महादेवतपश्चर्यावर्णनम् Mahadevatapashcharyavarnanam

(शिवरहस्यान्तर्गते ईशाख्ये)स्कन्द उवाच ।तदा ब्रह्मा हरिश्चैव सदक्षो वासवः सुराः ।नत्वा स्तुत्वा महादेवं ययुर्लोकान् सुरास्तदा ॥ १॥

(śivarahasyāntargate īśākhye)skanda uvāca |tadā brahmā hariścaiva sadakṣo vāsavaḥ surāḥ |natvā stutvā mahādevaṃ yayurlokān surāstadā || 1||

महादेवोऽपि विश्वात्मा ब्रह्मणा परिसन्त्वितः ।जगाम गणवृन्दैश्च नन्दिना विश्वनन्दिना ॥ २॥

mahādevo'pi viśvātmā brahmaṇā parisantvitaḥ |jagāma gaṇavṛndaiśca nandinā viśvanandinā || 2||

गणानां गर्जनैश्चैव भेरीपटहगोमुखैः ।काहलैः शङ्खगोशृङ्गैर्नदद्भिः गणवक्त्रतः ॥ ३॥

gaṇānāṃ garjanaiścaiva bherīpaṭahagomukhaiḥ |kāhalaiḥ śaṅkhagośṛṅgairnadadbhiḥ gaṇavaktrataḥ || 3||

नानाछत्र धरैरन्यैश्चामरासक्तपाणिभिः ।गणेन्द्रैः केतुहस्तैश्च चन्द्रस्फाटिकनिर्मलैः ॥ ४॥

nānāchatra dharairanyaiścāmarāsaktapāṇibhiḥ |gaṇendraiḥ ketuhastaiśca candrasphāṭikanirmalaiḥ || 4||

भस्मभूषितसर्वाङ्गैर्गणेन्द्रैर्वरुणोपमैः ।वृषारूढो महादेवः कोटित्रयगणावृतः ॥ ५॥

bhasmabhūṣitasarvāṅgairgaṇendrairvaruṇopamaiḥ |vṛṣārūḍho mahādevaḥ koṭitrayagaṇāvṛtaḥ || 5||

सत्या वियोगदुःखेन तपस्तप्तुं मनो दधे ।जगाम मन्दिरे तत्र नानाद्रुम विराजिते ॥ ६॥

satyā viyogaduḥkhena tapastaptuṃ mano dadhe |jagāma mandire tatra nānādruma virājite || 6||

चम्पकाशोकपुन्नागबकुलैः समलङ्कृते ।सालतालतमालढ्ये अङ्कोलकदलीयुते ॥ ७॥

campakāśokapunnāgabakulaiḥ samalaṅkṛte |sālatālatamālaḍhye aṅkolakadalīyute || 7||

कपित्थपूगहिन्तालरसालपनसावृते ।पारिजातकसम्पूर्णे नानापक्षिविराजिते ॥ ८॥

kapitthapūgahintālarasālapanasāvṛte |pārijātakasampūrṇe nānāpakṣivirājite || 8||

पुष्पगुच्छैकसुभगमिलद्भृङ्गकुलाकुले ।परभृत्सुन्दरगिरा पल्लवोल्लासिमारुते ॥ ९॥

puṣpagucchaikasubhagamiladbhṛṅgakulākule |parabhṛtsundaragirā pallavollāsimārute || 9||

नृत्यन्मयूरकेकाभिर्नदन्नत्यूहशोभिते ।हंसक्रेङ्कारसरसीसारसैः समलङ्कृते ॥ १०॥

nṛtyanmayūrakekābhirnadannatyūhaśobhite |haṃsakreṅkārasarasīsārasaiḥ samalaṅkṛte || 10||

फुल्लहल्लकपद्मालिनीलोत्पल सुकौमुदैः ।कदम्बमञ्जरीलोलस्रवत्पुष्परजोवृते ॥ ११॥

phullahallakapadmālinīlotpala sukaumudaiḥ |kadambamañjarīlolasravatpuṣparajovṛte || 11||

गलन्मधुस्रवालोलशाखान्दोलितमारुते ।भ्रमत्सारङ्गमातङ्ग सङ्घर्षितमहाद्रुमे ॥ १२॥

galanmadhusravālolaśākhāndolitamārute |bhramatsāraṅgamātaṅga saṅgharṣitamahādrume || 12||

उत्पुच्छचमरीसङ्घे सरघोड्डीनसङ्कुले ।कस्तूरिकामृगभ्राम्यद्गन्धवाहैकसुन्दरे ॥ १३॥

utpucchacamarīsaṅghe saraghoḍḍīnasaṅkule |kastūrikāmṛgabhrāmyadgandhavāhaikasundare || 13||

कपोतगलहुङ्कारै गोलाङ्गुलोत्थहुङ्कृते ।वानरोदरसम्बद्धस्तन्धयकुतूहले ॥ १४॥

kapotagalahuṅkārai golāṅgulotthahuṅkṛte |vānarodarasambaddhastandhayakutūhale || 14||

शाखालीढेषु संलीन शशिवक्त्रकणादरे ।सपक्षपक्षिविक्षेपैः पक्षिपोतैश्च भासुरे ॥ १५॥

śākhālīḍheṣu saṃlīna śaśivaktrakaṇādare |sapakṣapakṣivikṣepaiḥ pakṣipotaiśca bhāsure || 15||

खरोरुनखरोत्कीर्णलिक्षावीक्षणवानरे ।नैकधातुशतैश्चित्रे विचित्रकुसुमोज्ज्वले ॥ १६॥

kharorunakharotkīrṇalikṣāvīkṣaṇavānare |naikadhātuśataiścitre vicitrakusumojjvale || 16||

शाखाशतसहस्राढ्ये दवधूमसमाकुले ।कदम्बकदलीपुष्पवनान्दोलनसुन्दरे ॥ १७॥

śākhāśatasahasrāḍhye davadhūmasamākule |kadambakadalīpuṣpavanāndolanasundare || 17||

गिरिमस्तकसंस्राविनिर्झरप्रविराजिते ।पल्वलोदतटान्तस्थगुल्मवल्लीगृहैर्युते ॥ १८॥

girimastakasaṃsrāvinirjharapravirājite |palvalodataṭāntasthagulmavallīgṛhairyute || 18||

फुल्लवल्लीमहावल्लीगुच्छहल्लीस(ष)शोभिते ।वेणुसङ्घर्षणोत्पन्नहव्यवाहशिखावृते ॥ १९॥

phullavallīmahāvallīgucchahallīsa(ṣa)śobhite |veṇusaṅgharṣaṇotpannahavyavāhaśikhāvṛte || 19||

वेणुक्रीङ्कारबहुले झिल्लीगणविनादिते ।हल्लीस(ष)लास्यं कुर्वद्भिर्द्रुमहस्तैः परस्परम् ॥ २०॥

veṇukrīṅkārabahule jhillīgaṇavinādite |hallīsa(ṣa)lāsyaṃ kurvadbhirdrumahastaiḥ parasparam || 20||

मातङ्गबृंहितरवैः कोलघर्घरनिःस्वनैः ।घर्घरैस्तालपत्राणां नारिकेलैश्च शोभिते ॥ २१॥

mātaṅgabṛṃhitaravaiḥ kolaghargharaniḥsvanaiḥ |ghargharaistālapatrāṇāṃ nārikelaiśca śobhite || 21||

तद्भूतपत्रसल्लून पक्वनारेलतालकैः ।समावृता सा भूर्भाति मातङ्गमदपङ्किला ॥ २२॥

tadbhūtapatrasallūna pakvanārelatālakaiḥ |samāvṛtā sā bhūrbhāti mātaṅgamadapaṅkilā || 22||

विमलस्वादुपानीयैर्नैकप्रस्रवणैर्युते ।निरूढशष्पसम्पूर्मभूभागसमलङ्कृते ॥ २३॥

vimalasvādupānīyairnaikaprasravaṇairyute |nirūḍhaśaṣpasampūrmabhūbhāgasamalaṅkṛte || 23||

वनगोरससन्तप्तशिलातल विराजिते ।स्निग्धवर्णमहामूलसटावटविराजिते ॥ २४॥

vanagorasasantaptaśilātala virājite |snigdhavarṇamahāmūlasaṭāvaṭavirājite || 24||

मन्दं च तत्र गणपैर्महादेवो वृषास्थितः ।महादेवस्य देवस्य शङ्करस्यामितात्मनः ॥ २५॥

mandaṃ ca tatra gaṇapairmahādevo vṛṣāsthitaḥ |mahādevasya devasya śaṅkarasyāmitātmanaḥ || 25||

दीप्तमाद्यतनं तत्र हैमं मणिविभूषितम् ।हेमप्राकार संयुक्तं मणितोरणमण्डितम् ॥ २६॥

dīptamādyatanaṃ tatra haimaṃ maṇivibhūṣitam |hemaprākāra saṃyuktaṃ maṇitoraṇamaṇḍitam || 26||

स्फाटिकैः सुविचित्रैश्च गोपुरैश्च समन्वितम् ।सिह्मासनैर्मणिमयैः शुभास्तरमसंयुतैः ॥ २७॥

sphāṭikaiḥ suvicitraiśca gopuraiśca samanvitam |sihmāsanairmaṇimayaiḥ śubhāstaramasaṃyutaiḥ || 27||

रम्यादर्शगृहैश्चित्रैश्चित्ररङ्गविचित्रितैःवृक्षपाषाणफलकैश्चित्रितैः सौधभूषितैः ॥ २८॥

ramyādarśagṛhaiścitraiścitraraṅgavicitritaiḥvṛkṣapāṣāṇaphalakaiścitritaiḥ saudhabhūṣitaiḥ || 28||

वितानतानितैश्चित्रैर्दिव्यास्तरणिकावृते ।पद्मरागैः पुष्परागैर्नीलवैडूर्यनिर्मितैः ॥ २९॥

vitānatānitaiścitrairdivyāstaraṇikāvṛte |padmarāgaiḥ puṣparāgairnīlavaiḍūryanirmitaiḥ || 29||

गोमेदवज्रमुक्ताच्छविद्रुमैश्च विराजितैः ।मण्डितैः पुष्पमालाढ्यैर्धूपदीपसमावृतैः ॥ ३०॥

gomedavajramuktācchavidrumaiśca virājitaiḥ |maṇḍitaiḥ puṣpamālāḍhyairdhūpadīpasamāvṛtaiḥ || 30||

प्रमथैरावृते तत्र वेणु वीणाब्जनादिते ।झल्लरीशङ्खपटहभेरीगोमुखडिड्डिमैः ॥ ३१॥

pramathairāvṛte tatra veṇu vīṇābjanādite |jhallarīśaṅkhapaṭahabherīgomukhaḍiḍḍimaiḥ || 31||

सिद्धदेवर्षिगन्धर्वैर्ब्रह्मेन्द्राद्यमरैर्वृतैः ।किम्पुरुषैस्तथा नागैरप्सरोगणसेवितैः ॥ ३२॥

siddhadevarṣigandharvairbrahmendrādyamarairvṛtaiḥ |kimpuruṣaistathā nāgairapsarogaṇasevitaiḥ || 32||

गायद्गन्धर्वनिकरैर्वीणातन्त्रीविराजितैः(विनादितैः) ।मन्दारैश्चारुशिखरैरुपेतं शङ्करस्तदा ॥ ३३॥

gāyadgandharvanikarairvīṇātantrīvirājitaiḥ(vināditaiḥ) |mandāraiścāruśikharairupetaṃ śaṅkarastadā || 33||

दृष्ट्वा न हर्षमापाथ महादेवो महेश्वरः ।तदा रुद्रगणैः सार्धं निशश्वास मुहुर्मुहुः ॥ ३४॥

dṛṣṭvā na harṣamāpātha mahādevo maheśvaraḥ |tadā rudragaṇaiḥ sārdhaṃ niśaśvāsa muhurmuhuḥ || 34||

रुद्धाहिराडिवास्वस्थः स्थाणुः स्थाणुरिव स्थितः ।तदा सतीवियोगार्तो बभूवातीव विह्वलः ॥ ३५॥

ruddhāhirāḍivāsvasthaḥ sthāṇuḥ sthāṇuriva sthitaḥ |tadā satīviyogārto babhūvātīva vihvalaḥ || 35||

दृष्ट्वा चन्द्रमसं रात्रौ फुल्लमल्लीगणानिलम् ।जिघ्रत्स्वाङ्गमहासर्पपारणां व्यदधाद्धरः ॥ ३६॥

dṛṣṭvā candramasaṃ rātrau phullamallīgaṇānilam |jighratsvāṅgamahāsarpapāraṇāṃ vyadadhāddharaḥ || 36||

विनिश्वसन् तदा देवस्तपस्येव मनो दधे ।विधाय स्वात्मनात्मानं भस्मरूषितविग्रहः ॥ ३७॥

viniśvasan tadā devastapasyeva mano dadhe |vidhāya svātmanātmānaṃ bhasmarūṣitavigrahaḥ || 37||

त्रिपुण्ड्रविलसद्भालो रुद्राक्षाङ्गदकङ्कणः ।जटिलालकसन्मौलिपिशङ्गितगिरिप्रभः ॥ ३८॥

tripuṇḍravilasadbhālo rudrākṣāṅgadakaṅkaṇaḥ |jaṭilālakasanmaulipiśaṅgitagiriprabhaḥ || 38||

प्रभाविभासिसोमार्कः सुन्दरामलविग्रहः ।सोम धामवृतोत्तंसो महादेवो महेश्वरः ॥ ३९॥

prabhāvibhāsisomārkaḥ sundarāmalavigrahaḥ |soma dhāmavṛtottaṃso mahādevo maheśvaraḥ || 39||

उत्फुल्लपुण्डरीकाभमुखमण्डलभासुरः ।भालानलानिलालोल नेत्राञ्जलसुपक्षकः ॥ ४०॥

utphullapuṇḍarīkābhamukhamaṇḍalabhāsuraḥ |bhālānalānilālola netrāñjalasupakṣakaḥ || 40||

उद्यद्भानुप्रभा भासिवामलोचनसुन्दरः ।पूर्वपुण्यसुधाधाममण्डलोत्तुङ्गदक्षधृक् ॥ ४१॥

udyadbhānuprabhā bhāsivāmalocanasundaraḥ |pūrvapuṇyasudhādhāmamaṇḍalottuṅgadakṣadhṛk || 41||

चाम्पेयकलिकोद्दामनासापुटविराजितः ।बिम्बप्रभावधिक्कारिरदच्छदविशोभितः ॥ ४२॥

cāmpeyakalikoddāmanāsāpuṭavirājitaḥ |bimbaprabhāvadhikkāriradacchadaviśobhitaḥ || 42||

स्वच्छादर्शकपोलोद्यत्प्रभाभासितदिक्ततिः ।नागकुण्डल बिभ्राजत्कर्णावर्तविशोभितः ॥ ४३॥

svacchādarśakapolodyatprabhābhāsitadiktatiḥ |nāgakuṇḍala bibhrājatkarṇāvartaviśobhitaḥ || 43||

शम्बाभकण्ठगरल कीलाललितकन्धरः ।करिशुण्डाभवृत्तोरुबाहुदण्डविराजितः ॥ ४४॥

śambābhakaṇṭhagarala kīlālalitakandharaḥ |kariśuṇḍābhavṛttorubāhudaṇḍavirājitaḥ || 44||

चतुर्दशोरुभवनस्थानायितमहोदरः ।वृत्तगम्भीरसुभगनाभीकूपविराजितः ॥ ४५॥

caturdaśorubhavanasthānāyitamahodaraḥ |vṛttagambhīrasubhaganābhīkūpavirājitaḥ || 45||

त्रिवलीललितोदारमृगेन्द्रसमसत्कटिः ।व्याघ्रचर्मपरीधानः कृत्तिवासा महेश्वरः ॥ ४६॥

trivalīlalitodāramṛgendrasamasatkaṭiḥ |vyāghracarmaparīdhānaḥ kṛttivāsā maheśvaraḥ || 46||

रम्भावृत्तोरुस्निग्धोरु रुक्मदण्डपदद्वयः ।पादपद्मयुगालीढव्यालीमञ्जीरफूत्कृतिः ॥ ४७॥

rambhāvṛttorusnigdhoru rukmadaṇḍapadadvayaḥ |pādapadmayugālīḍhavyālīmañjīraphūtkṛtiḥ || 47||

नागहारो महादेवस्त्यक्त्वा चायुधमुत्तमम् ।मृगटङ्कौ परित्यज्य वटोरुविटपास्तृते ॥ ४८॥

nāgahāro mahādevastyaktvā cāyudhamuttamam |mṛgaṭaṅkau parityajya vaṭoruviṭapāstṛte || 48||

भूतलेऽजिन संस्तीर्णे व्याघ्राजिन विराजिते ।योगपट्टाभिरामेण पादावाबध्य चान्यतः ॥ ४९॥

bhūtale'jina saṃstīrṇe vyāghrājina virājite |yogapaṭṭābhirāmeṇa pādāvābadhya cānyataḥ || 49||

भस्माङ्गरागसुभगदेहकान्तिविराजितः ।नासाग्रन्यस्तनयनो भगनेत्रनिपातनः ॥ ५०॥

bhasmāṅgarāgasubhagadehakāntivirājitaḥ |nāsāgranyastanayano bhaganetranipātanaḥ || 50||

उग्रोऽप्यंव्यग्रमनसा इन्द्रियाण्यथ संहरन् ।विश्वतः परमेशानः रुद्रो विश्वाधिकः प्रभुः ॥ ५१॥

ugro'pyaṃvyagramanasā indriyāṇyatha saṃharan |viśvataḥ parameśānaḥ rudro viśvādhikaḥ prabhuḥ || 51||

आत्मानमात्मना ध्यायन् बाह्यव्यापारवर्जितःतमसः परमं साक्षात् ब्रह्म तन्निर्गुणं परम् ।चतुर्थं शिवमद्वैतं पूर्णात्पूर्णतरं शिवंविश्वतश्चक्षुषं देवं विश्वतोमुखमीश्वरम् ॥ ५२॥

ātmānamātmanā dhyāyan bāhyavyāpāravarjitaḥtamasaḥ paramaṃ sākṣāt brahma tannirguṇaṃ param |caturthaṃ śivamadvaitaṃ pūrṇātpūrṇataraṃ śivaṃviśvataścakṣuṣaṃ devaṃ viśvatomukhamīśvaram || 52||

सर्वेन्द्रियगुणातीतं सर्वेन्द्रियविवर्जितम् ।आकाशकोशं विश्वेशं चेतनानां च चेतनम् ॥ ५३॥

sarvendriyaguṇātītaṃ sarvendriyavivarjitam |ākāśakośaṃ viśveśaṃ cetanānāṃ ca cetanam || 53||

निरञ्जनं शिवं नित्यं व्याप्यव्यापकवर्जितम् ।भूतं भव्यं भविष्यच्च यद्भाव्यमभयं परम् ॥ ५४॥

nirañjanaṃ śivaṃ nityaṃ vyāpyavyāpakavarjitam |bhūtaṃ bhavyaṃ bhaviṣyacca yadbhāvyamabhayaṃ param || 54||

परात्परं साक्षिणं च विश्वस्मादुत्तरोत्तरम् ।अमृतं परमं धाम सीमा पुच्छप्रतिष्ठितम् ॥ ५५॥

parātparaṃ sākṣiṇaṃ ca viśvasmāduttarottaram |amṛtaṃ paramaṃ dhāma sīmā pucchapratiṣṭhitam || 55||

ऋतं सत्यं परं धाम वृद्धं ब्रह्म सनातनम् ।अणोरणुं महान्तं तमीशानं विश्वतोमुखम् ॥ ५६॥

ṛtaṃ satyaṃ paraṃ dhāma vṛddhaṃ brahma sanātanam |aṇoraṇuṃ mahāntaṃ tamīśānaṃ viśvatomukham || 56||

पुरीशयं गुहासंस्थं अवस्थातीतमीश्वरम् ।शाश्वतं ध्रुवमक्षय्यं क्षराक्षरविलक्षणम् ॥ ५७॥

purīśayaṃ guhāsaṃsthaṃ avasthātītamīśvaram |śāśvataṃ dhruvamakṣayyaṃ kṣarākṣaravilakṣaṇam || 57||

अपाणिपादजघनमचक्षुर्घ्राणमीश्वरम् ।अनक्षिघ्राणरसनं सर्वेन्द्रियगुणातिगम् ॥ ५८॥

apāṇipādajaghanamacakṣurghrāṇamīśvaram |anakṣighrāṇarasanaṃ sarvendriyaguṇātigam || 58||

शाश्वतं शान्तगम्भीरवेद्यं वेद्यविवर्जितम् ।रसं परं हरं तारं प्रणवं नादबोधितम् ॥ ५९॥

śāśvataṃ śāntagambhīravedyaṃ vedyavivarjitam |rasaṃ paraṃ haraṃ tāraṃ praṇavaṃ nādabodhitam || 59||

योगसाङ्ख्यदुरापं तं सर्वात्मानं गुणातिगम् ।वेदवेदान्तसंवेद्यं विश्वात्मानं सनातनम् ॥ ६०॥

yogasāṅkhyadurāpaṃ taṃ sarvātmānaṃ guṇātigam |vedavedāntasaṃvedyaṃ viśvātmānaṃ sanātanam || 60||

भावाभावैकरहितं हृदयं शरणं शिवम् ।प्रत्यग्दृश्यमनौपम्यं सर्वदृक्सर्वहृद्गतम् ॥ ६१॥

bhāvābhāvaikarahitaṃ hṛdayaṃ śaraṇaṃ śivam |pratyagdṛśyamanaupamyaṃ sarvadṛksarvahṛdgatam || 61||

वेदवेद्यं नतद्वेद्यमभेद्यं द्वैतवर्जितम् ।आनन्दं व्यापकं बोधं सर्वचैतन्यबोधदम् ॥ ६२॥

vedavedyaṃ natadvedyamabhedyaṃ dvaitavarjitam |ānandaṃ vyāpakaṃ bodhaṃ sarvacaitanyabodhadam || 62||

बहुरूपमरूपं च चिद्घनं भानभानकम् ।शिवं तुरीयमद्वैतं सर्वान्तर्यामिनं हरम् ॥ ६३॥

bahurūpamarūpaṃ ca cidghanaṃ bhānabhānakam |śivaṃ turīyamadvaitaṃ sarvāntaryāminaṃ haram || 63||

विश्वात्मानं विश्वरूपं वृत्तिवाग्रूपवर्जितम् ।सूक्ष्मं सूक्ष्मप्रतीकाशं वाच्यवाचकवर्जितम् ॥ ६४॥

viśvātmānaṃ viśvarūpaṃ vṛttivāgrūpavarjitam |sūkṣmaṃ sūkṣmapratīkāśaṃ vācyavācakavarjitam || 64||

न दिव्यं नान्तरिक्षं च वेदाश्रमविवर्जितम् ।आनन्दरूपममृतं सदैकरसमद्वयम् ॥ ६५॥

na divyaṃ nāntarikṣaṃ ca vedāśramavivarjitam |ānandarūpamamṛtaṃ sadaikarasamadvayam || 65||

अखण्डैकरसं देवः स्वात्मानं स्वात्मनि स्थितम् ।निश्चलस्थाणुवत्स्थाणुरतिष्ठद्गणसेवितः ॥ ६६॥

akhaṇḍaikarasaṃ devaḥ svātmānaṃ svātmani sthitam |niścalasthāṇuvatsthāṇuratiṣṭhadgaṇasevitaḥ || 66||

दशसाहस्रमब्दानां एवं तेपे तपो हरः ॥ ६७॥

daśasāhasramabdānāṃ evaṃ tepe tapo haraḥ || 67||

कुमार उवाच ।स्वात्मानमानन्दमखण्डबोधंवेदान्तसारं परमेश्वरं तदा ।स्वात्मानमालोक्य सनातनं शिवंन वेद किञ्चान्यदपीश्वरस्तदा ॥ ६८॥

kumāra uvāca |svātmānamānandamakhaṇḍabodhaṃvedāntasāraṃ parameśvaraṃ tadā |svātmānamālokya sanātanaṃ śivaṃna veda kiñcānyadapīśvarastadā || 68||

॥ इति शिवरहस्यान्तर्गते सुब्रह्मण्यप्रोक्तं महादेवतपश्चर्यावर्णनं सम्पूर्णम् ॥॥ श्रीशिवरहस्यम् । ईशाख्यः द्वादशमांशः । अध्यायः ८ महादेवतपश्चर्या । १६८ ॥

|| iti śivarahasyāntargate subrahmaṇyaproktaṃ mahādevatapaścaryāvarṇanaṃ sampūrṇam |||| śrīśivarahasyam | īśākhyaḥ dvādaśamāṃśaḥ | adhyāyaḥ 8 mahādevatapaścaryā | 168 ||

– ॥ श्रीशिवरहस्यम् ।ईशाख्यः द्वादशमांशः ।अध्यायः ८ महादेवतपश्चर्या ।१-६८ ॥

– || śrīśivarahasyam |īśākhyaḥ dvādaśamāṃśaḥ |adhyāyaḥ 8 mahādevatapaścaryā | 1-68 ||