सरस्वत्यष्टकम् १ Sarasvati Ashtakam

श्रीगणेशाय नमः ।शतानीक उवाच ।महामते महाप्राज्ञ सर्वशास्त्रविशारद ।अक्षीणकर्मबन्धस्तु पुरुषो द्विजसत्तम ॥ १॥

śrīgaṇeśāya namaḥ |śatānīka uvāca |mahāmate mahāprājña sarvaśāstraviśārada |akṣīṇakarmabandhastu puruṣo dvijasattama || 1||

मरणे यज्जपेज्जाप्यं यं च भावमनुस्मरन् ।परं पदमवाप्नोति तन्मे ब्रूहि महामुने ॥ २॥

maraṇe yajjapejjāpyaṃ yaṃ ca bhāvamanusmaran |paraṃ padamavāpnoti tanme brūhi mahāmune || 2||

शौनक उवाच ।इदमेव महाराज पृष्टवांस्ते पितामहः ।भीष्मं धर्मविदां पृष्ठेदं धर्मपुत्रो युधिष्ठिरः ॥ ३॥

śaunaka uvāca |idameva mahārāja pṛṣṭavāṃste pitāmahaḥ |bhīṣmaṃ dharmavidāṃ pṛṣṭhedaṃ dharmaputro yudhiṣṭhiraḥ || 3||

युधिष्ठिर उवाच ।पितामह महाप्राज्ञ सर्वशास्त्रविशारद ।बृहस्पतिस्तुता देवी वागीशाय महात्मने ।आत्मानं दर्शयामास सूर्य कोटिसमप्रभम् ॥ ४॥

yudhiṣṭhira uvāca |pitāmaha mahāprājña sarvaśāstraviśārada |bṛhaspatistutā devī vāgīśāya mahātmane |ātmānaṃ darśayāmāsa sūrya koṭisamaprabham || 4||

सरस्वत्युवाच ।वरं वृणीष्व भद्रं ते यत्ते मनसि वर्तते ।बृहस्पतिरुवाच ।यदि मे वरदा देवि दिव्यज्ञानं प्रयच्छ मे ॥ ५॥

sarasvatyuvāca |varaṃ vṛṇīṣva bhadraṃ te yatte manasi vartate |bṛhaspatiruvāca |yadi me varadā devi divyajñānaṃ prayaccha me || 5||

देव्युवाच ।हन्त ते निर्मलं ज्ञानं कुमतिध्वंसकारकम् ।स्तोत्रेणानेन ये भक्त्या मां स्तुवन्ति मनीषिणः ॥ ६॥

devyuvāca |hanta te nirmalaṃ jñānaṃ kumatidhvaṃsakārakam |stotreṇānena ye bhaktyā māṃ stuvanti manīṣiṇaḥ || 6||

बृहस्पतिरुवाच ।लभते परमं ज्ञानं यत्सुरैरपि दुर्लभम् ।प्राप्नोति पुरुषो नित्यं महामायाप्रसादतः ॥ ७॥

bṛhaspatiruvāca |labhate paramaṃ jñānaṃ yatsurairapi durlabham |prāpnoti puruṣo nityaṃ mahāmāyāprasādataḥ || 7||

सरस्वत्युवाच ।त्रिसन्ध्यं प्रयतो नित्यं पठेदष्टकमुत्तमम् ।तस्य कण्ठे सदा वासं करिष्यामि न संशयः ॥ ८॥

sarasvatyuvāca |trisandhyaṃ prayato nityaṃ paṭhedaṣṭakamuttamam |tasya kaṇṭhe sadā vāsaṃ kariṣyāmi na saṃśayaḥ || 8||

इति श्रीपद्मपुराणे दिव्यज्ञानप्रदायकं सरस्वत्यष्टकस्तोत्रं सम्पूर्णम् ॥

iti śrīpadmapurāṇe divyajñānapradāyakaṃ sarasvatyaṣṭakastotraṃ sampūrṇam ||