सरस्वतीस्तोत्रम् (अगस्त्यमुनिप्रोक्तम्) Shri Sarasvati Stotram (Agastyamuni Proktam)

श्रीगणेशाय नमः ।या कुन्देन्दुतुषारहारधवला या शुभ्रवस्त्रावृताया वीणावरदण्डमण्डितकरा या श्वेतपद्मासना ।या ब्रह्माच्युतशङ्करप्रभृतिभिर्देवैस्सदा पूजिता (वन्दिता)सा मां पातु सरस्वती भगवती निश्शेषजाड्यापहा ॥ १॥

śrīgaṇeśāya namaḥ |yā kundendutuṣārahāradhavalā yā śubhravastrāvṛtāyā vīṇāvaradaṇḍamaṇḍitakarā yā śvetapadmāsanā |yā brahmācyutaśaṅkaraprabhṛtibhirdevaissadā pūjitā (vanditā)sā māṃ pātu sarasvatī bhagavatī niśśeṣajāḍyāpahā || 1||

दोर्भिर्युक्ता चतुर्भिः स्फटिकमणिनिभैरक्षमालान्दधानाहस्तेनैकेन पद्मं सितमपिच शुकं पुस्तकं चापरेण ।भासा कुन्देन्दुशङ्खस्फटिकमणिनिभा भासमानाऽसमानासा मे वाग्देवतेयं निवसतु वदने सर्वदा सुप्रसन्ना ॥ २॥

dorbhiryuktā caturbhiḥ sphaṭikamaṇinibhairakṣamālāndadhānāhastenaikena padmaṃ sitamapica śukaṃ pustakaṃ cāpareṇa |bhāsā kundenduśaṅkhasphaṭikamaṇinibhā bhāsamānā'samānāsā me vāgdevateyaṃ nivasatu vadane sarvadā suprasannā || 2||

सुरासुरासेवितपादपङ्कजा करे विराजत्कमनीयपुस्तका ।विरिञ्चिपत्नी कमलासनस्थिता सरस्वती नृत्यतु वाचि मे सदा ॥ ३॥

surāsurāsevitapādapaṅkajā kare virājatkamanīyapustakā |viriñcipatnī kamalāsanasthitā sarasvatī nṛtyatu vāci me sadā || 3||

सरस्वती सरसिजकेसरप्रभा तपस्विनी सितकमलासनप्रिया ।घनस्तनी कमलविलोललोचना मनस्विनी भवतु वरप्रसादिनी ॥ ४॥

sarasvatī sarasijakesaraprabhā tapasvinī sitakamalāsanapriyā |ghanastanī kamalavilolalocanā manasvinī bhavatu varaprasādinī || 4||

सरस्वति नमस्तुभ्यं वरदे कामरूपिणि ।विद्यारम्भं करिष्यामि सिद्धिर्भवतु मे सदा ॥ ५॥

sarasvati namastubhyaṃ varade kāmarūpiṇi |vidyārambhaṃ kariṣyāmi siddhirbhavatu me sadā || 5||

सरस्वति नमस्तुभ्यं सर्वदेवि नमो नमः ।शान्तरूपे शशिधरे सर्वयोगे नमो नमः ॥ ६॥

sarasvati namastubhyaṃ sarvadevi namo namaḥ |śāntarūpe śaśidhare sarvayoge namo namaḥ || 6||

नित्यानन्दे निराधारे निष्कलायै नमो नमः ।विद्याधरे विशालाक्षि शुद्धज्ञाने नमो नमः ॥ ७॥

nityānande nirādhāre niṣkalāyai namo namaḥ |vidyādhare viśālākṣi śuddhajñāne namo namaḥ || 7||

शुद्धस्फटिकरूपायै सूक्ष्मरूपे नमो नमः ।शब्दब्रह्मि चतुर्हस्ते सर्वसिद्।ह्ध्यै नमो नमः ॥ ८॥

śuddhasphaṭikarūpāyai sūkṣmarūpe namo namaḥ |śabdabrahmi caturhaste sarvasid|hdhyai namo namaḥ || 8||

मुक्तालङ्कृतसर्वाङ्ग्यै मूलाधारे नमो नमः ।मूलमन्त्रस्वरूपायै मूलशक्त्यै नमो नमः ॥ ९॥

muktālaṅkṛtasarvāṅgyai mūlādhāre namo namaḥ |mūlamantrasvarūpāyai mūlaśaktyai namo namaḥ || 9||

मनोमयि महायोगे वागीश्वरि नमो नमः ।वाण्यै वरदहस्तायै वरदायै नमो नमः ॥ १०॥

manomayi mahāyoge vāgīśvari namo namaḥ |vāṇyai varadahastāyai varadāyai namo namaḥ || 10||

वेद्यायै वेदरूपायै वेदान्तायै नमो नमः ।गुणदोषविवर्जिन्यै गुणदीप्त्यै नमो नमः ॥ ११॥

vedyāyai vedarūpāyai vedāntāyai namo namaḥ |guṇadoṣavivarjinyai guṇadīptyai namo namaḥ || 11||

सर्वज्ञाने सदानन्दे सर्वरूपे नमो नमः ।सम्पन्नायै कुमार्यै च सर्वज्ञायै नमो नमः ॥ १२॥

sarvajñāne sadānande sarvarūpe namo namaḥ |sampannāyai kumāryai ca sarvajñāyai namo namaḥ || 12||

योगरूपे रमादेव्यै योगानन्दे नमो नमः ।दिव्यज्ञायै त्रिनेत्रायै दिव्यमूर्त्यै नमो नमः ॥ १३॥

yogarūpe ramādevyai yogānande namo namaḥ |divyajñāyai trinetrāyai divyamūrtyai namo namaḥ || 13||

अर्धचन्द्रजटाधारि चन्द्रबिम्बे नमो नमः । (अर्धचन्द्रधरे देविचन्द्ररूपे)चन्द्रादित्यजटाधारि चन्द्रबिम्बे नमो नमः ॥ १४॥ (चन्द्रादित्यसमे देवि चन्द्रभूषे)

ardhacandrajaṭādhāri candrabimbe namo namaḥ | (ardhacandradhare devicandrarūpe)candrādityajaṭādhāri candrabimbe namo namaḥ || 14|| (candrādityasame devi candrabhūṣe)

अणुरूपे महारूपे विश्वरूपे नमो नमः ।अणिमाद्यष्टसिद्धायै आनन्दायै नमो नमः ॥ १५॥

aṇurūpe mahārūpe viśvarūpe namo namaḥ |aṇimādyaṣṭasiddhāyai ānandāyai namo namaḥ || 15||

ज्ञानविज्ञानरूपायै ज्ञानमूर्ते नमो नमः ।नानाशास्त्रस्वरूपायै नानारूपे नमो नमः ॥ १६॥

jñānavijñānarūpāyai jñānamūrte namo namaḥ |nānāśāstrasvarūpāyai nānārūpe namo namaḥ || 16||

पद्मदे पद्मवंशे च पद्मरूपे नमो नमः ।परमेष्ठ्यै परामूर्त्यै नमस्ते पापनाशिनी ॥ १७॥

padmade padmavaṃśe ca padmarūpe namo namaḥ |parameṣṭhyai parāmūrtyai namaste pāpanāśinī || 17||

महादेव्यै महाकाल्यै महालक्ष्म्यै नमो नमः ।ब्रह्मविष्णुशिवाख्यायै ब्रह्मनार्यै नमो नमः ॥ १८॥

mahādevyai mahākālyai mahālakṣmyai namo namaḥ |brahmaviṣṇuśivākhyāyai brahmanāryai namo namaḥ || 18||

कमलाकरपुष्पा च कामरूपे नमो नमः । (कमलाकरगेहायै)कपालि कर्मदीप्तायै कर्मदायै नमो नमः ॥ १९॥ (कपालिप्राणनाथायै)

kamalākarapuṣpā ca kāmarūpe namo namaḥ | (kamalākaragehāyai)kapāli karmadīptāyai karmadāyai namo namaḥ || 19|| (kapāliprāṇanāthāyai)

सायं प्रातः पठेन्नित्यं षाण्मासात्सिद्धिरुच्यते ।चोरव्याघ्रभयं नास्ति पठतां शृण्वतामपि ॥ २०॥

sāyaṃ prātaḥ paṭhennityaṃ ṣāṇmāsātsiddhirucyate |coravyāghrabhayaṃ nāsti paṭhatāṃ śṛṇvatāmapi || 20||

इत्थं सरस्वतीस्तोत्रमगस्त्यमुनिवाचकम् ।सर्वसिद्धिकरं नॄणां सर्वपापप्रणाशनम् ॥ २१॥

itthaṃ sarasvatīstotramagastyamunivācakam |sarvasiddhikaraṃ nṝṇāṃ sarvapāpapraṇāśanam || 21||

॥ इत्यगस्त्यमुनिप्रोक्तं सरस्वतीस्तोत्रं सम्पूर्णम् ॥

|| ityagastyamuniproktaṃ sarasvatīstotraṃ sampūrṇam ||