सरस्वतीस्तोत्रम् ३ Shri Sarasvati Stotram

कुन्दालिद्युतिमन्दहाससुमुखी राकेन्दुबिम्बाननामल्लीतल्लजमालतीसुमनसां सौभाग्यपाटच्चरी ।फुल्लेन्दीवर वृन्दष ट्पदतमःसन्दोहसन्देहकृद्वेणीका विधिसुन्दरी मम भवेदानन्दसन्दोहिनी ॥ १॥

kundālidyutimandahāsasumukhī rākendubimbānanāmallītallajamālatīsumanasāṃ saubhāgyapāṭaccarī |phullendīvara vṛndaṣa ṭpadatamaḥsandohasandehakṛdveṇīkā vidhisundarī mama bhavedānandasandohinī || 1||

यत्पादाम्बुजसेवयैव ससुरो लोकः समर्त्यासुरोवागौन्नत्यमगाहत श्रुतिवचोवीथीषु या गीयते ।या श्वेताम्बुजमध्यवासरसिका या नम्ररक्षामणिःधातुः कापि कुटुम्बिनी वितरतात् सा निर्वृतिं नोऽतुलाम् ॥ २॥

yatpādāmbujasevayaiva sasuro lokaḥ samartyāsurovāgaunnatyamagāhata śrutivacovīthīṣu yā gīyate |yā śvetāmbujamadhyavāsarasikā yā namrarakṣāmaṇiḥdhātuḥ kāpi kuṭumbinī vitaratāt sā nirvṛtiṃ no'tulām || 2||

कस्तूरीघनसारगन्धलहरीसंवासितोरःस्थलासंवीता स्फुटकाशपुष्पसदृशक्षौमांशुकेनानिशम् ।पुस्तं हस्तचतुष्टये जपवटीं शस्तां शुकीं वल्लकींबिभ्राणा गृहिणी विधातुरवतान्नः सेवया तोषिता ॥ ३॥

kastūrīghanasāragandhalaharīsaṃvāsitoraḥsthalāsaṃvītā sphuṭakāśapuṣpasadṛśakṣaumāṃśukenāniśam |pustaṃ hastacatuṣṭaye japavaṭīṃ śastāṃ śukīṃ vallakīṃbibhrāṇā gṛhiṇī vidhāturavatānnaḥ sevayā toṣitā || 3||

शुभ्रं दभ्रवलग्नमभ्रतनु तेऽदभ्रप्रमोदप्रदंविभ्रान्ते भ्रमदन्धपरय सततं तैस्तैर्निजैर्विभ्रमैः ।शब्दब्रह्ममये जगत्यनितरापेक्षाधिकारक्रियंकिञ्चित्कुञ्चितकेशमद्य जयति स्रष्टुर्भुविष्ठं महः ॥ ४॥

śubhraṃ dabhravalagnamabhratanu te'dabhrapramodapradaṃvibhrānte bhramadandhaparaya satataṃ taistairnijairvibhramaiḥ |śabdabrahmamaye jagatyanitarāpekṣādhikārakriyaṃkiñcitkuñcitakeśamadya jayati sraṣṭurbhuviṣṭhaṃ mahaḥ || 4||

इति श्रीसरस्वतीस्तोत्रं सम्पूर्णम् ।

iti śrīsarasvatīstotraṃ sampūrṇam |