शिवस्तोत्रम् (गौतमकृतं २ स्कन्दपुराणान्तर्गतम् अस्तौषमादिमं लिङ्गमरुणाद्रिमयं महत्) Gautamakritam 2 Shiva Stotram

अस्तौषमादिमं लिङ्गमरुणाद्रिमयं महत् ॥ ९॥

astauṣamādimaṃ liṅgamaruṇādrimayaṃ mahat || 9||

आद्येन ब्रह्मणा पूर्वमर्चितं दिव्यचक्षुषा ।असौ यस्ताम्रो अरुण उत बभ्रुः सुमङ्गलः ॥ १०॥

ādyena brahmaṇā pūrvamarcitaṃ divyacakṣuṣā |asau yastāmro aruṇa uta babhruḥ sumaṅgalaḥ || 10||

इति वेदा स्तुवन्ति त्वामरुणाद्रीश सन्ततम् ।नमस्ताम्राय चारुणाय शिवाय परमात्मने ॥ ११॥

iti vedā stuvanti tvāmaruṇādrīśa santatam |namastāmrāya cāruṇāya śivāya paramātmane || 11||

सर्ववेदस्वरूपाय नित्यायामृतमूर्त्तये ।कालाय करुणार्द्राय दृष्टिपेयामृताब्धये ॥ १२॥

sarvavedasvarūpāya nityāyāmṛtamūrttaye |kālāya karuṇārdrāya dṛṣṭipeyāmṛtābdhaye || 12||

भक्तवात्सल्यपूर्णाय पुण्याय पुरभेदिने ।दर्शनं तव देवेश सर्वधर्मफलप्रदम् ॥ १३॥

bhaktavātsalyapūrṇāya puṇyāya purabhedine |darśanaṃ tava deveśa sarvadharmaphalapradam || 13||

भुवि लब्धवता भूयो नान्यत्कार्यं तपः क्वचित् ।भवता कर्मभूरेषा वर्ततेऽद्य निरोधिता ॥ १४॥

bhuvi labdhavatā bhūyo nānyatkāryaṃ tapaḥ kvacit |bhavatā karmabhūreṣā vartate'dya nirodhitā || 14||

प्रार्थयन्ते स्वयं वासान्देवाश्चात्र त्वदाश्रये ।कालसङ्ग्रहसञ्जातं फलं लब्धं मयाधुना ॥ १५॥

prārthayante svayaṃ vāsāndevāścātra tvadāśraye |kālasaṅgrahasañjātaṃ phalaṃ labdhaṃ mayādhunā || 15||

अन्यत्कृतं तपः सर्वं त्वद्दर्शनफलं मम ।ईदृशं तव देवेश रूपमत्यद्भुतोदयम् ॥ १६॥

anyatkṛtaṃ tapaḥ sarvaṃ tvaddarśanaphalaṃ mama |īdṛśaṃ tava deveśa rūpamatyadbhutodayam || 16||

एकमद्रिमयं लिङ्गं न क्वचिद्दृष्टवान्भुवि ।सूर्येन्द्वग्निसुसंयुक्तकोणत्रयमनोहरम् ॥ १७॥

ekamadrimayaṃ liṅgaṃ na kvaciddṛṣṭavānbhuvi |sūryendvagnisusaṃyuktakoṇatrayamanoharam || 17||

त्रिमूर्तिरूप देवेश दृश्यते ते वपुर्महत् ।शक्तित्रयस्वरूपेण कालत्रयविधानकम् ॥ १८॥

trimūrtirūpa deveśa dṛśyate te vapurmahat |śaktitrayasvarūpeṇa kālatrayavidhānakam || 18||

त्रिवेदात्मं त्रिकोणाङ्गं लिङ्गं ते दृष्टमद्भुतम् ।त्रैलोक्यरक्षणार्थाय विततं रूपमास्थितः ॥ १९॥

trivedātmaṃ trikoṇāṅgaṃ liṅgaṃ te dṛṣṭamadbhutam |trailokyarakṣaṇārthāya vitataṃ rūpamāsthitaḥ || 19||

दृश्यते वसुधाभागे शोणाद्रिरिति विश्रुतः ।अजानतां च मर्त्यानां समालोकनमात्रतः ॥ २०॥

dṛśyate vasudhābhāge śoṇādririti viśrutaḥ |ajānatāṃ ca martyānāṃ samālokanamātrataḥ || 20||

वितरत्यखिलान्भोगानव्याजकरुणानिधिः ।अर्चया रहितं लिङ्गमन्यं शून्यमुदाहृतम् ॥ २१॥

vitaratyakhilānbhogānavyājakaruṇānidhiḥ |arcayā rahitaṃ liṅgamanyaṃ śūnyamudāhṛtam || 21||

इदं तु पूजितं देवैः सदा सर्ववरप्रदम् ।प्रसीद करुणापूर्ण शोणाचलमहेश्वर ॥ २२॥

idaṃ tu pūjitaṃ devaiḥ sadā sarvavarapradam |prasīda karuṇāpūrṇa śoṇācalamaheśvara || 22||

त्रायस्व भवभीतं मां प्रपन्नं भक्तवत्सल ।द्रष्टव्यं द्रष्टमेतत्ते रूपमत्यद्भुतं महत् ॥ २३॥

trāyasva bhavabhītaṃ māṃ prapannaṃ bhaktavatsala |draṣṭavyaṃ draṣṭametatte rūpamatyadbhutaṃ mahat || 23||

कृतार्थय कृपासिन्धो शरण्य शरणागतम् ॥इति श्रीस्कन्दपुराणे माहेश्वरखण्डे, अरुणाचलमाहात्म्ये, पूर्वार्धे,अष्टमाध्यायान्तर्गतं गौतमकृतं शिवस्तोत्रं समाप्तम् ।स्कन्दपुराण । माहेश्वरखण्ड । अरुणाखण्ड । पूर्वखण्ड । अध्याय ८/९-२३॥स्कन्दपुराण । माहेश्वरखण्ड । अरुणाखण्ड । पूर्वखण्ड । अध्याय ८/९-२३॥

kṛtārthaya kṛpāsindho śaraṇya śaraṇāgatam ||iti śrīskandapurāṇe māheśvarakhaṇḍe, aruṇācalamāhātmye, pūrvārdhe,aṣṭamādhyāyāntargataṃ gautamakṛtaṃ śivastotraṃ samāptam |skandapurāṇa | māheśvarakhaṇḍa | aruṇākhaṇḍa | pūrvakhaṇḍa | adhyāya 8/9-23||skandapurāṇa | māheśvarakhaṇḍa | aruṇākhaṇḍa | pūrvakhaṇḍa | adhyāya 8/9-23||