महादेवाष्टकम् १ Mahadevashtakam

श्रीगणेशाय नमः ॥शिवं शान्तं शुद्धं प्रकटमकलङ्कं श्रुतिनुतंमहेशानं शम्भुं सकलसुरसंसेव्यचरणम् ।गिरीशं गौरीशं भवभयहरं निष्कलमजंमहादेवं वन्दे प्रणतजनतापोपशमनम् ॥ १॥

śrīgaṇeśāya namaḥ ||śivaṃ śāntaṃ śuddhaṃ prakaṭamakalaṅkaṃ śrutinutaṃmaheśānaṃ śambhuṃ sakalasurasaṃsevyacaraṇam |girīśaṃ gaurīśaṃ bhavabhayaharaṃ niṣkalamajaṃmahādevaṃ vande praṇatajanatāpopaśamanam || 1||

सदा सेव्यं भक्तैर्हृदि वसन्तं गिरिशयमुमाकान्तं क्षान्तं करधृतपिनाकं भ्रमहरम् ।त्रिनेत्रं पञ्चास्यं दशभुजमनन्तं शशिधरंमहादेवं वन्दे प्रणतजनतापोपशमनम् ॥ २॥

sadā sevyaṃ bhaktairhṛdi vasantaṃ giriśayamumākāntaṃ kṣāntaṃ karadhṛtapinākaṃ bhramaharam |trinetraṃ pañcāsyaṃ daśabhujamanantaṃ śaśidharaṃmahādevaṃ vande praṇatajanatāpopaśamanam || 2||

चिताभस्मालिप्तं भुजगमुकुटं विश्वसुखदंधनाध्यक्षस्याङ्गं त्रिपुरवधकर्तारमनघम् ।करोटीखट्वाङ्गे ह्यरसि च दधानं मृतिहरंमहादेवं वन्दे प्रणतजनतापोपशमनम् ॥ ३॥

citābhasmāliptaṃ bhujagamukuṭaṃ viśvasukhadaṃdhanādhyakṣasyāṅgaṃ tripuravadhakartāramanagham |karoṭīkhaṭvāṅge hyarasi ca dadhānaṃ mṛtiharaṃmahādevaṃ vande praṇatajanatāpopaśamanam || 3||

सदोत्साहं गङ्गाधरमचलमानन्दकरणंपुरारातिं भातं रतिपतिहरं दीप्तवदनम् ।जटाजूटैर्जुष्टं रसमुखगणेशानपितरंमहादेवं वन्दे प्रणतजनतापोपशमनम् ॥ ४॥

sadotsāhaṃ gaṅgādharamacalamānandakaraṇaṃpurārātiṃ bhātaṃ ratipatiharaṃ dīptavadanam |jaṭājūṭairjuṣṭaṃ rasamukhagaṇeśānapitaraṃmahādevaṃ vande praṇatajanatāpopaśamanam || 4||

वसन्तं कैलासे सुरमुनिसभायां हि नितरांब्रुवाणं सद्धर्मं निखिलमनुजानन्दजनकम् ।महेशानी साक्षात्सनकमुनिदेवर्षिसहितामहादेवं वन्दे प्रणतजनतापोपशमनम् ॥ ५॥

vasantaṃ kailāse suramunisabhāyāṃ hi nitarāṃbruvāṇaṃ saddharmaṃ nikhilamanujānandajanakam |maheśānī sākṣātsanakamunidevarṣisahitāmahādevaṃ vande praṇatajanatāpopaśamanam || 5||

शिवां स्वे वामाङ्गे गुहगणपतिं दक्षिणभुजेगले कालं व्यालं जलधिगरलं कण्ठविवरे ।ललाटे श्वेतेन्दुं जगदपि दधानं च जठरेमहादेवं वन्दे प्रणतजनतापोपशमनम् ॥ ६॥

śivāṃ sve vāmāṅge guhagaṇapatiṃ dakṣiṇabhujegale kālaṃ vyālaṃ jaladhigaralaṃ kaṇṭhavivare |lalāṭe śvetenduṃ jagadapi dadhānaṃ ca jaṭharemahādevaṃ vande praṇatajanatāpopaśamanam || 6||

सुराणां दैत्यानां बहुलमनुजानां बहुविधंतपःकुर्वाणानां झटिति फलदातारमखिलम् ।सुरेशं विद्येशं जलनिधिसुताकान्तहृदयंमहादेवं वन्दे प्रणतजनतापोपशमनम् ॥ ७॥

surāṇāṃ daityānāṃ bahulamanujānāṃ bahuvidhaṃtapaḥkurvāṇānāṃ jhaṭiti phaladātāramakhilam |sureśaṃ vidyeśaṃ jalanidhisutākāntahṛdayaṃmahādevaṃ vande praṇatajanatāpopaśamanam || 7||

वसानं वैयाघ्रीं मृदुलललितां कृत्तिमजरांवृषारूढं सृष्ट्यादिषु कमलजाद्यात्मवपुषम् ।अतर्क्यं निर्मायं तदपि फलदं भक्तसुखदंमहादेवं वन्दे प्रणतजनतापोपशमनम् ॥ ८॥

vasānaṃ vaiyāghrīṃ mṛdulalalitāṃ kṛttimajarāṃvṛṣārūḍhaṃ sṛṣṭyādiṣu kamalajādyātmavapuṣam |atarkyaṃ nirmāyaṃ tadapi phaladaṃ bhaktasukhadaṃmahādevaṃ vande praṇatajanatāpopaśamanam || 8||

इदं स्तोत्रं शम्भोर्दुरितदलनं धान्यधनदंहृदि ध्यात्वा शम्भुं तदनु रघुनाथेन रचितम् ।नरः सायम्प्रातः पठति नियतं तस्य विपदःक्षयं यान्ति स्वर्गं व्रजति सहसा सोऽपि मुदितः ॥ ९॥

idaṃ stotraṃ śambhorduritadalanaṃ dhānyadhanadaṃhṛdi dhyātvā śambhuṃ tadanu raghunāthena racitam |naraḥ sāyamprātaḥ paṭhati niyataṃ tasya vipadaḥkṣayaṃ yānti svargaṃ vrajati sahasā so'pi muditaḥ || 9||

इति पण्डितरघुनाथशर्मणा विरचितं श्रीमहादेवाष्टकं समाप्तम् ।

iti paṇḍitaraghunāthaśarmaṇā viracitaṃ śrīmahādevāṣṭakaṃ samāptam |