महेश्वरस्तुतिः गायत्रीकृता Gayatrikrita Maheshvara Stuti

नमो नमस्तेऽस्तु महेश तुभ्यं नमो नमस्ते वृषभध्वजाय ।नमो नमस्ते गिरिजाधवाय विद्यास्वरूपाय नमो नमस्ते ॥ १॥

namo namaste'stu maheśa tubhyaṃ namo namaste vṛṣabhadhvajāya |namo namaste girijādhavāya vidyāsvarūpāya namo namaste || 1||

नमो नमस्ते परमात्मने नमः स्वर्गापवर्गप्रद भर्ग शम्भो ।भवत्पदाम्भोजविलोकनेन सुखाम्बुधिर्मय्यनुवृत्तिमाप ॥ २॥

namo namaste paramātmane namaḥ svargāpavargaprada bharga śambho |bhavatpadāmbhojavilokanena sukhāmbudhirmayyanuvṛttimāpa || 2||

आपत्कुलं नष्टमनन्तमीश त्वत्पादपद्यार्पितचित्तवृत्तेः ।शुभास्पदत्वं समवाप्य शम्भो प्रसन्नचित्तोऽपि भवेन्नरोऽपि ॥ ३॥

āpatkulaṃ naṣṭamanantamīśa tvatpādapadyārpitacittavṛtteḥ |śubhāspadatvaṃ samavāpya śambho prasannacitto'pi bhavennaro'pi || 3||

अणोरणीयान् महतो महीयान् आत्मा गुहायां निहितोऽस्य जन्तोः ।तमक्रतुः पश्यति वीतशोको धातुः प्रसादान्महिमानमीशम् ॥ ४॥

aṇoraṇīyān mahato mahīyān ātmā guhāyāṃ nihito'sya jantoḥ |tamakratuḥ paśyati vītaśoko dhātuḥ prasādānmahimānamīśam || 4||

उमासहायं परमेश्वरं प्रभुं त्रिलोचनं नीलकण्ठं प्रशान्तम् ।ध्यात्वा मुनिर्गच्छति भूतयोनिं समस्तसाक्षिं तमसः परस्तात् ॥ ५॥

umāsahāyaṃ parameśvaraṃ prabhuṃ trilocanaṃ nīlakaṇṭhaṃ praśāntam |dhyātvā munirgacchati bhūtayoniṃ samastasākṣiṃ tamasaḥ parastāt || 5||

अव्यक्तरूपं परमात्मतत्त्वं न वेद वेदान्तपरिश्रमेऽपि ।ज्ञेयं परन्त्वीश्वरपादपद्मं प्रसाद विज्ञेयमिति प्रमा मे ॥ ६॥

avyaktarūpaṃ paramātmatattvaṃ na veda vedāntapariśrame'pi |jñeyaṃ parantvīśvarapādapadmaṃ prasāda vijñeyamiti pramā me || 6||

न यत्स्वरूपं तव वेददृष्टं न दृष्टमीशानसुरैरपीदम् ।मया परं भाग्यवशेन दृष्टं भाग्यस्य को वा भगवन्नियन्ता ॥ ७॥

na yatsvarūpaṃ tava vedadṛṣṭaṃ na dṛṣṭamīśānasurairapīdam |mayā paraṃ bhāgyavaśena dṛṣṭaṃ bhāgyasya ko vā bhagavanniyantā || 7||

यत्पादपद्मस्मरणप्रवृत्ताः कृतान्तवार्तामतिदुःसहां ताम् ।विहाय चानन्दजलाब्धिमग्नाः संसारतापैर्न च पीडिताः स्युः ॥ ८॥

yatpādapadmasmaraṇapravṛttāḥ kṛtāntavārtāmatiduḥsahāṃ tām |vihāya cānandajalābdhimagnāḥ saṃsāratāpairna ca pīḍitāḥ syuḥ || 8||

महेश्वर श्रीचरणारविन्दं निधाय चित्ताम्बुजकर्णिकायाम् ।आनन्दधारावृतसच्छरीरां सुराः प्रपश्यन्ति नरा न धीराः ॥ ९॥

maheśvara śrīcaraṇāravindaṃ nidhāya cittāmbujakarṇikāyām |ānandadhārāvṛtasaccharīrāṃ surāḥ prapaśyanti narā na dhīrāḥ || 9||

यदि क्षणं वा शिवपादपद्मं हृत्पद्मसंविष्टमतिप्रकृष्टम् ।प्रकृष्ट एवातिनिकृष्टजन्माप्युत्कृष्टजन्मा स तु किं पुनः स्यात् ॥ १०॥

yadi kṣaṇaṃ vā śivapādapadmaṃ hṛtpadmasaṃviṣṭamatiprakṛṣṭam |prakṛṣṭa evātinikṛṣṭajanmāpyutkṛṣṭajanmā sa tu kiṃ punaḥ syāt || 10||

स्वर्गापवर्गप्रदमीश्वरं त्वां भजन्ति धन्याः परमन्तरायैः ।विना विमुक्ताघपरम्परास्ते समस्तलोकेषु किलास्तिकास्ते ॥ ११॥

svargāpavargapradamīśvaraṃ tvāṃ bhajanti dhanyāḥ paramantarāyaiḥ |vinā vimuktāghaparamparāste samastalokeṣu kilāstikāste || 11||

अनन्तकल्याणपरम्परासु तिष्ठन्ति ते शङ्करपूजकास्ते ।नान्यत् प्रपश्यन्ति कदापि धीराः धीरास्त एवेति विचारिताश्च ॥ १२॥

anantakalyāṇaparamparāsu tiṣṭhanti te śaṅkarapūjakāste |nānyat prapaśyanti kadāpi dhīrāḥ dhīrāsta eveti vicāritāśca || 12||

माय प्रसादोऽपि कृतस्त्वयाऽयं त्वत्पादसन्दर्शनदानरूपः ।आनन्दकन्दोऽयमनुक्षणं मे सूते महानन्दनिधानमीश ॥ १३॥

māya prasādo'pi kṛtastvayā'yaṃ tvatpādasandarśanadānarūpaḥ |ānandakando'yamanukṣaṇaṃ me sūte mahānandanidhānamīśa || 13||

कारुण्यपूर्णाम्बुधिमीश्वर त्वां स्मृत्वाऽपि सन्तोषमहाब्धिपूर्णाः ।दृष्ट्वा भवन्तं भगवन्तमीश को वा न तृप्तः तरसा सुखेन ॥ १४॥

kāruṇyapūrṇāmbudhimīśvara tvāṃ smṛtvā'pi santoṣamahābdhipūrṇāḥ |dṛṣṭvā bhavantaṃ bhagavantamīśa ko vā na tṛptaḥ tarasā sukhena || 14||

अनुक्षणं तस्य शुभानि शम्भो सुखानि सम्पज्जलराशयोऽपि ।यस्यानपाया त्वयि भक्तिरीश सा तावदत्यन्तसुदुर्लभा न ॥ १५॥

anukṣaṇaṃ tasya śubhāni śambho sukhāni sampajjalarāśayo'pi |yasyānapāyā tvayi bhaktirīśa sā tāvadatyantasudurlabhā na || 15||

येनाप्रमादेन कृतोऽस्ति धर्मो महेश पादार्चनरूप एव ।तस्यैव तद्भक्तिशुभप्रवाहः न दुर्लभं किं नु सतामधीश ॥ १६॥

yenāpramādena kṛto'sti dharmo maheśa pādārcanarūpa eva |tasyaiva tadbhaktiśubhapravāhaḥ na durlabhaṃ kiṃ nu satāmadhīśa || 16||

शम्भो यथा भर्गपदप्रवेशो मन्त्रे मदीयेऽपि तथा प्रसादः ।भवत्वयं मे भगवन् वरोऽस्य वरत्वमित्येव मतिर्ममास्तु ॥ १७॥

śambho yathā bhargapadapraveśo mantre madīye'pi tathā prasādaḥ |bhavatvayaṃ me bhagavan varo'sya varatvamityeva matirmamāstu || 17||

॥ इति शिवरहस्यान्तर्गते गायत्रीकृता महेश्वरस्तुतिः सम्पूर्णा ॥॥ श्रीशिवरहस्यम् । हराख्यः तृतीयांशः । पूर्वार्धम् । अध्यायः २। ५७७३ ॥

|| iti śivarahasyāntargate gāyatrīkṛtā maheśvarastutiḥ sampūrṇā |||| śrīśivarahasyam | harākhyaḥ tṛtīyāṃśaḥ | pūrvārdham | adhyāyaḥ 2| 5773 ||

– ॥ श्रीशिवरहस्यम् ।हराख्यः तृतीयांशः ।पूर्वार्धम् ।अध्यायः २। ५७-७३ ॥

– || śrīśivarahasyam |harākhyaḥ tṛtīyāṃśaḥ |pūrvārdham |adhyāyaḥ 2| 57-73 ||