अनादिकल्पेश्वरस्तोत्रम् Anadikalpeshvarastotram

श्रीगणेशाय नमः ॥कर्पूरगौरो भुजगेन्द्रहारो गङ्गाधरो लोकहितावहः सः ।सर्वेश्वरो देववरोऽप्यघोरो योऽनादिकल्पेश्वर एव सोऽसौ ॥ १॥

śrīgaṇeśāya namaḥ ||karpūragauro bhujagendrahāro gaṅgādharo lokahitāvahaḥ saḥ |sarveśvaro devavaro'pyaghoro yo'nādikalpeśvara eva so'sau || 1||

कैलासवासी गिरिजाविलासी श्मशानवासी सुमनोनिवासी ।काशीनिवासी विजयप्रकाशी योऽनादिकल्पेश्वर एव सोऽसौ ॥ २॥

kailāsavāsī girijāvilāsī śmaśānavāsī sumanonivāsī |kāśīnivāsī vijayaprakāśī yo'nādikalpeśvara eva so'sau || 2||

त्रिशूलधारी भवदुःखहारी कन्दर्पवैरी रजनीशधारी ।कपर्दधारी भजकानुसारी योऽनादिकल्पेश्वर एव सोऽसौ ॥ ३॥

triśūladhārī bhavaduḥkhahārī kandarpavairī rajanīśadhārī |kapardadhārī bhajakānusārī yo'nādikalpeśvara eva so'sau || 3||

लोकाधिनाथः प्रमथाधिनाथः कैवल्यनाथः श्रुतिशास्त्रनाथः ।विद्यार्थनाथः पुरुषार्थनाथो योऽनादिकल्पेश्वर एव सोऽसौ ॥ ४॥

lokādhināthaḥ pramathādhināthaḥ kaivalyanāthaḥ śrutiśāstranāthaḥ |vidyārthanāthaḥ puruṣārthanātho yo'nādikalpeśvara eva so'sau || 4||

लिङ्गं परिच्छेत्तुमधोगतस्य नारायणश्चोपरि लोकनाथः ।बभूवतुस्तावपि नो समर्थौ योऽनादिकल्पेश्वर एव सोऽसौ ॥ ५॥

liṅgaṃ paricchettumadhogatasya nārāyaṇaścopari lokanāthaḥ |babhūvatustāvapi no samarthau yo'nādikalpeśvara eva so'sau || 5||

यं रावणस्ताण्डवकौशलेन गीतेन चातोषयदस्य सोऽत्र ।कृपाकटाक्षेण समृद्धिमाप योऽनादिकल्पेश्वर एव सोऽसौ ॥ ६॥

yaṃ rāvaṇastāṇḍavakauśalena gītena cātoṣayadasya so'tra |kṛpākaṭākṣeṇa samṛddhimāpa yo'nādikalpeśvara eva so'sau || 6||

सकृच्च बाणोऽवनमय्य शीर्षं यस्याग्रतः सोऽप्यलभत्समृद्धिम् ।देवेन्द्रसम्पत्त्यधिकां गरिष्ठां योऽनादिकल्पेश्वर एव सोऽसौ ॥ ७॥

sakṛcca bāṇo'vanamayya śīrṣaṃ yasyāgrataḥ so'pyalabhatsamṛddhim |devendrasampattyadhikāṃ gariṣṭhāṃ yo'nādikalpeśvara eva so'sau || 7||

गुणान्विमातुं न समर्थ एष वेषश्च जीवोऽपि विकुण्ठितोऽस्य ।श्रुतिश्च नूनं चकितं बभाषे योऽनादिकल्पेश्वर एव सोऽसौ ॥ ८॥

guṇānvimātuṃ na samartha eṣa veṣaśca jīvo'pi vikuṇṭhito'sya |śrutiśca nūnaṃ cakitaṃ babhāṣe yo'nādikalpeśvara eva so'sau || 8||

अनादिकल्पेश उमेश एतत्स्तवाष्टकं यः पठति त्रिकालम् ।स धौतपापोऽखिललोकवन्द्यं शैवं पदं यास्यति भक्तिमांश्चेत् ॥ ९॥

anādikalpeśa umeśa etatstavāṣṭakaṃ yaḥ paṭhati trikālam |sa dhautapāpo'khilalokavandyaṃ śaivaṃ padaṃ yāsyati bhaktimāṃścet || 9||

इति श्रीवासुदेवानन्दसरस्वतीकृतं अनादिकल्पेश्वरस्तोत्रं सम्पूर्णम् ।

iti śrīvāsudevānandasarasvatīkṛtaṃ anādikalpeśvarastotraṃ sampūrṇam |