बिल्ववृक्षमहिम्नवर्णनम् Bilvavriksha Mahimnavarnanam

महादेवस्वरूपोऽयं बिल्वो वेदैरपि स्तुतः ।यथाकथञ्चिदेतस्य महिमा ज्ञायते कथम् ॥ १॥

mahādevasvarūpo'yaṃ bilvo vedairapi stutaḥ |yathākathañcidetasya mahimā jñāyate katham || 1||

वनमेतत् पावनं च बिल्वेनानेन केवलम् ।एतद्वातानुषङ्गेन लिङ्गमङ्गं प्रजायते ॥ २॥

vanametat pāvanaṃ ca bilvenānena kevalam |etadvātānuṣaṅgena liṅgamaṅgaṃ prajāyate || 2||

पुण्यतीर्थानि यावन्ति लोकेषु प्रथितान्यपि ।तानि सर्वाणि तीर्थानि बिल्वमूले वसन्ति हि ॥ ३॥

puṇyatīrthāni yāvanti lokeṣu prathitānyapi |tāni sarvāṇi tīrthāni bilvamūle vasanti hi || 3||

बिल्वमूलजलैर्यस्तु मूर्धानमभिषिञ्चति ।स सर्वतीर्थस्नातः स्यात् स एव भुवि पावनः ॥ ४॥

bilvamūlajalairyastu mūrdhānamabhiṣiñcati |sa sarvatīrthasnātaḥ syāt sa eva bhuvi pāvanaḥ || 4||

बिल्वमूले महादेवं लिङ्गरूपिणमव्ययम् ।यः पूजयति पुण्यात्मा स शिवं प्राप्नुयात् ध्रुवम् ॥ ५॥

bilvamūle mahādevaṃ liṅgarūpiṇamavyayam |yaḥ pūjayati puṇyātmā sa śivaṃ prāpnuyāt dhruvam || 5||

बिल्वमूळे प्रजप्तास्तु मन्त्राः सिद्धिमुपागताः ।तन्मन्त्रमहिमा तावत् ज्ञायते शङ्करेण हि ॥ ६॥

bilvamūḷe prajaptāstu mantrāḥ siddhimupāgatāḥ |tanmantramahimā tāvat jñāyate śaṅkareṇa hi || 6||

शक्तिहीनोऽपि यो मन्त्रो बिल्वमूलेषु जप्यते ।स सिद्धः सकलं दद्यात् यदि माहेश्वरप्रियः ॥ ७॥

śaktihīno'pi yo mantro bilvamūleṣu japyate |sa siddhaḥ sakalaṃ dadyāt yadi māheśvarapriyaḥ || 7||

बिल्वरूपं समासाद्य शिव एवं स्वयं प्रभुः ।लोकानामुपकराय वनेऽस्मिन्नधितिष्ठति ॥ ८॥

bilvarūpaṃ samāsādya śiva evaṃ svayaṃ prabhuḥ |lokānāmupakarāya vane'sminnadhitiṣṭhati || 8||

एतस बिल्वमूलस्याप्यालवालमनुत्तमम् ।जलाकुलं महादेवो दृष्ट्वा तुष्टो भविष्यति ॥ ९॥

etasa bilvamūlasyāpyālavālamanuttamam |jalākulaṃ mahādevo dṛṣṭvā tuṣṭo bhaviṣyati || 9||

गन्धपुष्पादिभिः सर्वैरुपचारैः प्रयत्नतः ।यो बिल्वं पूजयेद्भक्त्या सन्ततिस्तस्य वर्धते ॥ १०॥

gandhapuṣpādibhiḥ sarvairupacāraiḥ prayatnataḥ |yo bilvaṃ pūjayedbhaktyā santatistasya vardhate || 10||

दीपमालां बिल्वमूले यः कल्पयति सादरम् ।स तत्त्वज्ञानसम्पन्नो महेशान्तर्गतो भवेत् ॥ ११॥

dīpamālāṃ bilvamūle yaḥ kalpayati sādaram |sa tattvajñānasampanno maheśāntargato bhavet || 11||

प्रदक्षिणनमस्कारान् बिल्वमूले प्रयत्नतः ।ते पापपर्वतानां नाशकाः स्युर्त संशयः ॥ १२॥

pradakṣiṇanamaskārān bilvamūle prayatnataḥ |te pāpaparvatānāṃ nāśakāḥ syurta saṃśayaḥ || 12||

नमस्कार्यत्वबुद्।ह्ध्या यः प्रणतो दण्डवद्भुवि ।तस्मात् पतन्ति पापानि नोत्तिष्ठन्ति कदाचन ॥ १३॥

namaskāryatvabud|hdhyā yaḥ praṇato daṇḍavadbhuvi |tasmāt patanti pāpāni nottiṣṭhanti kadācana || 13||

बिल्वशाखां समादाय हस्तेन नवपल्लवम् ।गृहीत्वा पूजयेद्बिल्वं तेन पापैः प्रमुच्यते ॥ १४॥

bilvaśākhāṃ samādāya hastena navapallavam |gṛhītvā pūjayedbilvaṃ tena pāpaiḥ pramucyate || 14||

बिल्वमूले शिवरतं भोजयेद्यस्तु भक्तितः ।एकं वा कोटिगुणितं तस्य पुण्यं प्रजायते ॥ १५॥

bilvamūle śivarataṃ bhojayedyastu bhaktitaḥ |ekaṃ vā koṭiguṇitaṃ tasya puṇyaṃ prajāyate || 15||

बिल्वमूले क्षीरयुक्तमन्नमाज्येन संयुतम् ।यो दद्याच्छिवभक्ताय स दरिद्रो न जायते ॥ १६॥

bilvamūle kṣīrayuktamannamājyena saṃyutam |yo dadyācchivabhaktāya sa daridro na jāyate || 16||

॥ इति शिवरहस्यान्तर्गते बिल्ववृक्षमहिम्नवर्णनं सम्पूर्णम् ॥॥ श्रीशिवरहस्यम् । हराख्यः तृतीयांशः । पूर्वार्धम् । अध्यायः २२। ५९७४ ॥

|| iti śivarahasyāntargate bilvavṛkṣamahimnavarṇanaṃ sampūrṇam |||| śrīśivarahasyam | harākhyaḥ tṛtīyāṃśaḥ | pūrvārdham | adhyāyaḥ 22| 5974 ||

– ॥ श्रीशिवरहस्यम् ।हराख्यः तृतीयांशः ।पूर्वार्धम् ।अध्यायः २२। ५९-७४ ॥

– || śrīśivarahasyam |harākhyaḥ tṛtīyāṃśaḥ |pūrvārdham |adhyāyaḥ 22| 59-74 ||