सरस्वत्यष्टकम् २ Shri Sarasvati Ashtakam

अमला विश्ववन्द्या सा कमलाकरमालिनी ।विमलाभ्रनिभा वोऽव्यात्कमला या सरस्वती ॥ १॥

amalā viśvavandyā sā kamalākaramālinī |vimalābhranibhā vo'vyātkamalā yā sarasvatī || 1||

वार्णसंस्थाङ्गरूपा या स्वर्णरत्नविभूषिता ।निर्णया भारति श्वेतवर्णा वोऽव्यात्सरस्वती ॥ २॥

vārṇasaṃsthāṅgarūpā yā svarṇaratnavibhūṣitā |nirṇayā bhārati śvetavarṇā vo'vyātsarasvatī || 2||

वरदाभयरुद्राक्षवरपुस्तकधारिणी ।सरसा सा सरोजस्था सारा वोऽव्यात्सरास्वती ॥ ३॥

varadābhayarudrākṣavarapustakadhāriṇī |sarasā sā sarojasthā sārā vo'vyātsarāsvatī || 3||

सुन्दरी सुमुखी पद्ममन्दिरा मधुरा च सा ।कुन्दभासा सदा वोऽव्याद्वन्दिता या सरस्वती ॥ ४॥

sundarī sumukhī padmamandirā madhurā ca sā |kundabhāsā sadā vo'vyādvanditā yā sarasvatī || 4||

रुद्राक्षलिपिता कुम्भमुद्राधृतकराम्बुजा ।भद्रार्थदायिनी साव्याद्भद्राब्जाक्षी सरस्वती ॥ ५॥

rudrākṣalipitā kumbhamudrādhṛtakarāmbujā |bhadrārthadāyinī sāvyādbhadrābjākṣī sarasvatī || 5||

रक्तकौशेयरत्नाढ्या व्यक्तभाषणभूषणा ।भक्तहृत्पद्मसंस्था सा शक्ता वोऽव्यात्सरस्वती ॥ ६॥

raktakauśeyaratnāḍhyā vyaktabhāṣaṇabhūṣaṇā |bhaktahṛtpadmasaṃsthā sā śaktā vo'vyātsarasvatī || 6||

चतुर्मुखस्य जाया या चतुर्वेदस्वरूपिणी ।चतुर्भुजा च सा वोऽव्याच्चतुर्वर्गा सरस्वती ॥ ७॥

caturmukhasya jāyā yā caturvedasvarūpiṇī |caturbhujā ca sā vo'vyāccaturvargā sarasvatī || 7||

सर्वलोकप्रपूज्या या पर्वचन्द्रनिभानना ।सर्वजिह्वाग्रसंस्था सा सदा वोऽव्यात्सरस्वती ॥ ८॥

sarvalokaprapūjyā yā parvacandranibhānanā |sarvajihvāgrasaṃsthā sā sadā vo'vyātsarasvatī || 8||

सरस्वत्यष्टकं नित्यं सकृत्प्रातर्जपेन्नरः।अज्ञैर्विमुच्यते सोऽयं प्राज्ञैरिष्टश्च लभ्यते ॥ ९॥

sarasvatyaṣṭakaṃ nityaṃ sakṛtprātarjapennaraḥ|ajñairvimucyate so'yaṃ prājñairiṣṭaśca labhyate || 9||

इति श्रीसरस्वत्यष्टकं समाप्तम् ।

iti śrīsarasvatyaṣṭakaṃ samāptam |