नमः ।वैद्युताशनिमेघानां गर्जितप्रभवे नमः ॥ ८॥

ṛkṣāṇāṃ prabhave tubhyaṃ grahāṇāṃ prabhave namaḥ |vaidyutāśanimeghānāṃ garjitaprabhave namaḥ || 8||

महोदधीनां प्रभवे द्वीपानां प्रभवे नमः ।अद्रीणां प्रभवे चैव वर्षाणां प्रभवे नमः ॥ ९॥

mahodadhīnāṃ prabhave dvīpānāṃ prabhave namaḥ |adrīṇāṃ prabhave caiva varṣāṇāṃ prabhave namaḥ || 9||

नमो नदीनां प्रभवे नदानां प्रभवे नमः ।महौषधीनां प्रभवे वृक्षाणां प्रभवे नमः ॥ १०॥

namo nadīnāṃ prabhave nadānāṃ prabhave namaḥ |mahauṣadhīnāṃ prabhave vṛkṣāṇāṃ prabhave namaḥ || 10||

धर्मवृक्षाय धर्माय स्थितीनां प्रभवे नमः ।प्रभवे च परार्धस्य परस्य प्रभवे नमः ॥ ११॥

dharmavṛkṣāya dharmāya sthitīnāṃ prabhave namaḥ |prabhave ca parārdhasya parasya prabhave namaḥ || 11||

नमो रसानां प्रभवे रत्नानां प्रभवे नमः ।क्षणानां प्रभवे चैव लवानां प्रभवे नमः ॥ १२॥

namo rasānāṃ prabhave ratnānāṃ prabhave namaḥ |kṣaṇānāṃ prabhave caiva lavānāṃ prabhave namaḥ || 12||

अहोरात्रार्धमासानां मासानां प्रभवे नमः ।ऋतूनां प्रभवे तुभ्यं सङ्ख्यायाः प्रभवे नमः ॥ १३॥

ahorātrārdhamāsānāṃ māsānāṃ prabhave namaḥ |ṛtūnāṃ prabhave tubhyaṃ saṅkhyāyāḥ prabhave namaḥ || 13||

प्रभवे चापरार्धस्य परार्धप्रभवे नमः ।नमः पुराणप्रभवे सर्गाणां प्रभवे नमः ॥ १४॥

prabhave cāparārdhasya parārdhaprabhave namaḥ |namaḥ purāṇaprabhave sargāṇāṃ prabhave namaḥ || 14||

मन्वन्तराणां प्रभवे योगस्य प्रभवे नमः ।चतुर्विधस्य सर्गस्य प्रभवेऽनन्तचक्षुषे ॥ १५॥

manvantarāṇāṃ prabhave yogasya prabhave namaḥ |caturvidhasya sargasya prabhave'nantacakṣuṣe || 15||

कल्पोदयनिबन्धानां वार्तानां प्रभवे नमः ।नमो विश्वस्य प्रभवे ब्रह्माधिपतये नमः ॥ १६॥

kalpodayanibandhānāṃ vārtānāṃ prabhave namaḥ |namo viśvasya prabhave brahmādhipataye namaḥ || 16||

विद्यानां प्रभवे चैव विद्याधिपतये नमः ।नमो व्रताधिपतये व्रतानां प्रभवे नमः ॥ १७॥

vidyānāṃ prabhave caiva vidyādhipataye namaḥ |namo vratādhipataye vratānāṃ prabhave namaḥ || 17||

मन्त्राणां प्रभवे तुभ्यं मन्त्राधिपतये नमः ।पितॄणां पतये चैव पशूनां पतये नमः ॥ १८॥

mantrāṇāṃ prabhave tubhyaṃ mantrādhipataye namaḥ |pitṝṇāṃ pataye caiva paśūnāṃ pataye namaḥ || 18||

वाग्वृषाय नमस्तुभ्यं पुराणवृषभाय च ।नमः पशूनां पतये गोवृषेन्द्रध्वजाय च ॥ १९॥

vāgvṛṣāya namastubhyaṃ purāṇavṛṣabhāya ca |namaḥ paśūnāṃ pataye govṛṣendradhvajāya ca || 19||

प्रजापतीनां पतये सिद्धीनां पतये नमः ।दैत्यदानवसङ्घानां रक्षसां पतये नमः ॥ २०॥

prajāpatīnāṃ pataye siddhīnāṃ pataye namaḥ |daityadānavasaṅghānāṃ rakṣasāṃ pataye namaḥ || 20||

गन्धर्वाणां च पतये यक्षाणां पतये नमः ।गरुडोरगसर्पाणां पक्षिणां पतये नमः ॥ २१॥

gandharvāṇāṃ ca pataye yakṣāṇāṃ pataye namaḥ |garuḍoragasarpāṇāṃ pakṣiṇāṃ pataye namaḥ || 21||

सर्वगुह्यपिशाचानां गुह्याधिपतये नमः ।गोकर्णाय च गोप्त्रे च शङ्कुकर्णाय वै नमः ॥ २२॥

sarvaguhyapiśācānāṃ guhyādhipataye namaḥ |gokarṇāya ca goptre ca śaṅkukarṇāya vai namaḥ || 22||

वराहायाप्रमेयाय ऋक्षाय विरजाय च ।नमो सुराणां पतये गणानां पतये नमः ॥ २३॥

varāhāyāprameyāya ṛkṣāya virajāya ca |namo surāṇāṃ pataye gaṇānāṃ pataye namaḥ || 23||

अम्भसां पतये चैव ओजसां पतये नमः ।नमोऽस्तु लक्ष्मीपतये श्रीपाय क्षितिपाय च ॥ २४॥

ambhasāṃ pataye caiva ojasāṃ pataye namaḥ |namo'stu lakṣmīpataye śrīpāya kṣitipāya ca || 24||

बलाबलसमूहाय अक्षोभ्यक्षोभणाय च ।दीप्तशृङ्गैकशृङ्गाय वृषभाय ककुद्मिने ॥ २५॥

balābalasamūhāya akṣobhyakṣobhaṇāya ca |dīptaśṛṅgaikaśṛṅgāya vṛṣabhāya kakudmine || 25||

नमः स्थैर्याय वपुषे तेजसानुव्रताय च ।अतीताय भविष्याय वर्तमानाय वै नमः ॥ २६॥

namaḥ sthairyāya vapuṣe tejasānuvratāya ca |atītāya bhaviṣyāya vartamānāya vai namaḥ || 26||

सुवर्चसे च वीर्याय शूराय ह्यजिताय च ।वरदाय वरेण्याय पुरुषाय महात्मने ॥ २७॥

suvarcase ca vīryāya śūrāya hyajitāya ca |varadāya vareṇyāya puruṣāya mahātmane || 27||

नमो भूताय भव्याय महते प्रभवाय च ।जनाय च नमस्तुभ्यं तपसे वरदाय च ॥ २८॥

namo bhūtāya bhavyāya mahate prabhavāya ca |janāya ca namastubhyaṃ tapase varadāya ca || 28||

अणवे महते चैव नमः सर्वगताय च ।नमो बन्धाय मोक्षाय स्वर्गाय नरकाय च ॥ २९॥

aṇave mahate caiva namaḥ sarvagatāya ca |namo bandhāya mokṣāya svargāya narakāya ca || 29||

नमो भवाय देवाय इज्याय याजकाय च ।प्रत्युदीर्णाय दीप्ताय तत्त्वायातिगुणाय च ॥ ३०॥

namo bhavāya devāya ijyāya yājakāya ca |pratyudīrṇāya dīptāya tattvāyātiguṇāya ca || 30||

नमः पाशाय शस्त्राय नमस्त्वाभरणाय च ।हुताय उपहूताय प्रहुतप्राशिताय च ॥ ३१॥

namaḥ pāśāya śastrāya namastvābharaṇāya ca |hutāya upahūtāya prahutaprāśitāya ca || 31||

नमोऽस्त्विष्टाय पूर्ताय अग्निष्टोमद्विजाय च ।सदस्याय नमश्चैव दक्षिणावभृथाय च ॥ ३२॥

namo'stviṣṭāya pūrtāya agniṣṭomadvijāya ca |sadasyāya namaścaiva dakṣiṇāvabhṛthāya ca || 32||

अहिंसायाप्रलोभाय पशुमन्त्रौषधाय च ।नमः पुष्टिप्रदानाय सुशीलाय सुशीलिने ॥ ३३॥

ahiṃsāyāpralobhāya paśumantrauṣadhāya ca |namaḥ puṣṭipradānāya suśīlāya suśīline || 33||

अतीताय भविष्याय वर्तमानाय ते नमः ।सुवर्चसे च वीर्याय शूराय ह्यजिताय च ॥ ३४॥

atītāya bhaviṣyāya vartamānāya te namaḥ |suvarcase ca vīryāya śūrāya hyajitāya ca || 34||

वरदाय वरेण्याय पुरुषाय महात्मने ।नमो भूताय भव्याय महते चाभयाय च ॥ ३५॥

varadāya vareṇyāya puruṣāya mahātmane |namo bhūtāya bhavyāya mahate cābhayāya ca || 35||

जरासिद्ध नमस्तुभ्यमयसे वरदाय च ।अधरे महते चैव नमः सस्तुपताय च ॥ ३६॥

jarāsiddha namastubhyamayase varadāya ca |adhare mahate caiva namaḥ sastupatāya ca || 36||

नमश्चेन्द्रियपत्राणां लेलिहानाय स्रग्विणे ।विश्वाय विश्वरूपाय विश्वतः शिरसे नमः ॥ ३७॥

namaścendriyapatrāṇāṃ lelihānāya sragviṇe |viśvāya viśvarūpāya viśvataḥ śirase namaḥ || 37||

सर्वतः पाणिपादाय रुद्रायाप्रतिमाय च ।नमो हव्याय कव्याय हव्यवाहाय वै नमः ॥ ३८॥

sarvataḥ pāṇipādāya rudrāyāpratimāya ca |namo havyāya kavyāya havyavāhāya vai namaḥ || 38||

नमः सिद्धाय मेध्याय इष्टायेज्यापराय च ।सुवीराय सुघोराय अक्षोभ्यक्षोभणाय च ॥ ३९॥

namaḥ siddhāya medhyāya iṣṭāyejyāparāya ca |suvīrāya sughorāya akṣobhyakṣobhaṇāya ca || 39||

सुप्रजाय सुमेधाय दीप्ताय भास्कराय च ।नमो बुद्धाय शुद्धाय विस्तृताय मताय च ॥ ४०॥

suprajāya sumedhāya dīptāya bhāskarāya ca |namo buddhāya śuddhāya vistṛtāya matāya ca || 40||

नमः स्थूलाय सूक्ष्माय दृश्यादृश्याय सर्वशः ।वर्षते ज्वलते चैव वायवे शिशिराय च ॥ ४१॥

namaḥ sthūlāya sūkṣmāya dṛśyādṛśyāya sarvaśaḥ |varṣate jvalate caiva vāyave śiśirāya ca || 41||

नमस्ते वक्रकेशाय ऊरुवक्षःशिखाय च ।नमो नमः सुवर्णाय तपनीयनिभाय च ॥ ४२॥

namaste vakrakeśāya ūruvakṣaḥśikhāya ca |namo namaḥ suvarṇāya tapanīyanibhāya ca || 42||

विरूपाक्षाय लिङ्गाय पिङ्गलाय महौजसे ।वृष्टिघ्नाय नमश्चैव नमः सौम्येक्षणाय च ॥ ४३॥

virūpākṣāya liṅgāya piṅgalāya mahaujase |vṛṣṭighnāya namaścaiva namaḥ saumyekṣaṇāya ca || 43||

नमो धूम्राय श्वेताय कृष्णाय लोहिताय च ।पिशिताय पिशङ्गाय पीताय च निषङ्गिणे ॥ ४४॥

namo dhūmrāya śvetāya kṛṣṇāya lohitāya ca |piśitāya piśaṅgāya pītāya ca niṣaṅgiṇe || 44||

नमस्ते सविशेषाय निर्विशेषाय वै नमः ।नम ईज्याय पूज्याय उपजीव्याय वै नमः ॥ ४५॥

namaste saviśeṣāya nirviśeṣāya vai namaḥ |nama ījyāya pūjyāya upajīvyāya vai namaḥ || 45||

नमः क्षेम्याय वृद्धाय वत्सलाय नमोनमः ।नमो भूताय सत्याय सत्यासत्याय वै नमः ॥ ४६॥

namaḥ kṣemyāya vṛddhāya vatsalāya namonamaḥ |namo bhūtāya satyāya satyāsatyāya vai namaḥ || 46||

नमो वै पद्मवर्णाय मृत्युघ्नाय च मृत्यवे ।नमो गौराय श्यामाय कद्रवे लोहिताय च ॥ ४७॥

namo vai padmavarṇāya mṛtyughnāya ca mṛtyave |namo gaurāya śyāmāya kadrave lohitāya ca || 47||

महासन्ध्याभ्रवर्णाय चारुदीप्ताय दीक्षिणे ।नमः कमलहस्ताय दिग्वासाय कपर्दिने ॥ ४८॥

mahāsandhyābhravarṇāya cārudīptāya dīkṣiṇe |namaḥ kamalahastāya digvāsāya kapardine || 48||

अप्रमाणाय सर्वाय अव्ययायामराय च ।नमो रूपाय गन्धाय शाश्वतायाक्षताय च ॥ ४९॥

apramāṇāya sarvāya avyayāyāmarāya ca |namo rūpāya gandhāya śāśvatāyākṣatāya ca || 49||

पुरस्ताद्बृंहते चैव विभ्रान्ताय कृताय च ।दुर्गमाय महेशाय क्रोधाय कपिलाय च ॥ ५०॥

purastādbṛṃhate caiva vibhrāntāya kṛtāya ca |durgamāya maheśāya krodhāya kapilāya ca || 50||

तर्क्यातर्क्यशरीराय बलिने रंहसाय च ।सिकत्याय प्रवाह्याय स्थिताय प्रसृताय च ॥ ५१॥

tarkyātarkyaśarīrāya baline raṃhasāya ca |sikatyāya pravāhyāya sthitāya prasṛtāya ca || 51||

सुमेधसे कुलालाय नमस्ते शशिखण्डिने ।चित्राय चित्रवेषाय चित्रवर्णाय मेधसे ॥ ५२॥

sumedhase kulālāya namaste śaśikhaṇḍine |citrāya citraveṣāya citravarṇāya medhase || 52||

चेकितानाय तुष्टाय नमस्ते निहिताय च ।नमः क्षान्ताय दान्ताय वज्रसंहननाय च ॥ ५३॥

cekitānāya tuṣṭāya namaste nihitāya ca |namaḥ kṣāntāya dāntāya vajrasaṃhananāya ca || 53||

रक्षोघ्नाय विषघ्नाय शितिकण्ठोर्ध्वमन्यवे ॥लेलिहाय कृतान्ताय तिग्मायुधधराय च ॥ ५४॥

rakṣoghnāya viṣaghnāya śitikaṇṭhordhvamanyave ||lelihāya kṛtāntāya tigmāyudhadharāya ca || 54||

प्रमोदाय सम्मोदाय यतिवेद्याय ते नमः ।अनामयाय सर्वाय महाकालाय वै नमः ॥ ५५॥

pramodāya sammodāya yativedyāya te namaḥ |anāmayāya sarvāya mahākālāya vai namaḥ || 55||

प्रणवप्रणवेशाय भगनेत्रान्तकाय च ।मृगव्याधाय दक्षाय दक्षयज्ञान्तकाय च ॥ ५६॥

praṇavapraṇaveśāya bhaganetrāntakāya ca |mṛgavyādhāya dakṣāya dakṣayajñāntakāya ca || 56||

सर्वभूतात्मभूताय सर्वेशातिशयाय च ।पुरघ्नाय सुशस्त्राय धन्विनेऽथ परश्वधे ॥ ५७॥

sarvabhūtātmabhūtāya sarveśātiśayāya ca |puraghnāya suśastrāya dhanvine'tha paraśvadhe || 57||

पूषदन्तविनाशाय भगनेत्रान्तकाय च ।कामदाय वरिष्ठाय कामाङ्गदहनाय च ॥ ५८॥

pūṣadantavināśāya bhaganetrāntakāya ca |kāmadāya variṣṭhāya kāmāṅgadahanāya ca || 58||

रङ्गे करालवक्राय नागेन्द्रवदनाय च ।दैत्यानामन्तकेशाय दैत्याक्रन्दकराय च ॥ ५९॥

raṅge karālavakrāya nāgendravadanāya ca |daityānāmantakeśāya daityākrandakarāya ca || 59||

हिमघ्नाय च तीक्ष्णाय आर्द्रचर्मधराय च ।श्मशानरतिनित्याय नमोऽस्तूल्मुकधारिणे ॥ ६०॥

himaghnāya ca tīkṣṇāya ārdracarmadharāya ca |śmaśānaratinityāya namo'stūlmukadhāriṇe || 60||

नमस्ते प्राणपालाय मुण्डमालाधराय च ।प्रहीणशोकैर्विविधैर्भूतैः परिवृताय च ॥ ६१॥

namaste prāṇapālāya muṇḍamālādharāya ca |prahīṇaśokairvividhairbhūtaiḥ parivṛtāya ca || 61||

नरनारीशरीराय देव्याः प्रियकराय च ।जटिने मुण्डिने चैव व्यालयज्ञोपवीतिने ॥ ६२॥

naranārīśarīrāya devyāḥ priyakarāya ca |jaṭine muṇḍine caiva vyālayajñopavītine || 62||

नमोऽस्तु नृत्यशीलाय उपनृत्यप्रियाय च ।मन्यवे गीतशीलाय मुनिभिर्गायते नमः ॥ ६३॥

namo'stu nṛtyaśīlāya upanṛtyapriyāya ca |manyave gītaśīlāya munibhirgāyate namaḥ || 63||

कटङ्कटाय तिग्माय अप्रियाय प्रियाय च ।विभीषणाय भीष्माय भगप्रमथनाय च ॥ ६४॥

kaṭaṅkaṭāya tigmāya apriyāya priyāya ca |vibhīṣaṇāya bhīṣmāya bhagapramathanāya ca || 64||

सिद्धसङ्घानुगीताय महाभागाय वै नमः ।नमो मुक्ताट्टहासाय क्ष्वेडितास्फोटिताय च ॥ ६५॥

siddhasaṅghānugītāya mahābhāgāya vai namaḥ |namo muktāṭṭahāsāya kṣveḍitāsphoṭitāya ca || 65||

नर्दते कूर्दते चैव नमः प्रमुदितात्मने ।नमो मृडाय श्वसते धावतेऽधिष्ठिते नमः ॥ ६६॥

nardate kūrdate caiva namaḥ pramuditātmane |namo mṛḍāya śvasate dhāvate'dhiṣṭhite namaḥ || 66||

ध्यायते जृम्भते चैव रुदते द्रवते नमः ।वल्गते क्रीडते चैव लम्बोदरशरीरिणे ॥ ६७॥

dhyāyate jṛmbhate caiva rudate dravate namaḥ |valgate krīḍate caiva lambodaraśarīriṇe || 67||

नमोऽकृत्याय कृत्याय मुण्डाय कीकटाय च ।नम उन्मत्तदेहाय किङ्किणीकाय वै नमः ॥ ६८॥

namo'kṛtyāya kṛtyāya muṇḍāya kīkaṭāya ca |nama unmattadehāya kiṅkiṇīkāya vai namaḥ || 68||

नमो विकृतवेषाय क्रूरायामर्षणाय च ।अप्रमेयाय गोप्त्रे च दीप्तायानिर्गुणाय च ॥ ६९॥

namo vikṛtaveṣāya krūrāyāmarṣaṇāya ca |aprameyāya goptre ca dīptāyānirguṇāya ca || 69||

वामप्रियाय वामाय चूडामणिधराय च ।नमस्तोकाय तनवे गुणैरप्रमिताय च ॥ ७०॥

vāmapriyāya vāmāya cūḍāmaṇidharāya ca |namastokāya tanave guṇairapramitāya ca || 70||

नमो गुण्याय गुह्याय अगम्यगमनाय च ।लोकधात्री त्वियं भूमिः पादौ सज्जनसेवितौ ॥ ७१॥

namo guṇyāya guhyāya agamyagamanāya ca |lokadhātrī tviyaṃ bhūmiḥ pādau sajjanasevitau || 71||

सर्वेषां सिद्धियोगानामधिष्ठानं तवोदरम् ।मध्येऽन्तरिक्षं विस्तीर्णं तारागणविभूषितम् ॥ ७२॥

sarveṣāṃ siddhiyogānāmadhiṣṭhānaṃ tavodaram |madhye'ntarikṣaṃ vistīrṇaṃ tārāgaṇavibhūṣitam || 72||

स्वातेः पथ इवाभाति श्रीमान् हारस्तवोरसि ।दिशो दशभुजास्तुभ्यं केयूराङ्गदभूषिताः ॥ ७३॥

svāteḥ patha ivābhāti śrīmān hārastavorasi |diśo daśabhujāstubhyaṃ keyūrāṅgadabhūṣitāḥ || 73||

विस्तीर्णपरिणाहश्च नीलाञ्जनचयोपमः ।कण्ठस्ते शोभते श्रीमान् हेमसूत्रविभूषितः ॥ ७४॥

vistīrṇapariṇāhaśca nīlāñjanacayopamaḥ |kaṇṭhaste śobhate śrīmān hemasūtravibhūṣitaḥ || 74||

दंष्ट्राकरालं दुर्धर्षमनौपम्यं मुखं तथा ।पद्ममालाकृतोष्णीषं शिरो द्यौः शोभतेऽधिकम् ॥ ७५॥

daṃṣṭrākarālaṃ durdharṣamanaupamyaṃ mukhaṃ tathā |padmamālākṛtoṣṇīṣaṃ śiro dyauḥ śobhate'dhikam || 75||

दीप्तिः सूर्ये वपुश्चन्द्रे स्थैर्यं शैलेऽनिले बलम् ।औष्ण्यमग्नौ तथा शैत्यमप्सु शब्दोऽम्बरे तथा ॥ ७६॥

dīptiḥ sūrye vapuścandre sthairyaṃ śaile'nile balam |auṣṇyamagnau tathā śaityamapsu śabdo'mbare tathā || 76||

अक्षरान्तरनिष्पन्दाद्गुणानेतान्विदुर्बुधाः ।जपो जप्यो महादेवो महायोगो महेश्वरः ॥ ७७॥

akṣarāntaraniṣpandādguṇānetānvidurbudhāḥ |japo japyo mahādevo mahāyogo maheśvaraḥ || 77||

पुरेशयो गुहावासी खेचरो रजनीचरः ।तपोनिधिर्गुहगुरुर्नन्दनो नन्दवर्धनः ॥ ७८॥

pureśayo guhāvāsī khecaro rajanīcaraḥ |taponidhirguhagururnandano nandavardhanaḥ || 78||

हयशीर्षा पयोधाता विधाता भूतभावनः ।बोद्धव्यो बोधिता नेता दुर्धर्षो दुष्प्रकम्पनः ॥ ७९॥

hayaśīrṣā payodhātā vidhātā bhūtabhāvanaḥ |boddhavyo bodhitā netā durdharṣo duṣprakampanaḥ || 79||

बृहद्रथो भीमकर्मा बृहत्कीर्तिर्धनञ्जयः ।घण्टाप्रियो ध्वजी छत्री पिनाकी ध्वजिनीपतिः ॥ ८०॥

bṛhadratho bhīmakarmā bṛhatkīrtirdhanañjayaḥ |ghaṇṭāpriyo dhvajī chatrī pinākī dhvajinīpatiḥ || 80||

कवची पाट्टिशी खड्गी धनुर्हस्तः परमश्वधी ।अघस्मरोऽनघः शूरो देवराजोऽरिमर्दनः ॥ ८१॥

kavacī pāṭṭiśī khaḍgī dhanurhastaḥ paramaśvadhī |aghasmaro'naghaḥ śūro devarājo'rimardanaḥ || 81||

त्वां प्रसाद्य पुरास्माभिर्द्विषन्तो निहता युधि ।अग्निः सदार्णवानम्भस्त्वं पिबन्नपि न तृप्यसे ॥ ८२॥

tvāṃ prasādya purāsmābhirdviṣanto nihatā yudhi |agniḥ sadārṇavānambhastvaṃ pibannapi na tṛpyase || 82||

क्रोधाकारः प्रसन्नात्मा कामदः कामगः प्रियः ।ब्रह्मचारी चागाधश्च ब्रह्मण्यः शिष्टपूजितः ॥ ८३॥

krodhākāraḥ prasannātmā kāmadaḥ kāmagaḥ priyaḥ |brahmacārī cāgādhaśca brahmaṇyaḥ śiṣṭapūjitaḥ || 83||

देवानामक्षयः कोशस्त्वया यज्ञः प्रकल्पितः ।हव्यं तवेदं वहति वेदोक्तं हव्यवाहनः ।प्रीते त्वयि महादेव वयं प्रीता भवामहे ॥ ८४॥

devānāmakṣayaḥ kośastvayā yajñaḥ prakalpitaḥ |havyaṃ tavedaṃ vahati vedoktaṃ havyavāhanaḥ |prīte tvayi mahādeva vayaṃ prītā bhavāmahe || 84||

भवानीशोऽनादिमांस्त्वं च सर्वलोकानां त्वं ब्रह्मकर्तादिसर्गः ।साङ्ख्याः प्रकृतेः परमं त्वां विदित्वा क्षीणध्यानास्त्वाममृत्युं विशन्ति ॥ ८५॥

bhavānīśo'nādimāṃstvaṃ ca sarvalokānāṃ tvaṃ brahmakartādisargaḥ |sāṅkhyāḥ prakṛteḥ paramaṃ tvāṃ viditvā kṣīṇadhyānāstvāmamṛtyuṃ viśanti || 85||

योगाश्च त्वां ध्यायिनो नित्यसिद्धं ज्ञात्वा योगान् सन्त्यजन्ते पुनस्तान् ।ये चाप्यन्ये त्वां प्रसन्ना विशुद्धाः स्वकर्मभिस्ते दिव्यभोगा भवन्ति ॥ ८६॥

yogāśca tvāṃ dhyāyino nityasiddhaṃ jñātvā yogān santyajante punastān |ye cāpyanye tvāṃ prasannā viśuddhāḥ svakarmabhiste divyabhogā bhavanti || 86||

अप्रसङ्ख्येयतत्त्वस्य यथा विद्मः स्वशक्तितः ।कीर्तितं तव माहात्म्यमपारस्य महात्मनः ॥ ८७॥

aprasaṅkhyeyatattvasya yathā vidmaḥ svaśaktitaḥ |kīrtitaṃ tava māhātmyamapārasya mahātmanaḥ || 87||

शिवो नो भव सर्वत्र योऽसि सोऽसि नमोऽस्तु ते ।सूत उवाछ ।य इदं कीर्तयेद्भक्त्या ब्रह्मनारायणस्तवम् ॥ ८८॥

śivo no bhava sarvatra yo'si so'si namo'stu te |sūta uvācha |ya idaṃ kīrtayedbhaktyā brahmanārāyaṇastavam || 88||

श्रावयेद्वा द्विजान् विध्वान् शृणुयाद्वा समाहितः ।अध्वमेधायुतं कृत्वा यत्फलं तदवाप्नुयात् ॥ ८९॥

śrāvayedvā dvijān vidhvān śṛṇuyādvā samāhitaḥ |adhvamedhāyutaṃ kṛtvā yatphalaṃ tadavāpnuyāt || 89||

पापाचारोऽपि यो मर्त्यः शृणुयाच्छिवसन्निधौ ।जपेद्वापि विनिर्मुक्तो ब्रह्मलोकं स गच्छति ॥ ९०॥

pāpācāro'pi yo martyaḥ śṛṇuyācchivasannidhau |japedvāpi vinirmukto brahmalokaṃ sa gacchati || 90||

श्राद्धे वा दैविके कार्ये यज्ञे वावभृथान्तिके ।कीर्तयेद्वा सतां मध्ये स याति ब्रह्मणोऽन्तिकम् ॥ ९१॥

śrāddhe vā daivike kārye yajñe vāvabhṛthāntike |kīrtayedvā satāṃ madhye sa yāti brahmaṇo'ntikam || 91||

इति श्रीलिङ्गमहापुराणे पूर्वभागे ब्रह्मविष्णुस्तुतिर्नामैकविंशोऽध्यायान्तर्गताश्रीविष्णुकृता महेश्वरस्तुतिः सम्पूर्णा ।॥ लिङ्गपुराणं ॥ पूर्वभागः । अध्यायः २१। २९१॥

iti śrīliṅgamahāpurāṇe pūrvabhāge brahmaviṣṇustutirnāmaikaviṃśo'dhyāyāntargatāśrīviṣṇukṛtā maheśvarastutiḥ sampūrṇā ||| liṅgapurāṇaṃ || pūrvabhāgaḥ | adhyāyaḥ 21| 291||